NE FESILI atu ne te Faiakoga Sili se fesili fakapoi e tasi. E fai penei te fesili: “Ko oi toku mātua, a ko oi foki oku taina?” (Mataio 12:48) E mata, e mafai o tali mai ne koe te fesili tenā?— Kāti ko iloa ne koe me i te mātua o Iesu ko Malia. Kae e iloa ne koe a igoa o ana taina?— E mata, e isi foki ne ana tuagane?—

E fai mai te Tusi Tapu me i taina o Iesu ko “Iakopo mo Iosefa mo Simona mo Iuta.” Kae ne isi foki ne tuagane o Iesu kolā ne ola i te taimi koi talai ei a ia. Ona ko Iesu ko te toekimua, e fo‵liki a latou katoa konei i a ia.—Mataio 13:55, 56; Luka 1:34, 35.

E mata, ne fai foki a taina o Iesu mo fai ana soko?— E fai mai te Tusi Tapu me i te taimi muamua ne “seai se tino e talitonu ki a ia.” (Ioane 7:5) Kae fakamuli ifo, ne fai a Iakopo mo Iuta mo fai ana soko, kae ne tusi foki ne lāua a tusi o te Tusi Tapu. E iloa ne koe a tusi ne tusi ne lāua?— Ao, ko Iakopo mo Iuta.

E tiga eiloa e seki taku mai a igoa o tuagane o Iesu i te Tusi Tapu, e iloa ne tatou me kāti e tokolua. Kae e mafai o tokouke atu. E mata, ne fai a tuagane konei mo fai ana soko?— E se taku mai i te Tusi Tapu, tela la, e se iloa ne tatou. Kae e mata, ko iloa ne koe te pogai ne ‵sili atu ei ne Iesu te fesili tenei, “Ko oi toku mātua, a ko oi foki oku taina?”— Ke onoono aka tatou.

Ne akoako atu a Iesu ki ana soko i te taimi ne fakalavelave atu ei se tino ki a ia i ana pati: “A tou mātua mo ou taina kolā e ‵tu i tua kae e fia fai‵pati ki a koe.” Tela la, ne fakaaoga ne ia a te avanoaga ke akoako atu se akoakoga tāua mai i te ‵sili atu o se fesili fakapoi: “Ko oi toku mātua, a ko oi foki oku taina?” Ne tusi atu tena lima ki ana soko  kae tali atu, ana muna: “Kiloke! Ko toku mātua mo oku taina konei!”

Ne toe fakamatala atu ei ne Iesu a te mea ne fakauiga a ia ki ei, ana muna: “Me ko so se tino e fai ne ia te loto o toku Tamana telā i te lagi, ko ia tenā ko toku taina mo toku tuagane mo toku mātua.” (Mataio 12:47-50) E fakaasi mai i te mea tenei a te pili o Iesu ki ana soko. Ne akoako mai ne ia ki a tatou me i ana soko ne fai eiloa pelā me ne taina, tuagane, mātua ‵tonu ki a ia.

I te taimi tenā, a taina ‵tonu o Iesu— ko Iakopo, Iosefa, Simona, mo Iuta— ne seki tali‵tonu me i a Iesu ko te Tama a te Atua. Kāti ne seki tali‵tonu latou ki pati a te agelu ko Kapilielu kolā ne fai atu ki te lotou mātua. (Luka 1:30-33) Tela la, kāti ne seki atafai faka‵lei atu latou ki a Iesu. Ko so se tino e fai penā, e se fai mo fai se taina io me se tuagane tonu. E mata, e iloa ne koe se tino telā e se atafai faka‵lei ki tena taina io me ko tena tuagane?—

E fai mai te Tusi Tapu e uiga ki a Esau mo Iakopo mo te kaitaua o Esau telā ne fai  aka ei ana muna penei: ‘Ka tamate ne au a Iakopo.’ Ne mataku te lā mātua, ko Lepeka, telā ne uga atu ei ne ia a Iakopo ke fano keatea ko te mea ke se mafai o tamate a ia ne Esau. (Kenese 27:41-46) Kae i te fia o tausaga mai tua ifo, ne ‵fuli a Esau, kae ne ‵sai kae sogi atu ki a Iakopo.—Kenese 33:4.

E se leva, ne maua ne Iakopo a tama tagata e toko 12. Kae ko tama tā‵gata ma‵tua ne seki a‵lofa ki te lotou taina foliki ko Iosefa. Ne loto ma‵sei latou ki a ia ona ko te mea ne alofa malosi te lotou tamana ki a ia. Tela la, ne ‵togi atu ne latou a ia ki tino ‵togi pologa kolā ne olo atu i te lotou auala ki Aikupito. Kae oti aka, ne fai atu latou ki te lotou tamana me ko oti ne tamate a Iosefa ne se manu fekai. (Kenese 37:23-36) Ko se faka‵tau eiloa i te matagā o te lotou mea ne fai, ne?—

Fakamuli ifo, ne sala‵mo a taina o Iosefa ki te lotou mea ne fai. Tela la, ne fakamagalo ne Iosefa a latou. E mata, e lavea ne koe a te auala e tai ‵pau ei a Iosefa mo Iesu?— Ne ‵tele keatea ana apositolo i te taimi ne oko atu ei te fakalavelave ki a ia, kae ne fakafiti foki ne Petelu me e se iloa ne ia tou tagata. Kae e pelā mo Iosefa, ne fakamagalo ne Iesu a latou katoa.

