MAYUTA chimpachkaptiki mayu apasuchkaptikiqa, ¿munawaqchu pipas salvaykusunaykita?... ¿Ima niwaqtaq salvasusqaykirayku chay runa wañukuptinqa?... Chaynam 37 kaq yachachikuypi rimamusqanchikman hina Jesucristopas wañukurqa salvawananchikpaq.

Ichaqa, ¿imamantam Jesusqa salvawanchik?... Wañuymantawan huchamantam. Jesusqa wañukurqataqmi mana allinkuna ruwaq runakunaraykupas. ¿Yaqachu qamqa chayna runakunarayku wañuruwaq?...

Bibliapim nin: ‘Sasatamá pipas mana faltayuq runapa rantinpiqa wañurunman, ichapas sumaq sunqu runapa rantinpiqa pipas wañunmanraq’, nispa. Jesusmi ichaqa llapallan runakunapa rantinpi wañukurqa. Arí, ‘huchasaparaq kachkaptinchikmi’ ñuqanchikpa rantinchikpipas wañukurqa (Romanos 5:6-8).

¿Pitaq Jesuspa apostolnin manaraq kachkaspan mana allinkuna ruwaq runa karqa?... Apostol Pablom, paymi nirqa: ‘Cristo Jesusmi hamurqa huchasapakunata salvananpaq, ñuqam huchasapakunamanta aswan huchallikuqqa kani’, nispa. Hinaspapas riqsikurqam ñawpaqkunataqa “mana yuyayniyuq” hinaspa ‘mana allinkuna ruwaq’ kasqanta (1 Timoteo 1:15; Tito 3:3).

Jehova Diosqa ancha kuyawasqanchiktam qawachiwarqanchik churin Jesusta runakunarayku wañukunanpaq kachamuspanqa. Bibliapi qawaykuy Juan 3:16 nisqanta. Chaypim nin: “Diosqa ancha-anchatam runakunata kuyarqa chaymi sapallan  churinta qumurqa haykam paypi iñiqqa mana wañuchisqa kanankupaq, aswanqa wiñay kawsayniyuq kanankupaq”, nispa.

Jesuspas taytan hinam kuyawarqanchik. 30 kaq yachachikuypi rimamusqanchikman hinam paytaqa tutallaraq hapiruspanku sacerdotekunapa jefen Caifasman aparurqaku. Chaypim yanqakunamanta tumpaspanku maqarqaku. Chayna Jesus kachkaptinmi apostol Pedropas Jesus riqsisqanta negakurqa.

Jesusqa tukuy tutam rikchaspallan achikyarurqa. Chay tuta juzgasqanku mana allin kasqanraykum achikyaytaqa sacerdotekunata, escribakunata, autoridadkunata lliwta qayachirqaku yapamanta Jesusta juzganankupaq. Hinaspam kaqlla tumparqaku “Diospa contranpim mana allinkunata rimarun” nispa.

Hinaspankum Jesusta chaqnaruspa Roma nacionmanta gobernador Pilatomanña apaspa nirqaku: ‘Kay runaqa gobiernopa contranpim kachkan. ¡Wañunanmi!’, nispa. Pilatoñataqmi llullakusqankuta yachaspan nirqa: ‘Ñuqaqa manam ima mana allintapas paypiqa tarinichu, kachaykusaqmi’, nispa. Hinaptinmi sacerdotekunawan llapa runa qaparirqaku: ‘¡Ama, wañuchiy!’, nispa.

Chaywanpas Pilatoqa kaqllam Jesustaqa kachaykuyta munarqa. Chay sacerdotekunawan runakunam ichaqa nirqaku: ‘Kay runata kachaykuspaykiqa manam Roma nacionta kamachiqpa amistadninchu kanki, wañuchinaykim’, nispa. Hinaspam aswan-aswanraq qaparirqaku. ¿Imatataq Pilatoqa ruwarqa?...

