SE A te tamaliki e mafaufau koe me ne fakafiafia malosi ne ia a Ieova?— Ko tena Tama, ko Iesu. Ke fai‵pati aka tatou ki mea ne fai ne Iesu ke fakafiafia atu ei ki tena Tamana faka-te-lagi.

Ne ‵nofo atu a te kāiga o Iesu i se koga telā e ‵tusa mo te tolu o aso te leva māfai e faimalaga atu mai Ielusalema, te koga telā e tu i ei a te faletapu gali o Ieova. Ne taku ne Iesu a te faletapu ki te “fale o toku Tamana.” E olo atu sāle a ia mo tena kāiga ki konā i tausaga katoa ke ‵kau atu ki te Paseka.

I te tausaga e tasi, i te taimi ko 12 ei a tausaga o Iesu, ne kamata o ‵foki atu tena kāiga mai tua o te Paseka. Ne seki iloa ne latou me i a Iesu e galo i olotou kāiga mo taugasoa, ke oko eiloa ki te taimi ne ma‵nava aka ei latou mō te po. I konā foki eiloa ne toe ‵foki atu a Malia mo Iosefa ki Ielusalema o ‵sala ki a Iesu. Se a tau faka‵tau, ne nofo atu a ia i fea?—

Ne maua atu ne lāua a Iesu i te faletapu. Ne fakalogologo a ia ki faiakoga, kae ne ‵sili atu ne ia ki a latou a fesili. Kae i te taimi ne fesili atu latou ki a ia e uiga ki se mea, ne tali atu tou tagata. Ne ōfo latou i tali ‵gali ne tuku atu ne ia. E a, e mafai o lavea ne koe a te pogai ne fiafia ei te Atua ki tena Tama?—

E tonu, i te taimi ne maua atu ei ne Malia mo Iosefa a Iesu, ne pelā aka eiloa lā lagonaga. Kae ne seki manavase a Iesu. Ne iloa ne ia me i te faletapu se koga ‵lei ke nofo atu i ei. Tela la, ne fesili atu a ia: “E se iloa ne koulua me e ‵tau au o nofo i te fale o toku Tamana?” Ne iloa ne ia me i te faletapu ko te fale o te Atua, kae ne fiafia malosi a ia ke nofo atu i konā.

 Mai tua ifo i ei, ne avatu ne Malia mo Iosefa a Iesu telā ko 12 ana tausaga ki te lotou fale i Nasaleta. Se a tau faka‵tau ki faifaiga a Iesu ki ana mātua?— Ia, e fai mai te Tusi Tapu me ne tumau a ia i te “fakalogo ki a lāua.” Se a tau faka‵tau ki te uiga o te mea tenā?— E fakauiga i ei me ne fakalogo a ia ki a lāua. E tonu, ne fai ne ia a mea ne fai atu ana mātua ke fai ne ia, ke oko foki eiloa māfai ko te taliga o vai mai i te vaikeli.—Luka 2:41-52.

Tela la, ke mafaufau ki te mea tenei: E tiga eiloa ne ‵lei katoatoa a Iesu, ne fakalogo a ia ki ana mātua sē ‵lei katoatoa. E mata, ne fakafiafia atu te mea tenei ki te Atua?— Ao, e mautinoa eiloa, me ne fai atu te Muna a te Atua ki tama‵liki: “Ke faka‵logo koutou ki otou mātua.” (Efeso 6:1) Ka fakafiafia foki ne koe te Atua māfai e fakalogo koe ki ou mātua, e pelā mo te mea ne fai ne Iesu.

A te suā auala e mafai o fakafiafia ne koe te Atua ko te faipati atu ki nisi tino e uiga ki a ia. E mafai o fai mai nei a nisi tino me e se tenei a te mea e ‵tau o fai ne tamaliki. Kae kafai e taumafai a tino o taofi a tamaliki mai i te faiga o te mea tenei, ne fai mai a Iesu: ‘E a, e seki  fai‵tau koutou ki te Tusi Tapu, “E takitaki ne koe a tama‵liki mo pepe ke tuku mai ne latou ou vikiga”?’ (Mataio 21:16) Tela la, e mafai o fakamatala atu ne tatou katoa ki nisi tino e uiga ki a Ieova te ‵tou Atua gali, māfai e ma‵nako tatou ki ei. Kae kafai e fai ne tatou, ka fakafiafia eiloa ne tatou a te Atua.

Tefea te koga e tauloto ei tatou ki mea e uiga ki te Atua ko te mea ke mafai o fai‵pati atu tatou ki nisi tino e uiga ki ei?— Mai i ‵tou sukesukega faka-te-Tusi Tapu i te fale. Kae e tauloto tatou ki mea e uke atu i te koga telā e maopoopo a tino o te Atua o suke‵suke i ei. Kae e mafai pefea o fai atu ne tatou me ko oi ana tino?—

Ia, ne a mea e fai ne tino i olotou fakatasiga? E mata, e akoako ‵tonu atu ne latou a mea i te Tusi Tapu? E mata, e fai‵tau kae sau‵tala latou ki ei? Tenā loa te auala e fakalogo‵logo ei tatou ki te Atua, ne?— Kae e fakamoe‵moe eiloa tatou ke lagona atu i fakatasiga Kelisiano a pati a te Atua, ne?— Kae e a māfai e fai mai a tino me e se ‵tau o ola koe e ‵tusa mo te Tusi Tapu? E mata, ka fai atu koe me i a latou ko tino o te Atua?—

