Cibalo 38

Ncotweelede Kumuyanda Jesu

KOYEZYEEZYA kuti uli mubwaato buli mukubbila. Sena inga wayanda kuti muntu umwi akuvwune kutegwa utanyikili?— Ino mbuti kuti umwi waaba buumi bwakwe buya kutegwa akuvwune?— Eeco ncaakacita Jesu Kristo. Mbubwenya mbotwakaiya mu Cibalo 37, wakaaba buumi bwakwe kabuli cinunuzyo ikutegwa tufwutulwe.

Ee, Jesu tatuvwuni kukunyikila pe. Ino utuvwuna kunzyi? Sena uciyeeyede?— Utuvwuna kucibi alufwu toonse nzyotwakakona kuli Adamu. Nokuba kuti bantu bamwi bakacita zintu zibi kapati, abalo aaba Jesu wakabafwida. Sena ulayanda kulibikka muntenda kutegwa uvwune bantu bali boobo?—

Ibbaibbele lyaamba kuti: “Nciyumu kumuntu kufwida muntu uululeme, nekubaboobo na wabona kuti muntu mubotu, inga ulazumina kumufwida.” Pele Bbaibbele lipandulula kuti Jesu “wakafwida basikasampusampu.” Aabo babikkilizya bantu ibatamubelekeli naaceya Leza! Alimwi Bbaibbele lilazumanana kwaamba kuti: “Nitwakacili basizibi [nitwakacili kucita zintu zibi] Kristo wakatufwida.”—Ba-Roma 5:6-8.

Sena kuli mwaabaapostolo umwi ngozyi cimwi ciindi iwakacita zintu zibyaabi?— Imwaapostolo ooyo wakalemba kuti: “Kristo Jesu wakaboola ansi ano kuzoofutula bacitazibi. Lino mebo ndi sizibi kwiinda boonse.” Imwaapostolo wakaamba boobo ngu Paulo. Wakaamba kuti cimwi ciindi wakali ‘mufwubafwuba’ alimwi akuti wakalizumenene “muzibi.”—1 Timoteo 1:15; Tito 3:3.

Koyeeya buyo luyando ndwaakajisi Leza kutegwa atume Mwanaakwe kuzyoofwida bantu bali boobo! Bweza Bbaibbele lyako akubala makani  aaya kuli Johane caandaano 3, kapango ka 16. Lyaamba kuti: “Obuya Leza mbwaakayandisya nyika [nkokuti bantu bakkala anyika], wakapa Mwanaakwe simuzyalwa alike, kuti umwi [a]umwi uumusyoma atafwidilili, pele abe abuumi ubutamani.”

Jesu wakatondezya kuti wakali kutuyanda mbubonya bwakali kutuyanda Bausyi. Ambweni uciyeeyede kuti mu Cibalo 30 cabbuku lino twakabala amwi aamapenzi aakamucitikila Jesu imasiku ngaakaangwa. Wakatolwa kumunzi wa Mupaizi Mupati Kayafa, ooko Nkwaakabetekwa. Bakamboni bakubeja bakaletwa akumutamikizya Jesu zintu nzyaatakacita, alimwi bantu bakamuuma amfwaindi. Eeco nceciindi Petro naakakazya kuti tamuzyi Jesu. Lino atweezyeezye kuti tuli kubusena oobo alimwi tulakonzya kuzyibona zyoonse zili mukucitika.

Bwaca. Jesu wali kulanga busiku boonse. Akaambo kakuti lubeteko lwamasiku tiilweendelezyegwa kabotu, icakufwambaana bapaizi batuma mulumbe wakuti Nkuta Mpati yaba Juda ibungane akuzeka alimwi. Mulubeta oolu, bamutamikizya alimwi Jesu kujatikizya milandu yakubisizya Leza.

Mpoonya, bapaizi bamwaanga Jesu alimwi akumutola kuli Pilato, imweendelezi waba Roma. Baambila Pilato kuti: ‘Jesu ubukila mfwulumende. Weelede kujayigwa.’ Pele Pilato ulizyi kuti nzyobaamba bapaizi aaba nzyakubeja. Aboobo Pilato wabaambila kuti: ‘Kunyina mulandu ngondajana ngwacitide mwaalumi ooyu. Ndamwaangulula.’ Pele bapaizi alimwi abambi boongolola ategwa: ‘Peepe! Mujaye!’

Kumbele, Pilato alimwi wasoleka kwaambila bantu kuti ulamwaangulula Jesu. Pele bapaizi baambila makamu-makamu aabantu ikoongolola kuti: ‘Ikuti umwaangulule, ayebo wabukila mfwulumende! Mujaye!’ Imakamu-makamu aabantu aayo asabila kapati. Sena ulicizyi Pilato ncaacita?—

Wazumina. Cakusaanguna walailila kuti Jesu akwibbaulwe. Mpoonya wamwaaba kuli basikalumamba kuti bamujaye. Babikka musini wamamvwa amutwe wa Jesu akumusampaula kwiinda mukumukotamina  akumuweela. Mpoonya bapa Jesu cisamu cipati naa cicinda ikuti abweze eelyo bamutola kunze aamunzi, nkokuti ku Busena Bwatupompo. Ooko bakankaila maanza aa Jesu azituta kucisamu amipikili. Mpoonya baciimika cisamu eeco cakuti lino Jesu ulalengelela aali ncico. Wiile kuzwa bulowa. Ulimvwide kapati kucisa.

