WAN tɛm di Gret Ticha bin aks wan kwɛstyɔn we sɔprayz ɔlman. I se: “Udat na mi tru mama ɛn mi tru brɔda dɛn?” (Matyu 12:48) Yu ebul ansa da kwɛstyɔn de?— Sɔntɛm yu no se Jizɔs in mama nem Meri. Bɔt yu no in brɔda dɛn nem dɛn?— Yu tink se i bin gɛt sista dɛn bak?—

Di Baybul se Jizɔs in brɔda dɛn nem ‘Jems, Josɛf, Saymɔn, ɛn Judas.’ Ɛn Jizɔs in sista dɛn bin de di tɛm we i bin de prich. Ɛnti Jizɔs na bin di fɔs pikin, so ɔl di ɔda wan dɛn na bin in smɔl wan dɛn.—Matyu 13:55, 56; Lyuk 1:34, 35.

Fɔ se Jizɔs in brɔda dɛn bin bi in disaypul dɛn?— Di Baybul se dɛn ‘nɔ bin biliv am fɔs.’ (Jɔn 7:5) Leta Jems ɛn Judas (we dɛn kin kɔl bak Jud) kam bi in disaypul dɛn, ɛn dɛn ivin rayt buk dɛn na di Baybul. Yu no us buk dɛn, dɛn rayt?— Yɛs, na Jems ɛn Jud In Lɛta.

Pan ɔl we Jizɔs in sista dɛn nem dɛn nɔ de insay di Baybul, wi no se i gɛt tu sista dɛn ɔ sɔntɛm i pas. Bɔt yu tink se in sista dɛn bin bi in disaypul dɛn?— Di Baybul nɔ se ɛnitin bɔt dat, so wi nɔ no. Bɔt yu no wetin mek Jizɔs aks dis kwɛstyɔn, “Udat na mi tru mama ɛn mi tru brɔda dɛn?”— Mek wi lan bɔt dat.

Jizɔs bin de tich in disaypul dɛn we sɔmbɔdi tɛl am se: “Yu mama ɛn yu brɔda dɛn tinap na do, ɛn dɛn want fɔ tɔk to yu.”  Jizɔs yuz dis chans fɔ tich dɛn wan fayn lɛsin bay we i aks dɛn se: “Udat na mi tru mama ɛn mi tru brɔda dɛn?” I pɔynt to in disaypul dɛn ɛn tɔk se: “Na dɛn wan ya, na dɛn na mi tru mama ɛn tru brɔda dɛn!”

Afta dat, Jizɔs ɛksplen wetin i min bay we i se: “Ɛnibɔdi we du wetin mi Papa we de na ɛvin want am fɔ du, nain na mi tru sista ɛn brɔda ɛn mama!” (Matyu 12:47-50) Dis sho wi aw Jizɔs bin rili lɛk in disaypul dɛn. I bin de tich wi se in disaypul dɛn na lɛk in tru tru brɔda, sista, ɛn mama.

Da tɛm de Jizɔs in brɔda dɛn we na Jems, Josɛf, Saymɔn, ɛn Judas nɔ bin biliv se Jizɔs na Gɔd in Pikin. I go bi bak se dɛn nɔ biliv wetin enjɛl Gebrɛl bin tɛl dɛn mama. (Lyuk 1:30-33) Sɔntɛm dɛn nɔ bin de ivin trit Jizɔs fayn. Ɛnibɔdi we du dat to yu nɔto yu tru tru brɔda ɔ sista. Yu no ɛnibɔdi we nɔ bin trit in brɔda ɔ sista fayn?—

 Di Baybul tɛl wi bɔt Isɔ ɛn Jekɔb ɛn aw Isɔ bin vɛks ɛn tɔk se: “A go kil Jekɔb.” Dɛn mama, we nem Ribɛka, bin fred ɛn i tɛl Jekɔb fɔ rɔnawe fɔ mek Isɔ nɔ kil am. (Jɛnɛsis 27:41-46) Afta lɔng tɛm, Isɔ bin chenj, ɛn i ɔg ɛn kis in brɔda Jekɔb.—Jɛnɛsis 33:4.

As tɛm de go, Jekɔb bin gɛt 12 bɔy pikin dɛn. Bɔt di big wan dɛn nɔ bin lɛk dɛn smɔl brɔda Josɛf. Dɛn bin de jɛlɔs am bikɔs dɛn papa lɛk am pas dɛn ɔl. So dɛn sɛl am to sɔm man dɛn we bin de sɛl slev dɛn ɛn we bin de go Ijipt. Ɛn dɛn kam tɛl dɛn papa se wan wayl animal dɔn kil Josɛf. (Jɛnɛsis 37:23-36) Yu nɔ tink se dat na bad bad tin?—

Afta sɔm tɛm Josɛf in brɔda dɛn fil bad fɔ wetin dɛn du. So Josɛf fɔgiv dɛn. Yu dɔn si naw aw Josɛf tan lɛk Jizɔs?— Jizɔs in disaypul dɛn rɔnawe we trɔbul mit am, ɛn Pita ivin dinay se i nɔ sabi am. Bɔt jɔs lɛk Josɛf, Jizɔs fɔgiv dɛn ɔl.

