¿MÁAX paalil a tuklik beet u maas kiʼimaktal u yóol Jéeoba?... Jesús, u Hijo. Koʼox ilik jujunpʼéel baʼax tu beetaj Jesús utiaʼal u kiʼimakkúuntik u yóol u Taata, yaan teʼ kaʼanoʼ.

² Jesús yéetel u láakʼtsiloʼobeʼ óoxpʼéel kʼiin ku bisiktiʼob utiaʼal u kʼuchloʼob Jerusalén. Teʼ kaaj jeʼeloʼ tiaʼan u templo Jéeobaiʼ, Jesuseʼ ku yaʼalik tu yoʼolal le templooʼ: «U yotoch in Taata». Letiʼ yéetel u láakʼtsiloʼobeʼ ku binoʼob cada jaʼab utiaʼal u kʼiinbesoʼob le Pascuaoʼ.

³ Le ka tsʼoʼok u kʼiinbesajil le Pascua le yaan kaʼach doce jaʼaboʼob tiʼ Jesusoʼ, joʼopʼ u suut u láakʼtsiloʼob tu kaajaloʼob. Le ka jeʼeloʼob utiaʼal u máanskoʼob le áakʼaboʼ, tu tsʼáajoʼob cuentaeʼ minaʼan Jesús ichil u láakʼtsiloʼob mix ichil u amigoʼob. María yéetel José túuneʼ suunajoʼob Jerusalén tu séebaʼanil utiaʼal u kaxtoʼob. ¿Tuʼux a tuklik tu kaxtoʼob?...

⁴ María yéetel Joseeʼ tu kaxtoʼob teʼ templooʼ. Jesuseʼ táan u yuʼubik baʼax ku yaʼalik le máaxoʼob kaʼansik le Leyoʼ yéetel táan u beetik kʼáatchiʼ tiʼob. Yéetel le ken u kʼáatoʼob wa baʼax tiʼeʼ, letiʼeʼ u yojel u núukil. Le j-kaʼansajoʼoboʼ ku jaʼakʼal u yóoloʼob yoʼolal bix u núukik le kʼáatchiʼoboʼ. ¿Ka naʼatik wa baʼaxten Dioseʼ jach kiʼimakchaj u yóol yoʼolal u Hijo?...

⁵ Ka ilaʼab Jesús tumen María yéetel Joseeʼ, kiʼimakchaj u yóoloʼob. Baʼaleʼ Jesuseʼ maʼ chiʼichnak kaʼachiʼ, tumen u yojel le templooʼ letiʼe kúuchil maas maʼalob utiaʼal u yantaloʼ. Le oʼolal tu yaʼalajtiʼob: «¿Maʼ wa a wojleʼex tu yotoch in Taata kʼaʼabéet in wantaliʼ?». Jesuseʼ u  yojel le templooʼ u yotoch Dios, le oʼolal jach uts tu tʼaan u yantaliʼ.

⁶ Ka tsʼoʼokeʼ, María yéetel Joseeʼ tu bisoʼob Jesús tu kaajil Nazaret, le kaaj tuʼux kajaʼanoʼob kaʼachoʼ. ¿Bix a tuklik u tratartik Jesús u taataʼob?... Le Bibliaoʼ ku yaʼalikeʼ «seguernaj u yuʼubik u tʼaan u taataʼob». ¿A wojel wa baʼax u kʼáat u yaʼal leloʼ?... U kʼáat u yaʼaleʼ ku beetik mantatsʼ tuláakal baʼax ku yaʼalik u taataʼob, jeʼex u meeyjul yotoch yéetel u bin chʼaʼ jaʼ (Lucas 2:41-52).

⁷ Tuukulnen tiʼ lelaʼ: kex Jesús minaʼan u kʼebaneʼ, tu yuʼubaj u tʼaan u taataʼob kex j-kʼebanoʼob. ¿Leloʼ ku beetik wa u kiʼimaktal u yóol Jéeoba kaʼachi?... Beyoʼ, tumen teʼ Bibliaoʼ ku yaʼalik tiʼ le paalaloʼoboʼ: «Paalaleʼex, uʼuyeʼex u tʼaan a taataʼex» (Efesoiloʼob 6:1). Wa ka beetik jeʼex Jesús yéetel ka wuʼuyik u tʼaan a taataʼobeʼ, yaan xan a beetik u kiʼimaktal u yóol Dios.

