¿LLAPA wawakunamanta mayqen wawan astawan Diosta kusichinman karan?... Jesusmi ¿riki? Kunan rimasun Jesuspa imakuna ruwasqanwan Jehová Dios kusikusqanmanta.

Jesuspa familianqa Jerusalén llaqtamanta kinsa p’unchay puriypi jinan tiyaran. Jerusalenpin kasharan Jehová Diospa templon, chaytan Jesusqa suticharan: ‘Yayaypa wasin’, nispa. Familianwanmi payqa sapa wata templota riqku Diosta adoranankupaq.

Juj kutinmi Jesús 12 watanpi kashaqtin familianwan kuska Jerusalén llaqtata viajaranku pascua fiestaman. Fiesta tukuyta kutipushaqtinkun samanankupaq Jesusta watukuranku. Ichaqa manan familiakunapas amigokunapas Jesusta rikusqakuchu. Chaymi Josewan Mariawan Jerusalenta kutiranku. ¿Maypin Jesús kasharan?...

Jesustaqa Diosta adorananku templopin tariranku. Chaypin Jesusqa yachachiqkuna chaupipi tiyaykuspa paykunata uyarisharan tapusharan ima. Tapuqtinkun Jesusqa allinta kutichiq. Yachachiqkunaqa ancha admirasqan kasharanku imaymana yachasqanmanta. Jehová Diospas anchatan kusikuran, ¿imarayku?...

Jesusta tariruspañan Mariapas Josepas thaj karanku. Jesusqa templotan Diospa wasinta jinapuni rikuran, chaymi kusisqa chaypi kasharan. Chaymi tayta-mamanta niran: “¿Manachu yacharankichis Yayaypa wasinpi kashanayta?”, nispa.

 Chay qhepamanmi Jesusqa tayta-mamanwan Nazaret llaqtaman kutipuranku, chaypin paykunaqa tiyaranku. ¿Imaynatan Jesús Josetapas Mariatapas rikuran?... Tayta-mamanta jinan, chaymi paykunata ‘kasukuran’. Jesusqa paykunaq kamachisqantan ruwaran, chaymi yanapakuran unu apamuypi juj ruwaykunapipas (Lucas 2:41-52).

Jesusqa mana juchayoq runan karan, tayta-mamantaq juchayoq runakuna. Chaywanpas Jesusqa tukuypin tayta-mamanta kasukuran. ¿Imaynan Dios sientekuran chayta rikuspa?... Diospunin wawakunata nin: ‘Wawakuna, tayta-mamaykichista kasukuychis’, nispa (Efesios 6:1). Qanpas Jesús jina Jehová Diosta kusichiyta munanki chayqa, tayta-mamaykitan kasukunayki.

¿Imatawanmi ruwawaq Diospa sonqonta kusichinaykipaq? Juj runakunamanmi paymanta willanayki. Wakin runakunan ninku: “Chaytaqa kuraq runakunallan ruwananku”, nispa.  Ichaqa, ¿ima ninmi Jesús? Juj kutinmi llaqtapi runakuna wawakunata jark’aranku Jehová Diosta alabashaqtinku, jinan Jesusqa niran: “¿Manachu leerankichis: ‘Erqechakunan Diosta jatunchanqa’ nisqa kasqanta?”, nispa (Mateo 21:16). Arí, llapa wawakunan Jehová Diosmanta jujkunaman willayta atinkuman. Chayta ruwasun chayqa, Diosmi anchata kusikunqa.

¿Maypin Diosmanta astawan yachasunman?... Bibliata estudiaspan. Ichaqa Jehová Diosta serviqkunaq juñunakusqan wasipin astawanqa yachasunman. ¿Pikunan Diosmanta cheqaq kaqta yachachinku?...

