Kauhanyo 41

Banana Ba Ba Tabisa Mulimu

KI UFI mwana fa lifasi y’o bona wena kuli n’a tabisize hahulu Jehova?— N’e li Mwan’a hae, Jesu. Ha lu ambole ka za lika za n’a ezize Jesu kuli a tabise Ndat’ahe wa kwa lihalimu.

Lubasi lwa habo Jesu ne lu pila mwa sibaka se si eza musipili wa mazazi a malalu ku zwa mwa Jerusalema, mo ne ku inzi tempele ye nde ya Jehova. Jesu n’a ize tempele yeo n’e li “ndu ya Ndate.” Yena ni ba mwa lubasi lwa habo ne ba yanga teñi ka silimo ni silimo kuli ba y’o fumaneha kwa mukiti wa Paseka.

Silimo se siñwi, Jesu ha n’a li wa lilimo ze 12, lubasi lwa habo lwa tama musipili wa ku kuta habo bona mukiti wa Paseka ha s’o felile. Ha ba t’o yemanga kuli ba pumule busihu, ba lemuha kuli Jesu n’a siyo mwahal’a bahabo bona ni balikani. Kacwalo, honaf’o, Maria ni Josefa ba kutela kwa Jerusalema kuli ba y’o bata Jesu. Wena u li n’a inzi kai?—

Ne ba fumani Jesu mwa tempele. N’a sweli ku teeleza kwa baluti, mi n’a sweli ku ba buzaka lipuzo. Mi ha ne ba mu buza nto ye ñwi, n’a ba alaba. Ne ba komokisizwe ki likalabo ze nde za n’a sweli ku ba fa. Kana wa kona ku bona libaka Mulimu ha n’a tabezi Mwan’a hae?—

Bo Maria ni Josefa ha ba y’o fumananga Jesu, ne ba ikutwile hande hahulu. Kono yena Jesu n’a si ka bilaela. N’a ziba kuli tempele n’e li sibaka se sinde sa ku fumaneha teñi. Kacwalo a buza kuli: “Ne mu sa zibi kuli ni lukela ku ba mwa ndu ya Ndate?” N’a  ziba kuli tempele n’e li ndu ya Mulimu, mi n’a lata ku ba kwateñi.

Hasamulaho, bo Maria ni Josefa ba kuta ni Jesu wa lilimo ze 12 habo kwa Nazareta. Wena u li Jesu n’a ezize cwañi bashemi ba hae?— Bibele i li “a zwelapili ku ipeya kwatas’a bona.” Ku wena, ku eza cwalo ku talusañi?— Ku talusa kuli n’a ba utwa. Ee, n’a ezize ze ne ba mu bulelelanga bashemi ba hae, niha ne ba ka mu bulelela ku y’o ka mezi kwa lisima.—Luka 2:41-52, NW.

Kacwalo, nahana ka za se: Nihaike Jesu n’a petehile, n’a utwanga bashemi ba hae ba ba si ka petahala. Kana ku eza cwalo ne ku tabisize Mulimu?— Kaniti luli ne ku mu tabisize, kakuli Linzwi la Mulimu li bulelela bana kuli: “Mu utwe bashemi ba mina.” (Maefese 6:1) Ni wena u ka tabisa Mulimu ha u utwa bashemi ba hao, sina Jesu ha n’a utwile bashemi ba hae.

Nzila ye ñwi y’o kona ku tabisa Mulimu ka yona ki ka ku bulelela ba bañwi ka za hae. Kono batu ba bañwi ba kana  ba bulela kuli w’o haki musebezi o ba swanela ku eza banana. Kono batu ha ne ba likile ku tuhelisa tushimani cwana ku eza cwalo, Jesu n’a ize: “Ibo mina ha mu si ka bala taba ye li: Ka milomo ya bana, ni ya ba ba anya, u fumani milumbeko ye petehile?” (Mateu 21:16) Kacwalo, kaufel’a luna lwa kona ku bulelela ba bañwi ka za Jehova ni ka za bunde bwa hae, haiba luli lwa tabela ku eza cwalo. Mi ha lu eza cwalo, lu ka tabisa Mulimu.

Ki kai ko lu ituta za Mulimu ze lu kona ku bulelela ba bañwi?— Ki kwa tuto ya luna ya Bibele kwa ndu ya luna. Kono lu ituta ze ñata kwa sibaka k’o batu ba Mulimu ba kopanela kuli ba itute. Lu kona ku ziba cwañi batu ba hae?—

Batu ba ezangañi kwa mikopano ya bona? Kana luli ba lutanga ze mwa Bibele? Kana ba i balanga ni ku i buhisana? Ki mona mo lu utwela Mulimu cwalo, nji cwañi?— Mi kwa mikopano ya Sikreste, lu libelela ku utwa z’a bulela Mulimu, nji cwañi?— Kono ku cwañi batu ha ne ba ka bulela kuli ha u tokwi ku pila ka mo i bulelela Bibele? Kana n’o ka li batu bao ki batu ba Mulimu?—

Ki ye nto ye ñwi ya ku nahana. Bibele i li batu ba Mulimu neikaba “sicaba sa libizo la hae.” (Likezo 15:14, NW) Bakeñisa kuli libizo la Mulimu ki Jehova, lwa kona ku buza batu haiba Jehova ki yena Mulimu wa bona. Ha ba li haki yena, fohe lwa ziba kuli haki batu ba hae. Batu ba Mulimu hape ne ba ka bulelela ba bañwi ka za Mubuso wa Mulimu. Mi ne ba ka bonisa kuli ba lata Mulimu ka ku latelela litaelo za hae.—1 Joani 5:3.

