A HI NGE u le byatsweni lebyi nwelaka. Xana u nga swi rhandza leswaku un’wana a ku ponisa?— Ku vuriwa yini loko munhu un’wana a nyikela hi vutomi bya yena leswaku a ku ponisa?— Phela hi leswi Yesu Kreste a swi endleke. Hilaha hi dyondzeke hakona eka Ndzima 37, u nyikele vutomi byakwe byi va nkutsulo leswaku hi kota ku ponisiwa.

I ntiyiso leswaku Yesu a nga hi ponisi eku nweleni. Xana wa ha tsundzuka leswaku u hi ponisa eka yini?— U hi ponisa eka xidyoho ni rifu leswi hi swi kumeke eka Adamu. Hambileswi vanhu van’wana va endleke swilo swo biha swinene, kambe Yesu u va ferile na vona. Xana wena u nga nghenisa vutomi bya wena ekhombyeni leswaku u ringeta ku ponisa vanhu vo tano?—

Bibele yi ri: “A nga kona loyi a nga felaka munhu la lulameke; kunene, kumbexana un’wana a nga ha xinyata a fela munhu lonene.” Kambe Bibele yi vula leswaku Yesu “u fele vanhu lava nga xiximiki Xikwembu.” Vanhu volavo va katsa ni lava va nga xi tirheliki Xikwembu! Bibele yi ya emahlweni yi ku: ‘Loko ha ha ri vadyohi, [ha ha endla swilo swo biha], Kreste u hi ferile.’—Varhoma 5:6-8.

Xana wa n’wi tiva muapostola, loyi a nga tshama a endla swilo swo biha swinene?— Muapostola yoloye u tsarile a ku: ‘Kreste Yesu u tile emisaveni leswaku a ta ponisa vadyohi. Eka vona ndzi le mahlweni.’ Muapostola la vuleke marito wolawo i Pawulo. U vule leswaku ‘u tshama a va xihunguki’ nileswaku u ‘ye emahlweni ni vubihi.’—1 Timotiya 1:15; Tito 3:3.

Anakanya rirhandzu lerikulu swonghasi, leri Xikwembu a xi ri na rona ku va xi rhumele N’wana wa xona leswaku a ta fela vanhu vo tano! Ndzi kombela u teka Bibele ya wena, hi hlaya hi mhaka leyi eka Yohane  ndzima 3, ndzimana 16. Yi ri: “Xikwembu xi rhandze misava [ku nga vanhu lava tshamaka emisaveni] swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”

Yesu u kombise leswaku u hi rhandza hi ndlela leyi Tata wakwe a hi rhandzaka ha yona. U ta tsundzuka leswaku eka Ndzima 30 ya buku leyi, hi hlaye swin’wana swa swilo leswi Yesu a twisiweke ku vava ha swona evusikwini lebyi a khomiweke ha byona. U yisiwe ekaya ra Kayafasi, Muprista Lonkulu, laha A nga fika a tengisiwa. Ku tisiwe vanhu lava hehleke Yesu hi mavunwa naswona vanhu va n’wi himetele hi swibakela. Hi wona nkarhi lowu Petro a landzuleke, a vula leswaku a nga n’wi tivi Yesu. A hi endle onge hi kona kwalaho naswona hi vona leswi endlekaka.

Hiloko ri xa. Yesu u hete vusiku hinkwabyo a nga etlelanga. Leswi ku tengisiwa koloko ka nivusiku a ku nga ri enawini, vaprista va hatla va vitana swirho swa Sanedri, kumbe swa huvo leyikulu ya Vayuda leswaku ku tlhela ku ta tengiwa. Kwalaho va tlhela va hehla Yesu va vula leswaku u tlule milawu ya Xikwembu.

Endzhaku ka sweswo vaprista va lerisa leswaku Yesu a bohiwa kutani va n’wi yisa eka Pilato, ndhuna-nkulu ya Rhoma. Va byela Pilato va ku: ‘Yesu u lwisana ni hulumendhe. U fanele a dlayiwa.’ Kambe Pilato wa swi vona leswaku vaprista va hemba. Kutani Pilato wa va byela a ku: ‘A ndzi xi voni xihoxo lexi endliweke hi munhu loyi. Ndza n’wi ntshunxa.’ Kambe vaprista ni vanhu van’wana va huwelela va ku: ‘U nga n’wi ntshunxi! N’wi dlaye!’