Munasqankuta ruwaspanmi Pilatoqa Jesusta maqachispan soldadokunata kamachirqa wañuchinankupaq. Chaymi soldadokunaqa kichkamanta ruwasqa coronata churaspanku qunqurakusparaq Jesusmanta asikuqku, hinaspam allin raku qiruta  chukuchirqaku “uma tullu” nispa riqsisqanku urqukama. Chaypim makintapas hinaspa chakintapas clavokunawan chukusqan qirullapi takarurqaku, hinaspam yawarllanpas sutuptin nanaywan qaparichkaqta sayarachirqaku.

Jesusqa manam chayllaqa wañurqachu, unaytaraqmi qirupi warkusqa ñakarillarqa. Chayna ñakarillaptinmi sacerdotekuna asikuqku, chaypi runakunapas niqkum: “Diospa churin kaspaykiqa ñakarichisuqniki qirumantayá uraykamuy”, nispa. Chaynata niptinkupas Jesusqa taytantam kasukurqa, taytanqa kay pachamanqa kachamurqa runakunarayku wañukunanpaqmi. Chaymantam  yaqa kimsa hora tarde lawta taytanta kallpawan qayakuspan wañukurqa (Mateo 26:36–27:50; Marcos 15:1; Lucas 22:39–23:46; Juan 18:1–19:30).

¡Jesusqa manamá Adan hinachu karqa! Adanqa mana kasukusqanwanmi Diosta mana kuyasqanta qawachirqa, runakunatapas mana kuyasqantam qawachirqa huchallikusqanwan, chayraykum huchasapallaña ñuqanchikpas kanchik. Jesusmi ichaqa Jehova Diostawan runakuna kuyasqanta qawachirqa Diosta kasukuspan hinaspa huchanchikrayku wañukuspan.

Mayna sumaqmi ñuqanchikpaq Jesuspa ruwasqanqa ¿aw?... ¿Agradecekunkichu Jehova Diosta churin Jesus kachamusqanmanta?... Apostol Pabloqa agradecekurqam. Chaymi nirqa: ‘Jesusmi kuyawaspan ñuqarayku wañukurqa’, nispa (Galatas 2:20). Jesusqa qamrayku hinaspa ñuqaraykum wañukurqa wiñay kawsayta haypananchikpaq. Chaymi paytaqa kuyananchik.

Apostol Pablom Corinto llaqtapi iñiqkunata nirqa: ‘Jesuspa kuyakuyninmi kallpanchawanchik’, nispa. ¿Imapaqtaq kallpanchawanchik?... Kikin Pablom nirqa: ‘Jesusqa llapallanchikpaqmi wañukurqa hinaspa kawsarimurqa, chaynapi kawsaqkuna manaña kikillanchikpaq kawsaspa wañupuwaqninchik Jesuspaqña kawsananchikpaq’, nispa (2 Corintios 5:14, 15).

 ¿Imaynatataq Jesuspaqña kawsasqaykita qawachiwaq?... Paymanta yachasqaykikunata runakunaman yachachispaykim. Chaymantapas sapallaykipi kaspapas allinkunata ruwaspaykim. Wasikipi mana pipas kaptinqa, ¿allinchu kanman televisionpi utaq internetpi mana allinkunata qawayniki?... Hukkuna mana qawaptinpas Jesusqa ima ruwasqaykitapas qawamuchkanmi.

Jesusqa Jehova Diospa ancha kuyasqanmi. Chaymi Jesusqa huk kutipi nirqa: ‘Hanaq pacha taytayqa kuyawanmi’, nispa. Ichaqa, ¿imanasqataq Jehova Diosqa Jesusta kuyan hinaspa imanasqataq ñuqanchikpas kuyananchik?... Wañunan kaptinpas Diospa munayninta ruwasqanraykum (Juan 10:17). Bibliapim niwanchik: ‘Diostayá qatipakuychik, chaymantapas hinallayá kuyakuq kaychik imaynam Cristopas ñuqanchikta kuyawasqanchikman hina, Cristoqa ñuqanchikraykum vidanta qurqa’, nispa (Efesios 5:1, 2). Chaynaqa Jesusta kuyanapaqqa bibliapa chay niwasqanchiktam kasukunanchik.