ITI naminsan, adda makapasiddaaw a saludsod ti Naindaklan a Mannursuro. Kastoy: “Asino ti inak, ken asino dagiti kakabsatko?” (Mateo 12:48) Masungbatam kadi dayta?— Mabalin nga ammom a Maria ti nagan ti ina ni Jesus. Ngem ammom kadi ti nagan dagiti kakabsatna a lallaki?— Adda met kadi kakabsatna a babbai?—

Kuna ti Biblia a “Santiago ken Jose ken Simon ken Judas” ti nagan dagiti lallaki a kakabsat ni Jesus. Ken idi mangaskasaba ni Jesus, addada sibibiag a kakabsatna a babbai. Yantangay ni Jesus ti inauna, adingna amin ida.​​—Mateo 13:​55, 56; Lucas 1:​34, 35.

Adalan met kadi ni Jesus dagiti kakabsatna?— Kuna ti Biblia nga idi damo ‘saanda a namati kenkuana.’ (Juan 7:5) Ngem idi agangay nagbalin met nga adalanna da Santiago ken Judas, ken nagsuratda pay kadagiti libro ti Biblia. Ammom kadi no ania dagiti libro nga insuratda?— Wen, Santiago ken Judas.

Nupay saan a nainaganan iti Biblia dagiti babbai a kakabsat ni Jesus, masiguradotayo nga adda dua wenno nasursurok pay a kakabsatna a babbai. Nagbalin kadi a pasurotna dagitoy a kakabsatna a babbai?— Saan a nadakamat iti Biblia, isu a ditay ammo. Ngem ammom kadi no apay a dinamag ni Jesus ti saludsod nga, “Asino ti inak, ken asino dagiti kakabsatko?”— Kitaenta.

Madama a mangisursuro ni Jesus kadagiti adalanna idi adda bimmallaet a nangikuna: “Ni inam ken ti kakabsatmo agtaktakderda iti ruar, a tartarigagayanda ti makisao kenka.” Gapuna, ginundawayan ni Jesus ti mangisuro iti napateg a leksion babaen ti panangyimtuodna  iti dayta a makapasiddaaw a saludsod: “Asino ti inak, ken asino dagiti kakabsatko?” Intudona dagiti adalanna sana kinuna: “Adtoy! Ti inak ken dagiti kakabsatko!”

Kalpasanna inlawlawag ni Jesus ti kayatna a sawen, a kunkunana: “Siasinoman a mangaramid iti pagayatan ni Amak nga adda sadi langit, dayta met laeng ti kabsatko a lalaki, ken kabsatko a babai, ken inak.” (Mateo 12:​47-​50) Daytoy ti mangipakita iti kinasinged ni Jesus kadagiti adalanna. Insurona kadatayo a dagiti adalanna ket imbilangna a kas literal a kakabsatna ken inana.

Iti daydi a tiempo, dagiti mismo a kakabsat ni Jesus​​—da Santiago, Jose, Simon, ken Judas​​—dida patien a ni Jesus ket Anak ti Dios. Sigurado a dida pinati ti imbaga ni anghel Gabriel ken ni nanangda. (Lucas 1:​30-​33) Gapuna, mabalin a saanda a nasingpet ken Jesus. Asinoman a kasta ti tigtignayna ket saan a pudno a kabsat. Adda kadi am-ammom a saan a nasingpet iti kabsatna?—

 Saritaen ti Biblia ti maipapan kada Esau ken Jacob ken no kasano a nakapungtot unay ni Esau isu a kinunana: “Papatayekto ni Jacob a kabsatko.” Napalalo ti buteng ni nanangda a Rebecca isu a pinapanawna ni Jacob tapno di mapatay ni Esau. (Genesis 27:​41-​46) Nupay kasta, nagbalbaliw ni Esau kalpasan ti adu a tawen, ket inarakup ken inagkanna ni Jacob.​​—Genesis 33:4.

