Ibuot 43

Mmanie Ẹdi Nditọeka Nnyịn?

KE IDAHA kiet Akwa Andikpep ama obụp mbụme oro akpade owo idem. Mbụme oro ekedi: “Anie edi eka Mi? mme anie ẹnyụn̄ ẹdi nditọ-eka Mi?” (Matthew 12:48) Nte afo emekeme ndibọrọ mbụme oro?— Ekeme ndidi afo ọmọdiọn̄ọ nte ke eka Jesus ekekere Mary. Edi nte ọmọfiọk enyịn̄ nditọeka esie irenowo?— Ndi enye ama enyene nditọeka iban n̄ko?—

Bible ọdọhọ ke nditọeka iren Jesus ẹkekere “James, ye Joseph, ye Simon, ye Judas.” Ndien Jesus ama enyene nditọeka iban emi ẹkedude uwem ke ini enye ọkọkwọrọde ikọ. Sia Jesus ekedide akpan, kpukpru mmọ ẹma ekpri ẹkan enye.—Matthew 13:55, 56; Luke 1:34, 35.

Ndi nditọeka iren Jesus ẹkedi mme mbet esie n̄ko?— Bible ọdọhọ ete ke akpa, mmọ ‘ikọbuọtke idem ye Enye.’ (John 7:5) Nte ededi, nte ini akakade, James ye Judas (n̄ko ẹkotde Jude) ẹma ẹkabade ẹdi mme mbet esie, ndien mmọ ẹma ẹkam ẹwet mme n̄wed Bible. Nte afo ọmọfiọk n̄wed emi mmọ ẹkewetde?— James ye Jude.

Okposụkedi owo mîsiakke enyịn̄ nditọeka iban Jesus ke Bible, nnyịn imọfiọk ite ke enye ama enyene nditọeka iban iba ke nsụhọde n̄kaha. Nte ededi, ekeme ndidi mmọ ẹma ẹwak ẹkan oro. Ndi nditọeka esie iban emi ẹma ẹkabade ẹdi mme anditiene enye?— Bible itịn̄ke, ntre nnyịn ifiọkke. Edi nte afo ọmọfiọk ntak emi Jesus okobụpde mbụme oro, “Anie edi eka Mi? mme anie ẹnyụn̄ ẹdi nditọ-eka Mi?”— Yak idụn̄ọde ifiọk.

Jesus ke ekekpep mme mbet esie n̄kpọ ke ini owo kiet ekesịbede  odụk edidọhọ enye ete: “Uka ye nditọ-uka ke ẹda ke an̄wa, ẹyom Fi, ndineme nneme ye afo.” Ntre Jesus ama ada ifet oro ekpep akpan ukpepn̄kpọ ebe ke ndibụp mbụme oro akpade owo idem ete: “Anie edi eka Mi? mme anie ẹnyụn̄ ẹdi nditọ-eka Mi?” Enye ama anyan ubọk owụt mme mbet esie onyụn̄ ọbọrọ ete: “Sese, eka Mi ye nditọ-eka Mi!”

Ekem Jesus ama anam ikọ esie an̄wan̄a, ọdọhọde ete: “Owo ekededi eke anamde se Ete Mi emi odude ke heaven amade, enye edi eyen-eka Mi eren ye eyen-eka Mi an̄wan, ye eka Mi.” (Matthew 12:47-50) Emi owụt adan̄a nte Jesus akamade mme mbet esie. Enye ekekpep nnyịn ete ke mme mbet imọ ẹketie nte ata nditọeka iren, iban, ye eka imọ.

Ke ini oro nditọeka iren Jesus—James, Joseph, Simon, ye Judas—ikenịmke nte ke Jesus ekedi Eyen Abasi. Anaedi mmọ ikenịmke se angel Gabriel eketịn̄de ọnọ eka mmọ. (Luke 1:30-33) Ntre anaedi mmọ ẹma ẹsọn̄  ido ye Jesus. Owo ekededi eke anamde n̄kpọ ntre idịghe ata eyeneka. Nte afo ọmọfiọk owo ekededi emi ọsọn̄de ido ye eyeneka esie?—

Bible etịn̄ aban̄a Esau ye Jacob ye nte Esau akayatde esịt tutu enye ọdọhọ ete: “Nyowot Jacob eyen-eka mi.” Eka mmọ, Rebekah, ama enen̄ede okop ndịk tutu enye anam Jacob ọkpọn̄ ufọk man Esau okûwot enye. (Genesis 27:41-46) Nte ededi, ediwak isua ke oro ebede Esau ama okpụhọde uwem esie, ndien enye ama afat onyụn̄ etịm Jacob inua.—Genesis 33:4.

Nte ini akakade, Jacob ama enyene nditọ 12. Edi ikpọ nditọ Jacob ikamaha Joseph, ekpri eyeneka mmọ. Mmọ ẹma ẹfịbe Joseph ufụp sia enye ekedide eyenima ete mmọ. Ntre mmọ ẹma ẹnyam enye ẹnọ mme anyam ifịn emi ẹkekade Egypt. Ekem mmọ ẹma ẹdọhọ ete mmọ ẹte ke idiọk unam ama owot Joseph. (Genesis 37:23-36) Ndi oro ikenyeneke ndịk?—

Nte ini akakade nditọeka Joseph ẹma ẹtua n̄kpọfiọk ẹban̄a se mmọ ẹkenamde. Ntre Joseph ama efen  ọnọ mmọ. Nte afo emekeme ndikụt nte Joseph ekebietde Jesus?— Mme apostle Jesus ẹma ẹkpọn̄ enye ke ini enye okodude ke mfịna, ndien Peter ama akam akan̄ enye. Edi, ukem nte Joseph, Jesus ama efen ọnọ kpukpru mmọ.

