MOLENGE wa na ndo ti sese ge mo bâ so lo zia lani ngia mingi na bê ti Jéhovah?— A yeke Molenge ti lo, Jésus. Zia e bâ ambeni ye so Jésus asala ti zia ngia na bê ti Babâ ti lo ti yayu.

Kodoro so afami ti Jésus alango dä ayo na Jérusalem. Jérusalem ayeke ndo so pendere temple ti Jéhovah ayeke dä, na a hunda ti tambela lango ota ti si kâ. Jésus ahiri temple ni ‘da ti Babâ ti mbi’. Ngu oko oko, lo na afami ti lo ayeke gue kâ ti sala matanga ti Pâque.

Mbeni lâ, tongana Jésus ayeke na ngu 12, afami ti lo ahunzi ti sala matanga ti Pâque na ala yeke kiri na kodoro ti ala. Ala luti na mbeni ndo ti hu tele. Na ngoi so la si ala ga ti bâ so Jésus ayeke na popo ti afami nga na akamarade ti ala pëpe. Hio, Marie na Joseph akiri na Jérusalem ti gi Jésus. Ti mo, lo lingbi ti duti na ndo wa?—

Ala wara Jésus na yâ ti temple. Lo yeke mä awafango ye ni, na lo yeke hunda tënë na ala. Na tongana ala hunda tënë na lo, lo yeke kiri tënë na ala. Anzoni kiringo tënë ti lo ni apika bê ti ala mingi. Mo bâ awe ngbanga ti nyen Nzapa awara ngia na yâ Molenge ti lo?—

Biani, tongana Marie na Joseph awara Jésus awe, bê ti ala adë. Me Jésus agi bê ti lo lani pëpe. Lo hinga so temple ayeke mbeni nzoni ndo ti duti dä. Ni la, lo hunda: ‘I hinga pëpe so a lingbi  mbi duti na yâ da ti Babâ ti mbi?’ Lo hinga so temple ni ayeke da ti Nzapa, na a nzere na lo ti duti dä.

Na pekoni, Marie na Joseph amû Jésus so ayeke na ngu 12, na ala kiri na Nazareth. Ti mo, Jésus asala lani ye na mbage ti babâ na mama ti lo tongana nyen?— Bible atene na e so lo “mä yanga ti ala” lakue. A ye ti tene nyen la?— A ye ti tene so lo yeke sala lakue ye so ala hunda na lo ti sala, même tongana a yeke ti gue ti tö ngu na dungu.​—Luc 2:41-52.

Bâ ye so si: Atâa so Jésus ayeke lani mbilimbili-kue, lo mä yanga ti babâ na mama ti lo so ayeke mbilimbili-kue pëpe. Ye so anzere na bê ti Nzapa?— Biani, teti Tënë ti Nzapa atene na amolenge: “I mä tënë ti ababâ na amama ti i.” (aEphésien 6:1). Tongana mo mä yanga ti babâ na mama ti mo, tongana ti so Jésus asala lani, mo nga kue mo yeke zia ande ngia na bê ti Nzapa.

Mbeni lege nde so e lingbi ti zia ngia na bê ti Nzapa dä ayeke ti fa tënë ti lo na azo. Me ambeni zo alingbi ti tene so a lingbi  amaseka asala ye so pëpe. Lani, tongana azo atara ti kanga lege na amolenge ti sala tongaso, Jésus atene: ‘I de i diko na yâ Mbeti ti Nzapa lâ oko pëpe? Nzapa asala si tënë ti gonda asigigi na yanga ti akete molenge.’ (Matthieu 21:16). Tongaso, tongana a yeke ye so e ye biani ti sala, e kue e lingbi ti fa ye na azo na ndo Jéhovah nga na ndo nzoni Nzapa so lo yeke. Tongana e sala tongaso, e yeke zia ande ngia na bê ti Nzapa.