Haiba wa ziba batu ba ba eza zeo kaufela, fohe u lukela ku kopana ni bona kwa mikopano ya bona ya ku lapela. U lukela ku teeleza ka tokomelo kwa mikopano yeo ni ku fa likalabo ha ku buziwa lipuzo. Jesu n’a ezize cwalo ha n’a li mwa ndu ya Mulimu. Mi ha u eza lika zeo, u ka tabisa Mulimu, sina Jesu ha n’a mu tabisize.

Kana wa kona ku hupula banana ba bañwi ba ba bulezwi mwa Bibele  be ne ba tabisize Mulimu?— Timotea ki mutala o ipitezi. Ndat’ahe n’a si mulumeli wa Jehova. Kono m’ahe, yena Eunise n’a li mulumeli, mi ni Loisi kukw’a hae ni yena n’a li mulumeli. Timotea n’a ba utwanga mi n’a itutile ka za Jehova.

Timotea ha n’a hulile, muapositola Paulusi n’a potezi munzi mwa n’a pila Timotea. N’a lemuhile kuli Timotea n’a lata luli ku sebeleza Jehova. Kacwalo a mema Timotea ku ya ni yena ilikuli Timotea a sebeleze Mulimu hahulu ni ku fita. Ko ne ba zamaela kaufela, ne ba bulelela batu ka za Mubuso wa Mulimu ni ka za Jesu.—Likezo 16:1-5; 2 Timotea 1:5; 3:14, 15.

Kono kana mwa Bibele ku na ni fela mitala ya bashimani be ne ba tabisize Mulimu?— Kutokwa. Ki wo mutala wa kasizana ka Muisilaele ke ne ka tabisize Mulimu. Ha ne ka pila, sicaba sa Asirya ni sicaba sa Isilaele ne ba li lila. Zazi le liñwi, Maasirya ba lwanisa Maisilaele ni ku isa kasizana kao mwa butanga. Ne ka isizwe kwa ndu ya nduna wa mpi, wa libizo la Naamani. Teñi,  ka t’o ba katanga ka musal’a Naamani.

Cwale, Naamani n’a kula butuku bwa mbingwa. Ha ku na mualafi ya n’a konile ku mu tusa. Kono kasizana kao ka kwa Isilaele ne ka lumela kuli mutanga yo muñwi ya ipitezi wa Mulimu, ili mupolofita, n’a kona ku tusa Naamani. Ki niti kuli Naamani ni musal’a hae ne ba si balapeli ba Jehova. Kana kasizana kao ne ka ka ba bulelela ze ne ka ziba? Wena n’o ka ezañi?—

Kasizana kao ne ka ize: ‘Kambe Naamani n’a ka ya ku mupolofita wa Jehova mwa Isilaele, f’o Naamani n’a ka foliswa kwa mbingwa ya hae.’ Naamani a utwa kasizana kao, mi a ya ku mupolofita wa Jehova. Ha n’a ezize sa n’a mu bulelezi mupolofita, a foliswa. Kabakaleo, Naamani a ba mulapeli wa Mulimu wa niti.—2 Malena 5:1-15.

Kana wa tabela ku tusa mutu yo muñwi ku ituta za Jehova ni ka z’a kona ku eza, sina kasizana kao ha ne ka ezize cwalo?— U kona ku tusa bomañi?— Ki niti kuli pili ba kana ba ikutwa kuli ha ba tokwi tuso. Kono wa kona ku ba ambota ka za lika ze nde z’a eza Jehova. Mi mwendi ba ka teeleza. Wa kona ku kolwa kuli u ka tabisa Mulimu ha u eza cwalo.

Susuezo ye ñwi kwa banana ya ku tabela ku sebeleza Mulimu i kona ku fumanwa kwa Samu 122:1; 148:12, 13; Muekelesia 12:1; 1 Timotea 4:12; ni Maheberu 10:23-25.

[Siswaniso se si fa likepe 213]

Jesu ha n’a sa li mwanana n’a tabisize cwañi Mulimu?

[Siswaniso se si fa likepe 215]

Nihaike ndat’ahe n’a si mulumeli, ki sifi seo Timotea n’a bata ku eza?

[Siswaniso se si fa likepe 216]

Kasizana ka Muisilaele ka ne ka tabisize cwañi Mulimu?