MMUANA kayi pa buloba uudi mumone ne: uvua musankishe Yehowa bikole menemene?​— Uvua Muanende Yezu. Tuanji kumona malu avua Yezu muenze bua kusankisha Tatuende wa mu diulu.

Dîku dia ba Yezu divua disombele mu musoko uvua mutantshi wa luendu lua matuku asatu ne ku Yelushalema, muaba uvua ntempelo mulenga wa Yehowa. Yezu wakabikila ntempelo au ne: ‘Nzubu wa Tatu wanyi.’ Yeye ne dîku diabu bavua bayamu tshidimu tshionso bua kubuela mu difesto dia Kupita kua Yehowa anyi Pasaka.

Tshidimu tshikuabu, pavua Yezu muikale ne bidimu 12, dîku diabu divua diumbukila ku Yelushalema kunyima kua difesto dia Kupita kua Yehowa. Butuku, padibu bafika muaba udibu ne bua kulala ke padibu bamona ne: Yezu kênaku to, kêna ni nkudi balela babu ni nkudi balunda babu. Anu apu, Mariya ne Yozefe badi bapingana ku Yelushalema bua kumukeba. Udi wela meji ne: uvua penyi?​—

Bakasangana Yezu mu ntempelo. Uvua uteleja balongeshi ne ubela nkonko. Nenku pavuabu bamuela lukonko, uvua anu wandamuna. Bavua bakema bua mandamuna mimpe avuaye ufila. Udi umona bua tshinyi Nzambi uvua umvua disanka bua Muanende anyi?​—

Ndekelu wa bionso padi Mariya ne Yozefe bapeta Yezu, badi batukija mioyo ya munda. Kadi Yezu kavua mumone bu bualu to. Uvua mumanye ne: kuikala mu ntempelo kuvua bualu buimpe. Ke bualu kayi wakebeja ne: ‘Kanuvua bamanye ne: ndi ne bua kuikala mu nzubu wa Tatu wanyi anyi?’ Uvua mumanye ne: ntempelo uvua nzubu wa Nzambi, ne uvua usanka bua kuikalamu.

 Pashishe, Mariya ne Yozefe badi bapingana ne Yezu mutshikale ne bidimu 12 kumbelu mu Nazaleta. Udi wela meji ne: Yezu uvua wangata baledi bende bishi?​— Bible udi wamba ne: ‘wakatungunuka ne kutumikila mêyi abu.’ Mbuena kuamba ne: uvua ubatumikila. Eyowa, uvua wenza tshivua baledi bende bamulomba, nansha bua kuya kusuna mâyi ku tshina tshia mâyi.​—Luka 2:41-52.

Nunku ela meji pa bualu ebu: Nansha muvua Yezu mupuangane, uvua utumikila baledi bende bavua bantu bapange bupuangane. Bualu ebu buvua busankishaku Nzambi anyi?​— Eyowa, bualu Dîyi dia Nzambi didi dibela bana ne: ‘Tumikilayi baledi benu.’ (Efeso 6:1) Wewe pebe udi mua kusankisha Nzambi paudi utumikila baledi bebe anu bu muvua Yezu muenze.

Mushindu mukuabu uudi mua kusankisha Nzambi nkuambila bakuabu malu adi amutangila. Kadi bantu bakuabu badi mua kuamba ne: ebu ki mbualu budi bukumbanyine bana to. Kadi pavua bantu batete mua kupumbisha bana bua kuambila bantu bakuabu malu adi atangila Nzambi, Yezu wakamba ne: ‘Kadi nuenu kanuakabala dîyi ne:  Wewe wakajadika butumbi buebe mukana mua bana bakese ne mua badi bamua mabele anyi?’ (Matayo 21:16) Nanku tuetu basue bulelela, tuetu bonso tudi mua kuambila bakuabu malu a Yehowa ne kubaleja ne: udi Nzambi wa malu a dikema. Tuetu benze nunku, netusankishe Nzambi.

