KAPU 43

Banani Kele Bampangi na Beto ya Babakala Ti ya Bankento?

KILUMBU mosi Longi ya Nene kuyulaka ngyufula mosi ya kuyituka. Yo vandaka nde: “Mama na mono nani, bampangi na mono banani?” (Matayo 12:48) Keti nge lendaka kupesa mvutu na ngyufula yai?— Ziku nge mezaba nde zina ya mama ya Yezu kuvandaka Maria. Kansi, keti nge mezaba bazina ya bampangi na yandi ya babakala?— Keti yandi vandaka mpi ti bampangi ya bankento?—

Biblia ketuba nde bazina ya bampangi ya Yezu ya babakala kuvandaka “Yakobo, Yozefi, Simoni ti Yudasi.” Yezu kuvandaka mpi ti bampangi ya bankento yina kuvandaka na luzingu ntangu yandi vandaka kulonga. Sambu Yezu kuvandaka mwana ya ntete, bampangi na yandi yonso kuvandaka baleki na yandi.—Matayo 13:55, 56; Luka 1:34, 35.

Keti bampangi ya Yezu ya babakala mpi kuvandaka balongoki na yandi?— Biblia ketuba nde ntete bo vandaka ‘kukwikila na yandi ve.’ (Yoane 7:5) Kansi, na nima, Yakobo ti Yudasi (ya bo vandaka kubinga mpi Yude) kukumaka balongoki na yandi, mpi bo sonikaka nkutu mikanda ya Biblia. Keti nge mezaba nki mikanda bo sonikaka?— Ee, mukanda ya Yakobo mpi ya Yude.

Ata Biblia kepesa ve bazina ya bampangi ya bankento ya Yezu, beto mezaba nde yandi vandaka ti bampangi ya bankento ata zole mpamba. Kansi, ziku bo vandaka mingi. Keti bampangi na yandi yina ya bankento kukumaka mpi balongoki na yandi?— Sambu Biblia ketubila yo ve, beto kezaba mpi ve. Kansi keti nge kezaba sambu na nki Yezu kuyulaka ngyufula nde: “Mama na mono nani, bampangi na mono banani?”— Beto sosa mvutu.

Yezu vandaka kulonga balongoki na yandi ntangu muntu mosi kuzengaka yandi ndinga nde: “Mama na nge ti bampangi na nge kele awa na nganda, bo ke zola kutubila nge mambu.” Ebuna Yezu kusadilaka okazio yina  sambu na kulonga dilongi mosi ya mfunu na kuyulaka ngyufula yai ya kuyituka: “Mama na mono nani, bampangi na mono banani?” Yandi tandulaka diboko na yandi kisika yina balongoki na yandi kuvandaka ebuna yandi pesaka mvutu yai nde: “Beno tala: Mama na mono ti bampangi na mono bo yai.”

Na nima, Yezu kutendulaka mambu ya yandi zolaka kutuba nde: “Konso muntu yina ke salaka mambu yina ya Tata na mono na zulu ke zolaka, yandi yina muntu kele mpangi na mono ya bakala to ya nkento, to mama na mono.” (Matayo 12:47-50) Kutuba yai kesonga nde Yezu vandaka kuzola balongoki na yandi mingi mpenza. Yandi kulongaka beto nde yandi vandaka kubaka balongoki na yandi bonso bampangi ya babakala, ya bankento, mpi bamama na yandi ya kinsuni.

Na ntangu yina, bampangi ya babakala ya Yezu yina yandi butukaka na bo—Yakobo, Yozefi, Simoni, ti Yudasi—vandaka kukwikila ve nde Yezu kuvandaka Mwana ya Nzambi. Yo fwete vanda nde bo kwikilaka ve mambu yina wanzyo Gabriele kuzabisaka mama na bo. (Luka 1:30-33) Ziku bo vandaka kusadila Yezu mambu ya  nku. Konso muntu yina kesalaka mambu ya mutindu yina kele ve mpangi ya bakala to ya nkento ya kyeleka. Keti nge mezaba ata muntu mosi yina mesadilaka mpangi na yandi ya bakala to ya nkento mambu ya nku?—

Biblia ketela beto disolo ya Ezau ti Yakobi mpi mutindu Ezau kuwaka makasi mingi mpenza ti mpila ya yandi tubaka nde: ‘Mono ta fwa mpangi na mono Yakobi.’ Mama na bo, Rebeka, kuwaka boma mpenza, yo yina yandi tindaka Yakobi ntama sambu Ezau kufwa yandi ve. (Kuyantika 27:41-46) Kansi, bamvula mingi na nima, Ezau kusobaka, yandi yambaka Yakobi mpi yandi pesaka yandi beze.—Kuyantika 33:4.

Na nima, Yakobi kubutaka bana ya babakala 12. Kansi, bana ya Yakobi yina kuvandaka bambuta vandaka kuzola ve leki na bo ya bakala, Yozefi. Bo vandaka kuwila yandi kimpala sambu tata na bo vandaka kuzola yandi mingi kuluta bo. Yo yina, bo tekaka yandi na bakomersa ya vandaka kusumba bampika yina vandaka kuluta sambu na kukwenda na Ezipte. Ebuna bo songaka tata na bo nde mbisi mosi ya mfinda kufwaka Yozefi. (Kuyantika 37:23-36) Keti dyambu yai kuvandaka ve ya mawa?—

Na nima, bampangi ya babakala ya Yozefi kuwaka mawa sambu na mambu ya bo salaka. Ebuna, Yozefi kuloluka bo. Keti nge kemona nki mutindu Yozefi kuvandaka bonso Yezu?— Bantumwa ya Yezu kutinaka  yandi ntangu yandi kumaka na mpasi. Nkutu Piere kubuyaka nde yandi mezaba ve Yezu. Kansi bonso Yozefi, Yezu kuloluka bo yonso.

