WAN leisi a Bigi Leriman poti wan aksi di ben fruwondru sma. Na aksi ben de: „Suma na mi mama, èn suma na den brada fu mi?” (Mateyus 12:48) Yu ben o man piki na aksi dati?— Kande yu sabi taki a mama fu Yesus ben nen Maria. Ma yu sabi fa den brada fu en ben nen?— A ben abi sisa tu?—

Bijbel e taki dati den brada fu Yesus ben nen „Yakobus nanga Yosef nanga Simon nanga Yudas”. Èn Yesus ben abi sisa di ben de na libi na a ten di a ben e preiki. Fu di Yesus ben de a fosi pikin fu en papa nanga mama, meki ala den brada nanga sisa disi ben yongu moro en.​—Mateyus 13:55, 56; Lukas 1:34, 35.

Den brada fu Yesus ben de disipel fu en tu?— Bijbel e taki dati na ini a bigin den „no ben bribi na ini en” (Yohanes 7:5). Ma bakaten, Yakobus nanga Yudas kon tron disipel fu en, èn den skrifi buku fu Bijbel srefi. Yu sabi sortu buku den skrifi?— Iya, den buku Yakobus nanga Yudas.

Den nen fu den sisa fu Yesus no kari na ini Bijbel, ma wi sabi taki a ben musu fu abi tu sisa. A kan, taki a ben abi moro leki tu sisa. Den sisa disi tron bakaman fu Yesus?— Bijbel no e taki noti fu dati, sobun wi no sabi. Ma yu sabi fu san ede Yesus ben poti na aksi: „Suma na mi mama, èn suma na den brada fu mi?”— Meki wi luku fu san ede a ben du dati.

Yesus ben e gi den disipel fu en leri, di wan sma taigi en wantronso: ’Yu mama nanga den brada fu yu e tanapu na dorosei èn  den wani taki nanga yu.’ Yesus teki na okasi dati fu leri den sma wan prenspari sani. Na fu dati ede a poti na aksi dati di ben fruwondru den sma drape. Na aksi dati ben de: „Suma na mi mama, èn suma na den brada fu mi?” A langa en anu sori go na den disipel fu en èn a piki na aksi dati nanga wan tranga sten: „Luku! Mi mama nanga den brada fu mi!”

Baka dati, Yesus fruteri san a ben wani taki nanga den wortu dati. A taki: ’Iniwan sma di e du a wani fu mi Tata di de na hemel, na a sma dati na mi brada, mi sisa, nanga mi mama’ (Mateyus 12:47-50). A sani disi e sori o tranga Yesus ben lobi den disipel fu en. A ben e leri wi taki den disipel fu en ben de leki trutru brada, sisa, nanga mama gi en.

Na a ten dati, Yesus en eigi brada, namku Yakobus, Yosef, Simon, nanga Yudas, no ben e bribi taki Yesus ben de a Manpikin fu Gado. A musu de so taki den no ben e bribi san na  engel Gabrièl ben taigi a mama fu den (Lukas 1:30-33). Sobun, a kan taki den no ben e handri na wan bun fasi nanga Yesus. Iniwan sma di e tyari ensrefi na a fasi dati, no de wan trutru brada noso sisa. Yu sabi wan sma di no ben lobi en brada noso sisa?—

Bijbel e taki fu Esau nanga Yakob. A fruteri fa Esau ben kisi so wan atibron, dati a taki: „Mi o kiri mi brada Yakob.” Rebeka, a mama fu den, ben frede so te taki a seni Yakob gowe so taki Esau no ben kan kiri en (Genesis 27:41-46). Ma furu yari baka dati, Esau kenki den fasi fu en, san meki taki a brasa Yakob èn a bosi en.​—Genesis 33:4.