Na ndo wa si e yeke manda ye na ndo Nzapa, si e lingbi ti sala tënë ti lo na azo?— Na mandango Bible ti e na kodoro. Me e yeke manda ye mingi na ndo so azo ti Nzapa ayeke bungbi tele ti ala dä. Ye oko, e lingbi ti hinga azo ti Nzapa ni tongana nyen?—

Azo ayeke sala nyen na ngoi ti abungbi ti ala? Ala yeke fa biani ye so ayeke na yâ ti Bible? Ala yeke diko ni na ayeke sala lisoro na ndo ni? A yeke tongaso la e yeke mä Nzapa, ni la ape?— Nga na abungbi, e yeke ku ti mä ye so Nzapa atene, ni la ape?— Ka tongana azo atene so a hunda pëpe ti tene e sala ye so Bible atene? Ala yeke azo ti Nzapa la?—

Bâ mbeni ye nde so a lingbi mo gbu li ti mo dä. Bible atene so azo ti Nzapa ayeke duti ‘azo teti iri ti Lo.’ (Kusala 15:14). Teti so iri ti Nzapa ayeke Jéhovah, e lingbi ti hunda azo wala Jéhovah ayeke Nzapa ti ala. Tongana ala tene ên-ën, e hinga awe so ala yeke azo ti lo pëpe. Azo ti Nzapa ayeke fa nga tënë ti Royaume ti lo na azo. Ala yeke fa nga so ala ye Nzapa na batango akomandema ti lo.​—1 Jean 5:3.

Tongana mo hinga azo so ayeke sala aye so kue, a yeke nzoni mo bungbi na ala ti voro Nzapa. Dengi mê ti mo nzoni na abungbi so, na kiri tënë tongana a hunda tënë. A yeke ye so Jésus asala lani tongana lo yeke na da ti Nzapa. Tongana mo sala tongaso, mo yeke zia ande ngia na bê ti Nzapa, tongana ti so Jésus asala.

 Mo hinga ambeni molenge na yâ ti Bible so azia lani ngia na bê ti Nzapa?— Tapande ti Timothée ayeke pendere mingi. Babâ ti lo ayeke voro lani Jéhovah pëpe. Me, mama ti lo, Eunice, na âta ti lo ti wali, Loïs, ayeke voro ti ala lani Jéhovah. Timothée ayeke mä lani ala na lo manda ye na ndo Jéhovah.

Tongana Timothée aga kota awe, bazengele Paul ague na kodoro so lo yeke dä. Lo bâ tongana nyen Timothée aye lani mingi ti sala kusala ti Jéhovah. Tongaso, lo hiri Timothée ti mû peko ti lo ti sala kusala ti Nzapa mingi ahon ti so lo yeke sala kozo. Na ndo kue so ala hon dä, ala yeke fa na azo tënë na ndo Royaume ti Nzapa nga na ndo Jésus.​—Kusala 16:1-5; 2 Timothée 1:5; 3:14, 15.

Me Bible afa so gi amolenge-koli si azia ngia na bê ti Nzapa?— Oko pëpe. Bâ tapande ti mbeni molenge-wali ti mara ti Israël. Na ngoi ni kâ, mara ti Syrie na ti Israël aye tele pëpe. Mbeni lâ, azo ti Syrie atiri na Israël na ala gbu molenge-wali so na ngbâa.  A tokua lo ti sala kua na da ti mokonzi ti aturugu, Naaman. Lo ga zo ti kua ti wali ti Naaman.

Naaman ayeke na kobela ti buruma. Docteur oko awara lege ti zi kobela ti lo pëpe. Me molenge-wali so ahinga so mbeni oko ti akota wakua ti Nzapa, mbeni prophète, alingbi ti zi kobela ti Naaman ni. Me Naaman na wali ti lo avoro lani Jéhovah pëpe. A yeke nzoni molenge-wali ni atene na ala ye so lo hinga? Tongana a yeke mo fade, mo yeke sala ti mo nyen?—

Molenge-wali ni atene: ‘Tongana fade Naaman ague abâ prophète ti Jéhovah na Israël kâ, kobela ti lo ayeke hon.’ Naaman amä molenge-wali ni, na lo gue lo bâ prophète ti Jéhovah ni. Tongana lo sala ye so prophète ni atene na lo ti sala, kobela ti lo ni ahon. Ye so asala si Naaman aga zo so avoro tâ Nzapa.​—2 aGbia 5:1-15.

Mo ye ti mû maboko na mbeni zo ti manda ye na ndo Jéhovah nga na ndo ye so lo lingbi ti sala, tongana molenge-wali so?— Mo lingbi ti mû maboko na azo wa?— Biani, peut-être na tongo nda ni ala yeke tene so a lingbi a mû maboko na ala pëpe. Me mo lingbi ti fa na ala apendere ye so Jéhovah asala. Na ala lingbi ti mä mo. Hinga biani so ye so ayeke zia ande ngia na bê ti Nzapa.