UJ KUTI, Jesusqa runasta tʼukuchinanpaj jina taporqa: ‘¿Pitaj mamayri? ¿Pikunataj hermanosniy kankuri?’, nispa (Mateo 12:48). Qanrí, ¿imatá kutichiwaj?... Ichapis yachanki mamanqa María kasqanta. Hermanosninpa sutisninkutarí, ¿yachankichu?... Hermanasninrí, ¿karqachu?...

Biblia nisqanman jina, Jesuspa hermanosnenqa Santiago, José, Simón, Judas ima karqanku. Hermanasninpis kallarqataj. Jesustaj kuraj kaj karqa (Mateo 13:55, 56; Lucas 1:34, 35).

Hermanosnin, ¿yachachisqasninchu karqanku?... Biblia nin jina, qallariypeqa “Jesuspi mana creerqankuchu” (Juan 7:5). Aswan qhepamantaj Santiago, Judas ima yachachisqasninman tukorqanku. Bibliaj iskay librosnintapis qhelqarqanku. ¿Yachankichu mayqenkunatachus?... Santiago chantá Judas cartata.

Bibliaqa mana Jesuspa hermanasninpa sutisninta willanchu. Jinapis iskay kasqankuta yachanchej. Paykuna, ¿yachachisqasninmanchu tukorqanku?... Bibliaqa mana imatapis ninchu, chayrayku mana yachanchejchu. Chantá, ¿imaraykú Jesús taporqa, ‘pichus maman, pikunatajchus hermanosnin kasqankuta’?... Chayta qhawarina.

Niraj chayta tapushaspa, Jesusqa yachachisqasninman Diosmanta yachachisharqa. Jinallapi uj runa Jesusman nerqa: ‘Mamayki, hermanosniyki ima jawapi suyashasunku, qanwan parlayta munaspa’, nispa. Jesustaj nerqa: ‘¿Pitaj mamayri? ¿Pikunataj hermanosniyri?’, nispa. Chantataj makinwan yachachisqasninta  señalaspa nerqa: ‘Qhawariychej, kaykuna kanku mamay, hermanosniypis’, nispa. Jesusqa chayta nispa, yachachisqasninman uj imata yachachiyta munarqa.

Chantá Jesús sutʼincharqa: ‘Pichus cielopi kashaj Tataypa munayninta ruwajmari hermanoytaj, hermanaytaj, mamaytaj’, nispa (Mateo 12:47-50). Chaytaj rikuchiwanchej, Jesús yachachisqasninta mayta munakusqanta. Chantapis yachachiwanchej, paykunata hermanosninta jina, hermanasninta jina, mamasninta jina qhawasqanta.

Chaypachaqa Santiago, José, Simón, Judas ima, mana creerqankuchu hermanonku Jesús, Diospa Wawan kasqanta. Manallataj creerqankuchu, imatachus ángel Gabriel mamankuman nisqanta (Lucas 1:30-33). Ichapis Jesustaqa chejnikoj kanku. Pillapis hermanonta chayri hermananta chejnikojqa, mana allin hermanochu,  nitaj allin hermanachu. ¿Rejsinkichu pillatapis hermanonta chayri hermananta chejnikojta?...

Bibliaqa Esaumanta Jacobmanta ima parlan. Paykunaqa hermanitos karqanku, Esautaj uj kuti Jacobpaj mayta phiñakorqa, nerqataj: “Wañurparichisaj Jacobta”, nispa. Mamanku Rebecaqa chayta yachaspa mancharikorqa. Chayrayku Jacobta ripunanta nerqa, Esaú mana wañuchinanpaj (Génesis 27:41-46). Ashkha watasninman, Esauqa niña Jacobta chejnikorqachu. Astawanpis ojllaykuspa muchʼaykorqa (Génesis 33:4).

Tiemponman, Jacobqa 12 wawasniyoj karqa. Kuraj wawasnenqa sullkʼitanku Joseta chejnikoj kanku. Tatankupaj aswan munasqa wawa kasqanraykutaj, paymanta envidiakoj kanku. Chayrayku Joseta vendeykorqanku Egiptoman rej esclavosta vendej runasman. Tatankumantaj nerqanku, uj phiña animal Joseta wañuchisqanta (Génesis 37:23-36). Chay ruwasqanku, ¿nicharí allinchu karqa?...