Idi agangay, naaddaan ni Jacob iti 12 nga annak a lallaki. Ngem dagiti in-inauna nga annak ni Jacob dida inayat ti in-inaudi a kabsatda a ni Jose. Nagimonda kenkuana gapu ta isu ti magustuan ti amada. Gapuna, inlakoda ni Jose kadagidiay agilaklako iti adipen nga agturong idi idiay Egipto. Kalpasanna imbagada ken tatangda a pinatay ti narungsot nga animal ni Jose. (Genesis 37:23-​36) Saan aya a nagdakes dayta?—

Idi agangay naladingitan dagiti kakabsat ni Jose iti inaramidda. Gapuna, pinakawan ida ni Jose. Matarusam kadi no kasano a kasla Jesus ni Jose?— Idi naipasango ni Jesus iti peggad, pinanawan dagiti mismo nga apostolna, ken imbaga pay ketdi ni  Pedro a saanna nga am-ammo ni Jesus. Ngem kas ken Jose, pinakawan ida ni Jesus.

Adda met leksion a maadaltayo kadagiti agkabsat a Cain ken Abel. Nakita ti Dios iti puso ni Cain a saanna a pudno nga ay-ayaten ti kabsatna. Gapuna, imbaga ti Dios ken Cain a baliwanna koma ti kababalinna. Dimngeg koma ni Cain no pudno nga ay-ayatenna ti Dios. Ngem dina ay-ayaten ti Dios. Maysa nga aldaw kinuna ni Cain ken Abel: “Mapanta idiay tay-ak.” Simmurot ni Abel ken Cain. Idi duduada sadiay, kinabil ni Cain ti kabsatna agingga a natay.​​—Genesis 4:​2-8.

Kuna ti Biblia nga adda naisangsangayan a leksion a maadaltayo iti dayta. Ammom kadi no ania dayta?— ‘Daytoy ti mensahe a nangngegyo nanipud idi damo: Rebbeng a maaddaantayo iti ayat iti maysa ken maysa; saan a kas ken Cain, a nagtaud iti daydiay nadangkes.’ Gapuna, rumbeng nga agiinnayat dagiti agkakabsat. Dida koma tultuladen ni Cain.​​—1 Juan 3:​11, 12.

Apay a ditay kayat a tuladen ni Cain?— Gapu ta kuna ti Biblia a ‘nagtaud ni Cain iti daydiay nadangkes,’ ni Satanas a Diablo. Gapu ta tinulad ni Cain ti Diablo, kasla ti Diablo ti amana.

Matarusam kadi no apay a napateg nga ayatem dagiti kakabsatmo?— No dimo ayaten ida, makin-annak ti tultuladem?— Dagiti annak ti Diablo. Kayatmo kadi ti agbalin nga anak ti Diablo?— No kasta, kasanom a maipakita a kayatmo ti agbalin nga anak ti Dios?— Babaen ti pudno a panangayatmo kadagiti kakabsatmo.

Ngem ania ti ayat?— Ti ayat ket nakaro a rikna iti unegtayo a mangtignay kadatayo nga agaramid iti naimbag kadagiti sabsabali. Maipakitatayo nga ay-ayatentayo dagiti sabsabali no nadungngotayo kadakuada ken no agaramidtayo kadagiti nasayaat para kadakuada. Ket siasino dagiti kakabsattayo a rumbeng nga  ayatentayo?— Laglagipem, sigun ken Jesus isuda dagidiay Kristiano a kakabsattayo.

Kasano kapateg ti panagayattayo kadagitoy a Kristiano a kakabsat?— Kuna ti Biblia: “Ti saan nga agayat iti kabsatna, a nakitana, saanna a mabalin nga ayaten ti Dios, a saanna a nakita.” (1 Juan 4:20) No kasta, saan a mabalin a dagiti laeng sumagmamano a kakabsattayo ti ayatentayo. Masapul nga ayatentayo amin ida. Kinuna ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Ay-ayatem kadi dagiti amin a kakabsat?— Laglagipem, no saanmo nga ay-ayaten ida, saanmo a talaga nga ay-ayaten ti Dios.

Kasanotayo a maipakita a talaga nga ay-ayatentayo dagiti kakabsattayo?— No ay-ayatentayo ida, ditay likliklikan ida gapu ta ditay kayat a kasarita ida. Gayyementayo amin ida. Kanayon nga aramidentayo ti naimbag kadakuada ken sidadaantayo a makikadua kadakuada. Ket no adda parikutda, tulongantayo ida gapu ta pudno a naitimpuyogtayo iti maysa a dakkel a pamilia.

No pudno nga ay-ayatentayo amin dagiti kakabsattayo, ania ti ipakpakita dayta?— Ipakpakitana a datayo dagiti adalan ni Jesus, ti Naindaklan a Mannursuro. Ket saan aya a dayta ti kayattayo a pagbalinan?—