SIN-O nga bata sa duta ang sa banta mo nagpahalipay gid kay Jehova?— Amo ang iya Anak, si Jesus. Hambalan naton ang mga butang nga ginhimo ni Jesus agod pahalipayon ang iya langitnon nga Amay.

Ang pamilya ni Jesus nagapuyo mga tatlo ka adlaw ang lalakbayon gikan sa Jerusalem, diin nahamtang ang matahom nga templo ni Jehova. Gintawag ni Jesus ang templo nga “balay sang akon Amay.” Sia kag ang iya pamilya nagakadto didto kada tuig agod magtambong sa Paskuwa.

Isa ka tuig, sang 12 anyos si Jesus, ang iya pamilya nagapauli na pagkatapos sang Paskuwa. Sang nagdulog sila sa isa ka duog agod magpaligad sang gab-i, nasapwan nila nga wala gali si Jesus sa tunga sang ila mga paryente kag mga abyan. Nagbalik si Maria kag si Jose sa Jerusalem agod pangitaon si Jesus. Diin sia sa banta mo?—

Nakita nila si Jesus sa templo. Nagapamati sia sa mga manunudlo, kag nagapamangkot sa ila. Kag kon sia naman ang ginapamangkot nila, nasabat niya ini pirme. Natingala sila sa maayo nga mga sabat ni Jesus. Mahangpan mo bala kon ngaa nalipay ang Dios sa iya Anak?—

Siempre, sang makita ni Maria kag ni Jose si Jesus, nadula ang ila kabalaka. Apang wala mabalaka si Jesus. Nahibaluan niya nga wala sing peligro sa templo. Gani namangkot sia: “Wala bala kamo makahibalo nga dapat yara ako sa balay sang akon Amay?” Nahibaluan niya nga ang templo balay sang Dios, kag luyag niya magkadto diri.

Pagkatapos sadto, gin-upod pauli ni Maria kag ni Jose ang 12 anyos nga si Jesus sa Nazaret. Paano sa banta mo nakig-angot si Jesus sa iya mga ginikanan? — Bueno, ang Biblia nagasiling nga “padayon sia nga nagpasakop sa ila.” Ano sa banta mo ang kahulugan sini?— Nagakahulugan ini nga matinumanon sia sa ila. Huo, gintuman niya ang ginasugo sang iya mga ginikanan bisan pa buluhaton ini sa balay subong sang pagsag-ub sing tubig gikan sa bubon.—Lucas 2:41-52.

Gani hunahunaa ini: Bisan pa himpit si Jesus, gintuman niya ang iya di-himpit nga mga ginikanan. Nagpahalipay bala ini sa Dios?— Pat-od gid, kay ang Pulong sang Dios nagasugo sa mga kabataan: “Magmatinumanon kamo sa inyo mga ginikanan.” (Efeso 6:1) Mapahalipay mo man ang Dios kon tumanon mo ang imo mga ginikanan, subong sang ginhimo ni Jesus.

Ang isa pa ka paagi agod mapahalipay mo ang Dios amo ang pagsugid sa iban tuhoy sa iya. Mahimo magasiling ang iban nga indi ini dapat himuon sang mga bata. Apang sang ginpunggan sang mga tawo ang mga bata nga lalaki sa paghimo sini, si Jesus nagsiling: ‘Wala bala ninyo mabasahi sa Kasulatan, “Gikan sa baba sang mga kabataan ang Dios magapaguwa sing  pagdayaw”?’ (Mateo 21:16) Gani sarang naton tanan masugiran ang iban nga mga tawo tuhoy kay Jehova kag kon daw ano sia ka dalayawon nga Dios, kon luyag gid naton. Kag kon himuon naton ini, mapahalipay naton ang Dios.

Diin kita makatuon sing mga butang tuhoy sa Dios nga masugid naton sa iban?— Gikan sa aton pagtuon sa Biblia sa puluy-an. Apang makatuon kita sing dugang pa sa duog nga ginatipunan sang katawhan sang Dios agod magtuon. Paano naton makilala kon sin-o ang iya katawhan?—

Bueno, ano ang ginahimo sang mga tawo sa ila mga pagtililipon? Gikan gid bala sa Biblia ang ginatudlo nila? Ginabasa bala nila kag ginahambalan ini? Amo sini kon paano kita nagapamati sa Dios, indi bala?— Kag sa Cristianong mga miting paabuton naton nga mabatian ang ginasiling sang Dios, indi bala?— Apang ano kon magsiling ang mga tawo nga indi mo dapat sundon ang ginasiling sang Biblia? Masiling ka bala nga katawhan sila sang Dios?—

