TICABANGE usesikebheni lesicwilako. Ungafuna yini kutsi umuntfu akusite?— Kutsiwani nangabe lotsite anikela ngekuphila kwakhe kuze akusindzise?— Nguloko Jesu Khristu lakwenta. Njengobe sifundzile eSehlukweni 37, wanikela ngekuphila kwakhe kwaba yinhlawulo kuze sikhone kusindziswa.

Kuliciniso, Jesu akasisindzisi nasicwila. Usisindzisa kuphi? Usakhumbula yini?— Usisindzisa esonweni nasekufeni lesakutfola nga-Adamu. Ngisho nobe labanye bantfu bente tintfo letimbi kakhulu, Jesu wabafela nabo. Wena bowungakufaka yini kuphila kwakho engotini kuze uzame kusindzisa bantfu labanjalo?—

LiBhayibheli litsi: “Kulukhuni kutsi lotsite afele umuntfu lomsulwa; mhlawumbe lotsite angamfela umuntfu lolungile.” Kepha liBhayibheli liyachaza kutsi Jesu “wafela bantfu labangamesabi Nkulunkulu.” Loko kufaka ekhatsi ngisho nebantfu labangamkhonti nekumkhonta Nkulunkulu. LiBhayibheli lichubeka litsi: “Ngesikhatsi sisetoni [sisenta tintfo letimbi], Khristu wasifela.”​—Roma 5:6-8.

Ukhona yini umphostoli lomkhumbulako loke wenta tintfo letimbi kakhulu?— Loyo mphostoli wabhala watsi: “Jesu weta emhlabeni kutewusindzisa toni. Futsi mine-ke ngingulesihamba embili.” Lomphostoli lowasho lamavi nguPawula. Watsi ‘wake waba bete ingcondvo’ futsi wachubeka aphila “ebubini.”​—1 Thimothi 1:15; Thithusi 3:3.

Ase ucabange kutsi belulukhulu kangakanani lutsandvo Nkulunkulu labenalo kuze atfumele iNdvodzana yakhe kutofela bantfu labente tintfo letimbi. Tsatsa liBhayibheli lakho futsi ufundze ngaloku kuJohane sehluko 3, livesi 16. Lelivesi litsi: “Nkulunkulu walitsandza  kakhulu live [lokuchaza, bantfu labahlala emhlabeni] kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.”

Jesu wakhombisa kutsi naye bekanelutsandvo lolufanana nalelo Babe wakhe bekanalo ngatsi. Kungenteka uyakhumbula eSehlukweni 30 salencwadzi, kutsi safundza ngetintfo letimbi Jesu labukana nato ngebusuku laboshwa ngabo. Watsatfwa wayiswa emtini wemPhristi Lophakeme Khayafase, lapho atekiswa khona licala. Kwaletfwa bofakazi bemanga labamcambela emanga futsi nebantfu bamshaya ngetibhakela. Kungaleso sikhatsi lapho Phetro aphika khona Jesu. Nyalo, asente shengatsi natsi silapho futsi siyakubona nalokunye lokwentekako.

Kuyasa. Jesu abengakalali busuku bonkhe. Ngenca yekutsi lelicala lebelitekwa ebusuku alizange lihambe kahle, ngekushesha baphristi babitela iSanhedrini ndzawonye nobe inkantolo lenkhulu yemaJuda kute baphindze bateke lelicala. Nanyalo baphindze basola Jesu ngekungalaleli umtsetfo waNkulunkulu.

Baphristi babese benta kutsi Jesu aboshwe, futsi bahamba naye bamyisa kuPilatu, umbusi wemaRoma. Batjela Pilatu kutsi ‘Jesu umelene nahulumende. Kufanele abulawe.’ Kepha Pilatu uyabona kutsi labaphristi bacamba emanga. Ngako Pilatu utsi kubo: ‘Angitfoli cala kulomuntfu. Ngitomkhulula.’ Kepha labaphristi kanye nalabanye bantfu bayamemeta batsi: ‘Ungamkhululi! Mbulale!’

