FAKAKAUKAU atu ‘okú ke ‘i ha vaka ‘oku ngoto. Te ke loto ke fakahaofi koe ‘e ha taha?— Fēfē kapau na‘e tuku atu ‘e ha taha ‘a ‘ene mo‘uí tonu ke fai pehē?— Sai, ko e me‘a ia na‘e fai ‘e Sīsū Kalaisí. Hangē ko ia na‘á ta ako ‘i he Vahe 37, na‘á ne foaki ‘a ‘ene mo‘uí ko ha huhu‘i koe‘uhí ke lava ai ‘o fakahaofi kitaua.

Ko e mo‘oni, ‘oku ‘ikai ke fakahaofi kitaua ‘e Sīsū mei ha‘ata melemo. Ko e hā ‘okú ne fakahaofi kitaua mei aí? ‘Okú ke manatu‘i?— Mei he angahala mo e mate na‘a tau ma‘u kotoa meia ‘Ātamá. Neongo kuo fai ‘e he kakai ‘e ni‘ihi ‘a e ngaahi me‘a ‘oku kovi ‘aupito, na‘e pekia foki ‘a Sīsū ma‘anautolu. Te ke tuku atu ho‘o mo‘uí ke feinga ke fakahaofi ‘a e kakai peheé?—

‘Oku pehē ‘e he Tohitapú: “Neongo ko ha faitotonu, hei‘ilo pe ai ha taha te ne fie mate ma‘ana: ‘io, kapau ko ha tangata lelei, tokaange nai ha taha te ne fakato‘oto‘a nai ‘o mate ma‘ana.” Neongo ia, ‘oku fakamatala ‘a e Tohitapú na‘e ‘pekia ‘a [Sīsū] ma‘á e faka‘otuamaté.’ ‘Oku kau ai ‘a e kakai ‘oku ‘ikai te nau teitei tauhi ‘a e ‘Otuá! ‘Oku hoko atu ‘a e lau ‘a e Tohitapú: ‘Na‘e pekia ‘a Kalaisi ma‘atautolu, lolotonga ‘oku tau kei angahala [kei fai ‘a e ngaahi me‘a ‘oku koví].’—Loma 5:6-8.

‘E lava ke ke fakakaukau ki ha ‘apositolo ‘a ia na‘á ne fai ‘i ha taimi ‘e taha ha ngaahi me‘a na‘e kovi ‘aupito?— Na‘e tohi ‘e he ‘apositolo ko iá: “Na‘e ha‘u ‘a Kalaisi Sisu ki mamani ke fakamo‘ui ‘a e kakai angahala. ‘A ia ‘oku ou fungani ai.” (Faka‘ītali ‘amautolu.) Ko e ‘apositolo na‘á ne lea‘aki iá ko Paula. Na‘á ne pehē, na‘á ne “faivale ‘i he taimi ‘e taha” pea na‘e hokohoko atu ‘ene “faikoví.”—1 Timote 1:15, 16; Taitusi 3:3, NW.

Fakakaukau atu ki he lahi ‘o e ‘ofa na‘e ma‘u ‘e he ‘Otuá ‘o ne fekau hifo ai ‘a hono ‘Aló ke pekia ma‘á e kakai peheé! Fēfē ke ke to‘o mai ho‘o  Tohitapú pea lau ‘o fekau‘aki mo e me‘á ni ‘i he Sione vahe 3, veesi 16. ‘Oku pehē ai: “Na‘e ‘ofa pehe ‘a e ‘Otua ki māmāni [‘a ia, ko e kakai ‘oku mo‘ui ‘i he māmaní], ko ia na‘a ne foaki hono ‘Alo tofu-pe-taha-ne-fakatupu, koe‘uhi ko ia kotoa pe ‘oku tui pikitai kiate ia ke ‘oua na‘a ‘auha, kae ma‘u ‘a e mo‘ui ta‘engata.”

Na‘e fakamo‘oni‘i ‘e Sīsū na‘á ne ma‘u ‘a e ‘ofa ko ia na‘e ma‘u ‘e he‘ene Tamaí kia kitauá. Te ke manatu‘i nai ‘i he Vahe 30 ‘o e tohí ni, na‘á ta lau ai ‘o fekau‘aki mo e ngaahi me‘a na‘e faingata‘a‘ia ai ‘a Sīsū ‘i he pō na‘e puke ai iá. Na‘e ‘ave ia ki he ‘api ‘o e Taula‘eiki Lahi ko Kaiafasí, ‘a ia na‘e fakamāu‘i ai Ia. Na‘e ‘omai ‘a e kau fakamo‘oni loi ‘a ia na‘a nau tala ‘a e ngaahi loi ‘o fekau‘aki mo Sīsū, pea na‘e tuki ia ‘e he kakaí. Ko e taimi ia na‘e faka‘ikai‘i ai ‘e Pita ‘a ‘ene ‘ilo‘i ‘a Sīsuú. Sai, pehē eni ‘okú ta ‘i ai tonu ‘o ta mamata ki ha toe me‘a kehe ‘oku hoko.

