A TAROGA e dua na taro veivakurabuitaki na Qasenivuli Levu ena dua na gauna. E taroga: ‘O cei na tinaqu, o cei o iratou na taciqu?’ (Maciu 12:48) O rawa ni sauma na taro oya?— O rairai kila ni yaca i tina i Jisu o Meri. Ia o kila na yacadratou na tacina?— Era tu tale beka ga na ganena?—

E vakaraitaka na iVolatabu ni yacadratou na taci Jisu o “Jemesa, kei Josefa, kei Saimoni, kei Jutasa.” Era bula tale tu ga na ganena ena gauna e vunau voli kina. Ni a ulumatua o Jisu, era gone kece na tacina.​—Maciu 13:55, 56; Luke 1:34, 35.

Era nona tisaipeli tale beka ga na tacina?— E kaya na iVolatabu nira sega mada “ni vakabauti koya ko iratou na tacina.” (Joni 7:5) Ia e muri, rau qai yaco me rau nona tisaipeli o Jemesa kei Jutasa (yacana tale ga o Juta), rau bau vola tale ga e rua na ivola ena iVolatabu. O kila se ivola cava erau dui vola?— Io, na Jemesa kei na Juta.

Dina ga ni sega ni cavuti ena iVolatabu na yacadra na ganei Jisu, ia eda kila ni rawa ni rua se sivia. Era yaco beka mera nona imuri na ganena?— E sega ni vakaraitaka na iVolatabu, eda sega gona ni kila. O kila se cava e vu ni nona taroga o Jisu, ‘O cei na tinaqu, o cei o iratou na taciqu?’— Daru raica mada.

O Jisu e vakavulici iratou tiko na nona tisaipeli ena gauna e kaya yani kina e dua: “Raica, e ratou tu e tautuba na tinamu kei iratou na tacimu, e ratou via vosa vei iko.” E vakayagataka na gauna oya o Jisu me vakavuvulitaka kina e dua na ka bibi, ena nona taroga na  taro veivakurabuitaki: ‘O cei na tinaqu, o cei o iratou na taciqu?’ Ni dodoka na ligana vei iratou na nona tisaipeli, e kaya: “Raica na tinaqu kei ira na taciqu!”

E qai vakamacalataka o Jisu na ibalebale ni nona vosa: “O koya ga e cakava na loma i Tamaqu mai lomalagi, sa i koya oqo na taciqu, kei na ganequ kei na tinaqu.” (Maciu 12:47-50) E vakaraitaka oqo na levu ni nona lomani ira nona tisaipeli o Jisu. E vakaraitaka vei keda o koya ni o ira na nona tisaipeli era vaka dina na tacina, ganena, kei na tinana.

Eratou se sega ni vakabauta ena gauna oya na taci Jisu o Jemesa, Josefa, Saimoni, kei Jutasa, ni o Jisu e Luve ni Kalou. De ratou sega ni vakabauta na ka e tukuna na agilosi o Keperieli vei tinadratou. (Luke 1:30-33) De eratou dau qati Jisu. Ke dua e vaka oya na nona ivakarau, e sega ni tacida dina o koya. O bau kila e dua e dau qati tacina se ganena?—

 E vakamacalataki Iso kei Jekope na iVolatabu kei na nona cudru o Iso ni kaya: ‘Au na vakamatei Jekope na taciqu.’ Ena levu ni nona rere o Repeka, na tinadrau, e vakatalai Jekope tani me kua kina ni vakamatei. (Vakatekivu 27:41-46) Ia e qai veisau o Iso ni oti e vica na yabaki, ni a qai mokota qai reguci Jekope tale.​—Vakatekivu 33:4.

Era qai sucu e 12 na luve tagane i Jekope. Ia o ira na luve i Jekope qase era dau qati tacidra o Josefa. Era qati koya baleta ni dau taleitaki koya vakalevu o tamadratou. Era mani volitaki koya vei ira na dauvolivolitaki era gole tiko i Ijipita. Eratou lai tukuna vei tamadratou ni a vakamatei Josefa e dua na manumanu kila. (Vakatekivu 37:23-36) E sega beka ni ka lolovira oya?—

Era qai veivutunitaka na tuakai Josefa na ka era cakava. E vosoti iratou kina o Josefa. O raica rawa se rau tautauvata vakacava o Josefa kei Jisu?— Eratou drovaki Jisu na nona yapositolo ena gauna e vakaleqai kina o Jisu, e cakitaka sara ga o Pita ni bau kilai koya. Ia, me vakataki Josefa, e vosoti iratou kece o Jisu.

