MBELA okaana kelipi kombada yedu ka li ka hafifa Jehova neenghono? —  Oka li Omona waye, Jesus. Natu ka kundafane kombinga yoinima oyo Jesus a li a ninga, oyo ya li ya hafifa Xe womeulu.

Oukwaneumbo wooJesus owa li hau ende olweendo lomafiku atatu okuya kuJerusalem oko kwa li otembeli yaJehova iwaiwa. Jesus okwa li ha ti otembeli oyo oyo ‘eumbo laXe.’ Jesus noukwaneumbo wavo ova li hava i kotembeli omudo keshe opo va ka dane Opaasa.

Omudo umwe eshi Jesus a li e na omido 12, oukwaneumbo wavo owa li tau di kOpaasa. Ovadali vaye ova li va didilika kutya Jesus ke mo mokati kovapambele nosho yo kookaume kaye eshi va li va kanghama ponhele yonhumba opo va li tava nangala. Diva Maria naJosef ova li va shuna kuJerusalem opo va ka konge Jesus. Mbela oto diladila kutya Jesus okwa li e li peni? — 

Ovadali vaJesus ova li ve mu hanga motembeli ta pwilikine kovahongi note va pula omapulo. Jesus okwa li yo ta nyamukula omapulo oo va li tave mu pula. Ovahongi ovo ova li va kuminwa omanyamukulo mawa oo Jesus a li te va pe. Mbela ou wete kutya omolwashike Kalunga a li a hafela Omona waye? — 

Maria naJosef ova li va hafa eshi va li va mona Jesus. Ashike Jesus ka li te lipula nasha, molwaashi okwa li e shi shii kutya otembeli onhele iwa nokukala. Onghee hano, okwa li a pula Maria naJosef a ti: ‘Oshike mwa konga nge? Kamu shi shii hamba nokutya Ame ndi nokukala meumbo laTate?’ Jesus okwa li e shi shii kutya otembeli oyo eumbo laKalunga, nokwa li e hole okukala mo.

Konima yaasho, Maria naJosef ova li va ya keumbo kuNasaret pamwe  naJesus, oo a li e na omido 12 pefimbo opo. Mbela oto diladila kutya Jesus okwa li ha ungaunga ngahelipi novadali vaye? —  Ombibeli oya ti kutya ‘okwa li ha dulika kuvo.’ Jesus okwa li ha ningi osho ovadali vaye tave mu lombwele, nokuli nongeenge a li ta pulwa a longe oilonga yomeumbo, ngaashi oku ka teka omeva. — Lukas 2:41-52, yelekanifa NW.

Onghee hano, diladila kwaashi: Nonande Jesus okwa li a wanenena, okwa li ha dulika kovadali vaye inava wanenena. Mbela osho osha li sha hafifa Kalunga? — Heeno osha li she mu hafifa, molwaashi Eendjovo daKalunga otadi lombwele ounona tadi ti: “Ounona nye, dulikeni kovakulunhu veni.” (Ovaefeso 6:1) Naave oto ka hafifa Kalunga ngeenge owa kala ho dulika kovadali voye, ngaashi Jesus a li a ninga.

Onghedi imwe vali omo to dulu okuhafifa Kalunga oyo okulombwela ovanhu kombinga yaye. Ndele ovanhu vamwe otashi dulika va tye kutya ounona inava pumbwa okulombwela ovanhu kombinga yaKalunga. Eshi ovanhu vamwe va li tava kendabala okukelela oumati vonhumba vaha lombwele ovanhu kombinga yaKalunga, Jesus okwa li e va lombwela a ti: “Inamu lesha hamba nande lumwe: Omomakanya ounona nouhanana we lilongela  ehambelelo?” (Mateus 21:16) Onghee hano, atusheni ohatu dulu okulombwela vamwe kombinga yaJehova nosho yo kutya Jehova oku li Kalunga mukumwifi, ngeenge otwa hala shili. Nongeenge otwa ningi ngaho, ohatu ka hafifa Kalunga.

Openi hatu dulu okulihonga kombinga yaKalunga opo tu dule okulombwela vamwe shi na sha naye? —  Okupitila mekonakonombibeli lopeumbo. Ndele ohatu dulu yo okulihonga shihapu keenhele oko haku ongala oshiwana shaKalunga opo shi konakone Ombibeli. Ndele mbela ongahelipi hatu dulu okushiiva ovanhu ovo ve li oshiwana shaKalunga? — 

Ovanhu vamwe ohava ningi shike ngeenge va ongala? Mbela ohava hongo ngoo shili osho shi li mOmbibeli? Ohava lesha ngoo Ombibeli noku i kundafana? Ohatu pwilikine kuKalunga okupitila mOmbibeli, hasho mbela? —  Pokwoongala kwopaKriste opo hatu dulu okuuda osho Kalunga ta ti, hasho mbela? —  Ndele oto ka ninga po shike ngeenge ovanhu vamwe ove ku lombwele kutya ino pumbwa okudulika kwaasho Ombibeli tai ti? Mbela oto ka tya ngoo kutya ovanhu va tya ngaho ove li oshiwana shaKalunga? — 

