MAFAUFAU la me e nofo atu koe i se poti telā ka pulu. E a, e manako koe ki se tino ke fakasao ne ia koe?— E a māfai ne tuku atu ne se tino tena ola ke fakasao ei koe?— Ia, tenā loa te mea ne fai ne Iesu Keliso. E pelā mo te mea ne tauloto ne tatou i te Mataupu e 37, ne tuku atu ne ia tena ola e pelā me se togiola ko te mea ke mafai o faka‵sao tatou.

E tonu, e se fakasao ne Iesu tatou mai i te ma‵lemu. Se a te mea e fakasao ne ia tatou mai i ei? E masaua ne koe?— Mai i te agasala mo te mate telā ne maua ne tatou katoa mai i a Atamu. E tiga eiloa ne fai ne nisi tino a mea ma‵sei ‵ki, ne mate foki a Iesu mō latou. E mata, ka tuku atu ne koe tou ola i te taumafai ke faka‵sao a tino penā?—

E fai mai te Tusi Tapu: “E faigata o mate se tino mō se tino amiotonu; kae kāti e mafai fua o mafaufau se tino ke mate a ia mō se tagata ‵lei.” Kae e fakamatala mai i te Tusi Tapu me i a Iesu ‘ne mate mō tino sē amioatua.’ E aofia i ei a tino kolā e se tavini atu eiloa ki te Atua! E toe fai mai te Tusi Tapu: “I te taimi koi agasala ei tatou, me ne mate a Keliso mō tatou.”—Loma 5:6-8.

E mata, e mafai o mafaufau koe ki se apositolo telā ne fai muamua ne ia a mea ma‵sei ‵ki?— Ne tusi mai te apositolo tenā: “I a Keliso Iesu ne vau ki te lalolagi o faka‵sao a tino agasala, kae ko au eiloa te tino agasala tafasili i te masei.” A te apositolo telā ne fai mai ne ia a pati konā ko Paulo. Ne fai mai a ia me ne fai muamua a ia mo fai se “tino valea” kae ne “fai mea ma‵sei.”—1 Timoteo 1:15; Tito 3:3.

Mafaufau fua ki te lasi o te alofa o te Atua i te ugamaiga o tena Tama ke mate mō tino penā! Kaia e se puke mai ei tau Tusi Tapu kae faitau e  uiga ki te mea tenei i te Ioane mataupu e 3, te fuaiupu e 16. I konā e fai mai: “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino e fakatuanaki ki a ia kae ke maua ne ia te ola se-gata-mai.”

Ne fakamaoni mai ne Iesu me ne ‵pau eiloa tena alofa mo te alofa o tena Tamana ki a tatou. Kāti e masaua ne koe te mea tenā i te Mataupu e 30 o te tusi tenei, ne fai‵tau tatou ki nisi mea ne logo‵mae ei a Iesu i te po ne puke fakapagota ei a ia. Ne avatu a ia ki te fale o te Faitaulaga Sili ko Kaiafa, telā ne tu atu ei a Ia i mua o te fono. Ne taku atu a molimau ‵loi ne tino kolā ne fai atu ne latou a loi e uiga ki a Iesu, mo tino kolā ne ‵pa ne latou a ia ki olotou lima. Tenā eiloa te taimi ne fakafiti ei a Petelu me e se iloa ne ia a Iesu. Nei la, ke fakaataata i ‵tou mafaufau me e ‵nofo atu tatou i konā kae e mafai o lavea ne tatou a nisi mea ne ‵tupu.

Ne oko atu ki te taeao. Ne ‵pula eiloa a Iesu i te po kātoa. Ona ko te fono i te po e se fetaui mo tulafono, ne maopoopo fakavave a faitaulaga ki te fono maluga a te Sanetulini io me ko Iutaia, kae ne toe fai a te suā fono. Ne toe ‵losi fakamasei atu ki a Iesu mō te solitulafono ki te Atua.

Ne fai ei ne faitaulaga ke saisai a Iesu, kae ke ‵taki atu ki a Pilato, te kovana Loma. Ne fai atu latou ki a Pilato: ‘E ‵teke atu a Iesu ki te malo. E ‵tau o tamate.’ Kae ne lavea ‵lei atu ne Pilato me e pati ‵loi fua a faitaulaga. Tela la, ne fai atu a Pilato ki a latou: ‘E seai se mea ‵se e maua ne au i te tagata tenei. Ka fakasaoloto ne au a ia.’ Kae ne ka‵laga atu a faitaulaga mo nisi tino: ‘Ikai! Tamate atu a ia!’

Fakamuli ifo, ne toe taumafai a Pilato o fai atu ki tino me ka fakasaoloto ne ia a Iesu. Kae ne fai ne faitaulaga a te vaitino ke ka‵laga atu: ‘Kafai e fakasaoloto ne koe a ia, ko ‵teke atu foki koe ki te malo! Tamate atu a ia!’ Ne momea aka eiloa te logoa o te vaitino. E iloa ne koe me ne a mea ne fai ne Pilato?—

Ne fai eiloa ne ia a te mea e fia‵fia latou ki ei. Muamua la, ne fai ne ia ke ‵kini a Iesu. Oti aka, ne tuku atu ei a ia ki sotia ke tamate ne latou a ia. Ne tuku atu ne latou se foualiki makaikai ki te ulu o Iesu kae fakatauemu  atu ki a ia mai i te ifo atu ki ana mua. Ne tuku atu ei ne latou se pou io me se lakau lasi ke amo ne Iesu kae takitaki atu a ia ki tua mo te fa‵kai ki se koga e igoa ki a Gatiulupoko. I konā ne ‵tuki ne latou a lima mo vae o Iesu ki luga i te lakau. Mai konā ne fakatu aka ei ne latou ki luga ko te mea ke tautau a Iesu i ei. Ko ‵sali mai eiloa a toto mai i tou tagata. Ko oko eiloa i te lasi o tena logo‵mae.

