HUNAHUNAA nga aada ka ha tikalunod nga baluto. Karuyag mo ba nga may-ada magluwas ha imo?— Kumusta man kon may-ada usa nga nagsakripisyo han iya kalugaringon nga kinabuhi ha pagbuhat hito?— Aw, ito an ginbuhat ni Jesu-Kristo. Sugad han hinbaroan naton ha Kapitulo 37, iginhatag niya an iya kinabuhi sugad nga lukat basi kita maluwas.

Siyempre, hi Jesus diri nagluluwas ha aton tikang ha kalunod. Tikang ha ano ginluwas kita niya? Nahinunumdom ka ba?— Tikang ha sala ngan kamatayon nga napanunod naton ngatanan tikang kan Adan. Bisan kon an iba nga mga tawo nagbubuhat hin maraot, hi Jesus namatay para ha ira liwat. Ibubutang mo ba ha peligro an imo kinabuhi basi luwason an mga tawo nga nagbuhat hin maraot?—

An Biblia nasiring: ‘Waray bisan hin-o nga maruruyag mamatay tungod ha usa nga matadong; oo, tungod ha usa nga maopay, bangin may iba nga maruyag pa ngani mamatay.’ Kondi, an Biblia nasiring nga hi Jesus ‘namatay tungod ha diri-diosnon nga mga tawo.’ Kaupod hito an mga tawo nga diri ngani nag-aalagad ha Dios! An Biblia dugang nga nasiring: “Hi Kristo namatay tungod ha aton han mga magpakasasala pa kita [nagbubuhat pa hin maraot].”​—Roma 5:6-8.

Kilala mo ba an apostol nga nagbuhat hadto hin maraot hinduro nga mga butang?— Iton nga apostol nagsurat: ‘Hi Kristo Jesus kinanhi ha kalibotan ha pagluwas ha mga magpakasasala. Ha ira ako an gilalabawi.’ An apostol nga nagsiring hito amo hi Pablo. Hiya nagsiring nga hiya “hadto kulangkulang” ngan nagkinabuhi hiya ‘ha karaotan.’​—1 Timoteo 1:15; Tito 3:3.

Hunahunaa la an daku nga gugma han Dios salit sinugo niya an iya Anak basi mamatay para ha mga tawo nga nagbubuhat hin maraot! Alayon kuhaa  an imo Biblia ngan basaha an mahitungod hini ha Juan kapitulo 3, bersikulo 16. Ito nasiring: “An Dios naghigugma gud han kalibotan [nga amo an mga tawo nga nag-uukoy ha tuna] nga iya iginhatag an iya bugtong nga Anak, basi nga an ngatanan nga natoo ha iya, diri mawara kondi mamay kinabuhi nga waray kataposan.”

Pinamatud-an ni Jesus nga an iya gugma ha aton kapariho han gugma han iya Amay. Bangin nahinunumdoman mo nga ha Kapitulo 30 hini nga libro, nabasa naton an mahitungod han mga gin-antos ni Jesus ha gab-i han gindakop hiya. Gindara hiya ngadto ha balay han Hitaas nga Saserdote nga hi Kaipas, diin ginbista Hiya. An palso nga mga testigo nagsumat hin mga buwa mahitungod kan Jesus, ngan ginsuntok hiya han mga tawo. Ito an panahon nga nagnigar hi Pedro nga kilala niya hi Jesus. Yana hunahunaon naton nga nakadto kita didto mismo ngan nakikita an nahitabo.

Aga na. Nag-agma hi Jesus ha bug-os nga gab-i. Tungod kay an pagbista ha gab-i diri legal, gintirok dayon han mga saserdote an Sanhedrin, o an Judio nga hitaas nga hukmanan, ngan gindumara an usa pa nga bista. Dinhi ira gin-akusahan utro hi Jesus hin mga krimen kontra ha Dios.

Sunod iginpagapos han mga saserdote hi Jesus, ngan ira gindara hiya ngadto kan Pilato, an Romano nga gobernador. Hira nagsiring kan Pilato: ‘Hi Jesus nakontra ha gobyerno. Kinahanglan patayon hiya.’ Kondi nasabtan ni Pilato nga nagbubuwa an mga saserdote. Salit hi Pilato nagsiring ha ira: ‘Waray ako nakita nga sayop hini nga tawo. Bubuhian ko hiya.’ Kondi an mga saserdote ngan an iba nagsinggit: ‘Diri! Pataya hiya!’

