NI MWANA ki omu nsi ou orikumanya owaashemeize Yehova munonga?— Omwana we Yesu. Ka tugambe aha bintu ebi Yesu yaakozire okushemeza Ishe ow’omu iguru.

Okuruga Yerusaalemu ahu hekalu ya Yehova eboneire munonga yaabaire eri, okuhika ei abazaire ba Yesu baabaire nibatuura hakaba hariho orugyendo rw’ebiro nka bishatu. Yesu akeeta hekalu egyo “enju ya Tata.” We n’ab’omu ka ei yaabaire naarugamu, buri mwaka bakaba bazayo aha Bugyenyi bw’Okuhingurwaho.

Obu Yesu yaabaire aine emyaka 12, we n’ab’omu ka ei yaabaire naarugamu bakaba nibagaruka omuka bwanyima y’Obugyenyi bw’Okuhingurwaho. Ku baahikire ahu baabaire nibaza kuraara bayetegyereza ngu Yesu akaba atari nabo kandi atari n’abanyabuzaare nari banywani baabo. Ahonaaho Mariamu na Yosefu bakagaruka Yerusaalemu kuronda Yesu. Nooteekateeka ngu akaba ari nkahi?—

Bakashanga Yesu omuri hekalu. Akaba ahurikiize abeegyesa, kandi arikubabuuza ebibuuzo. Kandi ku baabaire bagira eki baamubuuza, akaba akigarukamu. Bakatangaarira eby’okugarukamu bye. Nooreeba enshonga ahabw’enki Ruhanga yaashemeziibwe ebi Omwana we yaabaire naakora?—

Buzima, Mariamu na Yosefu ku baaboine Yesu, bakahurira gye. Kwonka Yesu we akaba ateerarikiriire. Akaba naamanya ngu hekalu n’omwanya murungi gw’okuzamu. N’ahabw’ekyo akababuuza ati: “Timurikumanya ku nshemereire kuguma omu nju ya Tata?” Akaba naamanya ngu hekalu n’enju ya Ruhanga, kandi akaba naakunda kugibamu.

 Bwanyima, Mariamu na Yosefu bakatwara Yesu baagaruka omuka Nazareesi. Nooteekateeka ngu Yesu akaba naatwariza ata abazaire be?— Baibuli neegira ngu ‘akaguma naaboorobera.’ Nooteekateeka ngu ekyo nikimanyisa ki?— Nikimanyisa ngu akaba akora eki abazaire be baabaire bamugambira kukora, n’obu kwakubaire okutaha amaizi ah’eiziba.​—Luka 2:41-52.

Teekateeka ahari eki: N’obu Yesu araabe yaabaire ahikiriire, akoorobera abazaire be abaabaire batahikiriire. Mbwenu shi ekyo kikashemeza Ruhanga?— Hatariho kubanganisa kikamushemeza, ahabw’okuba Ekigambo kya Ruhanga nikigambira abaana kiti: “Mworobere abazaire baanyu.” (Abaefeso 6:1) Naiwe noija kushemeza Ruhanga waayorobera abazaire baawe, nk’oku Yesu yaakozire.

Omuringo ogundi ogu orikubaasa kushemezamu Ruhanga n’okugambira abandi ebirikumukwataho. Abantu abamwe nibabaasa kugira ngu ekyo tikishemereire kukorwa abaana. Kwonka abantu ku baateireho kuzibira aboojo bato kukora ekyo, Yesu akagira ati: ‘Imwe timukashomaga ngu, omu kanwa  k’abaana bato Ruhanga akatamu okuhimbisa?’ (Matayo 21:16) N’ahabw’ekyo, buzima twena twaba nitwenda, nitubaasa kugambira abandi ebirikukwata ahari Yehova n’aha burungi bwe. Twakora ekyo, nitwija kushemeza Ruhanga.

Ebintu ebirikukwata ahari Ruhanga ebi turikubaasa kugambira abandi nitubyegyera nkahi?— Omu kwega Baibuli omuka. Kwonka ebirikukiraho nitubyegyera omu mwanya ogu abantu ba Ruhanga barikweteeraniramu kwega. Kwonka shi nitubaasa kumanya tuta abantu be?—

Niki eki abantu barikuba nibakora omu nteerane zaabo? Buzima nibeegyesa ebiri omu Baibuli? Mbwenu shi nibagishoma kandi bagigaaniiraho? Ebyo nibyo twine kukora okubaasa kuhurikiza Ruhanga, tikwo?— Kandi omu nteerane z’Ekikristaayo nituba twine amatsiko g’okuhurira ebi Ruhanga arikugamba, tikwo?— Kwonka shi abantu ku baakugira ngu toine kutwaza amagara gaawe nk’oku Baibuli erikugamba? Okaagira ngu n’abantu ba Ruhanga?—

