SIOPAN ugaw diad dalin so isipen mon amaliket a maong ed si Jehova?— Say Anak to, si Jesus. Pantongtongan ta pa iray bengatlan ginawa nen Jesus ya amaliket ed mangatatawen ya Ama to.

Say pamilya nen Jesus so ngalngali taloy agew a nambiahe manlapud Jerusalem, a kawalaan na marakdakep a templo nen Jehova. Tinawag nen Jesus so templo bilang “abung nen Amak.” Sikato tan say pamilya to so tinaon ya oonla diman pian onatendi ed Paskua.

Aminsan a taon, sanen 12-años nen Jesus, say pamilya to so pasempet la kayari na Paskua. Sanen tinmunda ira pian palabasen so sanlabi insan da naimano ya anggapo si Jesus ed limog na kakanayon tan kakaaro ra. Kanian tampol a pinmawil si Maria tan Jose ed Jerusalem pian anapen si Jesus. Iner kasi so isipen mon kawalaan to?—

Aromog day Jesus diad templo. Sikatoy onderengel ed saray managbangat, tan tetepetan tora. Tan no sikatoy tepetan da, naebatan to. Pankelawan daray maabig ya ebat to. Kasin natalosan mo no akin a maliket so Dios ed Anak to?—

Siempre, sanen nalmo a siansia nen Maria tan Jose si Jesus, sikaray akainawa. Balet ta agnaaburido si Jesus. Amta to a say templo so maabig a panayaman. Kanian intepet to: “Agyo ta amta a nepeg a wala ak ed abung nen Amak?” Amta to a say templo et abung na Dios, tan panliketan ton sikatoy wadman.

Kayari to, inawit nen Maria tan Jose so 12-años a si Jesus a pinmawil ed Nazaret. Panon kasi so impantrato nen Jesus ed atateng to?—  Ibabaga na Biblia ya “intultuloy toy nampasakop ed sikara.” Anto kasi isipen mon kabaliksan na saya?— Kabaliksan ton sikatoy matulok ed sikara. On, ginawa to so impagawa ed sikato na atateng to, anggano saya et kimey ed abung a singa say panasol ed bobon.—Lucas 2:41-52.

Kanian isipen pa iya: Anggaman ayadyari si Jesus, tinulok toy atateng to ya ag-ayadyari. Amaliket iya kasi ed Dios?— Segurado, lapud ibabaga na Salitay Dios ed ananak: ‘Ontulok kayo ed saray atateng yo.’ (Efeso 6:1) Napaliket mo met so Dios no tuloken moy atateng mo, a singa ginawa nen Jesus.

Say sananey a paraan a napaliket tayo so Dios et diad pangipaamta ed arum nipaakar ed sikato. Nayarin ibaga na arum a totoo ya agnepeg a gawaen iya na saray ugugaw ni. Balet sanen sinali na totoo a patundaen iray ugugaw a lalaki diad panggawa ed saya, inkuan nen Jesus: ‘Agyo ta’n balot abasa ed Kasulatan, “Dia ed sangi na saray ugugaw et nidayew so Dios”?’ (Mateo 21:16) Kanian nayarian tayon amin ya ibaga ed arum so nipaakar ed si Jehova tan nipaakar ed inka-alay abig  ton Dios, no talagan labay tayo. Tan no gawaen tayo, napaliket tayo so Dios.

Iner so pakaaralan tayo na saray bengatla nipaakar ed Dios a nayarian tayon itongtong ed arum?— Manlapud panagaral tayo ed Biblia diad ayaman. Balet makaaral itayo ni na dakel diad pasen a pantitiponan na totoo na Dios pian manaral. Balet panon tayon nibiig no siopa iray totoo to?—

Anto so gagawaen na totoo diad saray miting da? Kasin talagan ibabangat da so walad Biblia? Kasin babasaen tan pantotongtongan da itan? Agta ontan so idengel tayo ed Dios?— Tan diad saray panmimiting na saray Kristiano et ilaloan itayo ya ondengel ed ibabaga na Dios, agta ontan?— Balet panon to no ibaga na totoo ya agmo kaukolan so manbilay unong ed ibabaga na Biblia? Nibagam kasin sikaray totoo na Dios?—