Tenei foki a te suā mea ke mafaufau ki ei. E fai mai te Tusi Tapu me i tino o te Atua ka fai mo “tino mō tena igoa.” (Galuega 15:14) Ona ko te igoa o te Atua ko Ieova, e mafai o fesili atu tatou ki tino me e mata, te lotou Atua ko Ieova. Kafai e fai atu latou ikai, ko iloa ei ne tatou me i a latou e se ko ana tino. E fai‵pati atu foki a tino o te Atua ki nisi tino e uiga ki te Malo o te Atua. Kae e fakaasi atu ne latou te lotou a‵lofa ki te Atua mai i te faka‵logo ki ana fakatonuga.—1 Ioane 5:3.

Kafai e iloa ne koe a tino kolā e fai ne latou a mea katoa konei, ko ‵tau ei o kau atu koe ki a latou ke tapuaki atu ki te Atua. E ‵tau o fakalogologo faka‵lei koe i fakatasiga konei kae fai foki se tali māfai ko ‵sili mai a fesili. Tenā eiloa te mea ne fai ne Iesu i te taimi ne nofo atu ei a ia i te fale o te Atua. Kae kafai e fai ne koe a mea konei, ka fakafiafia ne koe te Atua, e pelā eiloa mo te mea ne fai ne Iesu.

E mata, e mafai o mafaufau koe ki nisi tama‵liki i te Tusi Tapu kolā  ne fakafiafia ne latou te Atua?— A Timoteo se fakaakoakoga tu ‵kese. A tena tamana e sē se tino talitonu ki a Ieova. Kae ko tena mātua, ko Eunike, mo tena tupuna ko Loise, ne tino tali‵tonu. Ne fakalogo a Timoteo ki a lāua kae ne tauloto e uiga ki a Ieova.

I te taimi ne gasolo aka ei o matua a Timoteo, ne āsi atu a te apositolo ko Paulo ki te fa‵kai ne nofo ei tou tagata. Ne lavea ne ia a te lasi o te fia tavini atu o Timoteo ki a Ieova. Tela la, ne ‵kami ne ia a Timoteo ke olo lāua ke tavini atu ki te Atua i se auala tai lasi atu. I so se koga ne faima‵laga atu lāua, ne fai‵pati lāua ki tino e uiga ki te Malo o te Atua mo Iesu.—Galuega 16:1-5; 2 Timoteo 1:5; 3:14, 15.

Kae e mata, e aofia fua i te Tusi Tapu a fakaakoakoga ‵lei a tamaliki tāgata kolā ne fakafiafia ne latou te Atua?— Ikai, e se penā loa. Mafaufau ki se tamaliki fafine Isalaelu telā ne fai penā. I te taimi ne ola ei tou fafine, ne fai fili eiloa a te fenua o Sulia mo te fenua o Isalaelu. I te aso e tasi ne taua atu a Sulia ki Isalaelu kae ne ave fakapagota ei ne latou te tamaliki fafine tenei. Ne avatu a ia ki te fale o te takitaki kautau, e  igoa ki a Namanu. Ne fai ei tou fafine mo fai te tavini a te avaga o Namanu.

Nei la, ko maua ne Namanu te masaki ko te lepela. E seai se tokita ne mafai o fesoasoani atu ki a ia. Kae ko te tamaliki fafine mai Isalaelu ne talitonu me i te tavini fakapito e tokotasi a te Atua, se pelofeta, e mafai o fesoasoani ki a Namanu. E tonu, a Namanu mo tena avaga e se tapuaki ki a Ieova. E mata, ne ‵tau o fai atu ne te tamaliki fafine tenei a te mea ne iloa ne ia? Ne a au mea ka fai moi ne nofo atu koe i konā?—

Ia, ne fai atu te tamaliki fafine, penei: ‘Moi ne fano a Namanu ki te pelofeta a Ieova i Isalaelu, e mafai ei o faka‵lei aka Namanu mai i tena lepela.’ Ne fakalogo a Namanu ki te tamaliki fafine, kae ne fanatu ki te pelofeta a Ieova. I te taimi ne fai ei ne ia a mea ne fai atu a te pelofeta ke fai ne ia, ne ‵lei ei tou tagata. Ne fai ne te mea tenei ke fai a Namanu mo fai se tino tapuaki ki te Atua tonu.—2 Tupu 5:1-15.

E mata, e fia fesoasoani atu koe ki se tino ke tauloto e uiga ki a Ieova mo mea e mafai ne ia o fai, e pelā mo te tamaliki fafine tenā?— Ko oi e mafai o fesoasoani atu koe ki ei?— E tonu, e mafai o mafau‵fau muamua latou me e se ma‵nako latou ki se fesoasoani. Kae e mafai o faipati atu koe ki a latou e uiga ki mea ‵lei e fai ne Ieova. Kāti e mafai o fakalogo‵logo mai latou. E mafai eiloa o mautinoa i a koe me ka fai ne te mea tenei ke fiafia a te Atua.