Apa ope na vali oshinima shimwe osho to dulu okudiladila kusho. Ombibeli oya ti kutya oshiwana shaKalunga osha “lukilwa edina laye.” (Oilonga 15:14, NW) Molwaashi edina laKalunga oJehova, ohatu dulu okupula ovanhu ngeenge Jehova oye Kalunga kavo. Ngeenge ova ti ahowe, opo nee otu shi shii kutya kave fi oshiwana shaKalunga. Oshiwana shaKalunga oshi na yo okukala tashi lombwele vamwe kombinga yOuhamba waKalunga. Ohashi ulike yo kutya oshi hole Kalunga mokudulika koipango yaye. — 1 Johannes 5:3.

Ngeenge ou shii ovanhu vonhumba ovo hava ningi oinima aishe oyo, ou na okukala ho ongala pamwe navo. Ou na okukala ho pwilikine nawa ngeenge u li pokwoongala nokuyandja omanyamukulo ngeenge tapa pulwa omapulo. Jesus naye osho a li ha ningi ngaho eshi a li ha i keumbo laKalunga. Ngeenge owa kala ho ningi ngaho, oto ka hafifa yo Kalunga, ngaashi ashike Jesus a li a ninga.

Mbela ou shii ounona vamwe ovo va popiwa mOmbibeli, ovo va li va  hafifa Kalunga? —  Timoteus oumwe womwaavo va li va hafifa Kalunga noku li oshihopaenenwa shiwa. Tate waye ka li a itavela Jehova. Ndele meme waye, Eunike, nosho yo meekulu waye Loide, ova li va itavela Jehova. Timoteus okwa li ha pwilikine kuvo ndele te lihongo kombinga yaJehova.

Eshi Timoteus a kula, omuyapostoli Paulus okwa li e uya okutalela po koshilando shooTimoteus. Paulus okwa li a mona kutya Timoteus okwa hala okulongela Jehova neenghono. Onghee hano, Paulus okwa li a pula Timoteus a ye pamwe naye va ka longele Kalunga oilonga ihapu. Ova li va lombwela ovanhu kombinga yOuhamba waKalunga nosho yo yaJesus keshe opo va li va ya. — Oilonga 16:1-5; 2 Timoteus 1:5; 3:14, 15.

Ndele mbela mOmbibeli omu na ashike oihopaenenwa yovamati ovanyasha ovo va li va hafifa Kalunga? —  Ahowe, omu na yo youkadona ovanyasha. Diladila kokakadona okanyasha Okaisrael oko ka li ka hafifa Kalunga. Pefimbo lako, (Ovaarami) Ovasiria nosho yo Ovaisrael kava li ve holafane. Efiku limwe Ovasiria ova li va lwifa Ovaisrael ndele tava kwata po okakadona oko. Okakadona oko oka li ka twalwa  keumbo londjai yoita, yedina Naeman, ndele taka ka ninga okapiya komukulukadi waNaeman.

Naeman okwa li e na oudu woshilundu, nokapa li ndokotola ta dulu oku mu hakula. Ndele okakadona oko okanyasha ka dja kuIsrael oka li ka itavela kutya omupiya waKalunga umwe e likalekelwa, omuprofeti, okwa li ta dulu okukwafela Naeman. Ashike Naeman nomukulukadi waye kava li hava longele Jehova. Mbela okakadona oko oka li take ke va lombwela osho ke shii? Mbela ngeno okwa li oove ngeno owa ninga po shike? — 

Okakadona oko kanini oka li ke va lombwela ka ti: ‘Ngeno Naeman okwa li ta i komuprofeti waJehova kuIsrael, ngeno ota ka velulwa koudu waye woshilundu.’ Naeman okwa li a pwilikina kokakadona oko, ndele ta i komuprofeti waJehova. Eshi Naeman a li a ninga ngaashi omuprofeti a li e mu lombwela, okwa li a veluka koudu waye woshilundu. Osho osha li she linyengifa Naeman a ninge omulongeli waKalunga kashili. — 2 Eehamba 5:1-15.

Mbela owa hala okukwafela umwe e lihonge kombinga yaJehova nosho yo osho Jehova ha dulu okuninga, ngaashi okakadona oko okanyasha ka li ka ninga? —  Oolyelye to dulu okukwafela? —  Ovanhu otashi dulika tete va kale ve wete inava pumbwa ekwafo. Ndele oto dulu okupopya navo kombinga yoinima iwa oyo Jehova ha ningi, notashi dulika va pwilikine kwoove. Kala u na oushili kutya osho otashi ka hafifa Kalunga.