ISIP mo pan akalugan ka ed sakey a baloto ya onlelereg la. Labay mo kasin walay mangisalba ed sika?— Panon to no walay angisakripisyo na mismon bilay to pian isalba to ka?— Ontan so ginawa nen Jesu-Kristo. Singa naaralan ta la diad Kapitulo 37, inter toy bilay to bilang dondon ta pian nisalba itayo.

Siempre, aliwan diad pakakalener so pangisalbaan nen Jesus ed sikatayo. Nanonotan mo ni no anto so pangisasalbaan to ed sikatayo?— Manlapud kasalanan tan ipapatey ya atawir tayon amin ed si Adan. Anggaman arum a totoo so nanggawa na mauges iran bengatla, inatey si Jesus parad sikara met. Kasin ipeligrom so bilay mo pian salien mon isalba so totoo a singa saratan?—

Ibabaga na Biblia: “Peteg, matalag a wala so ompatey lapu ed sakey a matunong a too, anggaman ontan nayari met a wala so ompangayan ompatey lapu ed maong a too.” Ingen, ipapaliwawa na Biblia a si Jesus so inatey parad ‘maramsak a totoo.’ Satan so mangisakop ed totoo ya ag-anggan manlilingkor ed Dios! Ibabaga ni na Biblia: “Ta anta, makasalanan itayo ni [siansian makakagawa na mauges iran bengatla], si Kristo inatey lapud sikatayo.”—Roma 5:6-8.

Siopay antam ya apostol a nanggawa na mauges iran bengatla ed apalabas?— Insulat na satan ya apostol: “Si Kristo Jesus linma dia ed mundo pian ilaban to so saray managkasalanan; a dia ed sikara siak so manunaan.” Say apostol ya angibaga ed satan et si Pablo. Inkuanto a sikatoy ‘makulangkulang ya aminsan’ tan sikatoy nambilay ‘ed kaugsan.’—1 Timoteo 1:15; Tito 3:3.

Isipen pa so pirmin panangaro na Dios diad impangibaki to ed Anak to pian ompatey nisengeg ed totoo a singa satan ya apostol! Alam pay  Bibliam tan basaen tay nipaakar ed saya diad Juan kapitulo 3, bersikulo 16. Ibabaga to ditan: “Ontan lay impangaro na Dios ed mundo [salanti, saray totoo a manaayam diad dalin], ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.”

Pinaneknekan nen Jesus a sikatoy walaan met na panangaro ed sikatayo a singa ed si Ama to. Nayarin nanonotan mo a diad Kapitulo 30 na sayan libro, abasa ta so nipaakar ed pigaran bengatla a sinagmak nen Jesus diad samay labi ya impakaerel to. Sikatoy inawit ed ayaman na Atagey a Saserdote a si Caipas, a diman et Sikatoy abista. Saray tilan testigo so inawit diman tan angibaga na katilaan nipaakar ed si Jesus, tan sikatoy pinoniti na saray totoo. Diad saman met ya ag-inamin nen Pedro a kabat toy Jesus. Natan ipasen ta pan wadman ta tan nanenengneng tay arum nin nagagawa.

Asabi lay kabuasan. Agnaugip si Jesus a sanlabi. Lapud aliwan duga so impanbista ed labi, saray saserdote so tampol a nantitipon diad Sanhedrin, odino atagey a korte na saray Judio, tan ginawa da lamet so sananey a bista. Dia et inakusaan da lamet si Jesus na saray krimen sumpad Dios.

Insan impabalor na saray saserdote si Jesus, tan sikatoy inyakar da ed si Pilato, say Romanon gobernador. Inkuan da ed si Pilato: ‘Si Jesus so sumpa ed gobierno. Nepeg a sikatoy pateyen.’ Balet nalilikas nen Pilato a mantitila iray saserdote. Kanian inkuan nen Pilato ed sikara: ‘Anggapoy naromog kon lingo ed sayan too. Sikatoy ibulos ko.’ Balet saray saserdote tan arum so inmeyag: ‘Andi! Patey mo!’

