AJOQERSUISORSUAQ ilaanni eqqumiippalulaartumik ima aperivoq: “Kinaagami anaanaga kikkuugamillu nukakka?” (Matthæusi 12:48) Nalunngiliuk kikkuusut? — Nalunavianngilat Jiisusip anaanaa Mariamik ateqartoq. Nukaasali aqqi nalunngiligit? — Najaqarpa? —

Biibilimi allassimavoq Jiisusip nukaasa ilaat “Jaakumik Josefimik Siimuumik Judasimillu” ateqartut. Biibilimi aamma allassimavoq najaqartoq. Jiisusi angajulliliaavoq, taamaammat qatanngutai tamarmik nukarliupput. — Matthæusi 13:55, 56; Lukasi 1:34, 35.

Jiisusip nukai aamma taassumunnga ajoqersugaappat? — Biibilimi allassimavoq nukaasa aallaqqaammut upperinngikkaat. (Johannesi 7:5, NV) Kingornali Jaaku Judasilu taassumunnga ajoqersuganngorput, allaallu Biibilimik allaqataallutik. Allakkat Biibilimiittut sorliit? — Taasarpavut Jaakup allagaanik Judasillu allagaanik.

Jiisusip najaasa aqqi Biibilimi allassimanngillat. Nalunngilarput minnerpaamik marluusimassasut, amerlanerusimasinnaappulli. Jiisusip najai taassumunnga ajoqersuganngorpat? — Tamanna Biibilimi allassimanngilaq, taamaattumik naluarput. Nalunngiliulli sooq Jiisusi ima aperinersoq: “Kinaagami anaanaga kikkuugamillu nukakka”? — Tusassavat.

Jiisusip ajoqersukkani ajoqersormagit angut takkuppoq oqarfigalugulu: ‘Anaanat nukkatillu silataaniipput oqaloqatigiumallutit.’ Periarfissaq tamanna atorluarpaa pingaaruteqartumik oqaaseqarnissaminut.  Taamaattuminguna ima aperisoq: “Kinaagami anaanaga kikkuugamillu nukakka?” Ajoqersukkani tikkuaatigalugit nammineq ima akivoq: “Aajuku anaanaga nukakkalu!”

Taava Jiisusip qanoq isumaqarnerluni nassuiarpaa ima oqarluni: ‘Kinaluunniit ataatama qilanniittup piumasaanik iliortoq tassa nukara najagalu anaanagalu.’ (Matthæusi 12:47-50) Tamatuma takutippaa Jiisusip qanoq qanitsigisumik ajoqersukkani attaveqarfigisimagai. Paasivarput ajoqersukkani qatanngutimisut anaanamisullu isigigai.

Tamanna pivoq qatanngutaasa — Jaakup, Josefip, Siimuup Judasillu — Guutip ernerigaa suli upperinngikkallarmassuk. Tassa inngilip Gabrielip anaanaminnut oqaasii upperinngilaat. (Lukasi 1:30-33) Immaqa allaat Jiisusi ajortumik pisarpaat. Taamaaliortoqarpat qatanngutigivinngilavut. Nalunngisaqarpit qatanngutiminut ajortorujussuarmik iliorsimasumik? —

 Biibilimi qatanngutigiit Esaui Jaakulu eqqartorneqarput. Esauip qatanngunni kamaatingaaramiuk ima oqarpoq: “Nukara Jaaku toqukkumaarpara.” Arnaata, Rebekkap, annilaangangaarami Jaaku ungasissumut aallartippaa Esauip toqunnginniassammagu. (1 Mosesi 27:41-46) Ukiorpassuilli tamatuma kingorna Esauip isummani allanngortippaa, naapeqqikkamillu Jaaku eqippaa kunillugulu. — 1 Mosesi 33:4.

