¿MÁVAPA ndéverõ g̃uarã pe mitã ombovyʼave vaʼekue Jehovápe?... Jesús. Koʼág̃a jahechamíta mbaʼépa ojapo vaʼekue haʼe ombovyʼa hag̃ua Itúvape.

Jesús oikohágui ojeguata vaʼerã tres díarupi oñeg̃uahẽ hag̃ua Jerusalénpe. Upépe oĩ vaʼekue pe témplo porãite oñemombaʼeguasuhápe Jehovápe. Jesús heʼími pe témplo haʼeha ‘Itúva róga’. Haʼe oho upépe ihentekuérandi káda áño Páskua jave.

Peteĩ jey, Jesús orekórõ guare 12 áño, haʼe ha ihentekuéra oho jeýma hína hógape pe Páskua opa rire. Upéinte opyta hikuái peteĩ lugárpe oke hag̃ua, ha upépe María ha José opilla sapyʼa Jesús ndaiporiha hendivekuéra, ni umi ótro ihénte ni iñamigokuérandi. Upémarõ pyaʼe oho jey hikuái Jerusalénpe oheka hag̃ua chupe. ¿Moõpa nde ere otopa hague Jesúspe?...

María ha José otopa hese pe témplope. Upépe haʼe oñemongeta hína umi mboʼehárandi ha oporandu chupekuéra heta mbaʼe. Ha haʼekuéra oporandu jave chupe, haʼe katuete ombohovái porã. Umi mboʼehára ohecharamoiterei mbaʼeichaitépa Jesús ivale. ¿Rentendémapa koʼág̃a mbaʼérepa Jesús ombovyʼa vaʼekue Jehovápe?...

Otopávo Jesús rehe, María ha José oñetrankilisa. Péro Jesús ndojepyʼapýi oikuaágui oĩ porãha pe témplope. Upévare heʼi chupekuéra: “¿Ndapeikuaái piko aime vaʼerãha che Túva rógape?”. Haʼe oikuaa porã vaʼekue pe témplo haʼeha Jehová róga, ha upévare oĩse vaʼekue upépe.

 Upe rire oho jey ituvakuérandi Nazarétpe, pe puévlo oikohápe hikuái. ¿Mbaʼéichapa nde ere Jesús otrata hague ituvakuérape?... La Biblia heʼi ‘osegi hague iñeʼẽrendu chupekuéra’. ¿Mbaʼéichapa ohechauka upéva?... Haʼe siémpre ojapo ituvakuéra heʼíva, tahaʼe jepe raʼe umi tembiapo ogapypegua, por ehémplo ogueroja y pósogui (Lucas 2:41-52).

Epensamína ko mbaʼére: Jesús ningo perfékto vaʼekue péro ituvakuéra nahániri, upéicharõ jepe haʼe iñeʼẽrendu chupekuéra. ¿Ombovyʼápa rakaʼe upéva Jehovápe?... Katuete, haʼe ningo heʼi voi mitãnguérape: “Peneñeʼẽrendúkena pende tuvakuérape” (Efesios 6:1). Nde avei ikatu rembovyʼa Ñandejárape neñeʼẽrendúramo nde sy ha nde túvape Jesús ojapo haguéicha.

Ikatu rembovyʼa avei Jehovápe remombeʼúramo ótrope umi mbaʼe reaprendéva chugui. Oĩ opensáva umi mitã ndojapói vaʼerãha upéva. Péro jahechamína mbaʼépa heʼi vaʼekue  Jesús umi opensávape upéicha: ‘¿Ndapeleéiva piko Ñandejára Ñeʼẽme heʼiha: “Umi mitãnguéra jepe omombaʼéta Ñandejárape”?’ (Mateo 21:16). Upéicharõ, enterovéva ikatu omombeʼu ótrope mbaʼeichaitépa Ñandejára imbaʼeporã. Jajapóramo upéicha Ñandejára ovyʼaitereíta.

¿Mbaʼéichapa ikatu ñaaprende Ñandejáragui?... Jastudiávo la Biblia ñande rógape. Avei ñaaprendevéta jaháramo oñembyatyhápe ostudia hag̃ua la Biblia umi ohayhúva Ñandejárape. Ikatu oĩ heʼíva ohayhuha Ñandejárape, péro ¿mbaʼéichapa jaikuaáta añetépa upéva?...

