NGUMUPHI umntfwana emhlabeni locabanga kutsi wenta Jehova wajabula kakhulu?— NguJesu iNdvodzana yakhe. Asikhulume ngetintfo letentiwa nguJesu letajabulisa Babe wakhe losezulwini.

Kusuka labekuhlala khona umndeni wakhaboJesu kuya eJerusalema bekutsatsa emalanga lamatsatfu, lokuyindzawo lapho lithempeli lelihle laJehova belitfolakala khona. Jesu wabita lelithempeli ngekutsi ‘yindlu yaBabe.’ Njalo ngemnyaka, yena nemndeni wakubo bebaya eJerusalema bayogubha liPhasika.

Ngalomunye umnyaka, ngalesikhatsi Jesu aneminyaka lengu-12, umndeni wakubo wabuyela emuva ekhaya ngemuva kweliPhasika. Wabona kutsi Jesu bekangekho etihlotjeni tawo nakubangani bakhe ngemuva kwekutsi ufike endzaweni labewuyolala kuyo. Ngaso leso sikhatsi, Mariya naJosefa babuyela emuva eJerusalema kuyofuna Jesu. Ucabanga kutsi bekakuphi?—

Bamtfola asethempelini. Jesu bekalalele bafundzisi futsi bekababuta nemibuto. Futsi nalapho bambuta lokutsite, bekabaphendvula. Timphendvulo labekatiniketa tabamangalisa kakhulu. Uyabona kutsi yini indzaba Nkulunkulu ajabula ngeNdvodzana yakhe?—

Ngalesikhatsi Mariya naJosefa sebamtfolile Jesu, kukhatsateka kwabo kwaba ncono. Kepha Jesu bekangakakhatsateki. Bekati kutsi lithempeli bekuyindzawo lephephile. Ngako-ke wababuta: “Beningati yini kutsi kufanele ngibe sendlini yaBabe?” Jesu bekati kutsi lithempeli bekuyindzawo yaNkulunkulu futsi bekatsandza kuya khona.

 Ngemuva kwaloko, Mariya naJosefa bamtsatsa Jesu babuyela naye ekhaya eNazaretha. Ucabanga kutsi Jesu wabaphatsa njani batali bakhe?— LiBhayibheli litsi: “Wachubeka abalalela.” Ucabanga kutsi loko kusho kutsini?— Kusho kutsi bekabahlonipha batali bakhe. Bekenta nobe yini labebatsi akayente, ngisho nobe loko bekusho kutsi ahambe ayokha emanti esicojeni.​—Lukha 2:41-52.

Cabanga nganaku: Ngisho nobe Jesu bekete sono, wabahlonipha batali bakhe labanesono. Kwamjabulisa yini loko Nkulunkulu?— Nakanjani kwamjabulisa, ngobe liVi laNkulunkulu litsi kubantfwana: “Lalelani batali benu.” (Efesu 6:1) Nangabe nawe ulalela batali bakho njengobe kwenta Jesu, utawujabulisa Nkulunkulu.

Lenye indlela longajabulisa ngayo Nkulunkulu kutsi utjele labanye ngaye. Kepha labanye bantfu bangase batsi bantfu labasha akukafanele bakwente loko. Ngalesikhatsi bantfu betama kuyekelisa bafana labancane kutsi bente loko, Jesu watsi: ‘Anizange nikufundze yini loku emiBhalweni: “Nkulunkulu utakwenta kutsi bantfwana netinswane bamdvumise”?’  (Matewu 21:16) Ngako-ke, sonkhe singakhona kutjela labanye ngaJehova nangekutsi unguNkulunkulu lomuhle kangakanani, uma sikufuna mbamba loko. Nasikufuna mbamba kukwenta loko, sitawujabulisa Nkulunkulu.

Sitifundza kuphi tintfo ngaNkulunkulu lesingakhona kutjela labanye ngato?— Esifundvweni setfu seliBhayibheli sasekhaya. Kodvwa singafundza lokunyenti endzaweni lapho bantfu baNkulunkulu bahlangana khona kuyofundza. Singababona kanjani labantfu baNkulunkulu?—

Labantfu yini labayentako emihlanganweni yabo? Bafundzisa lokuseBhayibhelini yini? Bayalifundza yini liBhayibheli baphindze bacoce ngalo? Akusiyo yini leyo indlela tsine lesimlalela ngayo Nkulunkulu?— Angeke yini silindzele kutsi emihlanganweni yebuKhristu sive loko Nkulunkulu lakushoko?— Kodvwa kutsiwani nangabe bantfu batsi akudzingeki uphile ngendlela liBhayibheli lelitsi kufanele siphile ngayo? Ungasho yini kutsi bantfu labanjalo babantfu baNkulunkulu?—