Ne seki mate eiloa a Iesu i konā. Ne tautau fua a ia i luga i te lakau. Ne fakatauemu atu a te faitaulaga sili ki a ia. Kae fai atu a tino kolā ne oloolo atu i konā: “Kafai koe ko te Tama a te Atua, fanaifo la ki lalo mo te lakau fakasaua!” Kae e iloa ‵lei ne Iesu a te mea ne uga mai a ia ne tena Tamana ke fai. E iloa ne ia me e ‵tau o tuku atu tena ola ‵lei katoatoa ko te mea ke mafai o maua ne tatou a te ola se-gata-mai.  Kāti ko te tolu i te fakaafiafi, ne tagi atu a Iesu ki tena Tamana ko te mea eiloa ko mate atu a ia.—Mataio 26:36–27:50; Maleko 15:1; Luka 22:39–23:46; Ioane 18:1–19:30.

Ko oko eiloa i te ‵kese o Iesu mai i a Atamu! Ne seki fakaasi atu ne Atamu a te alofa ki te Atua. Ne seki fakalogo a ia ki te Atua. Ne seki fakaasi mai foki ne ia a te alofa ki a tatou. Ona ko te mea ne agasala a ia, ne fa‵nau katoa mai tatou i te agasala. Kae ne fakaasi atu ne Iesu a te alofa ki te Atua mo tatou. Ne fakalogo faeloa a ia ki te Atua. Kae ne tuku mai ne ia tena ola ko te mea ke mafai o ave keatea ne ia a te logo‵mae telā ne tuku mai ne Atamu ki a tatou.

E a, e fakatāua ne koe a te ‵toe mea gali ne fai ne Iesu?— Kafai e ‵talo atu koe ki te Atua, e a, e fakafetai atu koe ki a ia mō te tukumaiga o tena Tama?— Ne fakatāua ne te apositolo ko Paulo a te mea ne fai ne Keliso mō ia. Ne tusi mai a Paulo me i te Tama a te Atua “ne alofa mai ki a au kae tuku mai foki tena ola ke ola ei au.” (Kalatia 2:20) Ne mate a Iesu mō koe kae penā foki mo au. Ne tuku atu ne ia tena ola ‵lei katoatoa ko te mea ke mafai o maua ne tatou te ola se-gata-mai! E mautinoa eiloa me tenā eiloa te ‵toe pogai sili e ‵tau ei o a‵lofa tatou ki a Iesu.

Ne tusi atu a te apositolo ko Paulo ki Kelisiano i te fa‵kai o Kolinito: “A matou e pule ne te alofa o Keliso mō tatou.” Se a te auala e pule ei tatou ne te alofa o Keliso? Se a tau faka‵tau?— Onoono la ki te tali a Paulo: “Ne mate [Keliso] mō tino katoa, ko te mea ko tino kolā e ola ke se ola mō latou, kae ke ola mō ia telā ne mate kae ne toetu ake.”—I a matou a mataimanu ‵kese; 2 Kolinito 5:14, 15, Tusi Tapu.

 E mata, e mafai o mafaufau koe ki auala e mafai ei o fakaasi atu ne koe me i a koe e ola i se olaga telā e fakafiafia atu ki te Keliso?— Ia, a te auala e tasi ko te fai atu ne koe ki nisi tino a mea ne tauloto ne koe e uiga ki a ia. Io me mafaufau e uiga ki te mea tenei: Kāti ko nofo tokotasi koe, tela la, ko se mafai o lavea ne tou mātua io me ko tou tamana a mea e fai ne koe, io me ko so se isi tino aka. E mata, ka onoono koe ki polokalame i te TV io me kāti e onoono atu koe ki mea i te Itaneti kolā e iloa ne koe me e se fiafia ki ei a Iesu?— Masaua, ko ola nei a Iesu, kae e mafai o lavea ne ia a mea katoa e fai ne tatou!

A te suā pogai e ‵tau ei o a‵lofa tatou ki a Iesu ona ko te mea e fia fakaakoako atu tatou ki a Ieova. Ne fai mai a Iesu: ‘E alofa mai te Tamana ki a au.’ E iloa ne koe a te pogai e alofa ei a ia ki a Iesu mo te pogai e ‵tau foki o fai tatou penā?— Ona ko te mea ne loto fiafia a Iesu o mate ko te mea ke fai ei te loto o te Atua. (Ioane 10:17) Tela la, ke na fai ne tatou a mea kolā e fai mai te Tusi Tapu ke fai ne tatou: “Ke fakaakoako koutou ki te Atua, e pelā me ne tama‵liki fagasele, kae ke tumau i te sa‵sale i te alofa, e pelā eiloa mo te alofa o Keliso ki a koutou kae tuku atu tena ola mō koutou.”—Efeso 5:1, 2.