NGALELINYE lilanga Umfundzisi Lomuhle Kakhulu wabuta umbuto lomangalisako. Lombuto bewutsi: “Ngubani make wami, futsi bobani bomnaketfu?” (Matewu 12:48) Bowungakhona yini kuwuphendvula lombuto?— Kungenteka uyati kutsi make waJesu nguMariya. Uyawati yini emagama abomnakabo?— Bekanabo yini bodzadzewabo?—

LiBhayibheli litsi emagama abomnakabo Jesu ‘bekuboJakobe, Josefa, Simoni, naJudasi.’ Bekaphindze abe nabodzadzewabo labebasaphila ngesikhatsi asashumayela. Njengobe Jesu bekangumntfwana wekucala, laba labanye bebabancane kunaye.​—Matewu 13:55, 56; Lukha 1:34, 35.

Labomnakabo nabo bebabafundzi bakhe yini?— LiBhayibheli litsi ekucaleni “bebangakholwa kuye.” (Johane 7:5) Kodvwa ngekuhamba kwesikhatsi, boJakobe naJudasi (laphindze abitwe ngekutsi nguJuda) baba bafundzi bakhe, futsi babhala ngisho netincwadzi teliBhayibheli. Uyati yini kutsi ngutiphi letincwadzi labatibhala?— Babhala incwadzi yaJakobe neyaJuda.

Nanobe bosisi baJesu kungakhulunywa ngabo eBhayibhelini, kodvwa siyati kutsi cishe bekanalababili. Nanobe kunjalo, kungenteka kutsi bekanabo nalabanye. Labosisi bakhe baba balandzeli bakhe yini?— Asati ngobe liBhayibheli alisitjeli loko. Uyati kutsi Jesu wabangelwa yini kubuta lombuto lotsi: “Ngubani make wami, futsi bobani bomnaketfu?”— Ase sitfole kutsi wawubutelani.

Jesu bekafundzisa bafundzi bakhe ngesikhatsi aphatanyiswa ngumuntfu atsi kuye: “Unyoko nabomnakenu beme ngephandle bafuna kukhuluma  nawe.” Ngako Jesu wasebentisa leso sikhatsi kuze abatjele sifundvo lesibalulekile ngekutsi abute lombuto lomangalisako lotsi: “Ngubani make wami, futsi bobani bomnaketfu?” Welula sandla sakhe wakhomba bafundzi bakhe wabese uphendvula lombuto watsi: “Nangu make wami nabomnaketfu!”

Jesu wachaza kutsi bekasho kutsini ngalamavi, ngekutsi atsi: “Nobe ngubani lowenta intsandvo yaBabe losezulwini nguye longumnaketfu, dzadzewetfu kanye namake.” (Matewu 12:47-50) Loku kukhombisa kutsi Jesu bekabatsandza kangakanani bafundzi bakhe. Bekasifundzisa kutsi bafundzi bakhe bebanjengabomnakabo mbamba, bosisi bakhe nabonina.

Ngaleso sikhatsi, bomnakabo Jesu—boJakobe, Josefa, Simoni, naJudasi, bebangakholwa kutsi Jesu uyiNdvodzana yaNkulunkulu. Bebangakholwa nekutsi ingilosi lenguGabhriyeli yamtjela make wabo ngaloko. (Lukha 1:30-33) Ngako kungenteka kutsi bebangamphatsi kahle Jesu. Nobe ngabe ngumuphi umuntfu lowenta njalo,  usuke angasiye umnakenu nobe dzadzewenu mbamba. Ukhona yini umuntfu lomatiko lophatsa kabi umnakabo nobe dzadzewabo?—

LiBhayibheli likhuluma nga-Esawu naJakobe kanye nendlela Esawu latfukutsela ngayo waze watsi: “Jakobe, umnaketfu, ngitambulala.” Make wabo, Rebheka, wesaba kakhulu kangangekutsi watsi Jakobe akahambe kuze Esawu angambulali. (Genesisi 27:41-46) Nanobe kunjalo, ngemuva kweminyaka leminyenti, Esawu washintja waze wagaca waphindze wanga Jakobe.​—Genesisi 33:4.

Njengobe sikhatsi sichubeka, Jakobe waba nemadvodzana langu-12. Kodvwa emadvodzana aJakobe lamadzala bewangamtsandzi umnakabo lomncane Josefa. Bekamdlela umona ngenca yekutsi babe wawo abetsandza yena kakhulu. Ngako bamtsengisa kubahwebi betigcili lebebaya eGibhithe. Ngemuva kwaloko, babese batjela babe wabo kutsi Josefa ubulawe silwane lesibi. (Genesisi 37:23-36) Loko bekungasiyo yini intfo lembi kakhulu?—

Ngemuva kwesikhatsi, bomnakabo Josefa batisola ngaloko lebebakwentile. Ngako Josefa wabatsetselela. Uyabona yini kutsi Josefa bekafanana njani naJesu?— Jesu washiywa baphostoli bakhe ngesikhatsi asenkingeni, futsi Phetro  waze waphika kutsi uyamati. Kodvwa njengaJosefa, Jesu wabatsetselela bonkhe.

