KAPU 38

Sambu na Nki Beto Fwete Zola Yezu

YINDULA nde nge kele na kati ya maswa mosi ya ke na kudinda. Keti nge tazola nde muntu kugulusa nge?— Keti nge tasepela kana muntu mosi kupesa luzingu na yandi sambu na kugulusa nge?— Yezu Kristu kusalaka mutindu yina. Mutindu beto longukaka na Kapu 37, yandi pesaka luzingu na yandi bonso nkudulu sambu na kugulusa beto.

Ya kyeleka, Yezu kegulusa beto ve na kudinda. Kansi yandi kegulusa beto na inki? Keti nge keyibuka?— Yezu kegulusa beto na masumu mpi na lufwa ya beto yonso kubakaka na Adami. Ata bantu mingi mesalaka mambu ya mbi mpenza, Yezu kufwaka mpi sambu na bo. Keti nge tandima na kutula luzingu na nge na kigonsa sambu na kugulusa bantu ya mutindu yina?—

Biblia ketuba nde: “Yo kele mpasi mingi muntu na kundima na kufwa sambu na muntu yina ke salaka mambu yina ya Nzambi ke zolaka. Ziku muntu lenda vanda na kikesa na kufwa sambu na muntu ya mbote.” Kansi Biblia ketendula nde Yezu ‘kufwaka sambu na bantu ya mbi.’ Bantu yina kesadilaka nkutu ve Nzambi kele na kati ya bantu yango! Biblia ketuba dyaka nde: “Kristo fwaka sambu na beto ntangu beto vandaka kaka bantu ya masumu [kusala kaka mambu ya mbi].”—Roma 5:6-8.

Keti nge le yibuka ntumwa mosi yina vandaka kusala ntete mambu ya mbi mpenza?— Ntumwa yango kusonikaka nde: “Yesu Kristo kwisaka na nsi-ntoto sambu na kugulusa bantu ya masumu. Ebuna mono, mono me luta bo yonso na kusala masumu.” Ntumwa yina kutubaka mpidina kuvandaka Polo. Yandi tubaka nde yandi vandaka ‘ntete zoba’ mpi nde yandi vandaka kusala ntangu yonso mambu ya “nku.”—1 Timoteo 1:15; Tito 3:3.

Yindula zola ya mingi yina Nzambi kuvandaka na yo yina kupusaka yandi na kutinda Mwana na yandi na kufwa sambu na bantu ya mutindu yai! Baka Biblia na nge mpi beto tanga mambu yai na Yoane kapu ya 3, verse ya 16. Beto ketanga kuna nde: “Nzambi me lutaka kuzola bantu yonso; yo  yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.”

Yezu kumonisaka nde yandi vandaka kuzola beto kaka bonso Tata na yandi kezolaka beto. Ziku nge keyibuka nde na Kapu 30 ya mukanda yai, beto tangaka bampasi yina Yezu kumonaka na mpimpa yina ya bo kangaka yandi. Bo nataka yandi na nzo ya Mfumu ya Banganga-Nzambi, Kaifa, kisika bo vandaka kusambisa Yandi. Bo vandaka kukotisa bambangi ya luvunu sambu bo kusila Yezu makambu, mpi bantu vandaka kubula yandi makofi. Piere kubuyaka nde yandi mezabaka ve Yezu na ntangu mambu yai vandaka kusalama. Ntangu yai, beto yindula nde beto kele pana mpi beto kemona mambu yankaka yina ke na kusalama.

Ntongo metana. Yezu melala ve mpimpa ya mvimba. Sambu kusambisa ya bo sambisaka yandi na mpimpa kuwakanaka ve ti nsiku ya leta, banganga-Nzambi yonso mebingisa nswalu-nswalu kimvuka yonso ya Sanedreni, to tribinale ya kuluta nene ya Bayuda, mpi bo kesambisa yandi dyaka. Na tribinale yai mpi, bo fundaka dyaka Yezu nde yandi vandaka kusala mambu ya nku kontre Nzambi.

Na nima, banganga-Nzambi mekanga Yezu, mpi bo menata yandi na Pilate, guvernere ya Roma. Bo mesonga Pilate nde: ‘Yezu ke kontre guvernema. Yandi fwete fwa.’ Kansi Pilate mebakisa nde banganga-Nzambi ke na kuta luvunu. Ebuna Pilate metubila bo nde: ‘Mu kemona ve dyambu mosi ya mbi ya muntu yai mesala. Mu tabikisa yandi.’ Kansi banganga-Nzambi ti bantu yankaka ketuba na ndinga ya ngolo nde: ‘Ve! Fwa yandi!’

Na nima, Pilate memeka dyaka na kutubila bantu nde yandi tabikisa Yezu. Kansi, banganga-Nzambi kepusa kibuka ya bantu na kutuba na ndinga ya ngolo nde: ‘Kana nge bikisa yandi, nge mpi kele kontre guvernema! Fwa yandi!’ Bantu mekuma kutula makelele mingi mpenza. Keti nge kezaba nki Pilate mesala?—

Yandi melemba. Ntete yandi metuba nde bo bula Yezu bafimbu. Na nima, yandi mepesa yandi na basoda sambu bo fwa yandi. Bo melwatisa Yezu mpu ya bansende, mpi bo keseka yandi na kufukamaka na ntwala na yandi. Na nima, bo mepesa Yezu nti mosi ya nene sambu yandi nata yo, mpi  bo mebasisa yandi na nganda ya bwala na kisika yina bo vandaka kubinga Kisika ya Mukwa ya Ntu. Ntangu bo mekuma kuna, bo mebula bansonso na maboko mpi na makulu ya Yezu sambu na kukangisa yandi na nti. Na nima, bo metedimisa nti na zulu sambu Yezu kuvanda ya kutelama na nti yango. Menga kebasika yandi. Yandi kewa mpasi mingi mpenza.

