TAKORLOORIARUK umiatsiami kivilersumiillutit. Nuannaassagaluarpit annaanneqaruit? — Qularnanngitsumik nuannaassaatit. Taavami annaassiniartup inuunini akigalugu annaappatit? — Tassa taama Jiisusi Kristusi iliorpoq. Soorlu kapitali 37-mi ilinniarit inuunini pilliutigaa annaakkumalluta.

Soorunami ipilersugut annaatinngilaatigut. Sumilliuna annaakkaatigut? Eqqaamaviuk? — Ajortimit toqumillu tamatta Adamimit kingornussatsinnit annaappaatigut. Inuit ilaat ajortuliungaarsimapput, taakkuli aamma pillugit Jiisusi toquvoq. Illit toqutaarusussavit inuit taamaattut annaanniarlugit? —

Biibilimi ima allassimavoq: ‘Ilimananngilaq inummik inoqatini pillugit toqujumasoqarnissaa, iluartuugaluarpalluunniit. Immaqa ajunngitsoq pillugu toqujumasoqarsinnaavoq.’ Biibilimili allassimavoq Jiisusi ‘iluaatsut pillugit toqusoq’ aamma Guutimut kiffartunngitsulluunniit! Biibilimi nangilluni ima allassimavoq: ‘Ajortiliugallartilluta [suli eqqunngitsuliortilluta] Kristusi pilluta toquvoq.’ — Romamiut 5:6-8.

Eqqaamaviuk apustilit ilaat eqqunngilluinnartumik iliortoq? — Apustili taanna ima allappoq: “Kristusi-Jiisusimi silarsuarmut tikiussimavoq ajortillit annaatissallugit, uangalu taakkunannga ajorteqarnersaavunga.” Apustili taama allattoq tassaavoq Paulusi. Qanga ‘sianiitsuusimagaluarluni’ aammalu ‘inuusimalluni ajortuulluni’, nammineq taama oqarpoq. — 1 Timotheusi 1:15; Titusi 3:3.

Eqqarsaatigeriaruk Guutip qanoq asannissimatiginera ernituamimi inuunera inuit taamaattut pillugit pilliutigimmagu! Biibili  qaqeriartigu iivangkiiliulu Johannesip allagaani, kapitali 3, versi 16-imi tamanna pillugu atuarluta. Ima allassimavoq: “[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.”

Jiisusip takutippaa Ataatamisut asatigaluta. Immaqa eqqaamasinnaavat unnuaq taanna Jiisusi tigusaagami qanoq ilaatigut iliorfigineqartoq. Atuakkami matumani kapitalimi 30-mi atuarparput. Palasiunermut Kajfasimukaanneqarpoq tassanilu eqqartuunneqalerluni. Sallullutik uppernarsaasut ilaasa Jiisusi salluliuutigaat, ilaasalu tilluarpaat. Unnuaq taanna Petrusip Jiisusi miserratigaa. Takorlooriartigu tassaniilluta qanorlu pisoqartoq takusinnaallugu.

Ullaanngulerpoq. Jiisusi unnuaq naallugu sininngilaq. Unnuakkut eqqartuussaanera inatsisinik unioqqutitsineruvoq; taamaattumik palasit tuaviorlutik Killisiuisoqatigiit qaaqquaat. Tassa juutit eqqartuussisoqatigiivisa pingaarnersaat. Tassani Jiisusi unnerluutigeqqippaat Guutip inatsisaanik unioqqutitsisutut.

Palasillu Jiisusi qilersortippaat, angummullu Romamiut sinnerlugit nunami aqutsisumukaallugu; taanna Pilatusimik ateqarpoq. Pilatusi ima oqarfigaat: ‘Jiisusi naalagaaffimmut akerlilersuisuuvoq. Toqutaassaaq.’ Pilatusilli malugaa palasit sallusut. Ima oqarfigai: ‘Takusinnaanngilara angut una eqqunngitsuliorsimasoq. Iperartinniarpara.’ Palasit allallu suaartarput: ‘Naamik! Toqussiuk!’

