NINO mo acel, Lapwony Madit openyo lapeny mo me ur. En openyo ni: “Maa anga? Ki omegina kono angagi?” (Matayo 12:48) Ka in onongo iromo dok i lapeny man nining?— Oromo bedo ni ingeyo ni min Yecu obedo Maliam. Ento tika ingeyo nying omegine?— Yecu mono onongo tye ki lumegine bene?—

Baibul tito ni nying omegi pa Yecu obedo, “Yakobo ki Yucepu ki Cimon ka Juda.” I kare ma Yecu obedo latit kwena, onongo lumegine tye. Kit ma en obedo latin kayo-ni, jo magi ducu onongo gin lutino bote.—Matayo 13:55, 56; Luka 1:34, 35.

Omegi pa Yecu mono bene gubedo lukwenane?— I acakkine Baibul tito ni “kadi omegine kikome bene pe guye en.” (Jon 7:5) Lacen, Yakobo ki Juda (nyo Yuda) gudoko lakwenane, gin bene gucoyo bukke me Baibul. Tika ingeyo nying bukke ma gucoyo?— Ee, gucoyo waraga pa Yakobo ki Juda.

Kadi bed pe kitito nying lumegi Yecu i Baibul, wangeyo ni en onongo tye ki lumegine. Oromo bedo ni en onongo tye ki lumegine makato acel. Lumegine magi tika gudoko lulub kore bene?— Baibul pe loko gin mo iye, pi meno, pe wangeyo. Ento ingeyo tyen lok mumiyo Yecu openyo lapeny ni, “Maa anga? Ki omegina kono angagi?”— Kong wanenu tyen lok man.

Yecu onongo tye ka pwonyo lukwenane ci ngat mo ongolo lokke kun wacce ni: “Nen, meni ki omegini gitye gucung woko gimito  lok kwedi.” Pi meno Yecu otiyo ki kare man me miyo pwony ki penyo lapeny me ur man ni: “Maa anga? Ki omegina kono angagi?” Ci en oryeyo bade tung bot lupwonnyene ka owaco botgi ni: ‘Wunen! Maa ki omegina gin egi!’

Ci Yecu otito gin mumiyo en oloko kit meno, kun wacci: “Dano ma tiyo gin ma Wora ma tye i polo mito, meno omera ki lamera, ki maa bene.” (Matayo 12:47-50) Man onyutu kit ma Yecu onongo tye kwede ki wat macok ki lupwonyene. En onongo tye ka pwonyowa ni lupwonyene gubedo calo omegine, lumegine ki megine.

I kare meno omegi pa Yecu kikome— Yakobo, Yucepu, Cimon, ki Juda—onongo pe giye ni Yecu obedo Wod pa Lubanga. Oromo bedo ni gin pe guye lok ma malaika Gabriel owaco bot mingi. (Luka 1:30-33) Man te lokke ni gin guromo bedo ki cwiny marac i kom Yecu. Ngat mo keken ma kit meno nongo pe  obedo omin nyo lamin kikome. In tika ingeyo ngat mo ma obedo ki cwiny marac i kom ominne nyo laminne?—

Baibul tito lok i kom Ecau ki Yakobo ki kit ma Ecau obedo ki akemo ci owacci: ‘Abineko omera Yakobo.’ Mingi, Labeka, obedo ki lworo matek ma omiyo en owaco ki Yakobo ni olwi woko wek Ecau pe oneke. (Acakki 27:41-46) Ento, i nge mwaki mapol cwiny Ecau olokke, en okwako kor Yakobo kun noto leme.—Acakki 33:4.