Chaypaqqa kaykunatan tapukunanchis: ¿Imatan chay juñukusqankupi ruwanku? ¿Leenkuchu Bibliata? ¿Bibliaq nisqanman jinachu yachachinku? Chaykunata ruwaspan Diosta uyarisun ¿riki?... Jinaspapas cheqaq Diosta adoraq runakunaqa Diospa nisqantan kasukunanku ¿riki?... Sichus juj juñunakuypi nisunkiku: “Manan Bibliaq nisqantaqa kasukunachu”, nispa chayri, ¿Diospa llaqtanchu kankuman?...

¿Imatawanmi ruwawaq? Biblian nin: ‘Diosmi runakunata sutinpaq ajllakuran’, nispa (Hechos 15:14). Diospa sutinqa Jehová nisqan ¿riki? “Diostan serviyku” niq runakunatan tapuwaq: “¿Jehová Diostachu adorankichis?”, nispa. “Manan” nisunkiku chayqa, manan paykunachu Diospa llaqtan kanku. Jinaspapas Jehová Diosta serviqkunaqa paypa gobiernonmantan jujkunaman yachachinanku, kasukunankun Diospa tukuy kamachisqantapas (1 Juan 5:3).

Chaykunata ruwaq runakunata reqsishanki chayqa, paykunaq juñunakuyninman riy Diosta adoranaykipaq. Juñunakuyman rispaqa yachachisqankutan allinta uyarinayki, tapumuqtinkupas kutichinaykin. Chaytan Jesuspas ruwaran Diospa  wasinta rispa. Chaykunata ruwanki chayqa, Jesús jinan Jehová Diospa sonqonta kusichinki.

¿Pi waynachan Diosta kusichillarantaq?... Jujninmi karan Timoteo. Paypa papanqa manan Jehová Diostachu serviran. Ichaqa maman Eunicepas abuelan Loidapas Diostan serviranku. Paykunan Timoteoman Jehová Diosmanta yachachiranku.

Juj kutinmi apóstol Pablo Timoteota visitaran. Timoteoqa waynañan kasharan, astawantaqmi Diosta serviyta munasharan. Chayta reparaspan Pabloqa Timoteota invitaran paywan kuska Diosta servinankupaq. Paykunaqa llapa chayasqanku llaqtakunapin Diospa gobiernonmanta Jesusmantawan yachachiranku (Hechos 16:1-5; 2 Timoteo 1:5; 3:14, 15).

Ichaqa, ¿Timoteollachu waynacha kashaspa Diosta kusichiran?... Manan, karanmi juj sipaschapas. Payqa Israel llaqtamantan karan. Juj p’unchaymi Siria llaqta runakuna Israel  llaqtawan maqanakuranku. Chaypin sipaschata jap’ispa Siria llaqtaman aparanku. Jinan Naamanpa wasinpi esclava kapuran, Naamanqa ejercitopi jefen karan.

Naamanqa lepra onqoyniyoqmi kasharan, manataqmi medicokuna jampiyta atirankuchu. Israel llaqtayoq sipaschaqa yacharanmi Diospa profetan qhaliyachiy atisqanta. Ichaqa Naamanpas esposanpas manan Jehová Diostachu adoraranku. ¿Imatan chay sipascha ruwaran? ¿Imatan qan ruwawaq karan?...

Chay sipaschan patronanta niran: ‘Samariapi kashaq profetaman patronniy rinman chayqa, lepra onqoyninmantan qhaliyapunman’, nispa. Chayta yacharuspan Naamanqa Diospa profetanta maskhaq riran, chay qhepamantaq profetaq nisqanta kasukuspa qhaliyapuran. Chaymantapachan Naamanqa Jehová Diosta adoraran (2 Reyes 5:1-15).

¿Munawaqchu chay sipascha jina kayta?... ¿Pikunamanmi qanpas Diosmanta willawaq?... Yaqapaschá wakinqa mana yachayta munanqakuchu. Ichaqa Diospa allinkuna ruwasqanmanta willaqtiykiqa uyarisunkikun. Chayta ruwanki chayqa Diosmi anchata kusikunqa.