Endzhakunyana ka nkarhi, Pilato u tlhela a ringeta ku byela vanhu leswaku u ta ntshunxa Yesu. Kambe vaprista va hlohlotela mintshungu leswaku yi huwelela yi ku: ‘Loko wo n’wi ntshunxa na wena u lwisana na hulumendhe! N’wi dlaye!’ Mintshungu yi sungula ku nga ha lawuleki. Xana wa swi tiva leswaku Pilato u endla yini?—

U pfumelelana ni mintshungu leyi. U rhanga hi ku lerisa leswaku Yesu a biwa hi ximoko. Kutani a n’wi nyiketa eka masocha leswaku a ta  dlayiwa. Ma tlhandleka harhi ya mitwa enhlokweni ya Yesu kutani ma endla xihlekiso ha yena hi ku nkhinsama emahlweni ka yena. Ma nyika Yesu nsika yo leha kumbe mhandzi leyikulu leswaku a yi rhwala, ma famba na yena exivandleni lexi vuriwaka Ndhawu ya Ripala. Ma fika kwalaho ma belela mavoko ni milenge ya Yesu emhandzini yoleyo hi swipikiri. Kutani ma yi yimisa leswaku Yesu a nembelela eka yona. U huma ngati. Naswona u twa ku vava swinene.

Yesu a nga fi hi wona nkarhi wolowo. U karhi u nembelela emhandzini yoleyo. Vaprista lavakulu va endla xihlekiso ha yena. naswona lava hundzaka hi ndlela va ri: “Loko u ri n’wana wa Xikwembu, xika emhandzini ya nxaniso!” Kambe Yesu u tiva leswi Tata wakwe a n’wi rhumeleke ku ta swi endla. Wa swi tiva leswaku u fanele a  nyikela hi vutomi bya yena lebyi hetisekeke leswaku hi kota ku kuma vutomi lebyi nga heriki. Eku heteleleni, hi nkarhi wa kwalomu ka awara ya nharhu nindzhenga, Yesu u huwelela Tata wakwe kutani a fa.—Matewu 26:36–27:50; Marka 15:1; Luka 22:39–23:46; Yohane 18:1–19:30.

Mawaku ndlela leyi Yesu a a hambane ha yona na Adamu! Adamu a a nga xi rhandzi Xikwembu. A nga xi yingisanga Xikwembu. Nakambe Adamu a nga hi rhandzanga. Hinkwerhu hi velekeriwe exidyohweni hikwalaho ka leswi a dyoheke. Kambe Yesu u rhandze Xikwembu a tlhela a rhandza na hina. Minkarhi hinkwayo u yingisa Xikwembu. Naswona u nyikele hi vutomi byakwe leswaku a susa ku vaviseka loku Adamu a hi tiseleke kona.

Xana wa xi tlangela xiendlo lexinene lexi Yesu a xi endleke?— Loko u khongela eka Xikwembu, xana wa xi nkhensa hileswi xi hi nyikeke N’wana wa xona?— Muapostola Pawulo u swi tlangerile leswi Kreste a n’wi endleleke swona. Pawulo u tsarile a vula leswaku N’wana wa Xikwembu ‘u ndzi rhandzile kutani a tinyiketa hikwalaho ka mina.’ (Vagalatiya 2:20) Yesu u fele mina na wena. U nyikele hi vutomi bya yena lebyi hetisekeke leswaku hi kota ku kuma vutomi lebyi nga heriki! Hakunene xexo i xivangelo lexi tiyeke lexi endlaka leswaku hi rhandza Yesu.

Muapostola Pawulo u tsalele Vakreste va le dorobeni ra Korinto a ku: “Rirhandzu ra Kreste ri hi susumetela ku endla swo karhi.” I yini leswi rirhandzu ra Kreste ri faneleke ku hi susumetela ku swi endla? U nga ku yini?— Twana leswaku Pawulo u ri yini: “Kreste u fele vanhu hinkwavo leswaku va hanyela Yena. A va fanelanga va hanyela ku titsakisa.” —Marito lawa hi lo voyamisa; 2 Vakorinto 5:14, 15, New Life Version.

Xana u nga anakanya tindlela leti wena u nga kombisaka ha tona leswaku u hanyela ku tsakisa Kreste?— Ndlela yin’wana i ku byela van’wana leswi u swi dyondzeke ha yena. Kumbe a hi nge: U wexe, manana ni tata wa wena a va swi voni leswi u swi endlaka naswona a ku na munhu un’wana la ku vonaka. Xana u nga hlalela minongonoko ya TV kumbe u languta swilo leswi nga eka Internet, leswi u swi tivaka leswaku a swi n’wi tsakisi Yesu?— Phela u nga rivali leswaku Yesu wa hanya naswona u vona hinkwaswo leswi hi swi endlaka!

Xivangelo xin’wana lexi endlaka leswaku hi rhandza Yesu hi leswaku hi lava ku tekelela Yehovha. Yesu u te: ‘Tatana wa ndzi rhandza.’ Xana wa swi tiva leswaku ha yini a rhandza Yesu nileswaku ha yini na hina hi fanele hi n’wi rhandza?— Hikuva Yesu a a tiyimiserile ku fa leswaku ku endleka ku rhandza ka Xikwembu. (Yohane 10:17) Kutani a hi endle leswi Bibele yi hi byelaka swona, yi ri: “Leswi mi nga vana lava rhandzekaka, vanani vatekeleri va Xikwembu, mi hambeta mi famba erirhandzwini, hilaha Kreste na yena a mi rhandzeke hakona ni ku tinyiketa hikwalaho ka n’wina.”—Vaefesa 5:1, 2.