GUNÍʼ ique zeluʼ ndaaniʼ ti barcu ni ziyaaziʼ. Ñee ñuláʼdxiluʼ ñuu tu nulá lii la?... Yanna, pa binni ca nudii xquendanabani para nulá lii yaʼ.... Ngapeʼ nga ni biʼniʼ Jesucristu. Casi bizíʼdinu lu capítulo 37 que, laabe bidiibe xquendanabánibe para quíxebe stóndanu ti ganda guilanu.

Ya, Jesús qué nulá diʼ laanu para cadi gátinu guiiguʼ. Rietenaláʼdxiluʼ xidé bilabe laanu la?... De donda ne de guendaguti ni bisaanané Adán laanu. Neca stale binni nga guizáʼ huayuni cosa malu, Jesús laaca guti pur laacabe. Ñee ninaluʼ niguuluʼ xquendanabániluʼ ra nagana para nulaluʼ binni zacá la?...

Biblia na: «Nanna nu nagana chuʼ tu gati pur tobi hombre runi jneza, peru ñanda ca ñuu tu nidxiña de racá, ñáti pur ti hombre chaʼhuiʼ». Peru laaca cusiéneni guti Jesús «para ulá cani ruchee», o binni ni qué runi ni na Dios. Ne laaca cuzeeteni «neca [bi]chéʼ né nu [Dios] chiqué», o neca bíninu cosa malu la? «Cristu guti pur laanu» (Romanos 5:6-8).

Ñee rietenaláʼdxiluʼ tu biʼniʼ stale cosa malu ante gaca apóstol la?... Laabe nga ni bicaa ca diidxaʼ riʼ: «Beeda Cristu Jesús ndaani guidxilayú, beda ulá cani cuchee». Lade guirácabe naa nga jma bichee. Hombre ca nga apóstol Pablu. Laabe guniʼbe guyuu ti tiempu qué ñuu xpiaanibe ne bibánibe para si guninabe stobi (1 Timoteo 1:15; Tito 3:3).

Guníʼ ique si pabiáʼ nga gunnaxhii Dios binni malu ora biseendabe Xiiñibe para gati pur laacaʼ. Gucuaa Biblia stiluʼ, ne biindaʼ xiná Juan, capítulo 3, versículo 16: «Purti nadxii xhaata Dios  binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe».

Jesús bisihuinni nadxii laanu stálepeʼ cásica Bixhózebe. Zándaca guietenalaʼdxuʼ bíʼyanu lu capítulo 30 stiʼ libru riʼ modo bininácabe Jesús gueelaʼ gunaazecabe laabe que. Primeru yenécabe laabe ralidxi Caifás xaíque stiʼ ca ni ruzaaquiʼ guʼxhuʼ que para guʼyaʼ xi bíʼnibe. Yenécabe tuudxi binni para guiníʼ puru ni cadi dxandíʼ de laabe, ne ca binni que gudíñecaʼ laabe. Dxi que nga guníʼ Pedru qué runibiáʼ laabe. Yanna guníʼ ique nuunu raqué ne cabézanu gúʼyanu xi chigaca.

Maʼ birá gueelaʼ, ne Jesús caʼruʼ liica gasi. Cumu cadi jneza guca juzgarbe gueelaʼ que la? oraqueca bisendacaa ca xaíque ni ruzaaquiʼ guʼxhuʼ que guiráʼ juez jma risaca de raqué, ne biʼniʼ juzgárcabe laabe sti biaje. Yanna riʼ la? laaca guníʼcabe cucheenebe Dios.

Oraqueca biʼniʼ mandar ca ni ruzaaquiʼ guʼxhuʼ que gundiibicabe Jesús ne chinécabe laabe nezalú Pilatu, xaíque stiʼ Roma. Rábicabe laa: Jesús cucaalú gobiernu. Naquiiñeʼ gátibe. Peru Pilatu nanna cusiguii ca ni ruzaaquiʼ guʼxhuʼ que, ngue runi rábibe laacaʼ: Qué huayuuyaʼ guni hombre riʼ cosa malu. Chigundaa laabe. Óraque ca ni ruzaaquiʼ guʼxhuʼ que ne stuudxi binni bicaacaʼ ridxi ne naca: ¡Coʼ, biiti laabe!

Despué, Pilatu gúdxibe ca binni que zundaabe Jesús sti biaje. Peru ca ni ruzaaquiʼ guʼxhuʼ que bicaacabe guiráʼ binni que gucaacaʼ ridxi ne guiniʼcaʼ: Pa gundaaluʼ laabe la? lii laaca cucaaluluʼ gobiernu. ¡Biiti laabe! Zeʼ ora jma nadipaʼ cabidxiaa ca binni que. Ñee nannuʼ xi biʼniʼ Pilatu la?...

