KAPU 41

Bana Yina Kepesaka Nzambi Kyese

NGE KEYINDULA nde na ntoto yai nki mwana mepesaka Yehowa kyese ya kuluta?— Mwana na yandi, Yezu. Beto tubila mambu yina Yezu kusalaka sambu na kupesa Tata na yandi ya zulu kyese.

Yo vandaka kulomba kutambula kiteso ya bilumbu tatu katuka na kisika yina dibuta ya Yezu vandaka kuzinga sambu na kukwenda na Yeruzalemi, kisika kuvandaka tempelo ya kitoko ya Yehowa. Yezu kubingaka tempelo nde “nzo ya Tata na mono.” Yandi ti dibuta na yandi, bo vandaka kwenda kuna konso mvula sambu na kuta nkinsi ya Pake.

Na mvula mosi, ntangu Yezu kuvandaka na bamvula 12, dibuta na yandi yantikaka kuvutuka na bwala na bo na nima ya kuta nkinsi ya Pake. Bo kwisaka kubakisa nde Yezu kuvandaka ve kumosi ti bampangi mpi ti banduku na bo kaka na mpimpa ntangu bo kumaka na kisika yina ya bo zolaka kupema. Na mbala mosi, Maria ti Yozefi kuvutukaka na Yeruzalemi sambu na kusosa Yezu. Nge keyindula nde yandi vandaka na wapi?—

Bo kutaka Yezu na kati ya tempelo. Yandi vandaka kuwidikila balongi, mpi yandi vandaka kuyula bo bangyufula. Ebuna ntangu bo vandaka kuyula yandi bangyufula, yandi vandaka kupesa bamvutu. Bo vandaka kuyituka na kuwa bamvutu ya kitoko ya yandi vandaka kupesa. Keti nge kebakisa sambu na nki Nzambi kuvandaka na kyese sambu na Mwana na yandi?—

Nsukansuka ntangu Maria ti Yozefi kumonaka Yezu, ntima na bo kukitaka. Kansi Yezu vandaka kudiyangisa ve. Yandi zabaka nde tempelo kuvandaka kisika mosi ya mbote ya kuvanda. Yo yina yandi yulaka nde: “Beno zabaka ve nde mono fweti vanda na Nzo ya Tata na mono?” Yandi zabaka nde tempelo kuvandaka nzo ya Nzambi, mpi yandi vandaka kuzola kuvanda kuna.

 Na nima, Maria ti Yozefi kubakaka Yezu yina kuvandaka na bamvula 12 mpi bo vutukaka na Nazareti. Nge keyindula nde Yezu kuvandaka ti bikalulu ya nki mutindu na ntwala ya bibuti na yandi?— Biblia ketuba nde yandi landaka na “kulemfuka na bo.” Nge keyindula nde yo ketendula nde inki?— Yo ketendula nde yandi vandaka kuwila bo. Ee, yandi vandaka kusala bisalu yina bibuti na yandi vandaka kulomba yandi na kusala, ata bisalu bonso kukwenda kubaka masa na dibulu.—Luka 2:41-52.

Yo yina, yindula fyoti dyambu yai: Ata Yezu kuvandaka muntu ya kukuka, yandi vandaka kulemfukila bibuti na yandi ya kukonda kukuka. Keti yo pesaka Nzambi kyese?— Ee, sambu Ndinga ya Nzambi ketubila bana nde: “Beno bana, beno fweti wila batata ti bamama na beno.” (Efezo 6:1) Nge tapesa mpi Nzambi kyese kana nge kewila bibuti na nge, mutindu Yezu kusalaka.

Kima yankaka ya nge le sala sambu na kupesa Nzambi kyese kele yai: nge fwe tubilaka bantu yankaka mambu yina metala Nzambi. Bantu mingi le tuba nde yo kele ve kisalu ya bana ya fyoti fwete sala. Kansi, ntangu bantu kusosaka na kubuyisa bana ya fyoti yina vandaka kusala yo, Yezu kutubaka  nde: ‘Keti beno metangaka ntete ve na Mukanda ya Nzambi nde, “Nge me longaka bana yina ke nwaka mabele ya bamama na bo, ti bana ya nkaka, sambu bo kupesa nge lukumu”?’ (Matayo 21:16) Yo yina, beto yonso le tubila bantu yankaka mambu ya metala Yehowa mpi kumonisa bo nde yandi kele Nzambi mosi ya mbote mpenza, kana beto kezola mpenza kusala yo. Ebuna kana beto sala yo, beto tapesa Nzambi kyese.

Na nki kisika beto kelongukaka mambu ya Nzambi yina beto le longa mpi bantu yankaka?— Na ntangu beto kelongukaka Biblia na nzo. Kansi beto kelongukaka dyaka mambu mingi na kisika yina bantu ya Nzambi kevukanaka sambu na kulonguka. Kansi, inki mutindu beto le zaba bantu na yandi?—

Inki bantu kesalaka na balukutakanu na bo? Keti bo kelongaka mpenza mambu yina ke na Biblia? Keti bo ketangaka yo mpi ketendulaka yo? Si mutindu ya beto fwe wa mambu ya Nzambi kele yo yina, mpidina ve?— Na ntangu beto kekwendaka na balukutakanu ya Bukristu, beto ketulaka ntima nde beto tawa mambu ya Nzambi ketubaka, mpidina ve?— Kansi, inki nge tasala kana bantu kusonga nge nde yo kele mfunu ve nde nge zitisa mambu yina Biblia ketubaka? Keti nge tatuba nde bo kele bantu ya Nzambi?—

Tala kima yankaka ya nge fwete yindulula. Biblia ketuba nde bantu ya Nzambi kezolaka kuvanda bantu yina ya “lunga kuvanda na nkumbu [to, “zina”] na yandi.” (Bisalu 15:14, Luwawanu ya mpa) Sambu zina ya Nzambi kele Yehowa, beto lenda yula bantu kana Yehowa kele Nzambi na bo. Kana bo tuba nde ve, pana beto tabakisa nde bo kele ve bantu na yandi. Bantu ya Nzambi fwete zabisa mpi bantu yankaka mambu ya metala Kimfumu ya Nzambi. Bo fwete monisaka mpi zola na bo sambu na Nzambi na kuzitisaka bansiku na yandi.—1 Yoane 5:3.

