HI WIHI n’wana loyi u anakanyaka leswaku u n’wi tsakise ngopfu Yehovha laha misaveni?— I Yesu, N’wana wakwe. A hi vulavule hi swilo leswi Yesu a swi endleke, leswi tsakiseke Tata wakwe wa le matilweni.

Ku suka laha ndyangu wa ka va Yesu a wu tshama kona ku ya eYerusalema, laha tempele yo saseka ya Yehovha a yi ri kona, a ku fambiwa masiku manharhu. Tempele yoleyo, Yesu u yi vitane “yindlu ya Tata wa mina.” Yena ni ndyangu wa ka vona a va ya lembe ni lembe eka yona va ya tlangela Paseka.

Lembe rin’wana, loko Yesu a ri ni malembe ya 12 hi vukhale, ndyangu wa ka vona wu teke riendzo wu tlhelela ekaya endzhaku ko tlangela Paseka. Loko wu fika laha a wu fanele wu etlela kona endleleni, wu xiye leswaku Yesu a nga kona ni le ka maxaka ya wona ni le ka vanghana. Hiloko xikan’we-kan’we Mariya na Yosefa va tlhelela eYerusalema leswaku va ya lava Yesu. Xana u ehleketa leswaku a a ri kwihi?—

Va kume Yesu a ri etempeleni. A a ri karhi a yingisele vadyondzisi naswona a va vutisa swivutiso. Kutani loko va n’wi vutisa swo karhi a a va hlamula. Tinhlamulo letinene leti a va nyikeke tona ti va hlamarisile. Xana wa swi vona leswaku ha yini Xikwembu a xi tsakisiwa hi N’wana wa xona?—

Kunene loko Mariya na Yosefa va hetelele va kume Yesu, va titwe va ntshunxekile. Kambe Yesu a a nga karhatekanga. A a swi tiva leswaku tempele i ndhawu leyinene leyi munhu a nga vaka eka yona. Kutani u vutisile a ku: “Xana a mi nga swi tivi leswaku ndzi fanele ku va endlwini ya Tatana?” A a swi tiva leswaku tempele yoleyo i yindlu ya Xikwembu kutani a a rhandza ku va eka yona.

 Endzhaku ka sweswo, Mariya na Yosefa va teke Yesu loyi a a ri ni malembe ya 12 hi vukhale va tlhelela na yena ekaya eNazareta. Xana u anakanya leswaku Yesu a a tikhoma njhani eka vatswari va yena?— Bibele yi vula leswaku u ‘hambete a tiveka ehansi ka vona.’ Xana u anakanya leswaku sweswo swi vula yini?— Swi vula leswaku a a va yingisa. Ina, a a endla leswi vatswari va yena va n’wi byeleke swona hambi ku ri ku ya ka mati exihlobyeni a ma tisa ekaya.—Luka 2:41-52.

Kutani anakanya hi mhaka leyi: Hambileswi Yesu a a hetisekile, u yingise vatswari va yena lava nga hetisekangiki. Xana sweswo swi xi tsakisile Xikwembu?— Ina, swi xi tsakisile, hikuva Rito ra Xikwembu ri byela vana ri ku: “Yingisani vatswari va n’wina.” (Vaefesa 6:1) Na wena u ta tsakisa Xikwembu loko u yingisa vatswari va wena ku fana na Yesu.

Ndlela yin’wana leyi u nga tsakisaka Xikwembu ha yona i ku vulavula ha xona eka van’wana. Hambiswiritano, vanhu van’wana va vula leswaku vana a va fanelanga va endla tano. Kambe loko vanhu va ringete ku sivela vana leswaku va endla tano, Yesu u te: ‘Xana a mi si tshama mi hlaya leswi eMatsalweni, leswaku “Xikwembu xi ta humesa swidzuniso  emilon’wini ya swihlangi”?’ (Matewu 21:16) Kutani loko hakunene hi swi lava ku endla tano, hinkwerhu hi nga byela van’wana ha Yehovha ni ndlela leyi a nga Xikwembu lexinene ha yona. Loko hi endla tano hi ta tsakisa Xikwembu.

Xana hi swi dyondza kwihi swilo leswi vulavulaka hi Xikwembu, leswi hi nga swi byelaka van’wana?— Hi swi dyondza eka dyondzo ya Bibele leyi hi vaka na yona ekaya. Kambe hi dyondza swo tala endhawini leyi vanhu va Xikwembu va hlengeletanaka kona leswaku va dyondza. Kambe, xana hi nga va tiva njhani vanhu va xona?—