Ko e pongipongí eni. Kuo ‘ā ‘a Sīsū ‘i he poó kotoa. Koe‘uhi ko e fakamaau ‘i he pō ko iá na‘e ‘ikai totonu, ‘oku ui fakavave mai ‘e he kau taula‘eikí ‘a e Sanetalimí, pe ko e fakamaau‘anga mā‘olunga faka-Siú, pea toe fai ha fakamaau ‘e taha. ‘Oku nau toe tukuaki‘i heni ‘a Sīsū ki he hia ki he ‘Otuá.

‘Oku hoko atu ai ‘a hono ha‘i ‘e he kau taula‘eikí ‘a Sīsū, pea nau taki ia kia Pailato, ko e kōvana Lomá. ‘Oku nau tala kia Pailato: ‘ ‘Oku fakafepaki ‘a Sīsū ki he pule‘angá. ‘Oku totonu ke tāmate‘i.’ Ka ‘oku lava ke sio ‘a Pailato ‘oku loi ‘a e kau taula‘eikí. Ko ia, ‘oku tala ange ‘e Pailato kia kinautolu: ‘ ‘Oku ‘ikai te u ‘ilo ha hala ‘a e tangatá ni. Te u tukuange ia.’ Ka ‘oku kaila ‘a e kau taula‘eikí mo e ni‘ihi kehé: ‘ ‘Ikai! Tāmate‘i ia!’

Ki mui ai, ‘oku toe feinga ‘a Pailato ke tala ki he kakaí te ne tukuange ‘a Sīsū ke tau‘atāina. Ka ‘oku ‘ai ‘e he kau taula‘eikí ‘a e fu‘u kakaí ke nau kaila: ‘Kapau te ke tukuange ia, ‘okú ke fakafepaki mo koe foki ki he pule‘angá! Tāmate‘i ia!’ ‘Oku hoko ‘o longoa‘a ‘aupito ‘a e fu‘u kakaí. ‘Okú ke ‘ilo ‘a e me‘a ‘oku fai ‘e Pailató?—

‘Okú ne fakavaivai ki ai. ‘Uluakí, ‘okú ne ‘ai ke uipi ‘a Sīsū. Hili iá, ‘okú ne tuku atu ia ki he kau sōtiá ke tāmate‘i. ‘Oku nau ‘ai ha kalauni talatala ‘i he ‘ulu ‘o Sīsuú pea fakakata‘aki ia ‘aki ‘enau punou ‘i mu‘a ‘iate ia.  ‘Oku nau ‘oange leva kia Sīsū ha fu‘u pou, pe ko e fu‘u ‘akau ke ne fua pea taki atu ia ki tu‘a mei he koló ki ha feitu‘u ‘oku ui ko e Potu ‘Ulupokó. ‘Oku nau tuki ai ‘a e nima mo e va‘e ‘o Sīsuú ki he ‘akaú. Hili iá, ‘oku nau fokotu‘u hake ia ki ‘olunga koe‘uhi ke tautau ai ‘a Sīsū. ‘Okú ne fetoto‘i. ‘Oku lahi ‘aupito ‘a e langá.

‘Oku ‘ikai ke mate ‘a Sīsū ‘i he taimi pē ko iá. ‘Okú ne tautau pē ‘i he ‘akaú. ‘Oku fakakata‘aki ia ‘e he kau taula‘eiki lahí. Pea ko e fa‘ahinga ‘oku lue haké ‘oku nau pehē: ‘Kapau ko e ‘Alo koe ‘o e ‘Otuá, ‘alu hifo mei he ‘akaú!’ Ka ‘oku ‘ilo ‘e Sīsū ‘a e me‘a na‘e fekau mai ia ‘e he‘ene Tamaí ke ne faí. ‘Okú ne ‘ilo kuo pau ke ne foaki ‘a ‘ene mo‘ui haohaoá koe‘uhi ke ta lava ai ‘o ma‘u ‘a e faingamālie ke ma‘u ‘a e mo‘ui ta‘engatá. Faifai pē, ‘i he tolú nai ‘o e efiafi ko iá, ‘oku  kaila hake ‘a Sīsū ki he‘ene Tamaí peá ne mate.—Mātiu 26:36–27:50, PM; Maake 15:1; Luke 22:39–23:46; Sione 18:1–19:30.

He kehe mo‘oni ko Sīsū meia ‘Ātama! Na‘e ‘ikai ke fakahā ‘e ‘Ātama ha ‘ofa ki he ‘Otuá. Na‘á ne talangata‘a ki he ‘Otuá. Pea na‘e ‘ikai ke fakahā ‘e ‘Ātama ha ‘ofa kia kitaua. Koe‘uhi na‘á ne faiangahala, kuo fanau‘i kotoa mai kitautolu ‘i he angahala. Ka ko Sīsū na‘á ne fakahā ‘a e ‘ofa ki he ‘Otuá mo kitaua. Na‘á ne talangofua ma‘u pē ki he ‘Otuá. Pea na‘á ne foaki ‘a ‘ene mo‘uí koe‘uhi ke ne malava ai ‘o to‘o ‘a e maumau na‘e fai ‘e ‘Ātama kia kitauá.