Kingorna Pilatusip inuit oqarfigeqqippai Jiisusi iperangaatinniarlugu. Palasilli inuppassuit suaartartippaat: ‘Iperagaatikkukku illit nammineq naalagaaffimmut akerlilersuisuuvutit! Toqussiuk!’ Inuppassuit nipittoraluttuinnarlutik suaartarput. Pilatusi qanoq iliussanerpa? —

Nakkaannarpoq. Siullermik Jiisusi iperartortippaa. Taava Jiisusi sakkutuunut tunniuppaa toqunniassammassuk. Kapinartulinnillu perlaasamik niaqorusiorpaat pallorfigisaqattaarlugulu kunngiusutut niaqoruserneqartutut illaruaatigalugu. Taava Jiisusi qisussuarmik  nammakkersippaat ingerlallugulu illoqarfiup avataanut Niaqornamik taasamut. Tassani Jiisusi assaatigut isigaatigullu kikiassuarnik qisummut kikiattorpaat. Taava qisuk napparpaat, taamaalilluni Jiisusi tassani nivingalerpoq. Aanaarpoq, anniartorujussuuvorlu.

Jiisusi ingerlaannaq toqunngilaq. Nappakkami nivingatillugu palasiunerit mitaatigaat. Inuillu saneqquttut ima oqarput: ‘Guutip ernerippatit nappakkamit aqqaannarsinnaassaatit!’ Jiisusilli nalunngilaa suna pillugu Ataatami aallartikkaani. Nalunngilaa inuunini naammalluinnartoq pilliutigisariaqarlugu naassaanngitsumik inuunissamut periarfissaqaqqulluta. Ualikkut pingasut missaanni Jiisusi Ataataminut torlulaatigaluni toquvoq. — Matthæusi  26:36–27:50; Markusi 15:1; Lukasi 22:39–23:46; Johannesi 18:1–19:30.

Ilumummi Jiisusi Adamimit allaaneruvoq! Adami Guutimut asannissuseqanngilaq. Naalanngilaa. Adami uagutsinnuttaaq asannissuseqanngilaq. Ajortuliornera pissutigalugu tamatta ajorteqarluta inunngorpugut. Jiisusilli Guutimut uagutsinnullu asannissuseqarnini takutippaa. Guuti naalattuaannarpaa. Inuuninilu pilliutigaa Adamip ajortuliai tamaasa iluarsiniarlugit.

Takusinnaaviuk Jiisusip uagut pilluta iliuuserisaa qanoq nuannertigisoq? — Jehovamut qinugaangavit ernini uagutsinnut tunniussimammagu qujasarpit? — Apustili Paulusi Jiisusip imminut iliuuserisaa pillugu qujamasuppoq. Ima allappoq: ‘Guutip ernera uannik asannippoq uangalu pillunga imminut tunniulluni.’ (Galatiamiut 2:20) Aamma Jiisusi illit uangalu pilluta toquvoq. Inuunini naammalluinnartoq pilliutigaa naassaanngitsumik inuusinnaaniassagatta! Tamanna pissutissaalluarpoq Jiisusi asanissaanut, ilaa? —

Apustilip Paulusip kristumiut illoqarfimmi Korinthimiittut ima allaffigai: ‘Kristusip asanninnerata iliuuseqarnissatsinnut kajumissisippaatigut.’ Kristusip asanninnerata sumik iliuuseqarusulersippaatigut? Qanoq isumaqarpit? — Malugeriaruk Paulusi qanoq akinersoq: “Kristusi inuit tamaasa pillugit toquvoq pilluni inuuleqqullugit. Namminneq piumasaminnik iliornissaq pillugu inuussanngillat.” — 2 Korinthimiut 5:14, 15, New Life Version.

 Illit Jiisusip kissaatigisaa malillugu inuullutit qanoq takutissinnaaviuk? — Assersuutigalugu inuit allat ilinniarsimasannik oqaluttuusinnaavatit. Aamma manna eqqarsaatigisinnaavat: Imaasinnaavoq kisivit angerlarsimagavit ataatavit, anaanavit allalluunniit qanoq iliornerit takusinnaanngikkaat. Taava fjernsynimi internettimiluunniit isiginnaassavit nalunngikkaluarlugu Jiisusip iluarinngisaanik isiginnaarlutit? — Eqqaamajuk Jiisusi uumavoq, qanorlu iliornerit takusinnaavaa.

Suli allamik Jiisusip asanissaanut pissutissaqarpugut. Tassa Jehova ilaarusukkatsigu. Jiisusi ima oqarpoq: “Ataatap asavaanga.” Nalunngiliuk sooq Jehovap Jiisusi asagaa, aamma sooq uagut taamaaliussasugut? — Tassa Jiisusip inuunini pilliutigiumammagu Guutip piumasaa pisinnaaqqullugu. (Johannesi 10:17) Biibilimi ima allassimasutut iliorta: “Guuti maligassarisiuk taassumunnga qitornaasutut asasaasutut, inuugitsilu asaqatigiillusi soorlu Kristusip asagaatigut uagullu pilluta imminut tunniulluni.” — Efesosimiut 5:1, 2.