MEERAQ kina Jehovamik nuannaartitsinerpaasimava? — Taassuma ernera, Jiisusi. Tusassavat Jiisusi Ataatani qilammiusoq nuannaartinniarlugu ilaatigut qanoq iliortoq.

Jiisusi meeraagallarami ilaquttanilu Jerusalemimiit, Jehovap naalaffiata kusanartup inissisimaffianit, ulluni pingasuni angalasarialittut ungasitsigisumi najugaqarput. Jiisusip naalaffik taasarpaa ‘Ataatama illua’ (NV). Ukiut tamaasa ilaquttanilu tassunga poorskisioriartortarput.

Jiisusi 12-inik ukioqartoq ilaqutariit poorskisioreeramik pisarnermissut angerlamut aallarput. Unnukkulli unikkamik Jiisusip angajoqqaavisa malugilerpaat Jiisusi ilaqutaminniinnanilu ikinngutiminniinngitsoq. Maria Josefilu tuaviorlutik Jerusalemimut uterput ujariartorlugu. Sumiissoraajuk? —

Naalaffimmi nanivaat. Tassani ajoqersuisunut tusarnaarpoq aperisarlunilu. Ajoqersuisut aamma aperisarpaat, akisinnaasarpaalu. Akilluartarmat tupigusupput. Paasisinnaavat sooq Guutip ernini nuannaarutigigaa, ilaa? —

Soorunami Mariamut Josefimullu Jiisusip naninera assut oqiliallannarpoq. Jiisusili annilaangasimanngilaq. Nalunngilaa naalaffik najussallugu pitsaasuusoq. Taamaattumik aperai: ‘Nalugassiuk Ataatama illuaniittariaqartunga?’ Jiisusip nalunngilaa naalaffik Guutip illorigaa, tassaniillunilu nuannaraa.

Mariap Josefillu Jiisusi 12-inik ukiulik Nazaretimut angerlaqatigaat. Jiisusi angajoqqaaminut qanoq pissusilersorsimasoraajuk? — Biibilimi  nanginnerani allassimavoq ‘naalakkai’. Jiisusip ataatami anaanamilu peqqussutai naalattarpai, assersuutigalugu puilasuliamit imertaqquppanni. — Lukasi 2:41-52.

Una eqqarsaatigeriaruk: Jiisusi naammalluinnartuugaluarluni angajoqqaani naammalluinnanngitsut naalattarpai. Guutip tamanna nuannaraa? — Tamanna qularnanngilluinnarpoq, meeqqanummi ima peqqussuteqarpoq: “Angajoqqaasi naalassigit.” (Efesosimiut 6:1) Angajoqqaatit naalakkukkit Jehova nuannaartissavat, soorlu Jiisusi taamaaliortoq.

Aamma Jehova nuannaartissinnaavat allanut eqqartorlugu. Immaqa ilaat oqassapput: ‘Meeqqat Guuti pillugu allanut oqaluttuartussaanngillat.’ Aamma Jiisusip nalaani taama oqartoqartarpoq. Taamali oqartut Jiisusip ima oqarfigai: ‘Allakkani imaattut atuannginnassigit: “Guuti meeraaqqanit unnersiutigineqassaaq”?’ (Matthæusi 21:16) Oqaluttuarusukkutta Jehova qanorlu pitsaalluinnartiginera pillugit allat oqaluttuussinnaavavut. Taamaaliorutta nuannaartissavarput.

Allanut eqqartorsinnaasatsinnik Guuti pillugu  ilikkagaqarumalluta qanoq iliussaagut? — Angerlarsimaffitsinni Biibili atuarlugulu atuaqqissaassavarput. Sulilu Guuti pillugu ilikkagaqarnerussaagut atuaqqissaarniarluta Guutip innuttai ilagisarutsigit. Kikkorpiaappammi Guutip innuttai? —

Kristumiutut ataatsimiinnermi Guutip innuttai ilaginerlugit paaserusukkaanni, ima aperisoqarsinnaavoq: Ilagiikkaangamik sulerisarpat? Ilumut Biibilimi allassimasut oqaluuserisarpaat? Nipituumik Biibili atuartarpaat qanorlu isumaqarnera oqaloqatigiissutigalugu? Taamaalillutami Guuti tusarnaartarparput, ilaa? — Kristumiutut ataatsimiikkaangatta naatsorsuutigisarparput Guuti qanoq oqarnersoq tusassallugu, ilaa? — Taavami oqartoqarpat Biibilimi allassimasut malillugit inuusariaqanngitsugut? Taava isumaqarpit Guutip innuttai ilagalugit? —