Jaaku 12-inik erneqarpoq. Ernerisa angajulliit nukartik Josefi nuannarinngilaat. Sinngagaat ataatamik nuannarinerummagu. Taamaattumik niuertunut Egypteniliartunut inussiatut tunivaat. Kingornalu ataatartik oqarfigaat Josefi uumasumit qaasuttumit toqunneqarsimasoq. (1 Mosesi 37:23-36) Naakkittaangaaramik, ilaa? —

Kingorna Josefip qatanngutaasa iliuuserisimasartik peqqissimissutigaat. Taamaammat Josefip isumakkeerfigai. Takusinnaaviuk qanoq Josefi Jiisusitut iliortoq? — Jiisusi tigusaammat apustilit qimarratigaat, Petrusillu ilisarisimanngisaannarnerarpaa. Taamaakkaluartoq  Jiisusip tamaasa isumakkeerfigai, soorlu Josefip qatanngutini isumakkeerfigigai.

Aamma qatanngutigiit Kaini Abelilu eqqarsaatigisinnaavavut. Taakku aamma ilinniarfigisinnaavavut. Guutip Kainip uummataani takusinnaavaa Kaini qatanngumminut piviusumik asannissuseqanngitsoq. Taamaattumik Guutip Kaini oqarfigaa pissutsini allanngortittariaqaraa. Kainip ilumut Jehova asasimaguniuk naalassimassagaluarpoq. Taamaaliunngilarli. Ullut ilaanni silamiitillutik kisimiitsillutillu Kainip qatanngunni sakkortuumik anaallugu toquppaa. — 1 Mosesi 4:2-8.

Pisimasoq tamanna sumik ilinniarfigissavarput? — Biibilimi ima allassimavoq: ‘Tusarliussaq tassaavoq pileqqaarneranniilli tusarsimasarsi: Asaqatigiissaagut assigissanagulu Kaini Ajortumit pisuusoq.’ Tassa qatanngutigiit asaqatigiissapput. Kainitut issanngillat. — 1 Johannesi 3:11, 12.

Sooq ajorpa Kainimik ilaarsinissaq? — Soorlu aatsaaginnaq atuareeripput Biibilimi allassimammat: “Ajortumit pisuusoq”. Ajortoq tassaavoq Saatani Diaavulu. Kaini Diaavulutut pissusilersorpoq, soorlulusooq Diaavulu ataatagigaa.

Qatanngutitta asanissaat sooq pingaaruteqartoq takusinnaaviuk? — Asanngikkutsigik kia qitornai assigissavavut? — Diaavulup qitornai. Taamaakkusunngilagut, ilaa? — Qanoq uppernarsarsinnaavarput Guutip qitornarigaatigut? — Qatanngutitsinnut ilumoortumik asannissuseqarnitsigut.

Asanninnermi sunaava? — Ilukkut misigissusiuvoq, allanut ajunngitsuliorusutsitsisoq. Allat ajunngitsuliorfigigaangatsigit takutittarparput asallugit. Kikkuuppammi qatanngutivut asasariaqakkavut? — Eqqaamajuk Jiisusip ajoqersormatigut taakku tassaasut kristumiunut ilaqutariissuarnut ilaasut.

 Kristumiut qatanngutitta asanissaat qanoq pingaaruteqartigaa? — Biibilimi ima allassimavoq: “Qatanngunnimi takusimasani asanngikkuniuk Guuti takusimanngisani asasinnaanngilaa.” (1 Johannesi 4:20) Kristumiunut ilaqutariissuarnut ilaasut ilaannaat asasinnaanngilavut. Tamaasa asasussaavavut. Jiisusi ima oqarpoq: “Asaqatigiikkussi tamatumuuna tamarmik paasissavaat ajoqersugarigissi.” (Johannesi 13:35) Qatanngutitit asavigit? — Asanngikkutsigit oqarsinnaanngilagut Guuti asallugu.

Qanormi qatanngutitsinnut ilumut asannissuseqarluta takutissinnaavarput? — Asagutsigik orninnaveersaassanngilavut oqalunnaveersaassanagillu. Tamaasa inussiarnisaarfigissavavut. Ajunngitsuliorfigissavavut avitseqatigerusullugillu. Ajornartorsiuteqalissagaluarpatalu ikiussavavut. Ilaqutariissuuvugummi.

Qatanngutivut asagutsigik suna ersersissavarput? — Ersersissavarput Ajoqersuisorsuarmut Jiisusimut ajoqersugaalluta. Taamaakkusuppugut, ilaa? —