LATIN mene i lobo-ni ma itamo ni oyomo cwiny Jehovah adada?— Latin meno obedo Wode, Yecu. Kong walok i kom jami mogo ma Yecu otimogi ma omiyo cwiny Wonne me polo obedo yom.

Lupaco pa Yecu onongo gibedo i bor piny ma romo wot me nino adek kulu nia ki i Jerucalem, ka ma ot pa Jehovah onongo tye iye. Yecu olwongo ot pa Lubanga ni “Ot pa Abana.” En ki jo me pacogi onongo giwoto kunnu mwaka ki mwaka me bedo i kwer me Kato.

I mwaka mo acel, ma Yecu onongo tye mwaka 12, lupacone gucako dok paco i nge kwer me Kato. Ento ma dong guo ka ma myero gubut iye, guniang ni Yecu kara pe i kin wadigi nyo i kin luremgi bene. Cutcut Maliam ki Yucepu gudok cen i Jerucalem ka yenyo Yecu. Itamo ni en onongo tye kwene?—

Gunongo Yecu i ot pa Lubanga. En onongo tye ka winyo lok pa lupwonye kun penyogi. Dok ka gupenye gin mo, en miyo lagamme. Gubedo ki ur pi lagam ma en obedo ka miyogi. Tika iromo niang gin mumiyo cwiny Lubanga obedo yom i kom Wode?—

I kare ma Maliam ki Yucepu gunongo Yecu, cwinygi obedo yom adada. Ento Yecu onongo pe obedo ki lworo mo keken. En ongeyo ni ka maber me bedo aye ot pa Lubanga. En openyogi ni: ‘Pe wungeyo ni myero abed i ot pa Abana?’ En ongeyo ni ot meno obedo ot pa Lubanga, dok en onongo maro bedo iye.

 Lacen, Maliam ki Yucepu gudwogo ki Yecu ma onongo tye ki mwaka 12 paco i Najaret. Itamo ni Yecu otero lunyodone nining?— Baibul waco ni en “Obedo kun winyogi.’’ Itamo ni man mono te lokke ngo?— Te lokke ni en obedo ki winy botgi. En otimo gin ma lunyodone wacce ni myero otim, kadi bed tic calo kelo pii ki i kulu-gu.—Luka 2:41-52.

Tam kong i lok man: Kadi bed Yecu onongo pe ki roc, ento en obedo ki winy bot lunyodone ma gitye ki roc. Tika man oyomo cwiny Lubanga?— Cwinye obedo yom, pien lok pa Lubanga waco bot lutino ni: “Wuwiny Lunyodowu.” (Jo Epeco 6:1) In bene itwero yomo cwiny Lubanga ka ibedo ki winy bot lunyodoni kit ma Yecu otimo kwede-ni.

Yo mukene ma itwero yomo kwede cwiny Lubanga aye tito lok kome bot dano. Jo mogo twero wacci man pe gin ma myero lutino gutim. Ento i kare ma dano gutemo gengo lutino me timo man, Yecu owacci: ‘Pe wukwano ki i  Ginacoya ni, “Wer ma litino lukere ki litino ma pud dot giwero me paki ber atika”?’ (Matayo 21:16) Pi meno, ka wamito, wan ducu watwero tito lok i kom Jehovah ki kit ma en obedo Lubanga maber kwede. Ka watimo meno, wabiyomo cwiny Lubanga.

Watwero pwonyo lok i kom Lubanga kikwene wek watit bot jo mukene?— Ki i kwano Baibul piwa kenwa ki paco. Ento wapwonyo jami mapol makato ki i kabedo ma jo pa Lubanga gigure iye ka kwan. Ento watwero ngeyo jone nining?—

Ngo ma gin gitimo i cokkegi? Tika ada gipwonyo gin ma tye i Baibul? Tika gikwano dok ginyamo lok ma tye i iye? Meno aye kit ma wawinyo kwede Lubanga, pe kumeno?— Dok i cokke, wangeyo ni wawinyo gin ma Lubanga waco, pe kumeno?— Ento ka dano giwacci pe myero ikwo i yo me Baibul kono? Tika itwero waco ni gin gubedo jo pa Lubanga?—