Disolo yankaka kele ya bampangi zole ya babakala, Kaini ti Abele. Beto lenda longuka mpi dilongi mosi na disolo na bo. Nzambi kumonaka na ntima ya Kaini nde yandi vandaka kuzola ve mpenza mpangi na yandi. Yo yina, Nzambi kulombaka Kaini nde yandi fwete soba bikalulu na yandi. Kana Kaini vandaka kuzola mpenza Nzambi, yandi zolaka kuwila yandi. Kansi yandi vandaka kuzola ve Nzambi. Kilumbu mosi, Kaini kusongaka Abele nde: ‘Beto kwenda kutambula fyoti na bilanga.’ Abele kukwendaka ti Kaini. Ntangu bo vandaka kuna na bilanga bo mosi, Kaini kubulaka leki na yandi ngolo mpenza mpi yandi fwaka yandi.—Kuyantika 4:2-8.

Biblia kezabisa beto nde kele ti dilongi mosi ya nene ya beto fwete longuka na disolo yai. Keti nge mezaba dilongi yango?— “Yai kele mambu yina ya beno me waka katuka na luyantiku: Beto fweti zolana. Beto sala ve mutindu Kaini salaka. Yandi vandaka muntu ya Muntu ya Mbi.” Bampangi ya babakala ti ya bankento fwete zolanaka bo na bo. Bo fwete vandaka ve bonso Kaini.—1 Yoane 3:11, 12.

Sambu na nki yo tavanda mbi na kuvanda bonso Kaini?— Sambu Biblia ketuba nde yandi “vandaka muntu ya Muntu ya Mbi,” Satana Dyabulu. Sambu Kaini kusalaka mambu bonso Dyabulu, yo vandaka mpenza bonso nde Dyabulu kuvandaka tata na yandi.

Keti nge kebakisa sambu na nki kuzola bampangi na nge ya babakala ti ya bankento kele mfunu?— Kana nge kezolaka bo ve, nge kelandaka mbandu ya bana ya nani?— Ya bana ya Dyabulu. Nge tazola ve kuvanda mwana ya Dyabulu, mpidina ve?— Kana mpidina, inki mutindu nge le songa nde nge kezola kuvanda mwana ya Nzambi?— Nge tasonga yo kana nge kezola bampangi na nge ya babakala ti ya bankento na masonga yonso.

Kansi, zola kele inki?— Zola kele mawi mosi ya ngolo ya kevandaka na kati na beto mpi ya kepusaka beto na kuzola kusala mambu ya mbote sambu na bantu yankaka. Beto kemonisaka nde beto kezolaka bankaka na ntangu beto kevandaka ti mawi ya mbote sambu na bo mpi na ntangu beto kesadilaka bo mambu ya mbote. Kansi, banani kele bampangi na beto ya  babakala ti ya bankento ya beto fwete zola?— Yibuka nde Yezu kulongaka nde bampangi na beto kele bayina kele na kati ya dibuta ya nene ya Bukristu.

Keti yo kele mfunu mpenza nde beto zola Bakristu yai ya babakala ti ya bankento?— Biblia ketuba nde: “Muntu yina ke zolaka ve mpangi na yandi [ya bakala to ya nkento] yina ya yandi ke monaka, inki mutindu yandi lenda zola Nzambi yina ya yandi me monaka ntete ve?” (1 Yoane 4:20) Yo yina, beto fwete zola ve kaka bantu ndambu na kati ya dibuta ya Bukristu. Beto fwete zola bo yonso. Yezu kutubaka nde: “Kana beno ke zolana beno na beno, bantu yonso ta zaba nde beno kele balonguki na mono.” (Yoane 13:35) Keti nge kezolaka bampangi yonso ya babakala ti ya bankento?— Kuvila ve nde kana nge kezola bo ve, nge takuka mpi ve kuzola mpenza Nzambi.

Inki mutindu beto le monisa nde beto kezolaka mpenza bampangi na beto ya babakala ti ya bankento?— Kana beto kezolaka bo, beto tatinaka bo ve sambu beto kezola ve kusolula ti bo. Beto tazingaka mbote ti bo yonso. Beto tasadilaka bo ntangu yonso mambu ya mbote mpi beto tazolaka kukabila bo. Ebuna kana bo ke na mpasi, beto tasadisa bo sambu beto kele mpenza dibuta mosi ya nene.

Kana beto kezola mpenza bampangi na beto yonso ya babakala ti ya bankento, yo tasonga nde inki?— Yo tasonga nde beto kele balongoki ya Yezu yina kele Longi ya Nene. Beto kezola kuvanda mutindu yina, mpidina ve?—

Bo ketubila dyaka mambu ya metala kuzola bampangi na beto ya babakala ti ya bankento na Galatia 6:10 mpi 1 Yoane 4:8, 21. Keti nge lenda kangula Biblia na nge sambu beto tanga baverse yina?

[Kifwanisu ya kele na lutiti 223]

Yezu kutendulaka nde banani kuvandaka bampangi na yandi ya babakala ti ya bankento?

[Kifwanisu ya kele na lutiti 224]

Inki dilongi beto fwete baka na mambu yina Kaini kusalaka Abele?

[Kifwanisu ya kele na lutiti 226]

Inki mutindu nge le songa nde nge kezolaka mpangi na nge?