Nia so sananey nin kaukolan a nonoten. Ibabaga na Biblia a saray totoo na Dios so magmaliw a ‘totoo parad ngaran to.’ (Gawa 15:14) Lapud say ngaran na Dios et Jehova, nayari tayon itepet ed totoo no kasin si Jehova so Dios da. No ibaga dan andi, diad ontan et naamtaan tayo ya aliwa iran totoo to. Saray totoo na Dios so mangitongtong met ed arum nipaakar ed Panarian na Dios. Tan nipanengneng day panangaro ra ed Dios diad pangunor ed saray ganggan to.—1 Juan 5:3.

No walay kabat mon totoo a manggagawa ed amin na saratan a bengatla, diad ontan et nepeg moy mitipon ed sikara parad panagdayew. Kaukolan moy ondengel a maong ed saratan a miting tan onebat no walaray tepet. Ontan so ginawa nen Jesus sanen sikatoy walad abung na Dios. Tan no gawaen mo iratan a bengatla, napaliket mo so Dios, a singa ginawa nen Jesus.

Wala tay nanonotan mo nin arum ya ugugaw ya abitla ed Biblia ya amaliket ed Dios?— Si Timoteo so sakey a maabig ya ehemplo. Say  ama to so aliwan mananisia ed si Jehova. Balet say ina to, si Eunice et mananisia, tan ontan met ed si bai to a Loida. Dinmengel si Timoteo ed sikara tan nanaral nipaakar ed Dios.

Sanen binmaleg lay Timoteo, binmisita si apostol Pablo ed baley a panaayam to. Naimano ton labalabay nen Timoteo so manlingkor ed si Jehova. Kanian inimbitaan toy Timoteo a miulop ed sikato a manlingkor ed Dios diad mas malaknab a paraan. Diad inerman a nakar da, impakabat da ed totoo so nipaakar ed Panarian na Dios tan si Jesus.—Gawa 16:1-5; 2 Timoteo 1:5; 3:14, 15.

Balet kasin saray kalangweran a lalaki labat so ehemplo ed Biblia ya amaliket ed Dios?— Andi. Nonoten so sakey a kalangweran a bii ya amaliket ed Dios. Sanen sikatoy mabilay ni, say nasyon na Siria tan say nasyon na Israel so mankalaban. Sakey ya agew et akilaban iray taga-Siria ed Israel tan sinamsam da iman a kalangweran a bii. Sikatoy inawit ed abung na pangulon sundalo, a say ngaran to et Naaman. Diman et sikatoy nagmaliw ya aripen na asawa nen Naaman.

 Insan nansakit si Naaman a say tawag ed sakit to et kating. Anggapo ed saray doktor to so makatambal ed sikato. Balet panisiaan na kalangweran a bii a taga-Israel a makatulong ed si Naaman so sakey ed saray espisyal a lingkor na Dios, sakey a propeta. Siempre, si Naaman tan say asawa to so aliwan managdayew ed si Jehova. Kasin ibaga ed sikara na kalangweran a bii so kabat to? No sika, antoy gawaen mo ey?—

Antam, imbaga na ugaw nin bii: ‘No onla labat si Naaman ed propeta nen Jehova diad Israel, diad ontan, onabig si Naaman ed kating to.’ Dinengel nen Naaman so ugaw nin bii, tan sikatoy linma ed propeta nen Jehova. Sanen ginawa toy papagawa ed sikato na propeta, sikatoy inmabig. Lapud saya et nagmaliw a managdayew na tuan Dios si Naaman.—2 Arari 5:1-15.

Kasin labay mon tulongan so sakey pian makaaral nipaakar ed si Jehova tan nipaakar ed no anto so gawaen to, a singa ginawa na saman ya ugaw a bii?— Siopa so antam a nayarian mon tulongan?— Siempre, diad primero et nayarin agda isipen a kaukolan da so tulong. Balet nayarin itongtong mo ed sikara iray maong a gagawaen nen Jehova. Tan nayarin ondengel ira. Makaseguro ka a mamaliket iya ed Dios.