 Tu brɔda dɛn bin de we nem Ken ɛn Ebɛl. Wi kin lan lɛsin bak frɔm dɛn. Gɔd bin si insay Ken in at, ɛn Gɔd si se i nɔ rili lɛk in brɔda. So Gɔd tɛl Ken se i fɔ chenj. If Ken bin rili lɛk Gɔd, i fɔ dɔn lisin. Bɔt i nɔ bin lɛk Gɔd. Wan de Ken tɛl Ebɛl se ‘lɛ dɛn go waka na fil.’ Ebɛl go wit am. We dɛn ɔl tu bin de na di fil, Ken kil am.—Jɛnɛsis 4:2-8.

Di Baybul tɛl wi se wan spɛshal lɛsin de we wi go lan frɔm dis stori. Yu no wetin na di lɛsin?— ‘Di mɛsej we wi bin yɛri di tɛm we wi fɔs bi Kristian na in dis: Wi fɔ lɛk wi kɔmpin mɔtalman. Wi nɔ fɔ tan lɛk Ken we de fɔ di wikɛd wan.’ So brɔda ɛn sista dɛn fɔ lɛk dɛnsɛf. Dɛn nɔ fɔ bi lɛk Ken.—Jɔn In Fɔs Lɛta 3:11, 12.

Wetin mek wi nɔ want fɔ bi lɛk Ken?— Na bikɔs di Baybul se Ken ‘de fɔ di wikɛd wan’ we na Setan. Bikɔs Ken du wetin Setan de du, i jɔs tan lɛk se Setan na in papa.

Yu si naw wetin mek i impɔtant fɔ lɛk yu brɔda ɛn sista dɛn?— If yu nɔ lɛk dɛn, udat in pikin dɛn yu go de falamakata?— Na Setan in pikin dɛn. Yu nɔ go want fɔ falamakata Setan in pikin dɛn, nɔto so?— So aw yu go pruv se yu na Gɔd in pikin?— Na bay we yu sho se yu rili lɛk yu brɔda ɛn sista dɛn.

Wetin i min fɔ lɛk ɔda pipul dɛn?— I min se wi de rili fil fayn bɔt dɛn insay wi at ɛn dis we aw wi de fil, na in de mek wi want fɔ du gud tin dɛn fɔ dɛn. Wi go sho se wi lɛk ɔda pipul dɛn we wi de tink bɔt gud tin fɔ dɛn ɛn du dɛn gud. Udat na  wi brɔda ɛn sista dɛn we wi fɔ sho se wi lɛk?— Mɛmba se Jizɔs bin tɛl wi se na di wan dɛn we de na di Kristian kɔngrigeshɔn.

Wetin mek i impɔtant fɔ lɛk wi Kristian brɔda ɛn sista dɛn?— Di Baybul se: “If pɔsin nɔ lɛk in kɔmpin we i de si, aw i go lɛk Gɔd we i nɔ de si?” (Jɔn In Fɔs Lɛta 4:20) So wi nɔ go se wi jɔs lɛk sɔm pipul dɛn na di Kristian kɔngrigeshɔn. Wi fɔ lɛk ɔlman. Jizɔs tɔk se: “If una lɛk una kɔmpin, ɔlman go no se una na mi lanin bɔy dɛn.” (Jɔn 13:35) Yu lɛk ɔl di brɔda ɛn sista dɛn, nɔto so?— Mɛmba se if yu nɔ lɛk dɛn, yu nɔ go se yu rili lɛk Gɔd.

Aw wi go sho se wi rili lɛk wi brɔda ɛn sista dɛn?— If wi lɛk dɛn, wi nɔ go want fɔ avɔyd dɛn bikɔs wi nɔ want fɔ tɔk to dɛn. Wi go bi padi to dɛn ɔl. Wi go de du dɛn gud ɔltɛm, ɛn wi go gladi fɔ gi dɛn wetin wi gɛt. Ɛn if dɛn gɛt prɔblɛm, wi go ɛp dɛn bikɔs wi na wan big famili.

We wi sho se wi rili lɛk wi brɔda ɛn sista dɛn, wetin dat de sho?— I de sho se wi na Jizɔs in disaypul dɛn. Nɔto dat wi want fɔ bi?—