Jahecha vaʼerã mbaʼépa ojapo hikuái oñembyaty jave. ¿Olee ha ostudiápa la Biblia? ¿Omboʼépa hikuái upépe heʼíva? La Biblia rupive ñahendu Ñandejárape, ¿ajépa?... Upévare, umi ohayhúva Ñandejárape oñembyaty jave omboʼe vaʼerã la Biblia, ¿ajépa?... Péro oĩramo peteĩ grúpo heʼíva natekotevẽiha jajapo la Biblia omboʼéva, ¿erénepa ohayhuha Ñandejárape ha ojapoha haʼe oipotáva?...

Jahecha vaʼerã avei ótra kósa. La Biblia ningo heʼi umi ohayhúva Ñandejárape oiporutaha térã ‘oguerahataha héra’ (Hechos 15:14). Ñandejára ningo héra Jehová. Upévare jahecha vaʼerã oimépa omombaʼeguasu Jehovápe ha oiporúpa héra. Oimérõ nahániri, upépe japilláta ndojapoiha hína Ñandejára heʼíva. Avei omombeʼu vaʼerã ótrope umi mbaʼe oaprendéva Ñandejáragui. Ohechaukáta avei ohayhuha Jehovápe iñeʼẽrendúramo chupe (1 Juan 5:3).

Reikuaáramo peteĩ grúpo ojapóva koʼã mbaʼe reñembyaty vaʼerã hendivekuéra remombaʼeguasu hag̃ua Jehovápe. Ehendu porã la heʼíva hikuái irreunionhápe ha embohovái ojejapo jave umi porandu. Péicha ojapo vaʼekue Jesús oĩrõ guare pe témplope, ha  upéva ombovyʼa Itúvape. Nde avei rejapóramo upéicha rembovyʼáta Jehovápe.

¿Nemanduʼápa ótro mitãre la Biblia heʼíva ombovyʼa hague Ñandejárape?... Peteĩva hína Timoteo. Itúva ndojeroviái vaʼekue Jehováre. Péro isy ha ijavuéla ohayhu Ñandejárape. Timoteo ohendu chupekuéra ha péicha oaprende Jehovágui.

Peteĩ jey apóstol Pablo ovisita Timoteo puévlo. Upérõ Timoteo tuicháma ha Pablo ohechakuaa hese ohayhuha Jehovápe, upévare heʼi chupe ndohoséipa hendive ojapo hag̃ua hetave mbaʼe Jehovápe g̃uarã. Upéi haʼekuéra oho heta lugárpe oñeʼẽ hag̃ua Ñandejára Rréinore ha omboʼe hag̃ua umi mbaʼe Jesús heʼi vaʼekue (Hechos 16:1-5; 2 Timoteo 1:5; 3:14, 15).

¿Heʼípa la Biblia mitãʼikuérante ikatuha ombovyʼa Jehovápe?... Nahániri. Jahechamína mbaʼépa ojapo vaʼekue peteĩ mitãkuñaʼi  Israelgua. Upe tiémpope tetã Israel ha Siria oñokontrário vaʼekue. Peteĩ jey, umi sírio oñorairõ umi Israelgua ndive ha ogueraha hikuái ko mitãkuñaʼípe Síriape. Upépe oñemondo chupe Naamán rógape, haʼéva pe mburuvicha ehersitopegua. Ha pe mitãkuñaʼi oñepyrũ ombaʼapo ko mburuvicha rembirekópe g̃uarã.

Naamán oreko vaʼekue lépra ha avave ndaikatúi omonguera chupe. Pe mitãkuñaʼi katu oguerovia Jehová proféta ikatuha omonguera upe mbaʼasy. Péro Naamán ha hembireko ndoadorái Jehovápe. Upévare, ¿iporãtapa ko mitãkuñaʼi omombeʼúramo la oikuaáva Jehovágui? Ndérire, ¿mbaʼépa rejapo vaʼerãmoʼã?...

Pe mitãkuñaʼi heʼi: ‘Israélpe oĩ Jehová proféta, ha karai Naamán ohóramo hendápe ikatu okuera’. Naamán oho pe proféta rendápe ha ojapo rire la heʼíva chupe, okueraite. Upéi Naamán ojerovia avei Jehováre (2 Reyes 5:1-15, NM).

¿Ndépa reipytyvõse avei ótrope oikuaa hag̃ua Jehovápe?... ¿Mávapepa ikatu reipytyvõ?... Ikatu ningo oĩ opensáva natekotevẽiha avave oipytyvõ chupe. Péro remombeʼúramo chupekuéra umi mbaʼe porã Jehová ojapóva, ikatu nerendu hikuái. Upéicha rejapóramo katuete rembovyʼáta Ñandejárape.