Ibuot 41

Nditọwọn̄ Oro Ẹnamde Abasi Enem Esịt

AFO ekere ke ewe eyen ke isọn̄ akanam Jehovah enem esịt akan?— Ekedi Eyen esie, Jesus. Yak ineme iban̄a mme n̄kpọ oro Jesus akanamde man Ete esie eke heaven enem esịt.

Ubon Jesus okodụn̄ ke ebiet oro akadade n̄kpọ nte usen ita ndisan̄a nto Jerusalem n̄kesịm, kpa ebiet emi ediye temple Jehovah okodude. Jesus okokot temple oro “ufọk Ete Mi.” Enye ye ubon esie ẹma ẹsika do kpukpru isua ndikodụk Passover.

Isua kiet, ke ini Jesus ekedide isua 12, ubon esie ẹma ẹtọn̄ọ isan̄ unyọn̄ ke Passover okụrede. Ekedi ke ini mmọ ẹkesịmde ebiet oro mmọ ẹkeyomde ndina ke mmọ ẹkedifiọk nte ke Jesus idụhe ke otu mme iman ye mme ufan mmọ. Ntre ke ndondo oro, Mary ye Joseph ẹfiak ẹka Jerusalem ndiyom Jesus. Afo ekere ke enye okodu m̀mọ̀n̄?—

Mmọ ẹma ẹkụt Jesus ke temple. Enye ke akakpan̄ utọn̄ ọnọ mme andikpep onyụn̄ obụp mmọ mme mbụme. Ndien ke ini mmọ ẹbụpde enye mbụme, enye ama esibọrọ. Mmọ ẹma ẹkop n̄kpaidem ẹban̄a nti ibọrọ oro enye ọkọnọde. Nte afo emekeme ndikụt ntak emi Abasi ekenemde esịt ye Eyen esie?—

Nte ededi, esịt ama ana Mary ye Joseph sụn̄ ke ini mmọ ẹkekụtde Jesus ke akpatre. Edi ikafịnake Jesus. Enye ama ọfiọk ete ke temple ekedi eti itie ndidu. Ntre enye ama obụp ete: “Nte ifiọkke ite, nnyene ndidu ke ufọk Ete Mi?” Enye ama ọfiọk ke temple ekedi ufọk Abasi, ndien enye ama ama ndidu do.

Ke oro ebede, Mary ye Joseph ẹma ẹda Jesus emi ekedide isua 12 ẹnyọn̄ ufọk mmọ ke Nazareth. Afo ekere ke Jesus akanam n̄kpọ didie  ye ete ye eka esie?— Ọfọn, Bible ọdọhọ ke enye ama “osụk ibuot ọnọ mmọ.” Afo ekere ke oro ọwọrọ nso?— Enye ọwọrọ ete ke enye ama okop uyo mmọ. Ih, enye ama anam se ete ye eka esie ẹkedọhọde enye anam, idem ọkpọkọm emi ekedi utọ utom nte edikoi mmọn̄ ke obube mmọn̄.—Luke 2:41-52.

Ntre kere ban̄a emi: Idem okposụkedi Jesus ekedide mfọnmma, enye ama osụk ibuot ọnọ ete ye eka esie emi ẹkedide mme anana-mfọnmma. Ndi emi ama anam Abasi enem esịt?— Ke akpanikọ ama anam, koro Ikọ Abasi ọdọhọ nditọwọn̄ ete: “Ẹkop uyo mme ete ye mme eka mbufo.” (Ephesus 6:1) Afo n̄ko ayanam Abasi enem esịt edieke afo okopde uyo ete ye eka fo, kpa nte Jesus okokopde.