Cain ye Abel ẹdi nditọeka iren iba. Nnyịn imekeme ndikpep n̄kpọ nto mmọ n̄ko. Abasi ama okụt esịt Cain nte ke enye iketịmke ima eyeneka esie. Ntre Abasi ama ọdọhọ Cain ete ke enye ekpenyene ndikpụhọde usụn̄ esie. Edieke Cain ekenen̄erede ama Abasi, enye akpakakpan̄ utọn̄. Edi enye ikamaha Abasi. Usen kiet Cain ama ọdọhọ Abel ete: ‘Yak nnyịn ika in̄wan̄.’ Abel ama etiene Cain aka. Ke adan̄aemi mmọ ẹkedude do ikpọn̄ ke in̄wan̄, Cain ama amia eyeneka esie owot.—Genesis 4:2-8.

Bible asian nnyịn ete ke akpan n̄kpọ odu oro nnyịn ikpekpepde ito oro. Nte afo ọmọfiọk se enye edide?— ‘Emi edi etop emi mbufo ẹkekopde toto ke editọn̄ọ ete: nnyịn ikpama kiet eken; ikûbiet Cain, emi ekedide eke andidiọk.’ Ntre nditọeka ẹkpenyene ndima kiet eken. Mmọ ikpebietke Cain.—1 John 3:11, 12.

Ntak ọkpọdiọkde ndibiet Cain?— Koro Bible ọdọhọ ete ke enye ‘ekedi eke andidiọk,’ Satan kpa Devil. Sia Cain akanamde n̄kpọ nte Devil, eketie ukem ukem nte Devil ekpedide ete esie.

Nte afo omokụt ntak emi edide akpan n̄kpọ ndima nditọeka fo?— Nditọ anie ke afo edikpebe edieke afo mûmaha mmọ?— Nditọ Devil. Afo ukpumaha ndidi eyen Devil, ndi akpama?— Ntre didie ke afo ekeme ndiwụt nte ke imọ iyom ndidi eyen Abasi?— Ebe ke ndinen̄ede mma nditọeka fo.

Edi nso idi ima?— Ima edi ntotụn̄ọ ntụk emi esịnede nnyịn ke idem oro anamde nnyịn iyom ndinam nti n̄kpọ nnọ mbon en̄wen. Nnyịn iwụt ke nnyịn imama mbon en̄wen ke ini nnyịn ikerede eti n̄kpọ iban̄a mmọ ye ke ini inamde nti n̄kpọ inọ mmọ. Ndien  mmanie ẹdi nditọeka nnyịn emi nnyịn ikpamade?— Ti ke Jesus ekekpep nte ke mmọ ẹdi akamba ubon Christian.

Nnyịn ndima nditọete Christian emi edi akpan n̄kpọ adan̄a didie?— Bible ọdọhọ ete: “Owo emi mîman̄a eyen-ete esie emi enye okokụtde ke enyịn ikemeke ndima Abasi emi enye mîkekwe.” (1 John 4:20) Ntre nnyịn ikemeke ndima sụk ibat ibat owo ke ubon Christian. Ana nnyịn ima kpukpru mmọ. Jesus ọkọdọhọ ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Ndi afo amama kpukpru nditọete iren ye iban?— Ti ke edieke afo mûmaha mmọ, afo ukemeke ndinen̄ede mma Abasi.

Didie ke nnyịn ikeme ndiwụt nte ke nnyịn imenen̄ede ima nditọete nnyịn?— Ọfọn, edieke nnyịn imade mmọ, nnyịn idifepke mmọ koro nnyịn mîyomke nditịn̄ ikọ ye mmọ. Nnyịn iditie ufan ufan ye kpukpru mmọ. Nnyịn iyanam eti n̄kpọ inọ mmọ kpukpru ini inyụn̄ inyịme ndibuana n̄kpọ ye mmọ. Ndien edieke mmọ ẹdude ke mfịna, nnyịn iyan̄wam mmọ koro nnyịn ke akpanikọ idide akamba ubon.

Ke ini nnyịn itịmde ima kpukpru nditọete nnyịn, nso ke oro owụt?— Enye owụt ete ke nnyịn idi mme mbet Jesus, kpa Akwa Andikpep. Ndien nte oro idịghe se nnyịn iyomde ndidi?—

Ẹtịn̄ n̄ko ẹban̄a edima nditọeka nnyịn ke Galatia 6:10 ye 1 John 4:8, 21. Ntak mûkụbọkede Bible fo unyụn̄ ukot mme itie N̄wed Abasi oro?

[Ndise ke page 223]

Mmanie ke Jesus ọkọdọhọ ke ẹdi nditọeka imọ?

[Ndise ke page 224]

Nso ke nnyịn ikpekpep ito se Cain akanamde Abel?

[Ndise ke page 226]

Didie ke afo ekeme ndiwụt ke imama eyeneka fo?