HIN-O nga bata dinhi ha tuna ha hunahuna mo an nakapalipay hinduro kan Jehova?— An iya Anak, hi Jesus. Aton pag-istoryahan an mahitungod han ginbuhat ni Jesus nga nakapalipay ha iya langitnon nga Amay.

An pamilya ni Jesus nag-ukoy ha lugar nga mga tulo ka adlaw an biyahe tikang ha Jerusalem, diin nahimutang an matahom nga templo ni Jehova. Gintawag ni Jesus an templo nga “balay han akon Amay.” Hiya ngan an iya pamilya napakadto kada tuig basi tumambong ha piyesta han Paskua.

Han 12 anyos hi Jesus, an iya pamilya nagbiyahe tipauli katapos han Paskua. Han inundang hira basi magpalabay han kagab-ihon, hinbaroan nira nga hi Jesus diri kaupod han ira mga paryente ngan mga sangkay. Salit binalik dayon hi Maria ngan Jose ha Jerusalem basi bilngon hi Jesus. Ha hunahuna mo, nakain hiya?—

Hin-agian nira hi Jesus ha templo. Namamati hiya ha mga magturutdo, ngan nagpapakiana hiya ha ira. Ngan kon nagpapakiana hira ha iya, nabaton hiya pirme. Nahipausa hira ha iya maopay nga mga baton. Nasasabtan mo ba kon kay ano nga nalipay an Dios ha iya Anak?—

Siyempre, han ha kataposan hin-agian ni Maria ngan Jose hi Jesus, mas maopay na gud an ira inabat. Kondi waray mabaraka hi Jesus. Maaram hiya nga an templo usa ka maopay nga lugar. Salit nagpakiana hiya: “Diri ba kamo maaram nga kinahanglan aada ako ha balay han akon Amay?” Maaram hiya nga balay han Dios an templo, ngan karuyag niya nga aadto hiya didto.

 Katapos, igin-upod ni Maria ngan Jose an 12-anyos nga hi Jesus tipauli ha Nasaret. Ha hunahuna mo, paonan-o gintrato ni Jesus an iya mga ginikanan?— Aw, an Biblia nasiring nga hiya ‘padayon nga nagpasakop ha ira.’ Ano ha hunahuna mo an kahulogan hito?— Nangangahulogan ito nga masinugtanon hiya ha ira. Oo, ginbuhat niya an iginpabuhat ha iya han iya mga ginikanan, bisan kon pagtrabaho ito ha balay sugad han pag-alog hin tubig tikang ha atabay.​—Lukas 2:41-52.

Salit hunahunaa ini: Bisan kon hi Jesus hingpit, sinugot hiya ha iya diri-hingpit nga mga ginikanan. Nakalipay ba ini ha Dios?— Oo, kay an Pulong han Dios nasiring ha kabataan: ‘Magin masinugtanon kamo ha iyo mga ginikanan.’ (Efeso 6:1) Mapapalipay mo liwat an Dios kon imo sugton an imo mga ginikanan, sugad han ginbuhat ni Jesus.

Usa pa nga paagi nga mapapalipay mo an Dios amo an pagsumat ha iba mahitungod ha iya. An iba nga mga tawo bangin sumiring nga diri ini angay buhaton han kabataan. Kondi han gindid-an han mga tawo an kabataan ha pagbuhat hini, hi Jesus nagsiring: ‘Waray ba niyo mabasa ha Kasuratan, “Ha baba  han mga kabataan ngan han mga nanunuso an Dios maghahatag hin pagdayaw”?’ (Mateo 21:16) Salit maisusumat naton ngatanan ha iba an mahitungod kan Jehova ngan an iya pagkaurusahon nga Dios, kon karuyag gud naton. Ngan kon buhaton naton ito, mapapalipay naton an Dios.

Diin naton mahibabaroan an mga butang mahitungod ha Dios nga maisusumat naton ha iba?— Tikang ha aton pag-aram ha Biblia ha balay. Kondi damu pa an aton mahibabaroan ha lugar diin nagkakatirok an katawohan han Dios basi mag-aram. Kondi paonan-o naton makikilala kon hin-o an iya katawohan?—

Aw, ano an ginbubuhat han mga tawo ha ira mga katirok? Igintututdo gud ba nira an aada ha Biblia? Ira ba ito ginbabasa ngan ginhihisgotan? Ha sugad nga paagi namamati kita ha Dios, diri ba?— Ngan ha Kristiano nga mga katirok malalaoman naton nga mabatian an ginsisiring han Dios, diri ba?— Kondi ano man kon an mga tawo magsiring nga diri ka kinahanglan magkinabuhi uyon ha ginsisiring han Biblia? Masisiring mo ba nga hira an katawohan han Dios?—

