Kauhanyo 38

Libaka Ha Lu Lukela Ku Lata Jesu

U NGE kuli u mwa mukolo o sweli ku tiba. Kana n’o ka bata kuli mutu yo muñwi a ku pilise?— Ku cwañi mutu yo muñwi ha n’a ka itombola bupilo bwa hae kuli a eze cwalo?— Ki mona mwa n’a ezelize Jesu Kreste cwalo. Sina ha lu itutile mwa Kauhanyo 37, n’a itombozi bupilo bwa hae ilikuli lu kone ku piliswa.

Ki niti kuli Jesu h’a lu pilisi kwa ku mina mikope. U lu pilisa kwañi? Kana wa hupula?— Ki kwa sibi ni lifu ze ne lu hozize ku Adama. Nihaike batu ba bañwi ba ezize lika ze maswe hahulu, Jesu n’a ba shwezi ni bona. Kana n’o ka itombola bupilo bwa hao kuli u like ku pilisa batu ba ba cwalo?—

Bibele i li: “Ka tata mutu n’a ka shwela ya lukile. Mwendi yo muñwi a ka suhana a tiisa pilu ku shwela yo munde.” Niteñi, Bibele i talusa kuli Jesu n’a ‘shwile bakeñisa baezalibi.’ F’o ki ku kopanyeleza ni batu ba ba sa sebelezi Mulimu! Bibele i zwelapili ku bulela kuli: “Lu sa li baezalibi [inze lu eza ze maswe] Kreste u shwile bakeñisa luna.”—Maroma 5:6-8.

Kana wa hupula muapositola yo muñwi ya n’a kile a eza lika ze maswe hahulu?— Muapositola y’o n’a ñozi kuli: ‘Jesu Kreste u tile mwa lifasi ku pilisa baezalibi. Ku bona ki na wa kwapili.’ Muapositola ya n’a bulezi cwalo n’e li Paulusi. N’a ize ‘sapili n’a na ni bukuba’ ni kuli n’a pila “ka lunya.”—1 Timotea 1:15; Tite 3:3.

Nahana fela butuna bwa lilato la n’a na ni lona Mulimu ha n’a lumile Mwan’a hae ku t’o shwela batu ba ba cwalo! Ha ku nge Bibele ya hao mi u bale ka za seo kwa Joani kauhanyo 3, timana 16.  Kwateñi i li: “Mulimu u latile lifasi hahulu [fo kikuli, batu ba ba pila fa lifasi], mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.”

Jesu n’a bonisize kuli ni yena u lu lata hahulu ku likana ni mw’a lu latela Ndat’ahe. Mwendi u ka hupula kuli mwa Kauhanyo 30 ya buka ye, ne lu balile za manyando a mañwi a n’a ipumani ku ona Jesu busihu bwa n’a tamilwe. N’a isizwe kwa ndu ya Kayafa, Muprisita yo Muhulu, ili k’o N’a iz’o zekiswa. Ne ku tisizwe lipaki za buhata be ne ba pumile ka za Jesu, mi batu ne ba mu natakile ka liñindi. N’e li ka nako yeo f’o Pitrosi n’a latuzi Jesu. Cwale ha lu nge kuli lu teñi ona m’o mi lwa kona ku bona ze ñwi ze ezahala.

Se ku ba kakusasana. Jesu u se a tonile busihu kaufela. Bakeñisa kuli muzeko wa busihu n’o si ka eziwa ka swanelo, baprisita kapili-pili ba biza ba Kuta ye Tuna ya Majuda kuli ba kalise muzeko o muñwi. Kwateñi, ba tameleza Jesu kuli u foselize Mulimu.

Baprisita cwale ba laela kuli Jesu a tamiwe, mi ba mu isa ku Pilato, mubusisi wa Muroma. Ba bulelela Pilato kuli: ‘Jesu u lwanisa mulonga. U lukela ku bulaiwa.’ Kono Pilato wa bona kuli baprisita ba bulela buhata. Kacwalo Pilato u ba bulelela kuli: ‘Ha ku na mafosisa e ni fumani ku munna y’o. Ni ka mu lukulula.’ Kono baprisita ni ba bañwi ba huweleza kuli: ‘Kutokwa! U mu bulaye!’

Hasamulaho, Pilato hape u lika ku bulelela batu kuli u ka lukulula Jesu. Kono baprisita ba kukueza sikwata sa batu ku huwa kuli: ‘Ha u ka mu lukulula, kanti he ni wena u lwanisa mulonga! U mu bulaye!’ Batu bao ba kalisa ku eza lilata le lituna. Kana wa ziba s’a eza Pilato?—

Wa latelela ze ba bulela. Pili, u laela kuli Jesu a shapiwe. Ku tuha f’o, u mu fa kwa masole kuli ba mu bulaye. Ba nga kuwani ya miutwa, ba i apesa kwa toho ya Jesu, mi ba mu kubamela  ka mashendekela. Cwale ba fa Jesu kota ye tuna kuli a i shimbe, mi ba mu isa kwande a muleneñi kwa sibaka se si bizwa Katendele. Teñi, ba kokotela mazoho ni mahutu a Jesu fa kota yeo. Cwale ba yemisa kota yeo ilikuli Jesu a nyendaele ku yona. U zwa mali. Butuku bw’a utwa ki bo butuna hahulu.

