Uzou Avọ 41

Emaha Nọ I Ru Ọghẹnẹ Eva Were

ỌMỌ vẹ evaọ otọakpọ na who roro nọ ọ mai ru Jihova eva were?— Ọmọ riẹ, Jesu. Joma ta ẹme kpahe eware nọ Jesu o ru ro ru Ọsẹ obọ odhiwu riẹ eva were.

O rẹ sae rehọ ohwo erẹ edẹ esa no oria nọ uviuwou Jesu o jẹ rria te Jerusalẹm, oria nọ etẹmpol owowoma ọrọ Jihova ọ jọ. Jesu o se etẹmpol na “uwou Ọsẹ mẹ.” Tei te uviuwou riẹ a re kpohọ obei kukpe kukpe kẹ ehaa Ọnyavrẹ na.

Ukpe jọ, okenọ Jesu ọ jọ ikpe 12, uviuwou riẹ u te muhọ ekpozi nọ ehaa Ọnyavrẹ na i kuhọ no. Okenọ a wohọ oria nọ a te wezẹ hẹriẹ oke no, a tẹ ruẹ nnọ Jesu ọ rrọ udevie imoni gbe egbẹnyusu rai hi. Meri avọ Josẹf a tẹ nwani ku oma rẹriẹ zihe kpohọ Jerusalẹm re a nyae gwọlọ Jesu. Diẹse who roro nọ ọ jọ?—

A ruẹ Jesu evaọ etẹmpol na. Ọ jẹ gaviezọ kẹ iwuhrẹ na, yọ ọ be nọ ae enọ. Ẹme nọ a nọ riẹ kpobi, ọ rẹ kẹ uyo riẹ. Emamọ iyo nọ ọ be kẹ u gbe rai unu. Kọ whọ ruẹ oware nọ Ọghẹnẹ ọ rọ were eva kugbe Ọmọ riẹ na?—

Whaọ, okenọ Meri gbe Josẹf a ruẹ Jesu, udu u te kie ai vi. Rekọ Jesu ọ jẹ ruẹ awa ha. Ọ riẹ nnọ etẹmpol na yọ emamọ oria nọ ọ rẹ jọ. Fikiere ọ tẹ nọ inọ: “Wha gbẹ riẹ nọ mẹ rẹ jọ eva uwou Ọsẹ mẹ?” Ọ riẹ nnọ etẹmpol na yọ uwou Ọghẹnẹ, yọ o were riẹ re ọ jọ etẹe.

 Uwhremu na, Meri avọ Josẹf a tẹ rehọ Jesu nọ ọ jọ ikpe 12 na kugbe oma zihe kpohọ Nazarẹt. Didi uruemu who roro nọ Jesu o dhesẹ kẹ ọsẹgboni riẹ?— Ebaibol na e ta nọ o “yo ẹme rai.” Eme who roro nọ oyena u dhesẹ?— U dhesẹ nọ ọ jẹ rehọ oma kpotọ kẹ ae. Ẹhẹ, o ru oware nọ ọsẹgboni riẹ a gwọlọ nọ o ru, o tẹ make rọnọ a vi rie uwou re ọ nya i si ame no ozae ze dede.—Luk 2:41-52.

Fikiere roro kpahe onana: Dede nọ Jesu ọ jọ gbagba, o yo ẹme kẹ ọsẹgboni riẹ nọ a gba ha. Kọ onana u ru eva were Ọghẹnẹ?— E, keme Ẹme Ọghẹnẹ ọ ta kẹ emaha nọ: “Wha yo ẹme enọ i yẹ owhai.” (Ahwo Ẹfẹsọs 6:1) Who ti ru Ọghẹnẹ eva were re who te yo ẹme kẹ ọsẹgboni ra, wọhọ epanọ Jesu o ru na.