⁸ Uláakʼ bix jeʼel a kiʼimakkúuntik u yóol Jéeobaeʼ, letiʼe ka tsikbalnakech tu yéeteloʼ. Yaan máax tuklikeʼ lelaʼ maʼ tu páajtal u beetaʼal tumen mejen paalal. Baʼaleʼ le ka  óotaʼab aʼalbil tiʼ le mejen paalal tumen le máakoʼob maʼ u tsʼáaikoʼob nojbeʼenil tiʼ Diosoʼ, ilawil baʼax aʼalaʼabtiʼob tumen Jesús: ‹¿Mix juntéen wa ta xokeʼex teʼ Kiliʼich Tsʼíiboʼoboʼ: «Yéetel u chiʼ le mejen paalal kun kiʼikiʼtʼantbil Diosoʼ»?› (Mateo 21:16). Bey túunoʼ tuláakal máak jeʼel u páajtal u tsikbaltik tiʼ uláakʼ máakoʼob tu yoʼolal Jéeoba bey xan tiʼ u jatsʼuts modoseʼ. Wa k-beetkeʼ, yaan kiʼimakkúuntik u yóol Dios.

⁹ ¿Tuʼux jeʼel k-maas kʼaj óoltik Dios utiaʼal k-tsikbaltik tiʼ u maasileʼ?... T-otoch, le ken k-xok le Bibliaoʼ. Baʼaleʼ jeʼel k-maas kaanbal tuʼux ku muchʼkuba u kaajal Dios utiaʼal u xookoʼoboʼ. ¿Bix jeʼel k-ojéeltik wa ku adorartaʼal Dios tumen le máaxoʼob ku binoʼob tiʼ junpʼéel religionoʼ?...

¹⁰ Táanileʼ kʼaʼabéet k-ilik baʼax ku beetkoʼob ken u muchʼubaʼob. ¿Jach wa ku kaʼanskoʼob le baʼax ku yaʼalik le Bibliaoʼ? ¿Ku xakʼalxoktikoʼob wa? ¿Máasaʼ lelaʼ letiʼe bix jeʼel k-uʼuyik u tʼaan Diosoʼ?... Le muchʼtáambaloʼoboʼ unaj u meyajoʼob utiaʼal u kaʼansaʼal baʼax ku yaʼalik Dios, ¿máasaʼ?... Baʼaleʼ ¿kux túun wa junpʼéel religión ku yaʼalik maʼ unaj u beetaʼal le baʼax ku yaʼalik le Bibliaoʼ? ¿Jeʼel wa a waʼalik letiʼob u kaajal Dioseʼ?...

¹¹ Yaan xan uláakʼ baʼal unaj a chʼaʼik en cuentail. Le Bibliaoʼ ku yaʼalikeʼ le máaxoʼob meyajtik Diosoʼ «junpʼéel kaaj bisik u kʼaabaʼ» (Baʼaxoʼob 15:14). Tumen Jéeoba u kʼaabaʼ Dioseʼ, jeʼel u páajtal k-kʼáatik tiʼ le máaxoʼob ku yaʼalikoʼob táan u meyajtikoʼoboʼ wa Jéeoba u kʼaabaʼ u Diosoʼob. Wa ku yaʼalikoʼob maʼatecheʼ, k-tsʼáaik cuentaeʼ maʼ táakaʼanoʼob ichil u kaajal Diosiʼ. Tsʼoʼoleʼ le máaxoʼob yanoʼob ichil u kaajal Diosoʼ, unaj u kʼaʼaytikoʼob u Reino tiʼ u maasil máakoʼob. Yéetel unaj u beetkoʼob baʼax ku yaʼalik Jéeoba utiaʼal u yeʼeskoʼob u yaabiltmoʼob (1 Juan 5:3).

¹² Wa a kʼaj óol junjaats máakoʼob beetik lelaʼ, maʼalob ka a muchʼaba a adorart Dios tu yéeteloʼob. Jach chʼenxikint baʼax ku kaʼansaʼal teʼ muchʼtáambaloʼoboʼ yéetel núuk le kʼáatchiʼob ku beetaʼaloʼ. Bey úuchik  u beetik Jesús le ka bin tu yotoch Diosoʼ. Wa ka beetik jeʼex úuchik u beetik Jesusoʼ, yaan xan a kiʼimakkúuntik u yóol Jéeoba.