Bidiibe lugar guni ca binni que ni nacaʼ. Primeru biʼniʼ mandarbe quíñecabe Jesús ne óraque bidiibe laa ca soldadu que para gúticaʼ laabe. Ca hombre riʼ guluucaʼ ti laʼpaʼ, o corona, de guichi íquebe ne bizuxíbicaʼ xañeebe cuxídxicaʼ laabe. Despué bidiicabe  laabe ti yaga para chinebe lu xíʼquebe ne guireenebe ni de ndaaniʼ guidxi que ne chinebe ni ra rábicabe «Lugar stiʼ Calavera». Ne raqué bitábicabe clavu nabe ne ñeebe lu yaga que ti ora guindísacabe yaga que gándabe luni. Guiráʼ ra gureza ládibe que biree rini ne laabe guizáʼ gucanabe.

Peru Jesús qué ñati diʼ oraqueca. Primeru gucanabe xadxí lu yaga que. Laga nándabe raqué la? ca ni ruzaaquiʼ guʼxhuʼ que bixídxicaʼ laabe, ne ca binni ni zidiʼdiʼ raqué rucaa ridxi ne nacaʼ: Pa xiiñiʼ Dios lii la? ¡biete lu yaga ca! Peru Jesús nánnabe biseendaʼ Bixhózebe laabe para xiixa risaca: gudiibe guendanabani sin donda stibe para guibáninu sin qué chuʼ dxi gátinu. Últimu la? maʼ huadxí,  biaʼ las tres que, Jesús bicaabe ridxi Bixhózebe ne gútibe (Mateo 26:36–27:50; Marcos 15:1; Lucas 22:39–23:46; Juan 18:1–19:30).

¡Guizáʼ gadxé guca Jesús de Adán xa! Adán que nusihuinni diʼ pa nadxii Dios, purtiʼ qué nuzuubadibe stiidxaʼ. Laaca qué nusihuínnidibe pa nadxiibe binni guidxilayú, purtiʼ pur bicheebe ca guiranu ralenenu donda. Peru Jesús biluiʼbe pabiáʼ nadxiibe Dios ne binni guidxilayú. Laabe bizuubabe stiidxaʼ Dios guiráʼ ora ne bidiibe xquendanabánibe para guni chaahuibe ni biʼniʼ Adán laanu.

Ñee rudiiluʼ cuenta pabiáʼ galán nga ni biʼniʼ Jesús ca la?... Ora runi orarluʼ Dios, ñee rudiiluʼ xquíxepeʼ laabe pur biseendabe Xiiñibe la?... Apóstol Pablu bidii xquíxepeʼ Jesús pur ni biʼniʼ ca. Guniʼbe gunnaxhii Xiiñiʼ Dios laabe ne bidii xquendanabani pur laabe (Gálatas 2:20). Jesús laaca guti pur lii ne pur naa. Bidiibe xquendanabánibe para gápanu ti guendanabani ni qué zaluxe. Ya, ndiʼ nga ti razón guizáʼ naroʼbaʼ para gannaxhiinu laabe.

Apóstol Pablu bicaa ra nuu ca xpinni Cristu ni nuu guidxi Corinto: Guendarannaxhii stiʼ Jesús rucaani laanu gúninu xiixa. Xii ndiʼ raʼbuʼ rucaani laanu gúninu yaʼ.... Biiyaʼ chaahuiʼ ximodo bicabi Pablu: «Cristu guti pur guiranu, ti zacá guiranu guibáninu pur laabe. Naquiiñeʼ guibánitu modo chulaʼdxiʼ Cristu, cadi modo chuláʼdxitu» (cursiva stidu; 2 Corintios 5:14, 15, Versión Nueva Vida).

 Ñee caníʼ íqueluʼ ximódoruʼ zanda gusihuínniluʼ nabániluʼ modo chulaʼdxiʼ Cristu la?... Ti modo zanda guʼnuʼ nga, guiníʼneluʼ binni ni maʼ biziidiluʼ de laabe. O guníʼ ique nuuluʼ lii si, ne guirutiʼ tu cayuuyaʼ lii, nin jñaaluʼ nin bixhózeluʼ nin sti binni. Ñee ziuuluʼ lu Internet o zuuyaluʼ xiixa ni cadiʼdiʼ lu tele ni nannuʼ qué ziulaʼdxiʼ Jesús la?... Bietenalaʼdxiʼ nabani Jesús ne ruuyabe guiráʼ ni rúninu.

Sti razón ni nápanu para gannaxhiinu Jesús nga purtiʼ racaláʼdxinu gácanu casi Jiobá. «Nadxii Bixhoze naa», na Jesús. Ñee nánnaluʼ xiñee nadxii Jiobá laabe ne xiñee laaca naquiiñeʼ gannaxhiinu laabe la?... Purtiʼ Jesús guná gueeda gati pur laanu para gaca ni na Dios (Juan 10:17). Nga runi naquiiñeʼ chinándanu conseju ni zeeda ndaaniʼ Biblia riʼ: «Ma xiiñi Dios laatu ne nadxii laatu. Yanna laucaalaʼdxi gaca tu casi laa. Intiica guni tu lausihuinni nadxii saa tu casi nadxii Cristu laanu. Gunaxhii be laanu dede uná be bisigaʼde be xpida be Dios para biaxa stonda nu» (Efesios 5:1, 2).