Yakobo onywalo awobe 12. Ento awobe pa Yakobo maditone onongo pe gimaro omingi matidi ma nyinge Yucepu. Gubedo ki nyeko i kome pien wongi onongo marre loyo gin ducu. Pi meno gin gumake ci gucate woko bot lucat opii ma onongo gitye ka cito i Ejipt. Ci guwaco bot wongi ni lee mager oneko Yucepu woko. (Acakki 37:23-36) Meno mono pe obedo tim marac mada?—

Lacen omego magi gungut pi bal ma gutimo i kom Yucepu. Pi meno, Yucepu otimo botgi kica. Tika iromo neno kit ma Yucepu gin ki Yecu gical kwede?— Lupwonnye pa  Yecu guringo woko i kare ma peko opoto i kome, dok Petero kikome okwero Yecu woko. Calo Yucepu, Yecu otimo botgi kica.

Dok tye omego aryo mo, gin gubedo Kain ki Abel. Watwero bene nongo pwony maber i komgi. Lubanga oneno ni cwiny Kain onongo pe maro ominne. Pi meno Lubanga owaco bot Kain ni olok kite ma pe ber-ri. Ka ada Kain onongo maro Lubanga, kono owinyo lokke. Ento en onongo obedo ngat ma pe maro Lubanga. Nino mo acel Kain owaco ki Abel ni: “Wacit i poto.” Abel owoto ki Kain. I kare ma gitye kacel i poto kengi, Kain ogoyo omine matek nio ka oneke woko.—Acakki 4:2-8.

Baibul tito pi pwony ma kite dok pat ma watwero nongone ki i gin mutimme-ni. In ingeyo pwony man?— ‘Man aye kwena ma wuwinyo nia i acakki, ni: Myero wamarre kekenwa; pe wabed calo Kain ma yam obedo latin pa Larac-ci.’ Pi meno omego ki lumego myero gumarre i kingi. Pe omyero gubed calo Kain.—1 Jon 3:11, 12.

Pingo rac me bedo calo Kain?— Pien Baibul waco ni en ‘yam obedo latin pa Larac-ci,’ Catan. Kit ma Kain oporo Larac ki ticce-ni, onongo bedo calo Larac-ci tye Wonne.

Dong iniang gin mumiyo pire tek me maro omegiwa ki lumegiwa?— Ka pe imarogi, nongo itye ka poro lutino pa anga?— Lutino pa Larac-ci. Pe wamito bedo jo ma kit meno, pe kumeno?— Dong, inyutu nining ni imito bedo latin pa Lubanga?— Ki maro omegini ki lumegini.

Ento mar mono obedo ngo?— Mar obedo gin ma wawinyo ki i cwinywa ma weko wabedo ki miti me timo gin maber bot jo mukene. Wanyutu ni wamaro jo mukene ka waterogi maber dok watimo jami mabeco pigi. Dong angagi ma gubedo omegiwa ki  lumegiwa ma omyero wamargi?— Wi opo ni, Yecu opwonyo ni gin gubedo utmegiwa ma Lukricitayo.

Pire tek marom mene ni myero wamar omegiwa ki lumegiwa ma Lukricitayo?— Baibul wacci: “Ngat ma pe maro ominne [nyo laminne] ma en oneno kome, pe twero maro Lubanga ma pe oneno kome.” (1 Jon 4:20) Pi meno pe watwero maro jo manok keken i kin utmegiwa ma Lukricitayo. Omyero wamar gin ducu. Yecu owacci: “Pi man dano ducu bingeyo ni wun lupwonnyena, ka mer tye i kinwu.” (Jon 13:35) In mono imaro omege ki lumege ducu?— Wi opo ni, ka pe imarogi ci nongo pe imaro Lubanga.

Watwero nyutu nining ni wamaro omegiwa ki lumegiwa?— Ka wamarogi, pe wabikanne woko ki botgi pien ni pe wamito lok kwedgi. Wabibedo lirem kwedgi ducu. Wabitimo jami maber pigi kare ducu dok wabimito ni wanywak jami kwedgi. Dok ka gitye ki peko, wabitute me konyogi pien wabedo jo me ot acel.

Ka wamaro omegiwa ki lumegiwa, ngo ma man nyutu?— Nyutu ni wan wabedo lupwonye pa Yecu, ma en Lapwony Madit. Man mono pe obedo gin ma wamito ni wabed?—