 A te suā tautaina ko Kaino mo Apelu. E mafai foki o tauloto ne tatou se akoakoga mai i a lāua. Ne lavea ne te Atua a te loto o Kaino me ne seki alofa tonu a ia ki tena taina. Tela la, ne fai atu te Atua ki a Kaino me e ‵tau o ‵fuli ana uiga. Moi ne alofa tonu a Kaino ki te Atua, penei ko fakalogo a ia. Kae ne seki alofa a ia ki te Atua. I te aso e tasi ne fai atu a Kaino ki a Apelu: “Vau ke olo tāua ki koga kolā e ‵tu ei fatoaga.” Ne fanatu a Apelu i a Kaino. I te taimi ne ‵nofo tokolua atu ei lāua i fatoaga, ne mafuli atu a Kaino, tamate eiloa ne ia tena taina.—Kenese 4:2-8.

E fai mai te Tusi Tapu me e isi se akoakoga tāua e ‵tau o tauloto ne tatou mai i te mea tenā. E iloa ne koe me se a?— ‘Tenei eiloa te fekau ne lagona ne koutou mai i te kamataga: E ‵tau o fakatau a‵lofa tatou; e se pelā mo Kaino, telā ne māfua mai i te tino masei.’ Tela la, e ‵tau o fakatau a‵lofa a taina mo tuagane. E se ‵tau o fai latou e pelā mo Kaino.—1 Ioane 3:11, 12.

Kaia e masei ei ke fai pelā mo Kaino?— Ona ko te Tusi Tapu e fai mai me ne ‘māfua mai a ia i te tino masei,’ ko Satani te Tiapolo. Ona ko te mea ne fai a Kaino e pelā mo te Tiapolo, ne fai eiloa a te Tiapolo e pelā me ko tena tamana.

E a, e lavea ne koe a te pogai e tāua ei ke alofa koe ki ou taina mo tuagane?— Kafai e se alofa koe ki a latou, i a ai la a tama‵liki e manako koe o fakaakoako ki ei?— Ko tamaliki a te Tiapolo. E se manako koe ke fai penā, ne?— Tela la, e mafai pefea o fakamaoni atu ne koe me e fia fai koe mo fai se tamaliki a te Atua?— Mai i te alofa tonu ki ou taina mo tuagane.

Kae se a te alofa?— A te alofa se lagonaga ‵loto telā e fai ei ke ma‵nako tatou o fai a mea ‵lei mō nisi tino. E fakaasi atu ne tatou me e a‵lofa tatou ki nisi tino i taimi e fakaasi atu ei ‵tou lagonaga atafai ki a latou mo te taimi e fai ei ne tatou a mea ‵lei mō latou. Kae ko oi ‵tou taina mo tuagane kolā e ‵tau o a‵lofa tatou ki ei?— Masaua, ne akoako mai a Iesu me ko latou kolā e aofia i te kāiga Kelisiano kātoa.

 E pefea te tāua ke a‵lofa tatou ki taina mo tuagane Kelisiano konei?— E fai mai te Tusi Tapu: “Me ko te tino telā e se alofa ki tena taina, telā ko oti ne matea ne ia, e se mafai o alofa ki te Atua, telā e seki matea ne ia.” (1 Ioane 4:20) Tela la, e se mafai o a‵lofa fua tatou ki nai tino i te kāiga Kelisiano. E ‵tau o a‵lofa tatou ki tino katoa. E fai mai a Iesu: “Ona ko te mea tenei ka iloa ei ne tino katoa i a koutou ko oku soko, manafai e fakatau a‵lofa koutou.” (Ioane 13:35) E mata, e alofa koe ki taina mo tuagane katoa?— Masaua, me kafai e se alofa koe ki a latou, e se mafai foki o alofa tonu koe ki te Atua.

E mafai pefea o fakaasi atu ne tatou me e a‵lofa tonu tatou ki ‵tou taina mo tuagane?— Ia, kafai e a‵lofa tatou ki a latou, ka se faka‵mao tatou keatea mai i a latou ona ko te mea e se fia fai‵pati atu tatou ki a latou. Ka fakaasi atu ne tatou a uiga ‵lei ki a latou katoa. Ka fai faeloa ne tatou a mea ‵lei mō latou kae loto fia‵fia ke fesoasoani atu. Kae kafai e tupu se fakalavelave ki a latou, ka fesoasoani atu tatou ona ko te mea e aofia tonu tatou i se kāiga lasi.

Kafai e a‵lofa tonu tatou ki ‵tou taina mo tuagane katoa, se a te mea e fakamaoni atu i ei?— E fakamaoni atu i ei me e fai tatou mo soko o Iesu, te Faiakoga Sili. Kae e se tenā eiloa te mea e ma‵nako tatou ki ei?—