HA USA nga okasyon an Bantogan nga Magturutdo nagpakiana hin makahipausa nga pakiana: “Hin-o an akon iroy, ngan hin-o an akon kabugtoan?” (Mateo 12:48) Mababaton mo ba ito nga pakiana?— Bangin maaram ka nga hi Maria an iroy ni Jesus. Kondi maaram ka ba han mga ngaran han iya kabugtoan nga kalalakin-an?— May-ada ba liwat hiya kabugtoan nga kababayin-an?—

An Biblia nasiring nga an kabugtoan nga kalalakin-an ni Jesus amo hi “Jakobo ngan Jose ngan Simon ngan Judas.” Ngan hi Jesus may-ada kabugtoan nga kababayin-an nga buhi han nagsasangyaw pa hiya. Tungod kay suhag hi Jesus, kamanghoran niya hira ngatanan.​—Mateo 13:​55, 56; Lukas 1:​34, 35.

An kabugtoan ba ni Jesus mga disipulo niya liwat?— An Biblia nasiring nga ha siyahan hira ‘diri natoo ha iya.’ (Juan 7:5) Kondi, ha urhi, hi Jakobo ngan Judas nagin mga disipulo niya, ngan nagsurat pa ngani hira hin mga libro han Biblia. Maaram ka ba kon ano nga mga libro an ira iginsurat?— An Jakobo ngan Judas.

Bisan kon an kabugtoan nga kababayin-an ni Jesus waray ngarani ha Biblia, maaram kita nga bangin duha an iya bugto nga babaye. Kondi, bangin may-ada iba pa. Nagin mga sumurunod ba niya ini nga kabugtoan nga kababayin-an?— Waray ginsisiring an Biblia, salit diri kita maaram. Kondi maaram ka ba kon kay ano nga hi Jesus nagpakiana, “Hin-o an akon iroy, ngan hin-o an akon kabugtoan?”— Kitaon naton.

Nagtututdo hi Jesus ha iya mga disipulo han may-ada binaton ha iya nga nasiring: ‘An imo iroy ngan an imo kabugtoan nagkakatukdaw ha gawas, ngan karuyag nira makiistorya ha imo.’ Salit ginamit ni Jesus an higayon ha pagtutdo han importante nga leksyon pinaagi han pagpakiana  hiton makahipausa nga pakiana: “Hin-o an akon iroy, ngan hin-o an akon kabugtoan?” Igin-unat niya an iya kamot ngadto ha iya mga disipulo ngan binaton, nga nasinggit: “Kitaa! An akon iroy ngan an akon kabugtoan!”

Katapos, iginsaysay ni Jesus kon ano an karuyag niya ipasabot, nasiring: “Bisan hin-o nga nagbubuhat han kaburut-on han akon Amay nga aadto ha langit, hiya amo an akon bugto nga lalaki ngan bugto nga babaye, ngan iroy.” (Mateo 12:47-50) Ipinapakita hini nga hinigugma gud ni Jesus an iya mga disipulo. Gintututdoan kita niya nga an iya mga disipulo pariho hin iya unudnon nga kabugtoan nga kalalakin-an ngan kababayin-an, ngan mga iroy.

Hiton nga panahon an kabugtoan mismo ni Jesus​—hi Jakobo, Jose, Simon, ngan Judas—​diri natoo nga hi Jesus Anak han Dios. Bangin diri hira natoo ha ginsiring han anghel nga hi Gabriel ha ira iroy. (Lukas 1:30-33) Salit bangin diri hira buotan kan Jesus. Bisan hin-o nga nagios hin sugad hito  diri totoo nga bugto nga lalaki o babaye. May kilala ka ba nga diri buotan ha iya bugto nga lalaki o babaye?—

An Biblia nagsusumat ha aton mahitungod kan Esaw ngan Jakob ngan kon paonan-o nasina gud hi Esaw salit hiya nagsiring: “Akon papatayon hi Jakob nga akon bugto.” An ira iroy, hi Rebeka, nahadlok gud salit iya ginpabaya hi Jakob basi diri hiya mapatay ni Esaw. (Genesis 27:41-46) Kondi, paglabay hin damu ka mga tuig nagbag-o hi Esaw, ngan hinangkopan ngan hinadkan niya hi Jakob.​—Genesis 33:4.