Hariho ekindi eki tushemereire kuteekateekaho. Baibuli neegira ngu abantu ba Ruhanga bakaba nibaija kuba ‘abantu abarikwetererwa eiziina rye.’ (Ebyakozirwe 15:14) Obu eiziina rya Ruhanga riri Yehova, nitubaasa kubuuza abantu yaaba Yehova niwe Ruhanga waabo. Baagira ngu ngaaha, obwo nitumanya ngu ti bantu be. Abantu ba Ruhanga kandi baine kuba nibagambira abandi aha Bukama bwa Ruhanga. Kandi baine kworeka ngu nibakunda Ruhanga barikworobera ebiragiro bye.​—1 Yohaana 5:3.

Waaba noomanya abantu abarikukora ebintu ebyo byona, oshemereire kweteerana nabo omu kuramya Ruhanga. Oshemereire kuhurikiza gye omu nteerane ezo kandi okaha eby’okugarukamu, ebibuuzo byabuzibwa. Ekyo nikyo Yesu yaakozire obu yaabaire ari omu nju ya Ruhanga. Kandi waakora ebyo, noija kushemeza Ruhanga, nk’oku Yesu yaakozire.

Noobaasa kuteekateeka aha baana abandi abarikugambwaho omu  Baibuli abaashemeize Ruhanga?— Timoseo n’eky’okureeberaho kirungi munonga. Ishe akaba atarikwikiririza omuri Yehova. Kwonka nyina, Yunike, na nyinenkuru Loisi, bo bakaba nibamwikiririzamu. Timoseo akabahurikiza kandi baamwegyesa ahari Yehova.

Timoseo ku yaakuzire, entumwa Paulo akataayaayira etauni ei yaabaire naatuuramu. Akeetegyereza ngu Timoseo akaba naakunda munonga kuheereza Yehova. N’ahabw’ekyo akeeta Timoseo kugyenda nawe kuheereza Ruhanga omu muringo ogurikukiraho. Ahu baabaire baraba hoona, bakaba bagambira abantu aha Bukama bwa Ruhanga n’ahari Yesu.​—Ebyakozirwe 16:1-5; 2 Timoseo 1:5; 3:14, 15.

Kwonka shi eby’okureeberaho ebiri omu Baibuli n’eby’aboojo bato bonka abaashemeize Yehova?— Ngaaha, tikwo kiri. Teekateeka aha mwishiki muto Omwisraeli owaashemeize Yehova. Obwire obwo, ab’eihanga rya Siria bakaba bari abazigu b’eihanga rya Israeli. Eizooba rimwe Abasiria bakarwanisa Abaisraeli kandi baatwara omwishiki muto ogwo nk’enkwatwa. Akooherezibwa omu nju ya mukuru  w’ihe, owaabaire naayetwa Naamani. Okwo akaba omuheereza w’omukazi wa Naamani.

Naamani akaba aine endwara erikwetwa ebibembe. Tihaine n’omwe omu bashaho owaabaasize kumuhwera. Kwonka omwishiki muto ogwo kuruga Israeli akaba naikiriza ngu omwe aha baheereza ba Ruhanga ab’omutaano nabi, akaba naabaasa kuhwera Naamani. Naamani n’omukazi we bakaba batarikuramya Yehova. Omwishiki muto ogwo akaba ashemereire kubagambira eki yaabaire naamanya? Okaakozire ki?—

Omwishiki muto ogwo akagira ati: ‘Naamani ku yaakuza owa nabi wa Yehova omuri Israeli, akaamutambira ebibembe bye.’ Naamani akahurikiza omwishiki ogwo, kandi yaaza owa nabi wa Yehova. Ku yaakozire ebi nabi yaamugambiire kukora, akakira. Eki kikareetera Naamani kuba omuramya wa Ruhanga ow’amazima.​—2 Abagabe 5:1-15.

Okaayenzire kuhwera omuntu kwega ahari Yehova n’aha ki arikubaasa kukora, nk’oku omwishiki ogwo yaakozire?— N’oha ou orikubaasa kuhwera?— Omu kubanza, nibabaasa okutateekateeka ngu nibeetenga obuhwezi. Kwonka noobaasa kugamba nabo aha bintu birungi ebi Yehova arikukora. Kandi nibabaasa kuhurikiza. Noobaasa kuhamya ngu eki nikiija kushemeza Ruhanga.