Gin mukene ma myero watam pire ene. Baibul wacci jo pa Lubanga gibibedo ‘lwak ma gilwongogi ki nyinge.’ (Tic pa Lukwena 15:14) Kit ma Lubanga nyinge Jehovah-ni, watwero penyo dano ka Jehovah aye Lubangagi. Ka guwaco ni pe, ci wangeyo ni gin pe jone. Jo pa Lubanga bene myero gubed ka tito pi Ker pa Lubanga bot jo mukene. Dok bene ginyuto margi pi Lubanga kun gigwoko cikke.—1 Jon 5:3.

Ka ingeyo jo ma gitimo jami magi, ci ribbe kwedgi i woro Lubanga. Myero iter iti me winyo lok i cokke magi dok imi lagam ka kipenyo lapeny. Meno aye gin ma Yecu otimo i kare ma en tye i ot pa Lubanga. Ka itimo jami magi, ibiyomo cwiny Lubanga kit ma Yecu otimo kwede.

Tika itwero tam i kom lutino mogo ma guyomo cwiny Lubanga ma kiloko i komgi i Baibul?— Temceo obedo lanen maber.  Wonne onongo pe obedo ngat ma ye i kom Jehovah. Ento minne Yuneki ki dadane Loi onongo giworo Jehovah. Temceo owinyo lokgi ci opwonyo lok i kom Jehovah.

I kare ma Temceo odoko dit , lakwena Paulo olimo taun ma en onongo kwo iye-ni. En oneno miti madit ma Temceo tye kwede me tic pi Jehovah. Pi meno en olwongo Temceo wek obin oti tic mukene mapol i tic pa Lubanga. Ka mo keken ma gin guwoto iye, gubedo ka tito pi Ker pa Lubanga ki dong ka lok i kom Yecu bot dano.—Tic pa Lukwena 16:1-5; 2 Temceo 1:5; 3:14, 15.

Tika lanen ma gitye i Baibul tye pa lutino awobe keken ma guyomo cwiny Lubanga?— Pe kumeno. Tam kong i kom latin anyaka me Icrael ma oyomo cwiny Lubanga. I kare ma en pud kwo, lobo Ciria ki Icrael onongo gubedo lumone. I nino mo acel, jo Ciria gulwenyo i kom Icrael ci gutero latin anyaka-ni macalo opii. Kicwale i ot pa ladit wi mony me Ciria ma nyinge  Naaman. En odoko latic pa dako pa Naaman.

Naaman onongo tye ki two dobo. Dokto mo keken onongo pe twero konyo en. Ento latin anyaka mua ki i Icrael-li onongo tye ki gen ni latic mo pa Lubanga, ma obedo lanebi twero konyo Naaman. Ento Naaman ki dakone onongo pe giworo Jehovah. Anyaka-ni mono onongo myero owac botgi gin ma en ngeyo? Ka in onongo itimo ngo?—

Latin anyaka-ni owacci: ‘ka onongo Naaman twero cito bot lanebi pa Jehovah ma i Icrael, onongo dobo pa Naaman cang woko.’ Naaman owinyo lok pa latin anyaka-ni ci ocito bot lanebi pa Jehovah. I kare ma en otimo gin ma lanebi-ni owacce, kome ocang cut. Man oweko Naaman odoko lawor Lubanga me ada.—2 Luker 5:1-15.

Tika imito konyo ngat mo wek opwony lok kom Jehovah ki dok gin ma en romo timone, kit ma latin anyaka-ni otimo kwede?— Nga ma itwero konyone?— I acakkine, guromo tamo ni pe gimito kony mo. Ento iromo tittigi jami mabeco ma Jehovah timogi. Man miyo giromo winyo lokki. Bed labongo akalakala mo ni man biyomo cwiny Lubanga.