Usụn̄ efen oro afo ekemede ndinam Abasi enem esịt edi nditịn̄ nnọ mbon efen mban̄a enye. Nte ededi, ndusụk owo ẹkeme ndidọhọ nte ke n̄kpri owo ikpenyeneke ndinam emi. Edi ke ini mme owo ẹkedomode ndikpan n̄kpri nditọ ndinam emi, Jesus ama ọdọhọ ete: ‘Nte akanam mbufo ikotke ke N̄wed Abasi ite, “Afo osio itoro eke ọfọnde ama ke inua nsek-nditọ  ye mme awap-eba”?’ (Matthew 21:16) Ntre kpukpru nnyịn imekeme nditịn̄ nnọ mbon en̄wen mban̄a Jehovah nnyụn̄ mban̄a utịbe utịbe Abasi oro enye edide edieke nnyịn inen̄erede iyom ndinam ntre. Ndien edieke nnyịn inamde emi, nnyịn iyanam Abasi enem esịt.

M̀mọ̀n̄ ke nnyịn isikpep n̄kpọ iban̄a Abasi, oro nnyịn ikemede nditịn̄ nnọ mbon efen?— Isikpep ke ukpepn̄kpọ Bible nnyịn ke ufọk. Edi nnyịn imesikpep ekese ke ebiet oro ikọt Abasi ẹsisopde idem man ẹkpep n̄kpọ. Edi didie ke nnyịn ikeme ndifiọk mbon emi ẹdide ikọt esie?—

Ọfọn, nso ke mme owo oro ẹsinam ke mme mbono esop mmọ? Ndi mmọ ẹsinen̄ede ẹkpep se idude ke Bible? Ndi mmọ ẹsikot ẹnyụn̄ ẹneme enye? Nte idịghe ntre ke nnyịn isikpan̄ utọn̄ inọ Abasi?— Ndien ke mme mbono esop Christian nnyịn imesidori enyịn ndikop se Abasi ọdọhọde, nte nnyịn isidorike?— Edi nso edieke mme owo ẹdọhọde ke afo unyeneke ndidu uwem ekekem ye se Bible ọdọhọde? Ndi afo ọkpọdọhọ ke mmọ ẹdi ikọt Abasi?—

Emi edi n̄kpọ efen ndikere mban̄a. Bible ọdọhọ ke ikọt Abasi ẹdidi ‘mme owo oro ẹkerede enyịn̄ esie.’ (Utom 15:14) Sia enyịn̄ Abasi edide Jehovah, nnyịn imekeme ndibụp mme owo m̀mê Jehovah edi Abasi mmọ. Edieke mmọ ẹdọhọde baba, do nnyịn ifiọk ke mmọ idịghe ikọt esie. Ikọt Abasi n̄ko ẹyetịn̄ ẹnọ mbon en̄wen ẹban̄a Obio Ubọn̄ Abasi. Ndien mmọ ẹyewụt ke mmimọ imama Abasi ebe ke ndinịm mbet esie.—1 John 5:3.

Edieke afo ọfiọkde mme owo oro ẹnamde kpukpru n̄kpọ oro, do afo ekpenyene ndisop idem ye mmọ kaban̄a utuakibuot. Afo ekpenyene nditịm n̄kpan̄ utọn̄ ke mme mbono esop emi ndien ekem ọbọrọ mme mbụme ke ini ẹbụpde. Oro edi se Jesus akanamde ke ini enye okodude ke ufọk Abasi. Ndien edieke afo anamde mme n̄kpọ oro, afo ayanam Abasi enem esịt, kpa nte Jesus akanamde.

Nte afo ọmọfiọk nditọwọn̄ efen oro ẹsiakde enyịn̄ ke Bible emi ẹkenamde  Abasi enem esịt?— Timothy edi n̄wọrọnda uwụtn̄kpọ kiet. Ete esie ikenịmke Jehovah ke akpanikọ. Edi eka esie Eunice ye ekaeka esie Lois ẹma ẹnịm Jehovah ke akpanikọ. Timothy ama akpan̄ utọn̄ ọnọ mmọ onyụn̄ ekpep n̄kpọ aban̄a Jehovah.