Jesu h’a shwi honaf’o. U nyendaela fela honacwalo fa kota. Baprisita ba bahulu ba mu shendaka. Mi bafitanzila ba li: “Haiba ki wena Mwan’a Mulimu, u tuluke fa [kota ya linyando, NW]!” Kono Jesu wa ziba seo Ndat’ahe a mu lumile ku t’o eza. Wa ziba kuli wa swanela ku itombola bupilo bwa hae bo bu petehile ilikuli lu be ni tohonolo ya ku ba ni bupilo bo bu sa feli. Kwa mafelelezo, ibat’o  ba ka nako ya 3 manzibwana ao, Jesu u huweleza ku Ndat’ahe mi wa shwa.—Mateu 26:36–27:50; Mareka 15:1; Luka 22:39–23:46; Joani 18:1–19:30.

Jesu n’a fapana hahulu ni Adama! Adama n’a si ka bonisa kuli wa lata Mulimu. N’a si ka utwa Mulimu. Mi Adama hape n’a si ka bonisa kuli wa lu lata. Kakuli n’a ezize sibi, kaufel’a luna lu pepilwe mwa sibi. Kono Jesu n’a bonisize kuli wa lata Mulimu hamohocwalo ni luna. Kamita n’a utwanga Mulimu. Mi n’a itombozi bupilo bwa hae ilikuli a felise ze maswe za n’a lu hozisize Adama.

Kana wa itebuha nto ye nde ya n’a ezize Jesu?— Ha u lapelanga ku Mulimu, kana wa itumelanga ku yena bakeñisa ku lu fa Mwan’a hae?— Muapositola Paulusi n’a itebuhile za n’a mu ezelize Kreste. Paulusi n’a ñozi kuli Mwan’a Mulimu ‘n’a ni latile, mi n’a itobohile mwa sibaka sa ka.’ (Magalata 2:20) Hape Jesu n’a shwezi wena ni na. N’a itombozi bupilo bwa hae bo bu petehile ilikuli lu kone ku ba ni bupilo bo bu sa feli! Kaniti leo ki libaka le lituna ha lu lukela ku lata Jesu.

Muapositola Paulusi n’a ñolezi Bakreste ba mwa Korinte kuli: “Lilato la Kreste la lu susueza ku nga muhato.” Lilato la Kreste li lukela ku lu susueza ku nga muhato mañi? Wena u liñi?— Bona mwa n’a alabezi Paulusi. N’a ize: ‘Kreste n’a shwezi bote ilikuli ba pilele Yena.  Ha ba swaneli ku pila kuli ba itabise.’—2 Makorinte 5:14, 15, toloko ya New Life Version.

Kana wa kona ku nahana linzila ze u kona ku bonisa ka zona kuli u pila ka ku bata ku tabisa Kreste?— Nzila ye ñwi ki ka ku bulelela ba bañwi ze u itutile ka za hae. Kamba nahana ka za se: Mwendi u inzi u nosi, mi bom’aho kamba bondat’aho ha ba boni z’o eza, mi ha ku na mutu ufi kamba ufi ya ku bona. Kana n’o ka buha mafilimu fa TV kamba ku buha maswaniso mwa libuka ao u ziba kuli h’a tabisi Jesu?— U si libali kuli Jesu cwale wa pila mi wa kona ku bona ze lu eza kaufela!

Libaka le liñwi ha lu lukela ku lata Jesu kikuli lu bata ku likanyisa Jehova. Jesu n’a ize: ‘Ndate wa ni lata.’ Kana wa ziba libaka Ndate h’a lata Jesu ni libaka ni luna ha lu lukela ku mu lata?— Libaka kikuli Jesu n’a tabela ku shwa ilikuli ku ezwe tato ya Mulimu. (Joani 10:17) Kacwalo, ha lu eze se i lu bulelela Bibele ha i li: “Mu be ba ba likanyisa Mulimu sina bana ba ba latwa; mi mu zamaye mwa lilato, sina Kreste ni yena h’a mi latile, mi a itoboha kabakala luna.”—Maefese 5:1, 2.

Kuli u itebuhe Kreste ni ku itebuha z’a lu ezelize, ha ku bale Joani 3:35; 15:9, 10; ni 1 Joani 5:11, 12.

[Maswaniso a fa likepe 199]

Jesu n’a tezwi ki manyando mañi ha n’a itombozi bupilo bwa hae bakeñisa luna?

[Siswaniso se si fa likepe 200]

Lu kona ku ezañi kuli lu bonise kuli lwa lata Jesu?

[Siswaniso se si fa likepe 201]

Ki mañi ya kona ku bona ze lu eza kaufela?