¹³ ¿Yaan wa uláakʼ chan paal kʼajaʼantech ku yaʼalik le Biblia tu kiʼimakkúuntaj u yóol Diosoʼ?... Juntúul tiʼ letiʼobeʼ Timoteo. U taataeʼ maʼatech u meyajtik Jéeoba. Baʼaleʼ Eunice, u maama, yéetel Loida, u abuelaeʼ, ku meyajtikoʼob. Timoteoeʼ tu yuʼubaj baʼax tu kaʼansoʼob, bey úuchik u kʼaj óoltik Jéeobaoʼ.

¹⁴ Apóstol Pabloeʼ tu xíimbaltaj u kaajal Timoteo le tsʼoʼok u nojochtaloʼ. Pabloeʼ tu yileʼ Timoteoeʼ jach taak u meyajtik Jéeoba, le oʼolal tu yaʼalajtiʼ ka xiʼik tu yéetel utiaʼal u maas meyajtik Dios. Tuláakal le kaajoʼob tuʼux máanoʼoboʼ tu tsikbaltoʼob tiʼ u Reino Dios yéetel tʼaanajoʼob tiʼ Jesús (Baʼaxoʼob 16:1-5; 2 Timoteo 1:5; 3:14, 15).

¹⁵ Baʼaleʼ ¿ku tʼaan wa le Biblia tiʼ juntúul chan x-chʼúupal tu kiʼimakkúuntaj u yóol Diosoʼ?... Ku tʼaan. Koʼox ilik baʼax tu beetaj juntúul chan x-chʼúupal israelita. Teʼ kʼiinoʼob jeʼeloʼ, u kaajil Siria yéetel  Israeleʼ táan kaʼach u baʼateloʼob. Junpʼéel kʼiineʼ le sirioʼoboʼ baʼatelnajoʼob yéetel le israelitaʼoboʼ ka tu bisoʼob palitsiltbil le chan x-chʼúupaloʼ. Tu bisoʼob tu yotoch Naamán, u nojchil le soldadoʼoboʼ, ka tsʼaʼab meyaj bey x-kʼoosil tiʼ u yatan le máakoʼ.

¹⁶ Naamaneʼ yaan lepra kaʼach tiʼ, mix juntúul doctor páajchajak u tsʼakik. Baʼaleʼ le chan x-chʼúupal israelitaoʼ u yojel jeʼel u páajtal u tsʼaʼakal tumen u profeta Dioseʼ. Naamán yéetel u yataneʼ maʼatech u adorartikoʼob kaʼach Jéeoba. ¿Tu yaʼalaj wa le chan x-chʼúupal baʼax u yojloʼ? Wa techeʼ, ¿baʼax jeʼel a beetik kaʼacheʼ?...

¹⁷ Le chan x-chʼúupaloʼ tu yaʼalaj: ‹Wa ka xiʼik Naamán u yil u profeta Jéeoba yaan Israeloʼ, jeʼel u yutstal le lepra tiʼoʼ›. Naamaneʼ tu yuʼubaj le baʼax tu yaʼaloʼ ka bin u yil le profetaoʼ. Úuchik u beetik le baʼax aʼalaʼabtiʼ tumen le profetaoʼ utschaji, yéetel joʼopʼ u adorartik Jéeoba (2 Reyes 5:1-15).

¹⁸ ¿Uts ta tʼaan wa ka a wáant wa máax u kʼaj óolt Jéeoba yéetel baʼax ken u beet, jeʼex úuchik u beetik le chan x-chʼúupaloʼ?... ¿Máaxoʼob jeʼel u páajtal a wáantikeʼ?... Maʼ xaaneʼ tu káajbaleʼ le máakoʼoboʼ jeʼel u tuklikoʼobeʼ maʼ kʼaʼabéet u yáantaʼaloʼobiʼ. Baʼaleʼ wa ka tsikbaltiktiʼob le baʼaxoʼob maʼalobtak ku beetik Jéeobaoʼ, maʼ xaaneʼ jeʼel u yuʼubkechoʼobeʼ. Leloʼ jach yaan u beetik u kiʼimaktal u yóol Dios.