HUK kutipim Jesus runakunata kaynata tapurqa: “¿Pitaq mamayqa hinaspa wawqiykunapas?”, nispa (Mateo 12:48). ¿Pitaq qampaqqa kanman?... Ninkipaschá Jesuspa mamanqa Maria kasqanta. Ichaqa, ¿yachankichu Jesuspa wawqinkuna pikuna kasqankuta?... ¿Karqachu paninkunapas?...

Bibliaqa ninmi Jesuspa wawqinkunaqa Santiago, Josey, Simon hinaspa Judas kasqankuta, nintaqmi paninkuna kasqantapas. Chay wawqi-paninkunaqa Jesuspa sullkankunam karqaku (Mateo 13:55, 56; Lucas 1:34, 35).

¿Paykunaqa Jesuspa qatiqninkunachu karqaku?... Bibliam nin: “Manam Jesuspiqa iñirqakuchu”, nispa (Juan 7:5). Ichaqa qipakunamanñam Santiagowan Judasqa Jesuspi iñikurqaku, hinaspam bibliapa wakin partentapas qillqarqaku. ¿Mayqin partekunata?... Santiago hinaspa Judas sutiyuq qillqakunatam.

Bibliapi Jesuspa paninkunapa sutinta mana rimaptinpas yachanchikmi iskay ima kasqankuta. ¿Paninkunaqa qatiqninkunachu karqaku?... Bibliaqa manam willawanchikchu. Ichaqa, ¿imanasqataq Jesusqa runakunata tapurqa pikuna maman hinaspa wawqinkuna kasqanmanta?... Chaymantayá yachaykusun.

Qatiqninkunaman Jesus yachachichkaptinmi huk kaqnin niykurqa: “Mamaykiwan wawqikikunam hawapi sayachkanku qanwan parlaykuyta munaspanku”, nispa. Chaymi Jesusqa pikuna ayllun hina kasqanmanta chaypi kaqkunaman yachachinanpaq  tapurqa: “¿Pitaq mamayqa hinaspa wawqiykunapas?”, nispa. Hinaspam qatiqninkunapa kasqan lawman makinta haywarispan nirqa: “Kayqaya mamayqa hinaspa wawqiykunaqa”, nispa.

Chaymantañataqmi nirqa: “Pipas hanaq pachapi taytaypa munasqanta ruwaqmi wawqiyqa, paniyqa hinaspa mamayqa”, nispa (Mateo 12:47-50). Chaynataqa nirqa qatiqninkunata kuyasqanraykum. Jesuspaqqa qatiqninkunam karqaku maman hina, wawqinkuna hina hinaspa paninkuna hina.

Jesuspa wawqin Santiagopaqqa, Joseypaqqa, Simonpaqqa hinaspa Judaspaqqa manam Diospa churinchu Jesusqa karqa. Chayrayku ichapas Jesustaqa chiqnirqakuraq. Paykunapaqqa yanqa rimayllam karqa Gabriel sutiyuq angelpa Mariaman willasqanpas (Lucas 1:30-33). Chayna chiqnikuqkunaqa manam chiqap wawqi-panichu nitaq turi-ñañachu kanku. ¿Riqsinkichu pipas wawqi-panin utaq turi-ñañan chiqniqta?...

 Bibliam willawanchik Esau runa wawqin Jacobwan llumpayta piñakuruspan wañuchiy munasqanmanta. Maman Rebecañataqmi chaywan mancharikuruspan Jacobta nirqa karuman ripukunanpaq (Genesis 27:41-46). Achka watakuna pasaytam ichaqa Esauqa wawqinta manaña chiqnirqañachu, aswanqa abrazaykuspanmi muchaykurqaraq (Genesis 33:4).

Chaymantam Jacobqa chunka iskayniyuq churiyuq karqa. Paypa mayor churinkunapas sullkanku Joseytam chiqniqku taytanpa ancha kuyasqan kasqanrayku. Chaymi chay churinkuna Egiptoman riq negociante runakunaman Joseyta rantikururqaku, hinaspam taytan Jacobman willarqaku purun animal wañurachisqanta (Genesis 37:23-36). Llumpay mana allinmi chay ruwasqankuqa karqa ¿aw?...