Ekuhambeni kwesikhatsi Pilatu waphindze wazama kutjela labantfu kutsi utomkhulula Jesu. Kepha labaphristi babangela kutsi lesicumbi simemete sitsi: ‘Nawukhulula lomuntfu, nawe utawube umelene nahulumende! Mbulale!’ Leticumbi tibanga umsindvo lomkhulu. Uyati yini kutsi Pilatu wentani?—

Uyabayekela batentele labakufunako. Kwekucala utsi Jesu akashaywe. Ngemuva kwaloko, umnikela emasotjeni kuze ambulale. Lamasotja atfwesa Jesu umchele wemanyeva enhloko yakhe futsi acala kuhlekisa  ngaye ngekutsi aguce embikwakhe. Ngako aniketa Jesu lugodvo lolukhulu kuze alutfwale futsi abese amkhiphela ngephandle kwelidolobha amyisa endzaweni lebitwa ngekutsi Sikobho. Nakefika lapho abetsela tandla netinyawo taJesu ngetipikili kulolugodvo. Abese ayalumisa lolugodvo kuze Jesu alenge kulo. Uyopha futsi uva buhlungu lobukhulu kakhulu.

Jesu akafi ngaso leso sikhatsi. Uchubeka alenga kulolugodvo. Labaphristi labakhulu bahlekisa ngaye. Nalabendlula lapho batsi: “Nangabe uyindvodzana yaNkulunkulu yehla kulolugodvo!” Kodvwa Jesu uyati kutsi Babe wakhe umtfumele kutowentani. Uyati kutsi kufanele anikele ngekuphila kwakhe lokute sono kuze tsine sibe nelitfuba lekutfola  kuphila lokuphakadze. Ekugcineni nase kutawushaya insimbi yesitsatfu entsambama, Jesu umemeta Babe wakhe, ngemva kwaloko uyafa.​—Matewu 26:36–27:50; Makho 15:1; Lukha 22:39–23:46; Johane 18:1–19:30.

Jesu bekahluke kakhulu ku-Adamu. Adamu akazange akhombise kutsi uyamtsandza Nkulunkulu. Akazange amlalele Nkulunkulu. Futsi Adamu akakhombisanga kutsi natsi uyasitsandza. Ngenca yekutsi wona, sonkhe sitalwa sinesono. Kepha Jesu wakhombisa kutsi uyamtsandza Nkulunkulu kanye natsi. Bekamlalela njalo Nkulunkulu. Futsi wanikela ngekuphila kwakhe kuze asuse lolokubi Adamu lasibangela kona.

Uyayibonga yini lentfo lenhle kakhulu Jesu layenta?— Nawuthantaza kuNkulunkulu, uyambonga yini ngekusipha iNdvodzana yakhe?— Umphostoli Pawula wambonga Khristu ngaloko lebekamentele kona. Pawula wabhala watsi iNdvodzana yaNkulunkulu ‘yangitsandza futsi yatinikela ngenca yami.’ (Galathiya 2:20) Jesu wafela wena kanye nami. Wanikela ngekuphila kwakhe lokute sono kuze natsi sikhone kutfola kuphila lokuphakadze. Asingabati kutsi lesi sizatfu lesicinile sekutsi kungani kufanele sitsandze Jesu.

Umphostoli Pawula wabhalela emaKhristu asedolobheni laseKhorinte watsi: “Lutsandvo Khristu lanalo luyasichuba.” Lutsandvo lwaKhristu kufanele lusente sifune kwentani? Yini wena loyicabangako?— Naka imphendvulo yaPawula: ‘Khristu wafela bonkhe bantfu  kuze baphilele yena. Labo labaphilako bangasaphileli kutijabulisa bona.’​—2 Khorinte 5:14, 15, ku-New Life Version.

Ikhona yini indlela longase uyicabange longakhombisa ngayo kutsi uphilela kujabulisa Khristu?— Lenye indlela longakhombisa ngayo kutsi utjele labanye ngaloko lokufundzile ngaye. Mhlawumbe ungacabanga nganaku: Kungenteka uwedvwana, make nobe babe wakho abakuboni loko lokwentako, ngisho nalabanye bantfu abakuboni. Ungatibukela yini tinhlelo teTV nobe mhlawumbe ubuke tintfo ku-Internet lowati kahle kutsi ngeke imjabulise Jesu?— Khumbula kutsi Jesu nyalo uyaphila futsi uyakubona konkhe lesikwentako.

Lesinye sizatfu lesenta kufaneleke kutsi sitsandze Jesu kutsi sifuna kulingisa Jehova. Jesu watsi: “Babe uyangitsandza.” Uyati yini kutsi kungani Jehova atsandza Jesu nekutsi kungani natsi kufanele sente njalo?— Kungenca yekutsi wavuma kufa kuze intsandvo yaNkulunkulu yenteke. (Johane 10:17) Ngako-ke asente loko liBhayibheli lelitsi asikwente nalitsi: “Lingisani Nkulunkulu njengebantfwana labatsandzekako, futsi chubekani nihamba ngelutsandvo, njengobe nje naKhristu anitsandza waphindze watinikela ngenca yenu.”​—Efesu 5:1, 2.