Yezu mefwa ve na mbala mosi. Yandi kele kaka ya kutelama na zulu ya nti. Bamfumu ya banganga-Nzambi keseka yandi. Ebuna bantu yina keluta ketuba nde: “Gulusa moyo na nge kana nge kele Mwana-Nzambi! Katuka na [nti ya mpasi, NW], kwisa kutuluka!” Kansi Yezu mezaba mambu ya Tata na yandi kutindaka yandi na kusala. Yandi mezaba nde yandi fwete pesa luzingu na yandi ya kukuka sambu beto kuzwa okazio ya kubaka luzingu ya mvula na mvula.  Nsukansuka, na kiteso ya ngunga ya tatu na nima ya midi, Yezu mebinga Tata na yandi na ndinga ya ngolo mpi yandi mefwa.—Matayo 26:36–27:50; Marko 15:1; Luka 22:39–23:46; Yoane 18:1–19:30.

Yezu kuvandaka mpenza ya kuswaswana ti Adami! Adami kusongaka ve zola sambu na Nzambi. Yandi kolamaka na Nzambi. Adami kuzolaka beto mpi ve. Sambu yandi salaka masumu, beto yonso mebutukaka mpi bantu ya masumu. Kansi Yezu kumonisaka zola na Nzambi mpi na beto. Yandi vandaka kulemfukila Nzambi ntangu yonso. Mpi yandi pesaka luzingu na yandi sambu na kukatula beto na mpasi yina Adami kunatilaka beto.

Keti nge kemonisaka ntonda na dyambu yai ya kitoko ya Yezu kusalaka?— Na ntangu nge kesalaka kisambu na Nzambi, keti nge kepesaka yandi mersi na mutindu yandi pesaka beto Mwana na yandi?— Ntumwa Polo kusongaka ntonda na mambu yina Kristu kusalaka sambu na yandi. Polo kusonikaka nde Mwana ya Nzambi ‘kuzolaka mono mpi yandi me fwaka sambu na mono.’ (Galatia 2:20) Yezu kufwaka mpi sambu na nge ti mono. Yandi pesaka luzingu na yandi ya kukuka sambu beto baka luzingu ya mvula na mvula! Ntembe kele ve nde, yai kele kikuma mosi ya ngolo ya fwete pusa beto na kuzola yandi.

Ntumwa Polo kusonikilaka Bakristu ya Korinto nde: “Kuzola yina ya Kristo ke zolaka beto yo [kepusaka beto na bisalu, NW].” Zola ya Kristu fwete pusa beto na kusala bisalu ya nki mutindu? Nge keyindula inki?— Tala mvutu ya Polo: ‘Kristu mefwaka sambu na bantu yonso, sambu bo kuzinga dyaka ve sambu na bo mosi, kansi sambu na Yandi.’—2 Korinto 5:14, 15.

 Keti nge le yindula mambu yina nge le sala sambu na kumonisa nde nge kezinga sambu na kusepedisa Kristu?— Mosi na kati ya mambu ya nge le sala kele kuzabisa bankaka mambu na yandi ya nge melongukaka. To yindula fyoti dyambu yai: Nge lenda vanda nge mosi, ebuna mama to tata na nge to muntu yankaka kemona ve mambu ya nge ke na kusala. Keti nge tatala baprograme ya televizio to kusala mambu yankaka ya nge kezaba nde yo tasepedisa ve Yezu?— Kuvila ve nde, ntangu yai, Yezu kele na luzingu mpi yandi kemonaka mambu yonso ya beto kesalaka!

Kikuma yankaka ya fwete pusa beto na kuzola Yezu kele nde beto kezola kulanda mbandu ya Yehowa. Yezu kutubaka nde: “Tata ke zolaka mono.” Keti nge mezaba sambu na nki yandi kezolaka Yezu mpi sambu na nki beto mpi fwete zola Yezu?— Sambu Yezu kundimaka na kufwa sambu luzolo ya Nzambi kusalama. (Yoane 10:17) Yo yina, beto fwete sala mambu yai ya Biblia kesonga beto nde: “Beno kele bana yina ya Nzambi ke zolaka; yo yina beno fweti meka na kusala bonso yandi. Beno fweti zolana na luzingu na beno yonso, mutindu Kristo zolaka beto; yandi pesaka moyo na yandi sambu na beto.”—Efezo 5:1, 2.

Sambu ntonda na beto sambu na Yezu mpi sambu na mambu yina ya yandi mesadilaka beto kukuma mingi, beto tanga Yoane 3:35; 15:9, 10; mpi 1 Yoane 5:11, 12.

[Bifwanisu ya kele na lutiti 199]

Inki bampasi Yezu kumonaka ntangu yandi pesaka luzingu na yandi sambu na beto?

[Kifwanisu ya kele na lutiti 200]

Inki beto le sala sambu na kusonga nde beto kezolaka Yezu?

[Kifwanisu ya kele na lutiti 201]

Nani le mona mambu yonso ya beto kesalaka?