Ichaqa watakuna pasaytam Joseypa wawqinkunaqa chay ruwasqankumanta wanakurqaku, chaymi Joseyqa pampachaykurqa. ¿Josey hinachu Jesuspas pampachakuykuq  karqa?... Arí, Jesusqa qatiqninkunatam pampachaykurqa qipancharuchkaptinkupas, Pedrotapas pampachaykurqam negarusqanmanta.

Bibliaqa willawanchiktaqmi Cainmanta hinaspa wawqin Abelmantapas. Cainqa wawqin Abeltam chiqniyta qallaykurqa, hinaptinmi Jehova Diosqa nirqa ama chiqninanpaq. Cainñataqmi Diostapas mana kuyasqanrayku mana kasurqachu. Chaymi huk punchaw wawqinta nirqa: “Hakuchik purikuq”, nispa. Hinaspanmi chakrapi kachkaptinku wawqin Abelta Cainqa maqaspa wañurachirqa (Genesis 4:2-8).

¿Imatam kayqa yachachiwanchik?... Bibliam nin: ‘Qamkunaqa qallariymantapacham uyarirqankichik “llapallaykichikmi kuyanakunaykichik” niq willakuyta. Amayá Cain hinachu kaychik, payqa satanaspa churin kaspanmi wawqinta wañurachirqa’, nispa. Chaynaqa kaypi nisqanman hinam wawqi-paninchiktaqa utaq turi-ñañanchiktaqa kuyananchik (1 Juan 3:11, 12).

¿Imanasqataq Cain hinaqa mana kananchikchu?... Cainqa Diosta mana kasukuspan ‘satanaspa churin hina rikurirusqanraykum’.

Hinaptinqa, ¿imanasqataq wawqi-panikikunataqa utaq turi-ñañaykikunataqa kuyanayki?... Mana kuyaspaykiqa, ¿pikuna hinataq kachkawaq?... Satanaspa churinkuna hinam. Manachá paykuna hina kaytaqa munawaqchu ¿aw?... Hinaspaqa, ¿imatam ruwanayki Diospa churin hina kanaykipaqqa?... Wawqi-panikikunatam utaq turi-ñañaykikunatam kuyanayki.

¿Imaynatam kuyasqaykita qawachiwaq?... Paykunapaq tukuy sunquwan imatapas ruwaspam. ¿Pikunatawanraqmi kuyananchik wawqi-paninchikta utaq turi-ñañanchikta hina?... Jesuspa  nisqanman hinaqa Jehova Diosta serviq iñiqmasinchikkunatawanmi.

¿Imanasqataq iñiqmasinchikkunataqa kuyananchik?... Bibliam niwanchik: “Pipas rikusqan iñiqmasinta mana kuyaqqa manamá mana rikusqan Diostaqa kuyanmanchu”, nispa (1 Juan 4:20). Chaynaqa manamá iskay-kimsa iñiqmasinchikkunallatachu kuyananchik, aswanqa llapallan iñiqmasinchikkunatam. Chaymi Jesus nirqa: “Qamkuna kuyanakuptikichikmi llapallan runakuna yachanqaku qatiqniykuna kasqaykichikta”, nispa (Juan 13:35). ¿Qamqa llapallan iñiqmasinchikkunatachu kuyanki?... Paykunata mana kuyaspaykiqa manam Diostapas kuyachkankichu.

Hinaptinqa, ¿imaynatam iñiqmasinchikkuna sunqumanta kuyasqanchikta qawachichwan?... Huñunakuykunapi paykunawan kallpanchanakunapaq kuyakuywan rimaspam, paykunapaq allin kaqkunata ruwaspam, imanchikkunatapas qunakuykuspam hinaspa sasachakuypi tarikuptinkupas yanapaykuspam.

Chayna sunqumanta iñiqmasinchikkunata kuyaspaqa, ¿pikuna kasqanchiktataq riqsichikusun?... Jesuspa qatiqninkuna kasqanchiktam. Paypa qatiqninkuna kayqa kusikuypaqmi ¿aw?...