GUUTIP nuannaarutigisinnaasaanik iliuuseqarsinnaavugut? Arlaannik tunisinnaavarput? — Jehova nammineq oqarpoq: “Uanga pigigakkit orpippassuarni uumasut tamaasa.” Aamma oqarpoq: “Sølvi uanga pigaara, kuulti uanga pigaara.” (Tussiaat 24:1; 50:10; Haggaji 2:8, NV) Taamaattorli arlaannik Jehova tunisinnaavarput. Sumik? —

Jehovamut kiffartorniarluta aalajangersinnaavugut. Taassuma iluarisaminik iliornissamut pinngitsaalinngilaatigut. Maanna paasiniariartigu sooq Jehovap nammineq aalajangiisinnaatikkaatigut taanna kiffartuutissanerlugu kiffartuutissannginnerluguluunniit.

Robotti sunaasoq nalunngilat, ilaa? — Tassa maskiinaavoq aquttagaq qanorluunniit iliortinneqarsinnaasoq. Nammineq eqqarsarsinnaanngilaq namminerlu qanoq iliornissaminut aalajangiisinnaanani. Jehovap tamatta robottitut pinngortissimasinnaagaluarpaatigut, piumasaminik iliortussatut. Guutili taamaaliunngilaq. Nalunngiliuk sooq Guutip taama pinngortinngikkaatigut? — Immaqa pinnguaqarputit robottitut ittumik. Attataasaq tooraanni taava pinnguaq sananeqaatimi siunertaa malillugu iliussaaq. Taamaattumik  pinnguaqarpit? — Taamaattumik pinnguaqarluni pikkunaagineqaleriaannaasinnaavoq. Sananeqarnini kisiat malillugu iliorsinnaavoq. Jehovap kissaatiginngilaa robottituinnaq allamik iliuuseqarsinnaanata naalassasugut. Jehovap kissaatigaa uagut imminik asanninneq piumasaatullu iliorusunneq pissutigalugit kiffartorfigissagitsinni.

Ataatarput qilammiittoq qanoq misigisarsoraajuk kajumilluta naalakkaangatsinni? — Aamma aperisinnaavakkit: Ataatat anaanallu naalakkukkit qanoq sunniuteqassava? — Biibilimi allassimavoq ‘erneq ilisimasoq ataataminut nuannaarutaasartoq’, kisianni ‘erneq sianiitsoq anaanaminut isumakuluutaalersartoq’. (Ussatit 10:1) Malugisarpiuk ataatat anaanallu qanoq nuannaartigisartut iliuusereqqusaat iliuuserisimagaangakkit? — Qanorlu kinguneqartarpa iliuusereqqusaat iliuuserisimanngikkaangakkit? —

Ataatarput qilammiusoq, Jehova, eqqarsaatigeqqilaariaruk. Qanoq ililluta nuannaartissinnaagitsinni oqaluttuuppaatigut. Biibilit qaqeriaruk, Ussatillu 27:11 qupperlugu. Ima allassimavoq: “Ernera [imaluunniit paniga], ilisimasuuniarit taamalu uummatiga nuannaartillugu, mitallersikka akisinnaaniassavakka.” Nalunngiliuk arlaannik ‘mitalliineq’ qanoq isumaqartoq? — Isumaqarpoq mittatilliineq illaruaatiginninnerluunniit. Arlaata illaatigippatit sapinnginnerakkat sapernerarlugu, taava oqarsinnaavugut ‘mitalleraatit’. Illaruaatigaatit. Saatanip Jehova qanoq mitallerpaa? — Tusassavat.

 Eqqaamajuk kapitalimi 8-mi atuaripput Saatani annerpaajorusuttoq. Inuit tamarmik imminut naalannissaat kissaatigaa. Saatani oqarpoq Jehovap inuunermik naassaanngitsumik tunisiumanera pissutigiinnarlugu inuit Jehova pallorfigigaat. Saatanip Adami Evalu naalanngitsereeramigit Jehova unammillerpaa. Ima oqarfigaa: ‘Inuit kiffartorfigisarpaatsit tunisisarnerit pissutigiinnarlugu. Periarfissittuugumma kinaluunniit ilinnit tunussitissinnaavara.’

Oqaatsit taakkorpiaat Biibilimi allassimanngikkaluarput. Biibilimili Jobi pillugu atuarutta, paasissavarput Saatani Jehovamut taamatungajak oqartoq. Tassa Jobip aalajaannera aalajaannginneraluunniit Saatanimut Jehovamullu pingaaruteqartorujussuuvoq. Biibilimi Jobimik allakkat, kapitalit 1 aamma 2, qupperiartigit qanoq pisoqarsimanera paasiniarlugu.