Diad saginonor, sinali lamet nen Pilato ya ibaga ed totoo ya ibulos toy Jesus. Balet sinugsogan na saray saserdote iray karaklan pian ibando day: ‘No sikatoy ibulos mo, sumpa ka met ed gobierno! Patey mo!’ Maingal a maong iray karaklan. Antam no antoy ginawa nen Pilato?—

Sikatoy inmabuloy. Unona et impasiplatan toy Jesus. Insan to inyawat ed saray sundalo pian pateyen da. Sikaray angiyan na korona a sabit  ed ulo nen Jesus tan sikatoy inelek-elekan da a tinmutuek ira ed arap to. Insan da pinasakbatan si Jesus na baleg a poste tan impaarap da ed paway na syudad diad sakey a pasen a say tawag et Lapislapis na Ulo. Diman et impasak da iray lima tan sali nen Jesus ed poste. Insan da impaalagey so poste ya akabitin ditan si Jesus. Sikatoy mandaldala. Man-otot a maong iray sugat to.

Ag-inatey a tampol si Jesus. Sikatoy akabitin ed poste. Sikatoy inelek-elekan na saray pangulon saserdote. Tan inkuan na saray ondadalan: “No anak ka na Dios, epas ka ed panamairapan a kiew!” Balet amta nen Jesus no antoy angibakian nen Ama to a gawaen to. Amta to a nepeg ton iter so ayadyarin bilay to ta pian nawalaan itayo na tsansan makaawat na andi-anggaan  a bilay. Diad kaunoran, ngalngali la alas tres ed ngarem, inmakis si Jesus ed si Ama to insan inatey.—Mateo 26:36–27:50, NW; Marcos 15:1; Lucas 22:39–23:46; Juan 18:1–19:30.

Agaylay pidumaan nen Jesus ed si Adan! Ag-impanengneng nen Adan so aro to ed Dios. Sinumlang toy Dios. Ag-impanengneng nen Adan so aro to ed sikatayo. Lapud sikatoy nankasalanan, amin tayo so nianak a makasalanan. Balet impanengneng nen Jesus so aro to ed Dios tan ed sikatayo. Naynay ton tinulok so Dios. Tan inter toy bilay to pian napaandi to so epekto na ginawa nen Adan ed sikatayo.

Agka kasi misalsalamat ed makapakelkelaw a bengatlan ginawa nen Jesus?— Sano manpikasi ka ed Dios, kasin sikatoy pisasalamatan mo lapud impangiter toy Anak to?— Inapresya nen apostol Pablo so ginawa nen Kristo parad sikato. Insulat nen Pablo a say Anak na Dios “angaro ed siak, tan inter to so inkasikaton dili lapud siak.” (Galacia 2:20) Inatey si Jesus para ed sika tan ed siak met. Inter toy ayadyarin bilay to pian nawalaan itayo na andi-anggaan a bilay! Seguradon satan so mabiskeg a rason no akin ya aroen tayo si Jesus.

Onia so insulat nen apostol Pablo ed saray Kristiano ed syudad na Corinto: “Say aro nen Kristo so mamakiwas ed sikatayo.” Anto so pamakiwasan ed sikatayo na aro nen Kristo? Antoy nikuan mo ey?— Imanoen so ebat nen Pablo: “Si Kristo inatey parad amin ta pian sikaray manbilay parad Sikato. Ag-ira nepeg a manbilay pian paliketen so inkasikara.”—Kien mi iray italiko; 2 Corinto 5:14, 15, New Life Version.

 Wala tay nanonotan mo iran paraan a nipanengneng mon manbibilay ka pian paliketen si Kristo?— Say sakey a paraan et diad pangibaga ed arum no antoy naaralan mo nipaakar ed sikato. Odino isipen pa iya: Nayarin bukbukor mo, kanian agnanenengneng nen nanay odino tatay mo so gagawaen mo, tan anggapo met so arum a makakanengneng ed sika. Kasin manbantay ka na saray programa ed TV odino onnengneng ed saray bengatla diad Internet ya antam ya agmakapaliket ed si Jesus?— Tandaan, si Jesus so mabilay natan, tan nanenengneng ton amin so gagawaen tayo!

Say sananey nin rason no akin a nepeg tayon aroen si Jesus et labay tayon aligen si Jehova. Inkuan nen Jesus, “inaro ak nen Ama.” Antam no akin ya aaroen to si Jesus tan no akin ya aroen tayo met?— Lapud mabulos si Jesus ya ompatey ta pian nagawa so linawa na Dios. (Juan 10:17) Kanian gawaen tayo so ibabaga na Biblia ed sikatayo: “Aligen yo sirin so Dios, singa anak to kayon inararo; tan mankurang kayo ed aro, a singa met impangaro nen Kristo ed sikayo, tan inter to so laman to lapu ed sikatayo.”—Efeso 5:1, 2.