Edhere ọfa nọ whọ sai ro ru Ọghẹnẹ eva were họ whọ rẹ ta kẹ amọfa kpahe iẹe. Ahwo jọ a rẹ sae ta nnọ onana u fo kẹ emaha ha. Rekọ okenọ ahwo a jẹ gwọlọ whaha emaha re a siọ onana  ba eruo, Jesu ọ ta nọ: ‘Kọ wha gbẹ jọ Ikereakere na se nọ, “Ọghẹnẹ ọ te rọ ujiro no unu emaha ze”?’ (Matiu 21:16) Fikiere mai kpobi a sae ta kẹ amọfa kpahe Jihova gbe epanọ ọ rrọ Ọghẹnẹ ogbunu te ma tẹ gwọlọ ru ere. Yọ ma te ru ere, ma ti ru eva were Ọghẹnẹ.

Diẹse ma re jo wuhrẹ eware kpahe Ọghẹnẹ nọ ma rẹ sae ta kẹ amọfa kpahe?— No uwuhrẹ Ebaibol mai eva obọ uwou ze. Rekọ ma re wuhrẹ vi ere eva oria nọ ahwo Ọghẹnẹ a re koko họ kẹ ewuhrẹ. Rekọ ẹvẹ ma re ro vuhu ahwo riẹ?—

Kọ eme ahwo na a be jọ iwuhrẹ rai ru? Kọ a bi ghine wuhrẹ oware nọ o rrọ Ebaibol na? Kọ a bi sei jẹ ta ẹme kpahe iẹe? Ere ma rẹ rọ gaviezọ kẹ Ọghẹnẹ, ogbẹrọ ere?— Yọ eva iwuhrẹ Ileleikristi ma re rẹro nọ ma re yo oware nọ Ọghẹnẹ ọ ta, ogbẹrọ ere?— Rekọ ẹvẹ otẹrọnọ ahwo a ta nọ who re du rria lele oware nọ Ebaibol na e ta ha? Kọ whọ rẹ ta nọ ahwo Ọghẹnẹ a rrọ?—

Oware ofa nọ a re roro kpahe ona. Ebaibol na e ta nọ ahwo Ọghẹnẹ a te jọ ‘ahwo kẹ odẹ riẹ.’ (Iruẹru 15:14) Nọ odẹ Ọghẹnẹ o rrọ Jihova na, ma rẹ sae nọ ahwo sọ Jihova họ Ọghẹnẹ rai. A te yo nọ ijo, koyehọ ma rẹ riẹ nọ a rrọ ahwo riẹ hẹ. Ahwo Ọghẹnẹ a rẹ jẹ ta kẹ amọfa kpahe Uvie Ọghẹnẹ. Yọ a re dhesẹ uyoyou rai kẹ Ọghẹnẹ ẹkwoma ekoko ijaje riẹ.—1 Jọn 5:3.

Whọ tẹ riẹ ahwo nọ a re ru eware enana kpobi, koyehọ who re ku oma gbe ai evaọ egagọ. Whọ rẹ gaviezọ gaga eva iwuhrẹ nana whọ vẹ jẹ kuyo evaọ okenọ a tẹ nọ enọ. Ere Jesu o ru evaọ okenọ ọ jọ uwou Ọghẹnẹ. Yọ who te ru eware enana, who ti ru eva were Ọghẹnẹ, wọhọ epanọ Jesu o ru na.

 Kọ whọ sai roro ku emaha efa nọ a jọ Ebaibol na fodẹ nọ i ru Ọghẹnẹ eva were?— Timoti yọ obọdẹ oriruo jọ. Ọsẹ riẹ ọ jẹ gọ Jihova ha. Rekọ oni riẹ, Yunisi, gbe oniode riẹ, Lọis, a jẹ gọ Jihova. Timoti ọ gaviezọ kẹ ae je wuhrẹ kpahe Jihova.