Baka wan pisi ten, Yakob ben abi 12 manpikin. Ma den moro bigi boi fu Yakob no ben lobi Yosef, a pikin brada fu den. Den ben dyarusu na en tapu, fu di a papa fu den ben lobi en moro. Fu dati ede den seri en gi sma di ben e bai srafu èn di ben de na pasi fu go na Egepte. Baka dati, den brada taigi a papa fu den taki wan werdri meti kiri Yosef (Genesis 37:23-36). A sani di den brada ben du no ben bun kwetikweti, a no so?—

 Bakaten den brada fu Yosef ben e firi sari fu a sani di den du. Fu dati ede Yosef gi den pardon. Yu kan si fa Yosef ben de leki Yesus?— Yesus en eigi apostel ben lowe gowe di a ben de na ini problema, èn Petrus ben taki srefi dati a no ben sabi en. Toku Yesus gi den alamala pardon, neleki fa Yosef ben du dati.

Dan yu ben abi den tu brada Kain nanga Abel. Wi kan leri wan sani fu den sosrefi. Gado ben si na ini Kain ati taki a no ben lobi en brada trutru. Fu dati ede Gado taigi Kain taki a ben musu kenki den fasi fu en. Efu Kain ben lobi Gado trutru, dan a ben o arki Gado. Ma a no ben lobi Gado. Wan dei, Kain taigi Abel: „Meki wi go na gron.” Abel go nanga Kain. Di den ben de den wawan na ini a gron, dan Kain naki en brada so tranga taki a kiri en.​—Genesis 4:2-8.

Bijbel e fruteri wi taki wi musu leri wan prenspari sani fu dati. Yu sabi san na dati?— ’Disi na a boskopu di yu yere sensi a bigin: Wi musu lobi makandra; wi no musu de leki Kain, di ben komoto fu na ogriwan.’ Fu dati ede brada nanga sisa musu lobi makandra. Den no musu de leki Kain.​—1 Yohanes 3:11, 12.

Fu san ede a no bun fu de leki Kain?— Fu di Bijbel e taki dati a ’ben komoto fu na ogriwan’, Satan Didibri. Fu di Kain ben tyari ensrefi neleki Didibri, meki a ben de leki Didibri ben de en papa.

Yu e si fu san ede a de prenspari fu lobi yu brada nanga sisa?— Efu yu no lobi den, dan leki suma pikin yu e du?— Leki pikin fu Didibri. Yu no ben o wani fu de wan pikin fu Didibri, a no so? Sobun, fa yu kan sori taki yu wani de wan pikin fu Gado?— Yu kan du dati te yu lobi yu brada nanga sisa trutru.

Ma san na lobi?— Lobi na wan dipi firi di wi abi na ini wi ati. A e meki taki wi wani du bun sani gi tra sma. Wi e sori taki wi lobi  trawan te wi e sori switifasi gi den èn te wi e du bun sani gi den. Èn suma na den brada nanga sisa fu wi di wi musu lobi?— Memre taki Yesus ben leri wi taki dati na den memre fu a bigi Kresten famiri.

O prenspari a de taki wi lobi den Kresten brada nanga sisa disi?— Bijbel e taki: „A sma di no lobi en brada [noso en sisa] di a si, no man lobi Gado di a no si” (1 Yohanes 4:20). Sobun, wi no man lobi wan tu sma nomo na ini a Kresten famiri. Wi musu lobi den alamala. Yesus ben taki: ’Te unu lobi makandra, dan na so fasi ala sma o sabi taki unu na mi disipel’ (Yohanes 13:35). Yu lobi ala den brada nanga sisa?— Memre taki efu yu no lobi den alamala, dan yu no kan lobi Gado trutru.

Fa wi kan sori taki wi lobi wi brada nanga sisa trutru?— We, efu wi lobi den, dan wi no sa wai pasi gi den fu di wi no wani taki nanga den. Wi sa sori switifasi gi den alamala. Wi sa du bun gi den ala ten èn wi sa de klariklari fu prati sani nanga den. Èn efu oiti problema miti den, dan wi sa yepi den fu di wi na wan bigi famiri trutru.

Te wi lobi ala wi brada nanga sisa trutru, dan san dati e sori?— Dati e sori taki wi na disipel fu Yesus, a Bigi Leriman. Èn a no dati wi wani de?—