Iini an usa pa nga angay hunahunaon. An Biblia nasiring nga an katawohan han Dios magigin ‘katawohan para ha iya ngaran.’ (Buhat 15:14) Tungod kay Jehova an ngaran han Dios, mahimo naton pakianhan an mga tawo kon hi Jehova an ira Dios. Kon sumiring hira nga diri, niyan maaram kita nga diri hira an iya katawohan. An katawohan han Dios mag-iistorya liwat ha iba mahitungod han Ginhadian han Dios. Ngan ipapakita nira an ira gugma ha Dios pinaagi han pagtuman han iya mga sugo.​—1 Juan 5:3.

Kon may kilala ka nga mga tawo nga nagbubuhat hito ngatanan, niyan sadang ka makig-upod ha ira ha pagsingba ha Dios. Sadang ka mamati hin maopay hini nga mga katirok ngan katapos, batona an mga pakiana nga iginpapakiana. Ito an ginbuhat ni Jesus han nakadto hiya ha balay han Dios. Ngan kon buhaton mo ito nga mga butang, mapapalipay mo an Dios, sugad la han ginbuhat ni Jesus.

 May nahuhunahuna ka ba nga iba nga kabataan nga gin-unabi ha Biblia nga nakapalipay ha Dios?— Hi Timoteo usa ka maopay gud nga susbaranan. Diri tumuroo kan Jehova an iya amay. Kondi tumuroo an iya iroy, hi Eunice, ngan an iya apoy nga hi Loida. Namati hi Timoteo ha ira ngan nahibaro mahitungod kan Jehova.

Han daku na hi Timoteo, ginbisita ni Pablo an bungto nga iya inuukyan. Naobserbahan niya nga karuyag gud ni Timoteo nga mag-alagad kan Jehova. Salit iya igin-upod hi Timoteo basi mas labaw an iya mahimo ha pag-alagad ha Dios. Bisan diin hira magbiyahe, ira ginsumatan an mga tawo mahitungod han Ginhadian han Dios ngan mahitungod kan Jesus.​—Buhat 16:1-5; 2 Timoteo 1:5; 3:​14, 15.

Kondi kabataan la ba nga kalalakin-an an aton mga susbaranan ha Biblia nga nakapalipay ha Dios?— Diri. Tagda an Israelita nga daragita nga nakapalipay ha Dios. Ha iya panahon, magkaaway an nasud han Sirya ngan Israel. Usa ka adlaw nakig-away an mga Siryahanon ha Israel ngan gindara nga bihag iton nga daragita. Gindara hiya ngadto ha balay  han punoan han kasundalohan nga hi Naaman. Didto nagin surugoon hiya han asawa ni Naaman.

Hi Naaman may-ada sakit nga tinatawag nga sanla. Waray doktor nga nakatambal ha iya. Kondi an daragita tikang ha Israel natoo nga an usa han espesyal nga mga surugoon han Dios, usa nga propeta, makakatambal kan Naaman. Siyempre, hi Naaman ngan an iya asawa diri nagsisingba kan Jehova. Sadang ba isumat han daragita ha ira an iya hinbabaroan? Kon ikaw, ano an imo bubuhaton?—

Aw, an daragita nagsiring: ‘Kon makadto la hi Naaman ha propeta ni Jehova ha Israel, matatambal hi Naaman ha iya sanla.’ Namati hi Naaman ha daragita, ngan kinadto hiya ha propeta ni Jehova. Han gintuman niya an iginpabuhat ha iya han propeta, natambal hiya. Tungod hini hi Naaman nagin magsiringba han matuod nga Dios.​—2 Hadi 5:1-15.

Karuyag mo ba buligan an usa nga mahibaro mahitungod kan Jehova ngan kon ano an mahihimo niya, sugad han ginbuhat hiton nga daragita?— Hin-o an mabubuligan mo?— Siyempre, ha siyahan bangin diri hira naghuhunahuna nga nagkikinahanglan hira hin bulig. Kondi mahimo ka makiistorya ha ira mahitungod han mag-opay nga mga butang nga ginbubuhat ni Jehova. Ngan bangin mamati hira. Makakasiguro ka nga makakalipay ini ha Dios.