Nọ Timoti ọ rro te ohwo no, Pọl ukọ na o weze kpohọ ẹwho nọ ọ jẹ rria. Ọ ruẹ epanọ Timoti ọ gwọlọ gọ Jihova te. Fikiere o te zizie Timoti re o lele iei gọ Ọghẹnẹ evaọ edhere ologbo. Oria kpobi nọ a te, a jẹ ta kẹ ahwo kpahe Uvie Ọghẹnẹ jẹ kpahe Jesu.—Iruẹru 16:1-5; 2 Timoti 1:5; 3:14, 15.

Kọ iriruo ọ emaha emezae nọ i ru Ọghẹnẹ eva were ọvo e rrọ Ebaibol na?— Ijo. Roro kpahe ọmọtẹ ọboba ọrọ Izrẹl jọ nọ o ru ere. Evaọ oke riẹ, orẹwho Siria gbe orẹwho Izrẹl a jọ ewegrẹ. Ẹdẹjọ ahwo Siria a tẹ wọ ẹmo bru ahwo Izrẹl, a te mu ọmọtẹ ọboba na kpo. A tẹ rehọ iẹe kpohọ uwou oletu ogbaẹmo na, ọnọ a re se Neaman. Ọ tẹ jọ obei zihe ruọ odibo kẹ aye Neaman.

 Whaọ, Neaman o wo ẹyao nọ a re se oti. Uvumọ edọkita ọ sai fi obọ họ kẹe he. Rekọ u mu ọmọtẹ ọboba ọrọ Izrẹl na ẹro nnọ odibo obọdẹ Ọghẹnẹ jọ, ọruẹaro, ọ rẹ sai fi obọ họ kẹ Neaman. Whaọ, Neaman avọ aye riẹ a be gọ Jihova ha. Kọ ọmọtẹ ọboba na ọ te ta oware nọ ọ riẹ kẹ ae? Eme whọ hai ru?—

Ọmọtẹ ọboba na ọ ta nọ: ‘O hae rọnọ Neaman ọ rẹ nya bru ọruẹaro Jihova evaọ Izrẹl, a hai siwi oti Neaman na.’ Neaman ọ gaviezọ kẹ ọmọtẹ na, ọ tẹ nya bru ọruẹaro Jihova. Nọ o ru oware nọ ọruẹaro na ọ ta kẹe nnọ o ru, ẹyao riẹ o te kpo. Onana u te ru Neaman zihe ruọ ọgegagọ Ọghẹnẹ uzẹme na.—2 Ivie 5:1-15.

Kọ o te were owhẹ re who fi obọ họ kẹ ohwo jọ wuhrẹ kpahe Jihova jẹ kpahe oware nọ ọ rẹ sai ru, wọhọ epanọ ọmọtẹ ọboba ọyena o ru na?— Ono whọ rẹ sai fi obọ họ kẹ?— Uzẹme, evaọ ọsosuọ a ti roro nọ a gwọlọ obufihọ họ. Rekọ whọ sae ta kẹ ae kpahe eware iwoma nọ Jihova o ru no. Ẹsejọhọ a te gaviezọ. O sai mu owhẹ ẹro inọ onana o te lẹliẹ eva were Ọghẹnẹ.

A rẹ sae ruẹ uduotahawọ ofa kẹ emaha re a wo isiuru ọ ẹgọ Ọghẹnẹ eva Olezi 122:1; 148:12, 13; Ọtausiwoma Na 12:1; 1 Timoti 4:12; gbe Ahwo Hibru 10:23-25.

[Iwoho nọ e rrọ ẹwẹ-obe avọ 213]

Ẹvẹ ọmaha na, Jesu, o ro ru Ọghẹnẹ eva were?

[Uwoho nọ o rrọ ẹwẹ-obe avọ 215]

Dede nọ ọsẹ riẹ ọ jọ ọgọ-Ọghẹnẹ hẹ, eme Timoti ọ gwọlọ ru?

[Uwoho nọ o rrọ ẹwẹ-obe avọ 216]

Ẹvẹ ọmọtẹ Izrẹl ọnana o ro ru eva were Ọghẹnẹ?