Kuphindze kube naKhayini na-Abela, nabo lababobhuti. Singafundza sifundvo nakubo. Nkulunkulu wambona enhlitiyweni Khayini kutsi bekangamtsandzi mbamba umnakabo. Ngako Nkulunkulu wecwayisa Khayini kutsi ashintje indlela lebekenta ngayo. Kube Khayini bekamtsandza mbamba Nkulunkulu, ngabe wamlalela. Kodvwa bekangamtsandzi. Ngalelinye lilanga, Khayani watsi ku-Abela: “Asambe, siye etsafeni.” Ngako Abela wahamba naKhayini. Njengobe bebabobili etsafeni, Khayini washaya umnakabo kabuhlungu waze wambulala.​—Genesisi 4:2-8.

LiBhayibheli lisitjela kutsi kunesifundvo lesikhetsekile lesingasifundza kuloku. Uyasati yini kutsi ngusiphi?— ‘Lesifundvo ngulomlayeto lesicoce ngawo ekucaleni lotsi: Kufanele sitsandzane singafani naKhayini lowavela kulomubi.’ Ngako kufanele sibatsandze bomnaketfu nabodzadzewetfu, nabo basitsandze. Akukafaneli bafanane naKhayini.​—1 Johane 3:11, 12.

Kungani kungaba yintfo lembi kulingisa Khayini?— Kungobe liBhayibheli litsi ‘wavela kulomubi,’ Sathane Develi. Ngesizatfu sekutsi Khayini wenta njengaDeveli, loko kwafanana nekutsi Develi bekangubabe wakhe.

Uyakubona yini kubaluleka kwekutsi utsandze bomnakenu nabodzadzewenu?— Nangabe ungabatsandzi, utawube ulingisa bantfwana babani?— Utawube ulingisa bantfwana baDeveli. Ngeke utsandze kuba njalo, angitsi?— Ngako, ungakhombisa njani kutsi ufuna kuba ngumntfwana waNkulunkulu?— Ungakhombisa ngekutsi ubatsandze mbamba bomnakenu kanye nabodzadzewenu.

Luyini lutsandvo?— Lutsandvo yindlela lejulile lesitiva ngayo ngekhatsi lesenta sifune kwentela labanye tintfo letinhle. Sikhombisa kutsi siyabatsandza labanye nangabe siba nemiva lemihle ngabo futsi sibentela tintfo letinhle. Bobani bomnaketfu nabodzadzewetfu lokufanele  sibatsandze?— Khumbula kutsi Jesu watsi ngulabo labakha umndeni lomkhulu webuKhristu.

Kubaluleke kangakanani kutsi sitsandze labomnaketfu nabodzadzewetfu labangemaKhristu?— LiBhayibheli litsi: “Umuntfu longamtsandzi umzalwane wakhe [nobe dzadzewakhe] lambonako, angeke amtsandze Nkulunkulu langazange asambone.” (1 Johane 4:20) Ngako, akukafaneli sitsandze labambalwa nje kuphela emndenini webuKhristu. Kufanele sibatsandze bonkhe. Jesu watsi: “Nangabe nitsandzana, bonkhe batawukwati kutsi nibafundzi bami.” (Johane 13:35) Uyabatsandza yini bonkhe bazalwane nabodzadze?— Khumbula kutsi nangabe ungabatsandzi bazalwane nabodzadze, awumtsandzi mbamba naNkulunkulu.

Singakhombisa njani kutsi sibatsandza sibili bazalwane betfu nabodzadzewetfu?— Nangabe sibatsandza, ngeke sibabalekele ngobe singafuni kucoca nabo. Sitawuba nebungani kubo bonkhe. Sitawuhlale sibentela tintfo letinhle siphindze sifune kuhlanganyela lokutsite nabo. Nangabe kwenteka baba senkingeni, sitawubaniketa lusito ngobe singumndeni lomkhulu sibili.

Nangabe sibatsandza mbamba bonkhe bazalwane betfu nabodzadzewetfu, loko kukhombisani?— Kukhombisa kutsi sibafundzi baJesu, Umfundzisi Lomuhle Kakhulu. Asifuni yini kuba bafundzi baJesu?—