Yari ang isa pa ka butang nga hunahunaon mo. Ang Biblia nagasiling nga ang katawhan sang Dios dapat mangin “katawhan para sa iya ngalan.” (Binuhatan 15:14) Sanglit ang ngalan sang Dios amo si Jehova, sarang naton mapamangkot ang mga tawo kon si Jehova bala ang ila Dios. Kon magsiling sila nga indi, nian mahibaluan naton nga indi sila ang iya katawhan. Ang katawhan sang Dios dapat man nagapakighambal sa iban tuhoy sa Ginharian sang Dios. Kag ginapakita nila ang ila gugma sa Dios paagi sa pagtuman sa iya mga sugo.—1 Juan 5:3.

Kon kilala mo ang mga tawo nga nagahimo sining tanan nga butang, nian dapat ka magbuylog sa ila sa pagsimba. Dapat ka mamati sing maayo sa sining mga miting kag magsabat sa mga pamangkot kon may ginapamangkot. Amo sina ang ginhimo ni Jesus sang didto sia sa balay sang Dios. Kag kon himuon mo ining mga butang, mapahalipay mo ang Dios, subong sang ginhimo ni Jesus.

May madumduman ka pa bala nga mga kabataan nga ginasambit sa Biblia nga nagpahalipay sa Dios?— Si Timoteo isa ka talalupangdon nga  halimbawa. Indi tumuluo ni Jehova ang iya amay. Apang tumuluo ni Jehova ang iya iloy nga si Eunice, kag ang iya man lola nga si Loida. Nagpamati si Timoteo sa ila kag nakatuon sia tuhoy kay Jehova.

Sang magdaku na si Timoteo, nagduaw si apostol Pablo sa banwa nga iya ginapuy-an. Natalupangdan niya ang daku nga handum ni Timoteo nga mag-alagad kay Jehova. Gani gin-agda niya si Timoteo nga mag-upod sa iya agod kapin pa ang iya mahimo sa pag-alagad sa Dios. Bisan diin sila magkadto, ginsugiran nila ang mga tawo tuhoy sa Ginharian sang Dios kag tuhoy kay Jesus.—Binuhatan 16:1-5; 2 Timoteo 1:5; 3:14, 15.

Apang mga halimbawa lamang bala sang mga bata nga lalaki nga nagpahalipay sa Dios ang ginasambit sa Biblia?— Indi. Binagbinaga ang isa ka Israelinhon nga bata nga babayi nga nagpahalipay sa Dios. Sang panahon niya, magkaaway ang pungsod sang Siria kag ang pungsod sang Israel. Isa ka adlaw nakig-away ang mga Sirianhon batok sa Israel kag ginbihag nila ining bata nga babayi. Gindala sia sa balay sang pangulo  sang hangaway, nga si Naaman. Didto, nangin suluguon sia sang asawa ni Naaman.

Natabo nga gin-aro si Naaman. Wala sing doktor nga nakabulig sa iya. Apang nahibaluan sang bata nga babayi gikan sa Israel nga sarang mabuligan si Naaman sang isa sang pinasahi nga mga alagad sang Dios, nga isa ka manalagna. Sa pagkamatuod, si Naaman kag ang iya asawa wala nagasimba kay Jehova. Sugiran bala sila sang bata nga babayi sang iya nahibaluan? Kon ikaw yadtong bata nga babayi, ano ang himuon mo?—

Bueno, ang bata nga babayi nagsiling: ‘Kon magkadto lamang kuntani si Naaman sa manalagna ni Jehova sa Israel, magaayo ang iya aro.’ Namati si Naaman sa bata nga babayi, kag nagkadto sia sa manalagna ni Jehova. Sang ginhimo niya ang ginsiling sang manalagna, nag-ayo sia. Bangod sini, si Naaman nangin sumilimba sang matuod nga Dios.—2 Hari 5:1-15.

Luyag mo bala buligan ang iban nga makatuon tuhoy kay Jehova kag tuhoy sa iya masarangan nga himuon, subong sang ginhimo sadtong bata nga babayi?— Sin-o ang imo mabuligan?— Sa pagkamatuod, sa primero mahimo nga indi sila maghunahuna nga nagakinahanglan sila sing bulig. Apang sarang mo masugid sa ila ang tuhoy sa maayong mga butang nga ginahimo ni Jehova. Kag mahimo nga mamati sila. Kag mapat-od mo nga magapahalipay ini sa Dios.