 Vakasamataki rau tale ga na veitacini o Keni kei Epeli. Eda vuli tale ga vei rau. E kila na Kalou ni sega ni lomani tacina o Keni. E mani tukuna vei Keni me veisautaka na nona ivalavala. Ke a lomana dina na Kalou o Keni, ke a rogoca na ivakasala. Ia e sega ni lomana na Kalou o koya. E kaya vei Epeli o Keni ena dua na siga: “Daru lako ki na were.” E muri Keni o Epeli. Ni rau tiko taurua mai na were, e mokuti tacina vakaukaua o Keni me lai mate sara kina.​—Vakatekivu 4:2-8.

E vakaraitaka na iVolatabu nida vulica e dua na ivakavuvuli bibi mai na ka e yaco oya. O kila se cava eda vulica?— “Sa i koya oqo na i tukutuku ko ni a rogoca mai na i vakatekivu: me da sa veilomani vaka i keda. Me da kakua ni vakataki Keni, na luve ni Vunica.” E dodonu gona meda lomani ira na tacida kei na ganeda. Meda kua ni vakataki Keni.​—1 Joni 3:11, 12,  VV.

Na cava eda sega kina ni vinakata meda vakataki Keni?— Baleta e kaya na iVolatabu ni o Keni e ‘lako mai vua na vunica,’ o Setani na Tevoro. Ni muria na ivalavala ni Tevoro o Keni, e vaka sara ga e tamana na Tevoro.

O raica rawa na bibi ni nomu lomani ira na tacimu kei na ganemu?— Ke o sega ni lomani ira, o na vakatotomuri ira tiko na luve i cei?— Na luve ni Tevoro. O na sega ni vinakata oya, se vakaevei?— O na vakaraitaka vakacava ni o vinakata mo luve ni Kalou?— Ena nomu lomani ira na tacimu kei na ganemu.

Ia na cava sara mada na loloma?— Na kena vu sara ga mai lomada na noda vinakata meda cakava na veika vinaka vei ira tale e so. Eda vakaraitaka na noda lomani ira tale e so ena noda taleitaki ira kei na noda cakava na veika vinaka vei ira. O cei o ira na tacida kei na ganeda e dodonu meda lomana?— Me vaka e tukuna o Jisu, oqo o ira na tacida lotu Vakarisito.

 E bibi vakacava na noda lomani ira na tacida kei na ganeda lotu Vakarisito?— E kaya na iVolatabu: “O koya e sega ni lomana na tacina [se ganena], e raica rawa, ena lomana vakacava na Kalou, o koya e sega ni raica.” (1 Joni 4:20, NW) E sega gona ni rawa meda lomani ira ga e so na tacida kei na ganeda lotu Vakarisito. E dodonu meda lomani ira kece. A kaya o Jisu: “A ka oqo era na kila kina na tamata kecega ni dou sa noqu tisaipeli, kevaka dou sa veilomani.” (Joni 13:35) O dau lomani ira kece na tacida kei na ganeda?— Kevaka o sega ni lomani ira, o sega ni lomana na Kalou.

Eda vakaraitaka vakacava nida lomani ira dina na tacida kei na ganeda?— Kevaka eda lomani ira, eda na sega ni yawaki ira baleta nida sega ni via vosa vei ira. Eda na veimaliwai vinaka kei ira kece. Eda na caka vinaka tiko ga vei ira, da qai wasea vata kei ira na ka. Kevaka era sotava na leqa, eda na vukei ira baleta nida veitacini dina.

Na cava e vakadinadinataka nida lomani ira dina na tacida kei na ganeda?— E vakadinadinataka nida tisaipeli i Jisu, na Qasenivuli Levu. O sega li ni vinakata oya?—