¿PI WARMATAQ Jehova Diosta aswan kusichiq warma karqa?... Jesucristom. Kaypim yachasunchik Jehova Diosta imakuna ruwasqanwan Jesus kusichisqanmanta.

Jesusqa yacharqa Nazaret llaqtapim. Ichaqa chaymanta kimsa punchaw puriypim Jerusalenpi Diosta yupaychana hatun wasi karqa, chay wasitam Jesus suticharqa “taytaypa wasin” nispa. Chaymanmi Jesusqa tayta-mamanwan kuska watan-watan riq pascua fiesta ruwaq.

Huk kutipim chunka iskayniyuq watanpi Jesus kachkaptin, Jesuspa tayta-mamanqa ayllunpiwan kuska pascua fiesta ruwasqankumanta llaqtankuman kutichkarqaku. Ichaqa huk punchaw puriytaña risqankupim Joseywan Mariaqa musyakururqaku Jesusqa mana piyninkuwanpas kasqanta. Chaymi chakinkupas pisisqa Jerusalenman Jesusta maskaq kutirqaku. Jesusqa, ¿hinallachu chaypi kachkanman karqa?... Arí.

Jesustaqa tarirurqaku Diospa wasinpi Diosmanta yachachiqkunawan rimachkaqtam. Payqa yachachiqkunata uyarispam sumaqllataña tapuchkasqa, yachachiqkuna tapuptinpas sumaqtam rimariqpas. Chaymi yachachiqkunaqa warmata qawaspa uyarayachkasqaku. Maynatachá chayta qawaspanqa Jehova Diosqa kusikurqa ¿aw?...

Jesusta tariruptinkum Joseypa hinaspa Mariapa sunqunpas chayraq tiyaykurqa. Jesusqa hawkallam kachkasqa Diospa wasinpi kasqanrayku. Chaymi tayta-mamanta nirqa: ‘¿Manachum yacharqankichik hanaq pacha taytaypa wasinpi kanayta?’, nispa. Jesusqa  Diospa wasinpi kasqanmanta mana iskayrayaspanmi chaypi kayta anchata munaq.

Chaymantam Joseywan Mariaqa Nazaret llaqtankuman Jesuspiwan kuskaña kutikurqaku. ¿Imaynam Jesusqa tayta-mamanwan kawsakurqa?... Bibliapim nin: ‘Paykunatam imapipas kasukurqa’, nispa. Jesusqa tayta-mamantam kasukurqa tukuy imapi. Wasinpipas yanapakurqachá yakukunata yaku tuqyanan uchkumanta aysaspan (Lucas 2:41-52).

Chaynaqa, Diospa churin kachkaspanpas Jesusqa kasukurqam pantaq tayta-mamantaqa. Maynataya chaywanqa Jehova Diosqa kusikurqa ¿aw?... Chaymi Diosqa warmakunata nin: “Tayta-mamaykichikta kasukuychik”, nispa (Efesios 6:1). Jesus hina tayta-mamaykita kasukuspaykiqa Jehova Diostam kusichinki.

Jehova Diostaqa kusichinkitaqmi paymanta runakunaman willakuspapas. Ichaqa manam lliw runakunapaqchu warmakunapa chay ruwasqankuqa allin. Chaynam  karqa Jesuspa tiemponpi wakin runakunawanpas. Huk kutipim warmakuna Diosta hatunchachkaptinku runakuna piñakurqaku, hinaptinmi paykunata Jesus nirqa: “¿Manachu haykapipas leerqankichik ‘warmachakunapiwan wawakunawanmi alabaykachikunki’ nisqanta?”, nispa (Mateo 21:16). Chay nisqanwanmi yachanchik pipas Diosmantaqa willakuy atisqanmanta, chayta ruwaspaqa Diostam kusichisun.

Ichaqa, ¿maypitaq Diosmantaqa yachachwan?... Wasinchikpi bibliata qawaspam. Chaymantapas huñunakuykunaman rispam. Ichaqa, ¿imaynatam yachachwan maypipas huñunakuq runakunaqa Diospa runankuna kasqanta?...