Kunyina Jesu naafwa ndilyonya. Wiile kulengelela aawo aacisamu. Bapaizi bapati bamuweela. Alimwi basimwiinda nzila bati: ‘Ikuti koli Mwana a-Leza ncobeni, seluka kuzwa aacisamu eeco cakupenzezya!’ Pele Jesu ulicizyi eeco Bausyi ncobakamutuma kuti azyoocite. Ulizyi kuti weelede kwaaba buumi bwakwe bulondokede ikutegwa tube aacoolwe cakujana buumi butamani. Kumamanino, aciindi ca 3 kiloko kumazuba buzuba oobo, Jesu wakoompolola Bausyi eelyo wakafwa. —Matayo 26:36–27:50; Marko 15:1; Luka 22:39–23:46; Johane 18:1–19:30.

Eelyo Jesu wakaliindene kapati kaka a Adamu! Adamu tanaakalutondezya pe luyando ndwaakajisi kuli Leza. Wakazangila Leza. Alimwi kunyina nokuba kulindiswe Adamu naakatondezya luyando. Akaambo kakuti wakabisya, toonse twakazyalwa katujisi cibi. Pele Jesu wakatondezya luyando kuli Leza alimwi akulindiswe. Wakali kumvwida Leza lyoonse. Alimwi wakaaba buumi bwakwe ikutegwa agusye zintu zibi zyoonse nzyaakatuletela Adamu.

Sena ulalumba kuti Jesu wakatucitila cintu citaliboteli?— Eelyo nopaila kuli Leza, sena ulamulumba kuti wakatupa Mwanaakwe?— Imwaapostolo Paulo wakalumba kujatikizya ncaakamucitila Kristo. Paulo wakalemba kuti Mwanaa Leza “wakandiyanda akulyaaba nkaambo kangu.” (Ba-Galatiya 2:20) Jesu wakatufwida yebo andime. Wakaaba buumi bwakwe bulondokede ikutegwa tujane buumi butamani! Mmasimpe aako nkaambo kapati ncotweelede kumuyanda Jesu.

Imwaapostolo Paulo wakalembela Banakristo bamumunzi wa Korinto kuti: “Ikuyanda Kristo nkokutukulwaizya kucita milimo.” Ino mmilimo iili buti kuyanda Kristo ncokweelede kutupa kubeleka? Ino uyeeya buti?— Komvwa bwiinguzi bwa Paulo bwakuti: “Kristo wakafwida bantu boonse ikutegwa kabaponena Nguwe. Tabeelede kuponena kulikkomanisya beni.”—Ndiswe twaasendeka mabala; 2 Ba-Korinto 5:14, 15, New Life Version.

 Sena inga wayeeya nzila zimwi mbonga watondezya kuti uponena kukkomanisya Kristo?— Inzila imwi nkwiinda mukwaambila bamwi nzyookayiya kujatikizya nguwe. Naa kociyeeyela eeci: Ulakonzya koli olikke, aboobo banyoko naa bauso tabakonzyi kubona nzyoli mukucita, alimwi kunyina muntunsi uumbi uunga wakubona. Sena inga walangilila mapulogilamu aacipekupeku (TV) naa kulangilila zintu aamuncini wakkompyuta wa Internet nzyozyi kuti inga tiizyamukkomanisya Jesu?— Koyeeya kuti, Jesu lino ulapona alimwi ulakonzya kubona zintu zyoonse nzyotucita!

Akambi kaambo ncotweelede kumuyanda Jesu nkakuti tuyanda kumwiiya Jehova. Jesu wakati: ‘Taata ulandiyanda.’ Sena ulikazyi kaambo ncamuyanda Jesu alimwi aswebo ncotweelede kumuyanda?— Nkaambo Jesu wakalisungula kufwa ikutegwa kuyanda kwa Leza kucitwe. (Johane 10:17) Aboobo atucite eeco Bbaibbele ncolitwaambila kuti: “Amube basikwiiya ba-Leza mbuli bana bayandwi, alimwi amweende cakuyandana, mbuli Kristo alakwe mbwaakayanda ndinywe akulyaab[a nkaambo kandinywe].”—Ba-Efeso 5:1, 2.

Ikutegwa tumulumbe kapati Jesu azeezyo nzyaakatucitila, bala Johane 3:35; 15:9, 10; alimwi a 1 Johane 5:11, 12.

[Zifwanikiso izili apeeji 199]

Ino nkupenzyegwa kuli buti nkwaakapenga Jesu naakaaba buumi bwakwe akaambo kandiswe?

[Cifwanikiso icili apeeji 200]

Ino ncinzi ncotunga twacita kutegwa tutondezye kuti tulamuyanda Jesu?

[Cifwanikiso icili apeeji 201]

Ino nguni uukonzya kubona zintu zyoonse nzyotucita?