Naku lokunye longase ucabange ngako. LiBhayibheli litsi bantfu baNkulunkulu bayoba “bantfu labatawubitwa ngelibito lakhe.” (Imisebenti 15:14) Njengobe libito laNkulunkulu kunguJehova, singababuta bantfu kutsi Jehova unguNkulunkulu wabo yini. Nangabe batsi cha, sitokwati kutsi abasibo bantfu baNkulunkulu. Bantfu baNkulunkulu batjela labanye ngeMbuso waNkulunkulu. Futsi kufanele babonise lutsandvo lwabo ngaNkulunkulu ngekutsi bagcine imiyalo yakhe.​—1 Johane 5:3.

Nangabe wati bantfu labatentako tonkhe letintfo, kufanele uhlangane nabo kuze nikhonte Nkulunkulu. Nawukulemihlangano, kufanele ulalelisise kahle futsi uphendvule nalapho kubutwa imibuto. Nguloko Jesu lakwenta ngesikhatsi asendlini yaNkulunkulu. Futsi nawukwenta loko, utawujabulisa Nkulunkulu njengobe naJesu enta.

 Bakhona yini labanye bantfwana lobacabangako lokukhulunywa ngabo eBhayibhelini labenta Nkulunkulu wajabula?— Thimothi usibonelo lesihle kuloku. Babe wakhe abengakholwa kuJehova. Kepha make wakhe Yunisi nagogo wakhe Lowisi bebakholwa kuJehova. Thimothi wabalalela futsi wafundza ngaJehova.

Ngalesikhatsi Thimothi sekakhulile, umphostoli Pawula wavakashela lidolobha lakubo. Wabona kutsi Thimothi bekakufuna kakhulu kukhonta Jehova. Ngako wamema Thimothi kutsi ahambe naye batokhonta Nkulunkulu ngalokwengetiwe. Kuto tonkhe tindzawo lebebatihambela, batjela bantfu ngeMbuso waNkulunkulu nangaJesu.​—Imisebenti 16:1-5; 2 Thimothi 1:5; 3:14, 15.

Kunetibonelo tebafana kuphela yini eBhayibhelini lebenta Nkulunkulu wajabula?— Akusinjalo. Cabanga ngentfombatana yaka-Israyeli leyenta Nkulunkulu wajabula. Ngalesikhatsi isaphila, emaSiriya nema-Israyeli bekangevani. Ngalelinye lilanga, emaSiriya alwa nema-Israyeli abese atfumba lentfombatana lencane. Yayiswa endlini  yendvuna yelibutfo, libito layo lebekunguNamani. Kuleyondlu yaba sisebenti semfati waNamani.

Namani bekanesifo sebulephelo. Akekho dokotela lowakhona kumsita. Kodvwa lentfombatana lencane yaka-Israyeli beyikholwa kutsi lomunye wetisebenti letikhetsekile taNkulunkulu, lesingumphrofethi besingakhona kusita Namani. Kuliciniso kutsi Namani nemfati wakhe bebangamkhonti Jehova. Bekufanele yini lentfombatanyana ibatjele loko lebeyikwati? Wena yini lobotayenta?—

Lentfombatana lencane yatsi: ‘Kube Namani umane ubonana nemphrofethi waJehova loka-Israyeli, ngaleso sizatfu Namani bekangaphiliswa kulobulephelo bakhe.’ Namani wayilalela lentfombatana, futsi waya kulomphrofethi waJehova. Ngalesikhatsi akwenta loko lomphrofethi bekamtjele kutsi akwente, welapheka kulokugula kwakhe. Loku kwabese kwenta Namani waba sikhonti saNkulunkulu weliciniso.​—2 Emakhosi 5:1-15.

Bowungatsandza yini wena kusita umuntfu lotsite kutsi afundze ngaJehova futsi afundze nangaloko langakwenta, njengobe kwenta lentfombatana lencane?— Ukhona yini umuntfu longamsita?— Liciniso kutsi ekucaleni bangase bangaboni kutsi badzinga lusito. Kepha ungakhuluma nabo ngetintfo letinhle Jehova latentako. Futsi ngaloko kungenteka bakulalele. Ungaciniseka kutsi loku kutamjabulisa Nkulunkulu.