Nkuepi kutudi tulongela malu a Nzambi atudi mua kuambila bantu bakuabu?​— Mu dilonga dietu dia Bible dia kumbelu. Kadi tudi tulonga bia bungi muaba udi bantu ba Nzambi badisangishila bua kulonga. Kadi mmushindu kayi utudi mua kumanya bantu bende?​—

Ntshinyi tshitu bantu aba benza mu bisangilu biabu? Batu balongesha menemene malu adi mu Bible anyi? Batu babala Bible peshi bayukidilangana malu adimu anyi? Kuenza nanku ke mushindu utudi tuteleja Nzambi, ki mmuomu anyi?​— Nenku mu bisangilu bia bena Kristo katuenaku tutekemena bua kumvua tshidi Nzambi wamba anyi?​— Kadi netuambe tshinyi bikala bantu bamba ne: kabiena bikengela kuenza malu adi Bible wamba to? Newambe ne: bantu abu mbantu ba Nzambi anyi?​—

Tuele kabidi meji pa bualu ebu. Bible udi wamba ne: bantu ba Nzambi badi ne bua kuikala ne ‘dîna diende.’ (Bienzedi 15:14) Bu mudi dîna dia Nzambi dikale Yehowa, tudi mua kuebeja bantu abu ne: Yehowa Nzambi wenu anyi? Buobu bambe ne: tòo, nanku bidi bileja ne: ki mbantu bende to. Bantu ba Nzambi badi kabidi mua kuambila bakuabu malu adi atangila Bukalenge bua Nzambi. Ne badi ne bua kuleja ne: mbanange Nzambi padibu balama mikenji yende.​—1 Yone 5:3.

Wewe mumanye bantu badi benza malu onso aa, udi mua kudisangisha nabu bua kutendelela Nzambi. Udi ne bua kuteleja ne ntema yonso malu adibu bamba mu bisangilu abi ne kuandamuna nkonko idibu bela. Ke tshivua Yezu muenze pavuaye mu nzubu wa Nzambi. Wewe muenze nenku, neusankishe Nzambi anu muvua Yezu mumusankishe.

 Udi mua kuvuluka bana bakuabu badibu batele mu Bible bavua basankishe Nzambi anyi?​— Timote udi tshilejilu tshia pa buatshi. Tatuende kavua mutendeledi wa Yehowa to. Kadi mamuende Eunike ne kakuende mukaji Loi (muledi wa mamuende) bavua batendelela Yehowa. Timote uvua ubateleja ne ulonga malu adi atangila Yehowa.

Pakakola Timote, mupostolo Paulo wakalua mu tshimenga tshivuaye musombele. Wakamona muvua Timote musue kuenzela Yehowa mudimu. Nanku wakalomba Timote bua kuya nende bua kuenzela Nzambi mudimu wa bungi. Miaba yonso ivuabu baya, bavua bambila bantu malu adi atangila Bukalenge bua Nzambi ne adi atangila Yezu.​—Bienzedi 16:1-5; 2 Timote 1:5; 3:14, 15.

Kadi mu Bible mudi anu bilejilu bia bana ba balume patupu bavua basankisha Nzambi anyi?​— Nansha kakese. Tangila tshilejilu tshia nsongakaji muena Isalele wakasankisha Nzambi. Mu tshikondo tshivuaye ne muoyo, tshisamba tshia bena Sulia ne tshia Isalele bivua biluishangana. Dituku dikuabu bena Sulia bakaluisha bena Isalele ne kukuatabu muana wa bakaji au ku bupika. Bakamutuma kumbelu  kua mfumu wa basalayi, dîna diende divua Nâmana. Muana wa bakaji eu wakalua muena mudimu wa mukaji wa Nâmana.

Mpindieu Nâmana uvua ne disama dia nsudi. Baminganga bonso bakapangila bua kumuondopa. Kadi nsongakaji au muena Isalele uvua witabuja ne: muprofete mukuabu musadidi wa Nzambi wa pa buende uvua mua kuondapa Nâmana. Bushuwa, Nâmana ne mukajende kabavua batendelela Yehowa to. Muana wa bakaji au uvua ne bua kubambila tshivuaye mumanye anyi? Kadi wewe, uvua ne bua kuikala muenze tshinyi?​—

Muana mukese wa bakaji au wakamba ne: ‘Bu Nâmana mua kuya kudi muprofete wa Yehowa udi mu Isalele, nebuondope Nâmana nsudi yende.’ Nâmana wakateleja muana wa bakaji au, ne kuyaye kudi muprofete wa Yehowa. Pakenzaye tshivua muprofete mumuambile bua kuenza, wakumvua bimpe. Bua bualu ebu Nâmana wakalua musadidi wa Nzambi mulelela.​—2 Bakelenge 5:1-15.

Udi musue kuambuluisha muntu bua kulonga malu adi atangila Yehowa ne bidiye mua kuenza, bu muvua muana wa bakaji au muenze anyi?​— Nnganyi uudi mua kuambuluisha?​— Musangu wa kumpala bantu kabena mua kuela meji ne: badi dijinga ne diambuluisha to. Kadi udi mua kubambila malu mimpe adi Yehowa wenza. Ne badi mua kuteleja. Udi mua kuikala mutuishibue ne: bualu ebu nebusankishe Nzambi.