‘Okú ke hounga‘ia ‘i he me‘a fakaofo na‘e fai ‘e Sīsuú?— ‘I ho‘o lotu ki he ‘Otuá, ‘okú ke fakamālō kiate ia ‘i he‘ene foaki mai ‘a hono ‘Aló?— Na‘e hounga‘ia ‘a e ‘apositolo ko Paulá ‘i he me‘a na‘e fai ‘e Kalaisi ma‘aná. Na‘e tohi ‘e Paula ko e ‘Alo ‘o e ‘Otuá na‘á ne “ ‘ofeina au, mo ne foaki ia ‘e ia ke pekia koe‘uhi ko au.” (Faka‘ītali ‘amautolu; Kaletia 2:20) Na‘e pekia ‘a Sīsū ma‘au pea mo au foki. Na‘á ne foaki ‘a ‘ene mo‘ui haohaoá koe‘uhi ke ta lava ai ‘o ma‘u ‘a e mo‘ui ta‘engatá! Ko e mo‘oni, ko ha ‘uhinga mālohi ia ‘oku totonu ai ke ta ‘ofa ‘ia Sīsuú.

Na‘e tohi ‘a e ‘apositolo ko Paulá ki he kau Kalisitiane ‘i he kolo ko Kolinitoó: “Ko e ‘ofa ‘a Kalaisí ‘okú ne ‘ai kitautolu ke tau ngāue.” Ko e hā ‘a e fa‘ahinga ngāue ‘oku totonu ke ‘ai kitaua ‘e he ‘ofa ‘a Kalaisí ke ta faí? Ko e hā ho‘o fakakaukaú?— Fakatokanga‘i ‘a e tali ‘a Paulá: “Na‘e pekia ‘a Kalaisi ma‘á e tokotaha kotoa pē koe‘uhi ke nau mo‘ui Ma‘ana. ‘Oku ‘ikai totonu ke nau mo‘ui ke fakafiemālie‘i kinautolu.”—Faka‘ītali ‘amautolu; 2 Kolinito 5:14, 15, New Life Version.

 ‘E lava ke ke fakakaukau ki ha ngaahi founga ‘e lava ke ke fakahaa‘i ai ‘okú ke mo‘ui ke fakafiemālie‘i ‘a Kalaisi?— Sai, ko e founga ‘e taha ko hono tala ki he ni‘ihi kehé ‘a e me‘a kuó ke ako ‘o fekau‘aki mo iá. Pe ki‘i fakakaukau angé ki he me‘á ni: Mahalo ‘okú ke tokotaha nai, ko ia ‘oku ‘ikai lava ke sio atu ‘a ho‘o fa‘eé pe tamaí ki he me‘a ‘okú ke faí, pea pehē foki ki ha sio atu ‘a ha taha pē kia koe. Te ke sio ‘i he ngaahi polokalama televīsone pe mamata ‘i he ngaahi me‘a ‘i he ‘Initanetí ‘okú ke ‘ilo ‘e ‘ikai ke fakafiemālie‘i ai ‘a Sīsuú?— Manatu‘i, ‘oku lolotonga mo‘ui ‘a Sīsū he taimí ni, pea ‘oku malava ke ne sio hifo ki he me‘a kotoa pē ‘okú ta faí!

Ko e toe ‘uhinga ‘oku totonu ai ke ta ‘ofa ‘ia Sīsuú he ko hota lotó ia ke fa‘ifa‘itaki kia Sihova. ‘ ‘Oku ‘ofa‘i au ‘e he Tamaí,’ ko e lea ia ‘a Sīsuú. ‘Okú ke ‘ilo ‘a e ‘uhinga ‘okú ne ‘ofa ai ‘ia Sīsū pea mo e ‘uhinga ‘oku totonu ai ke ta ‘ofa ‘ia Sīsuú?— Koe‘uhí he na‘e loto-lelei ‘a Sīsū ke pekia kae lava ke fakahoko ‘a e finangalo ‘o e ‘Otuá. (Sione 10:17) Ko ia, ta fai ‘a e me‘a ‘oku tala mai ‘e he Tohitapú: “Mou hoko mu‘a ko e kau fa‘ifa‘itaki ki he ‘Otua, ‘o tāu mo e fanau kuo ‘ofeina: pea fou ‘i he ‘ofa, ‘o hange foki ko Kalaisi ne ne ‘ofa‘i kimoutolu, ‘o ne li‘oa ia koe‘uhi ko kimoutolu.”—Efeso 4:32e, 33 (5:1, 2, PM).