Ke Timothy ama ọkọkọri okpon, apostle Paul ama aka ekese obio oro enye okodụn̄de. Enye ama okụt nte Timothy ekenen̄erede oyom ndinam n̄kpọ Jehovah. Ntre enye ama okot Timothy ete asan̄a ye imọ anam n̄kpọ Abasi ke udomo oro akam okponde akan. Kpukpru itie oro mmọ ẹkekade, mmọ ẹma ẹtịn̄ ẹnọ mme owo ẹban̄a Obio Ubọn̄ Abasi ẹnyụn̄ ẹtịn̄ ẹban̄a Jesus.—Utom 16:1-5; 2 Timothy 1:5; 3:14, 15.

Edi nte mme uwụtn̄kpọ nditọiren kpọt ke nnyịn inyene ke Bible nte mbon oro ẹkenamde Abasi enem esịt?— Baba-o. Kere ban̄a eyenan̄wan Israel emi akanamde Abasi enem esịt. Ke ini enye okodude uwem, idụt Syria ye idụt Israel ẹkedi mme asua. Usen kiet mbon Syria ẹma ẹn̄wana ye Israel ẹnyụn̄ ẹmụm ekpri n̄kaiferi oro ẹnyọn̄ nte ofụn. Ẹma ẹnọ enye aka ufọk akwa owoekọn̄, emi ẹkekotde Naaman.  Do enye ama akabade edi eyenufọk n̄wan Naaman.

Ini oro Naaman ama ọdọn̄ọ udọn̄ọ oro ẹkotde akpamfia. Abiausọbọ ndomokiet ikekemeke ndin̄wam enye. Edi ekpri n̄kaiferi Israel oro ama enịm ke akpanikọ ete ke kiet ke otu akpan asan̄autom Abasi, kpa prọfet, ekeme ndin̄wam Naaman. Nte ededi, Naaman ye n̄wan esie ikatuakke ibuot inọ Jehovah. Nte ekpri n̄kaiferi oro ekpenyene nditịn̄ se enye ọfiọkde nnọ mmọ? Nso ke afo akpakanam?—

Ọfọn, ekpri n̄kaiferi oro ama ọdọhọ ete: ‘Ubaha nte Naaman akpakade ebịne prọfet Jehovah ke Israel, ẹkpenam akpamfia Naaman okụre.’ Naaman ama okop uyo n̄kaiferi oro, ndien enye ama aka ebịne prọfet Jehovah. Ke ini enye akanamde se prọfet oro ọkọdọhọde, udọn̄ọ esie ama okụre. Emi ama anam Naaman akabade edi andituak ibuot nnọ Abasi akpanikọ.—2 Ndidem 5:1-15.

Ndi afo akpama ndin̄wam owo ekpep n̄kpọ aban̄a Jehovah ye se enye ekemede ndinam, nte ekpri n̄kaiferi oro akanamde?— Anie ke afo ekeme ndin̄wam?— Nte ededi, ke akpa mmọ ẹkeme ndikere ke mmimọ iyomke un̄wam. Edi afo emekeme nditịn̄ nnọ mmọ mban̄a nti n̄kpọ oro Jehovah anamde. Ndien mmọ ekeme ndikpan̄ utọn̄. Afo emekeme ndinịm ke akpanikọ nte ke emi ayanam Abasi enem esịt.

Ẹkeme ndikụt n̄kaiso nsịnudọn̄ oro ẹnọde mme uyen ẹte ẹkop inem ke ndinam n̄kpọ Abasi ke Psalm 122:1; 148:12, 13; Ecclesiastes 12:1; 1 Timothy 4:12; ye Mme Hebrew 10:23-25.

[Mme ndise ke page 213]

Didie ke Jesus akanam Abasi enem esịt?

[Ndise ke page 215]

Okposụkedi ete esie mîkedịghe andinịm ke akpanikọ, nso ke Timothy okoyom ndinam?

[Ndise ke page 216]

Didie ke ekpri eyenan̄wan Israel emi akanam Abasi enem esịt?