Aamma alla eqqarsaatigisariaqarparput. Biibilimi allassimavoq Guutip innuttai ‘aqqanut innuttaassasut’. (Apustilit Suliaat 15:14) Guutip aqqa tassaavoq Jehova, soorlu nalunngikkit. Taamaammat inuit aperisinnaavavut Guutiat Jehovamik ateqarnersoq. Naaggaarpata taava nalussanngilarput Guutip innuttarinngikkai. Nalunngilarpullu Guutip innuttaasa allanut taassuma naalagaaffia oqaluuserisaraat. Aammattaaq Guuti asallugu takutissavaat piumasaanik iliornermikkut. — 1 Johannesi 5:3.

Nalunngisaqarutta taamatut iliortunik taava taakku ilagissavavut Guutimillu pallorfiginneqatigissallugit. Taamaaliortarpugut naalagaaffilersaarfimmi ataatsimiikkaangatta. Ataatsimiinnerni tusarnaarluartariaqarputit aperisoqaraangallu akiniartarlutit. Jiisusi Guutip illuaniikkami taamaaliorpoq. Taamaalioruit Jehova nuannaartissavat, soorlu Jiisusi taamaaliortoq.

Meeqqanik allanik Biibilimi allaatigineqartunik Guutimik nuannaartitsisunik nalunngisaqarpit? — Timotheusi maligassaalluarpoq. Ataataata Jehova upperinngilaa. Anaanaatali, Eunikemik ateqartup,  aanaatalu, Loisip, upperaat. Timotheusip taakku tusarnaartarpai Jehovamillu ilinniarfigalugit.

Timotheusi inuusuttunngormat apustili Paulusi illoqarfiannut tikeraarpoq. Malugaa Timotheusip ilumut Jehovap kiffartorfiginissaa kissaatigigaa. Taamaattumik aallaqqilerami Timotheusi aperaa angalaqatigiumaneraani; taava Guuti suli annerusumik kiffartorfigisinnaassavaa. Angalaqataajumavoq, sumilu tamaani angalallutik tikiffimminni, Guutip naalagaaffianik Jiisusimillu inuit oqaluttuuttarpaat. — Apustilit Suliaat 16:1-5; 2 Timotheusi 1:5; 3:14, 15.

Biibilimi nukappiaraannaat Guutimik nuannaartitsisut eqqartorneqarpat? — Maanna niviarsiarannguamik Israelikkuusumik Guutimik nuannaartitsisumik oqaluttuutissavakkit. Taamani taanna inuutillugu inoqarpoq Aramæerinik taaguutilinnik; Israelikkunnut akeraapput. Ullut ilaanni Aramæerit Israelikkunnut sorsutsillutik niviarsiarannguaq taanna tigusaraat. Sakkutuut naalagaata Na’amanip illuanukaappaat. Tassani sakkutuut naalagaata nulianut kiffaassaaq.

 Na’amani nappaateqarpoq pupinnermik taaneqartartumik. Nakorsap arlaannaataluunniit ikiorsinnaasimanngilaa. Niviarsiarannguarli Israelikkuusoq qulanngilluinnarpoq Guutip immikkut ittumik kiffaasa ilaata, pruffiitit ilaata, Na’amani ikiorsinnaagaa. Sakkutuut naalagaata nuliatalu soorunami Jehova pallorfiginngilaat. Niviarsiarannguup nalunngisaminik oqaluttuutissavai? Illit qanoq iliussagaluarpit? —

Niviarsiarannguaq ima oqarpoq: ‘Na’amani Israelimut Jehovap pruffiitianukartuugaluaruni pupinnerminit ajorunnaartitaassagaluarpoq.’ Na’amanip niviarsiaraq tusarnaarpaa Jehovallu pruffiitianukarluni aallarluni. Pruffiitillu oqaasii malillugit iliorami aaqqippoq! Taamaalilluni Na’amanip Guuti ilumoortoq pallorfigilerpaa. — 2 Kunngit 5:1-15.

Allat Jehova pillugu sapinngisarpassuilu pillugit ilisimasaqalernissaannik ikiorusukkaluarpigit, soorlu niviarsiarannguaq taamaaliortoq? — Illit kikkut ikiorsinnaavigit? — Inuit ikiorusutatit immaqa isumaqarput ikiorneqarnissartik pisariaqartinnagu. Jehovalli ajunngitsuliarpassuinik oqaluttuussinnaavavut. Immaqa tusarnaarumassapput. Qularissanngilat tamanna Jehovap nuannaarutigissagaa.