Diospa runankunaqa huñunakuyninkupim bibliata qawanku hinaspa bibliamanta imam kaqta yachachinku. Chayta mana ruwaspankuqa, ¿yaqachu Diospa runankuna kanmanku?... Diospa runankunaqa bibliallawan yachachisqam kananku ¿aw?... ¿Ima niwaqtaq “Diospa llaqtanmi kaniku” nichkaspanku bibliata qipanchaqkunamanta?...

Chaymantapas Diospa runankunamantam bibliapi nin ‘sutin apaq llaqta’ kasqankumanta (Hechos 15:14). Chaymi “Diospa llaqtanmi kaniku” niqkunataqa tapuchwan Diospa ima sutin kasqanmanta. Jehova kasqanta mana niwaspanchikqa manam Diospa llaqtanchu kanku. Chaymantapas Diospa llaqtanqa Diospa munaychakuyninmantam runakunaman willakunanku, hinaspapas kamachikuyninkunatam kasukunanku (1 Juan 5:3).

Chaykuna ruwaq runakunata riqsispaykiqa paykunawan Diosta yupaychanaykipaq huñunakuy. Yachachisqankuta tukuy sunquwan uyariy hinaspa tapukuy kaptinpas atispaqa rimariy. Chaytam Jesuspas ruwarqa Diospa wasinpi kaspanqa. Jesusta qatipakuspaykiqa Jehova Diostam kusichinki.

 Bibliaqa willawanchiktaqmi huk warmachapas Dios kusichisqanmanta, ¿pitaq karqa chay warmachaqa?... Timoteom. Payqa maman Eunicewan hinaspa abuelitan Loidawanmi Jehova Diosmanta yachachisqa karqa. Taytanmi ichaqa mana Jehova Diospiqa iñiqchu.

Timoteo mozoña kaptinmi apostol Pablo Timoteopa llaqtanman chayarurqa, hinaspanmi musyarurqa Timoteoqa Diosta aswanraq serviy munasqanta. Chaymi Diosmanta willakuypi puriysiqnin kananpaq pusakurqa. Pablowan Timoteoqa maymanñapas rispankum Diosmantawan Jesusmanta runakunaman willakuqku (Hechos 16:1-5; 2 Timoteo 1:5; 3:14, 15).

Bibliaqa willawanchiktaqmi Diosta kusichiq warmi warmachamantapas. ¿Pitaq chay warmachaqa karqa?... Israel llaqtayuq warmi warmacham. Paymi wakin runakunawan kuska presochasqa karqa Israel llaqtan Siria nacionwan guerrapi kaptin. Chaymi  Siria nacionniyuq Naaman runapa warminta servinanpaq aparurqaku.

Patronnin Naamanqa lepra unquywan mana pipapas hampiy atisqanmi karqa. Chay warmacham ichaqa yacharqa piwan hampirachikunanmanta. Hinaspaqa, ¿yaqachum yachasqanta willakunman karqa Naaman Jehova Diosta mana yupaychachkaptinpas? ¿Imatam qamqa ruwawaq karqa?...

Warmachaqa kaynatam willakurqa: ‘Llaqtaypi yachaq Diosniypa serviqnin runaman patronniy riruspanqa lepra unquyninmantachá hampirachikamunman’, nispa. Chaymi Naamanqa Israel llaqtaman rispan Diospa serviqnin runawan lepra unquyninmanta hampirachikurqa, hinaspam paypas Jehova Diospa serviqninña rikurirurqa (2 Reyes 5:1-15).

¿Munawaqchu qampas Israel llaqtayuq warmi warmacha hina Diospa serviqninña kanankupaq pimanpas Diosmanta yachachiyta?... ¿Pimantaq yachachiwaq?... Qallariypiqa ichapas yachachinaykitaqa mana munanqakuchu. Chayna kaptinpas imakuna Diospa ruwananmanta willaptikiqa uyarinmankuraqmi. Chayta ruwaspaykiqa Jehova Diospa sunquntamá kusichinki.