Kapitali 1-imi malugaarput inngilit qilammi Jehovamut sassarneranni Saatani ilaasoq. Jehovap Saatani aperaa: “Sumit aggerpit?” Saatani akivoq nunarsuaq tamakkerlugu  angalaffigisimallugu. Taava Jehova ima aperivoq: ‘Jobi malugaajuk? Jobip kiffartorfigaanga, ajortumillu iliunngisaannarluni.’ — Jobi 1:6-8.

Saatanip ingerlaannaq nassuiaatissarsiorniarsaraa. Saatani ima oqarpoq: ‘Jobip kiffartorfigaatit ajornartorsiuteqannginnini pissutigiinnarlugu. Sernissussaarukku pilluaqqussaarlugulu taava kiinnat toqqavillugu perloqqussagaluarpaatit!’ Jehovalli akivaa: ‘Iluarisannik Jobip pigisai iliorfigikkit; taava takussavarput. Jobili nammineq ajortumik pissanngilat.’ — Jobi 1:9-12.

Saatanimi qanoq iliorpa? — Siullermik Jobip nersutaatai siutituujutaalu tamaasa tillitsippai inuillu nersutinik paarsisut toqutsillugit. Taava savaatai savanillu paarsisut kallermik eqqortippai toqullugit. Kingorna angutit tikiupput qatigattuujutaalu tillillugit qatigattuunillu paarsisut toqullugit. Naggataagullu illu Jobip qitornaasa qulit isersimaffigisaat Saatanip anorersuarmik eqqortippaa, tamarmillu toqupput. Jobi perlunnik taama ajortigisunik eqqugaagaluarluni Jehovamut kiffartortuarpoq. — Jobi 1:13-22.

Jehovap Saatani oqaluuteqqikkamiuk Jobip aalajaattuarnera uparuarpaa. Saatanip nassuiaatissarsioqqinniarsaraa ima oqarluni: ‘Jobi napparsimalernissaanut akuerigumma taava kiinnat toqqavillugu perloqqussagaluarpaatit.’  Saatanip taama iliornissaa Jehovap akueraa, Jobili toqoqqunngilluinnarpaa.

Saatanip Jobip timaa tamaat ajuaqalersippaa. Tipingaarmat qanilliumaneqanngilaq. Allaat nuliata oqarfigaa: “Guuti perloqquinnaruk toqullutillu!” Ikinngutaasuusaartut pulaarput. Ajornerusumilli misigitiinnarpaat. Taama napparsimatigimmat ajortuliungaarsimanerarpaat. Naak Saatanip taama atsigisumik aliasutsillunilu anniartikkaluaraani Jobip Jehova aalajaalluni kiffartorfigiuarpaa. — Jobi 2:1-13; 7:5; 19:13-20.

Jobi aalajaammat Jehova qanoq misigisoraajuk? — Jobi taama aalajaatsigimmat Jehovap nuannaarutigingaarpaa. Saatanimut ima oqarsinnaalerpoq: ‘Jobi takulaariaruk! Kiffartuuppaanga piumagami.’ Jobitut ikkusuppit, Jehovap tikkuarsinnaasaatut takutinniarlugu Saatani ilumuunngitsoq? — Saatani oqaraangat kikkunnik tamanik kiffartorunnaarsitsisinnaalluni illit uangalu taassuma salluneranut uppernarsaaqataasinnaavugut. Tamanna uagutsinnut immikkut pisinnaatitaaffiuvoq. Jiisusip aamma tamanna immikkut pisinnaatitaaffittut isigisimavaa.

Ajoqersuisorsuaq Saatanip ajortumik iliortinniaraluaraagani ajortumik iliunngisaannarpoq. Eqqarsaatigilaariaruk Ataataata tamanna qanoq nuannaarutigitigigaa! Jehovap Jiisusi tikkuarlugu Saatanimut oqarsinnaavoq: ‘Ernera takulaariaruk! Uannut aalajaalluinnarpoq, taamaaliorporlu asagaminga!’ Eqqarsaatigeriarullu Jiisusi qanoq nuannaartigisimassasoq Ataatami uummataa nuannaartissinnaallugu. Jehovamik nuannaartitsisinnaanini nappakkami anniartitaaffimmi toqu tikillugu aalajaannissaminut iluaqutigaa. — Hebræerit 12:2.

Ajoqersuisorsuaq ilaarusuppiuk Jehovalu nuannaartillugu? — Jehovap ilinnut iliuuseriterusutai pillugit ilinniartuartariaqarputit ilikkakkatillu malillugit iliuuseqarnikkut nuannaartillugu!