Kana nge mezaba bantu ya kesalaka mambu yina yonso, nge fwete kwendaka kukutana ti bo sambu na kusambila Nzambi. Nge fwete widikilaka mbotembote mambu ya bo kelonga na balukutakanu yina mpi kupesa bamvutu na ntangu bo keyulaka bangyufula. Yezu kusalaka mutindu yina ntangu yandi vandaka na nzo ya Nzambi. Kana nge kesala mpidina, nge mpi tapesa Nzambi kyese, mutindu Yezu kusalaka.

 Keti nge le yindula bana yankaka ya kupesaka Nzambi kyese yina Biblia ketubila?— Timoteo kele mbandu mosi ya mbote mpenza. Tata na yandi vandaka kukwikila ve na Yehowa. Kansi, mama na yandi Enise mpi nkaka na yandi ya nkento Loise vandaka kukwikila na Yehowa. Timoteo kuwilaka bo mpi kulongukaka mambu ya metala Yehowa.

Ntangu Timoteo kuyelaka, ntumwa Polo kwendaka na bwala yina Timoteo vandaka kuzinga. Yandi monaka Timoteo mpi yandi bakisaka nde yandi vandaka kuzola mpenza kusadila Yehowa. Yo yina yandi bingaka Timoteo na kufidisa yandi sambu Timoteo kumona mpila ya kusadila Nzambi mingi dyaka. Bisika yonso ya bo vandaka kwenda, bo vandaka kutubila bantu mambu ya metala Kimfumu ya Nzambi ti Yezu.—Bisalu 16:1-5; 2 Timoteo 1:5; 3:14, 15.

Kansi, keti Biblia ketubilaka kaka bambandu ya bana ya babakala yina kupesaka Nzambi kyese?— Ve. Beto tadila mbandu ya mwana-nkento mosi ya Izraele yina kupesaka Nzambi kyese. Ntangu yandi vandaka na luzingu, dikanda ya Siria mpi ya Izraele kuvandaka bambeni. Kilumbu mosi, bantu ya Siria kunwanaka ti bantu ya Izraele mpi bo  nataka mwana-nkento yina ya fyoti na kimpika. Bo tindaka yandi na nzo ya mfumu ya basoda, yina bo vandaka kubinga nde Namani. Ntangu yandi kumaka kuzinga na nzo yango, yandi kumaka nsadi ya nkento ya Namani.

Namani kubelaka maladi yina bo kebingaka nde lepre. Ata munganga mosi ve kukaka kubelula yandi. Kansi, mwana-nkento yina ya bwala ya Izraele vandaka kukwikila nde profete mosi, yina kuvandaka nsadi ya nene ya Nzambi, takuka kusadisa Namani. Namani ti nkento na yandi vandaka kusambila ve Yehowa. Keti mwana-nkento yai zolaka kutubila bo mambu yina ya yandi zabaka? Kana yo vandaka nge, inki nge zolaka kusala?—

Mwana-nkento yina kutubaka nde: ‘Kana Namani kukwenda na profete ya Yehowa na Izraele, profete tabelula lepre na yandi.’ Namani kuwilaka mwana-nkento yina ya fyoti, mpi yandi kwendaka na profete ya Yehowa. Ntangu yandi salaka mambu yina profete kuzabisaka yandi na kusala, yandi belukaka. Mambu yai ya Namani kumonaka kupusaka yandi na kusambila Nzambi ya kyeleka.—2 Bantotila 5:1-15.

Keti nge tazola kusadisa muntu na kulonguka mambu ya Yehowa ti mambu yina yandi lenda sala, mutindu mwana-nkento yai kusalaka?— Inki muntu nge le sadisa na kisika yina nge kezingaka?— Ntembe kele ve nde na luyantiku bo le yindula nde bo kele ve ti mfunu ya lusadisu. Kansi, nge le monisa bo mambu ya kitoko ya Yehowa mesalaka. Bo le ndima yo mpi. Kana nge kesala mpidina, nge le tula mpenza ntima nde Nzambi tavanda na kyese.

Baleke lenda baka dyaka kikesa ya kusadila Nzambi na kyese na Nkunga 122:1; 148:12, 13; Longi 12:1; 1 Timoteo 4:12; mpi Baebreo 10:23-25.

[Bifwanisu ya kele na lutiti 213]

Inki mutindu Yezu kupesaka Nzambi kyese ntangu yandi vandaka mwana?

[Kifwanisu ya kele na lutiti 215]

Ata tata na yandi vandaka kukwikila ve na Nzambi, Timoteo kumonisaka luzolo ya kusala inki?

[Kifwanisu ya kele na lutiti 216]

Inki mutindu mwana-nkento yai ya Izraele kupesaka Nzambi kyese?