Watasninman, Josej hermanosnenqa chayta ruwasqankumanta  pesachikorqanku. Josetaj paykunata perdonarqa. ¿Reparankichu Josewan Jesuswan imapichus rijchʼakusqankuta?... Jesusta presochashajtinku, apostolesnin ayqerikaporqanku. Chantapis Pedroqa Jesusta mana rejsisqanta nerqa. Jinapis Jesusqa, José jinallataj apostolesninta perdonarqa.

Chantapis Cainmanta, Abelmanta ima yachakullasunmantaj. Diosqa yacharqa, Caín hermanonta chejnikusqanta. Chayrayku amaña chejnikunanta yuyaycharqa. Caín Diosta munakunman karqa chayqa, payta kasukunman karqa. Jinapis mana Diosta munakorqachu. Uj kuti, Cainqa Abelta nerqa: “Jaku campoman”, nispa. Chantá campopi sapallanku kashajtinku, Cainqa hermanon Abelta wañucherqa (Génesis 4:2-8).

¿Imatataj chaymanta yachakusunman?... Biblia nin: “Kaymin qallariymantapacha uyarisqaykichej chay willayqa: Ujkuna ujkunawan munanakunanchej. Mana Caín jinachu kananchej; payqa Kuraj Supaymanta [karqa]”, nispa. Chayrayku hermanitosqa munanakunanku tiyan. Manataj Caín jinachu kananku tiyan (1 Juan 3:11, 12).

¿Imaraykutaj mana Caín jinachu kana tiyan?... Bibliaqa nin: “Payqa Kuraj Supaymanta [karqa]”, nispa. Cainqa Kuraj Supay jina ruwarqa. Chayrayku Satanaspa wawanman tukorqa.

¿Reparankichu imaraykuchus hermanitosniykita munakunayki kasqanta?... Mana munakunki chay, ¿pikunamantaj rijchʼakunki?... Supaypa wawasninman. ¿Munankichu paykunaman rijchʼakuyta?... ¿Imaynatá rikuchiwaj Diospa wawan kayta munasqaykita?... Hermanitosniykita munakuspa.

¿Imaynataj munakuyniyoj runa?... Munakuyniyoj runaqa, wajkunata tukuy sonqo yanapayta munan. Wajkunapaj allin imasta  ruwaspaqa, paykunata munakusqanchejta rikuchinchej. ¿Pikunatataj hermanitosninchejta jina munakunallanchejtaj tiyan?... Jesús yachachisqanman jinaqa, Diospa llajtanpi kajkunata.

¿Imaraykú paykunata munakunanchej tiyan?... Biblia nin: “Sichus pipis rikushasqan hermanonta mana munakun chayqa, manallataj Diostapis munakunchu, pitachus mana rikusqantaqa”, nispa (1 Juan 4:20). Mana wakin hermanosllatachu munakunanchej tiyan, manaqa tukuy hermanosta. Jesús nerqa: “Qankunachus munanakunkichej chayqa, tukuy runas yachanqanku yachachisqasniy kasqaykichejta”, nispa (Juan 13:35). ¿Tukuy hermanostachu munakunki?... Paykunatachus mana munakunki chayqa, manallataj Diostapis munakunkichu.

¿Imaynatá hermanosninchejta tukuy sonqo munakusqanchejta rikuchisunman?... Chaytaqa ruwasunman, paykunata parlapayaspa, nitaj paykunamanta ayqespa. Astawanpis tukuywan kʼachas kana, allin kajtapuni paykunapaj ruwana, imanchejtapis jaywarina. Ima llakiypi rikukojtinkupis yanaparina. Imaraykuchus uj familialla kanchej.

Hermanosninchejta tukuy sonqo munakuspa, ¿imatá rikuchisun?... Jesuspa yachachisqasnin kasqanchejta. ¿Munanchejcharí paypa yachachisqasnin kayta?...