Katapos, nagsari utro hi Pilato nga sumatan an mga tawo nga bubuhian niya hi Jesus. Kondi gin-aghat han mga saserdote an damu nga mga tawo nga magsinggit: ‘Kon buhian mo hiya, nakontra ka liwat ha gobyerno! Pataya hiya!’ An mga tawo nag-aringasa hinduro. Maaram ka ba kon ano an ginbuhat ni Pilato?—

Tinugot hiya. Siyahan iya ginpalatigo hi Jesus. Katapos, iya igintubyan hiya ha mga sundalo basi patayon. Ira ginbutangan hin korona nga mga tunok an ulo ni Jesus ngan gintamay hiya pinaagi han pagyukbo ha iya atubangan.  Katapos, ira gintagan hi Jesus hin daku nga poste basi pas-anon ngan gindara hiya ha gawas han siyudad ngadto ha lugar nga tinatawag nga Lugar han Kalabera. Didto ira iginraysang ha poste an mga kamot ngan mga tiil ni Jesus. Katapos, ira ginpatindog ito salit nabibitay hi Jesus dida hito. Nagdinugo an iya mga samad. Duro an kaul-ol.

Hi Jesus waray mamatay dayon. Nabibitay la hiya ha poste. An punoan nga mga saserdote nagtamay ha iya. Ngan an mga lumalabay nagsiring: ‘Kon anak ka han Dios, lusad tikang ha pasakitan nga kahoy!’ Kondi maaram hi Jesus kon ano an karuyag han iya Amay nga buhaton niya. Maaram hiya nga kinahanglan ihatag niya an iya hingpit nga kinabuhi basi magkaada kita higayon nga makarawat an kinabuhi nga waray kataposan. Ha kataposan, mga alas tres han  kulop, hi Jesus nagsinggit ngadto ha iya Amay ngan namatay.​—Mateo 26:36–​27:50; Markos 15:1; Lukas 22:39–​23:46; Juan 18:1–​19:30.

Naiiba gud hi Jesus kan Adan! Hi Adan waray magpakita hin gugma ha Dios. Iya gintalapas an Dios. Hi Adan waray liwat magpakita hin gugma ha aton. Tungod kay hiya nakasala, kita ngatanan natawo nga makasasala. Kondi hi Jesus nagpakita hin gugma ha Dios ngan ha aton. Pirme hiya nasugot ha Dios. Ngan iya iginhatag an iya kinabuhi basi mawara an kadaot nga ginbuhat ni Adan ha aton.

Inaapresyar mo ba an urusahon nga butang nga ginbuhat ni Jesus?— Kon nag-aampo ka ha Dios, pinasasalamatan mo ba hiya tungod kay iginhatag niya ha aton an iya Anak?— Inapresyar ni apostol Pablo an ginbuhat ni Kristo para ha iya. Hi Pablo nagsurat nga an Anak han Dios “naghigugma ha akon, ngan nagtubyan han iya kalugaringon tungod ha akon.” (Galasia 2:20) Hi Jesus namatay para ha imo ngan para ha akon liwat. Iginhatag niya an iya hingpit nga kinabuhi basi magkaada kita kinabuhi nga waray kataposan! Sigurado nga ito an marig-on nga hinungdan kon kay ano nga sadang higugmaon naton hi Jesus.

Hi apostol Pablo nagsurat ha mga Kristiano ha siyudad han Korinto: ‘An gugma ni Kristo nagpapagios ha amon ha pagbuhat.’ Ha ano nga klase hin buhat sadang magpagios ha aton an gugma ni Kristo? Ano ha hunahuna mo?— Tigamni an baton ni Pablo: “Hi Kristo namatay tungod ha ngatanan basi hira mabuhi para ha Iya. Diri hira sadang mabuhi ha paglipay ha ira kalugaringon.”​—Amon an italiko; 2 Korinto 5:​14, 15, New Life Version.

 May nahuhunahuna ka ba nga mga paagi nga maipapakita mo nga nabubuhi ka ha paglipay kan Kristo?— Bueno, an usa nga paagi amo an pagsumat ha iba han imo hinbabaroan mahitungod ha iya. O hunahunaa ini: Bangin nag-uusahan ka, salit diri nakikita ni imo Nanay o Tatay kon ano an imo ginbubuhat, ngan diri ka liwat nakikita han bisan hin-o nga iba nga tawo. Magkikita ka ba hin mga programa ha TV o bangin magkita ha mga butang ha Internet nga maaram ka nga diri makakalipay kan Jesus?— Hinumdumi, buhi na yana hi Jesus, ngan nakikita niya an ngatanan nga aton ginbubuhat!

An usa pa nga hinungdan kon kay ano nga sadang higugmaon naton hi Jesus amo nga karuyag naton subaron hi Jehova. “An Amay nahigugma ha akon,” siring ni Jesus. Maaram ka ba kon kay ano nga nahigugma hiya kan Jesus ngan kon kay ano nga sadang higugmaon liwat naton hiya?— Tungod kay disidido mamatay hi Jesus basi matuman an kaburut-on han Dios. (Juan 10:17) Salit buhaton naton an ginsisiring han Biblia ha aton: “Magsubad kamo ha Dios, sugad ha mga hinigugma nga anak; ngan manggawi kamo ha gugma, sugad nga hi Kristo naghigugma man ha iyo, ngan nagtubyan ha iya ngahaw tungod ha iyo.”​—Efeso 5:​1, 2.