Tivutise, i yini lexi vanhu volavo va xi endlaka eminhlanganweni ya vona? Xana va dyondzisa swilo leswi nga eBibeleni hakunene? Xana va yi hlaya ni ku bula ha yona? Hi yona ndlela leyi hi yingisaka Xikwembu ha yona, a swi tano ke?— Nakambe eminhlanganweni ya Vukreste hi langutele ku twa leswi Xikwembu xi swi vulaka, a swi tano ke?— Kambe, ku vuriwa yini loko vanhu va vula leswaku a wu fanelanga u hanya hi ku landza leswi Bibele yi swi vulaka? Xana u nga vula leswaku vanhu volavo i va Xikwembu?—

Hi leyi mhaka yin’wana leyi u nga anakanyaka ha yona. Bibele yi vula leswaku vanhu va Xikwembu va ta va “vanhu va vito ra xona.” (Mintirho 15:14) Leswi vito ra Xikwembu ku nga Yehovha, hi nga vutisa vanhu loko Yehovha a ri Xikwembu xa vona. Loko va ala, hi ta swi tiva leswaku a hi vanhu va yena. Nakambe vanhu va Xikwembu va fanele va byela van’wana hi ta Mfumo wa Xikwembu. Naswona va ta kombisa leswaku va xi rhandza Xikwembu hi ku hambeta va hlayisa swileriso swa xona.—1 Yohane 5:3.

Loko u tiva vanhu lava endlaka swilo leswi hinkwaswo, u fanele u hlangana na vona mi gandzela swin’we. U fanele u rhiya ndleve eminhlanganweni yoleyo naswona loko ku vutisiwa swivutiso, u hlamula. Hi leswi Yesu a swi endleke loko a ri endlwini ya Xikwembu. Loko u endla swilo sweswo, u ta tsakisa Xikwembu, hilaha Yesu a endleke hakona.

 Xana u nga tsundzuka vana van’wana lava boxiweke eBibeleni, lava tsakiseke Xikwembu?— Timotiya i xikombiso lexinene ngopfu. Tata wakwe a a nga pfumeli eka Yehovha. Kambe mana wakwe Yunika ni kokwana wakwe Luwisa a va pfumela. Timotiya u va yingisile kutani a dyondza ha Yehovha.

Loko Timotiya se a kurile, muapostola Pawulo u endzele doroba leri a a tshama eka rona. U yi xiyile ndlela leyi Timotiya a a swi lava ha yona ku tirhela Yehovha. Hiloko a rhamba Timotiya leswaku a famba na yena, a ya endla leswi engetelekeke entirhweni wa Xikwembu. Kun’wana ni kun’wana laha a va famba kona, a va byela vanhu hi ta Mfumo wa Xikwembu ni hi Yesu.—Mintirho 16:1-5; 2 Timotiya 1:5; 3:14, 15.

Kambe, xana Bibele yi lo tamela swikombiso swa vafana ntsena lava tsakiseke Xikwembu?— Nikatsongo. Anakanya hi xinhwanyetana xa Muisrayele lexi xi xi tsakiseke. Hi nkarhi wa xona, tiko ra Siriya ni ra Israyele a ma ri valala. Siku rin’wana Vasiriya va lwe ni Vaisrayele kutani va teka xinhwanyetana lexi va xi endla hlonga. Xi yisiwe endlwini ya  ndhuna ya vuthu leyi a yi vuriwa Namani. Xi fike xi tirhela nsati wa Namani.

Kutani Namani a a ri ni vuvabyi lebyi vuriwaka nhlokonho. A nga kona dokodela ni un’we loyi a a kota ku n’wi tshungula. Kambe, xinhwanyetana lexi, lexi humaka eIsrayele a xi ri ni ripfumelo ra leswaku un’wana wa malandza yo hlawuleka ya Xikwembu, ku nga muprofeta, a a ta swi kota ku pfuna Namani. I ntiyiso leswaku Namani ni nsati wakwe a va nga n’wi gandzeli Yehovha. Xana xinhwanyetana lexi a xi fanele xi va byela leswi xi swi tivaka? Xana wena a wu ta va u endle yini?—

Xinhwanyetana lexi xi te: ‘Loko Namani o ya eka muprofeta wa Yehovha eIsrayele, Namani u ta tshunguriwa nhlokonho leyi a nga na yona.’ Namani u xi yingisile xinhwanyetana xexo kutani a ya eka muprofeta wa Yehovha. Loko a endlile leswi muprofeta a n’wi byeleke swona, u tshungulekile. Sweswo swi endle leswaku Namani a va mugandzeri wa Xikwembu xa ntiyiso.—2 Tihosi 5:1-15.

Xana u nga rhandza ku fana ni xinhwanyetana lexiya, na wena u pfuna munhu un’wana leswaku a tiva hi Yehovha ni leswi a nga ta swi endla?— I vamani lava u nga va pfunaka?— I ntiyiso leswaku eku sunguleni swi nga endleka va anakanya leswaku a va wu lavi mpfuno. Kambe u nga vulavula na vona hi swilo leswinene leswi Yehovha a swi endlaka. Naswona swi nga endleka va ku yingisa. Hakunene sweswo swi ta tsakisa Xikwembu.