Inabot an panahon, hi Jakob nagkaada 12 nga anak nga kalalakin-an. Kondi an magurang nga mga anak ni Jakob diri nahigugma ha ira manghod nga hi Jose. Nangabugho hira ha iya tungod kay hiya an paborito nga anak han ira amay. Salit ira iginbaligya hiya ha mga namamalit hin mga uripon nga tikadto ha Ehipto. Katapos, ira ginsumatan an ira amay nga ginpatay hi Jose han ihalas nga mananap. (Genesis 37:23-36) Diri ba maraot ito?—

Ha urhi nagbasol an kabugtoan ni Jose ha ira ginbuhat. Salit ginpasaylo hira ni Jose. Nasasabtan mo ba kon paonan-o hi Jose pariho kan Jesus?— An mga apostol ni Jesus pinalagiw han may problema hiya, ngan nagnigar pa ngani hi Pedro  nga kilala niya hiya. Kondi, pariho kan Jose, ginpasaylo ni Jesus hira ngatanan.

Aada liwat an duha nga magbugto nga hi Kain ngan Abel. Mahibabaro liwat kita hin leksyon tikang ha ira. Nakita han Dios ha kasingkasing ni Kain nga diri hiya totoo nga nahigugma ha iya bugto. Salit nagsiring an Dios kan Kain nga sadang bag-ohon niya an iya paggawi. Kon totoo nga nahigugma hi Kain ha Dios, namati unta hiya. Kondi diri hiya nahigugma ha Dios. Usa ka adlaw hi Kain nagsiring kan Abel: ‘Kadto kita ha uma.’ Inupod hi Abel kan Kain. Samtang hira la nga duha didto ha uma, hinampak hin grabe ni Kain hi Abel salit iya napatay hiya.​—Genesis 4:2-8.

An Biblia nagsusumat ha aton nga may-ada espesyal nga leksyon nga sadang hibaroan naton tikang hito. Maaram ka ba kon ano ito?— ‘Ini an mensahe nga iyo hinbatian tikang ha tinikangan: Sadang maghigugmaay kita ha usa kag usa; diri sugad kan Kain nga hiya tikang ha usa nga maraot.’ Salit an magburugto sadang maghigugmaay ha usa kag usa. Diri hira sadang magin pariho kan Kain.​—1 Juan 3:​11, 12.

Kay ano nga diri naton karuyag nga magin pariho kan Kain?— Tungod kay an Biblia nasiring nga hiya ‘tikang ha usa nga maraot,’ hi Satanas nga Yawa. Tungod kay ginios hi Kain pariho han Yawa, sugad la hin amay niya an Yawa.

Nasasabtan mo ba kon kay ano nga importante nga higugmaon mo an imo kabugtoan?— Kon diri mo higugmaon hira, kan kanay mga anak an imo ginsusubad?— Mga anak han Yawa. Diri mo karuyag nga magin sugad hito, diri ba?— Salit paonan-o mo mapapamatud-an nga karuyag mo magin anak han Dios?— Pinaagi han totoo nga paghigugma ha imo kabugtoan.

Kondi ano an gugma?— An gugma amo an hilarom nga pagbati ha sulod naton nga nagpapagios ha aton nga magbuhat hin maopay para ha iba nga mga tawo. Ipinapakita naton nga nahigugma kita ha iba kon maopay an aton pagtagad ha ira ngan kon nagbubuhat kita hin maopay para ha  ira. Ngan hin-o an aton kabugtoan nga sadang higugmaon naton?— Hinumdumi, hi Jesus nagtutdo nga hira an nagkukompuwesto han daku nga Kristiano nga pamilya.

Kay ano nga importante nga higugmaon naton inin Kristiano nga kabugtoan?— An Biblia nasiring: “An diri nahigugma ha iya bugto nga iya nakita, diri nahigugma ha Dios nga waray niya kitaa.” (1 Juan 4:20) Salit diri pipira la ha Kristiano nga pamilya an sadang higugmaon naton. Kinahanglan higugmaon naton hira ngatanan. Hi Jesus nagsiring: ‘Tungod hini an ngatanan makilala nga kamo an akon mga disipulo, kon kamo naghihigugmaay ha usa kag usa.’ (Juan 13:35) Hinigugma mo ba an ngatanan nga kabugtoan?— Hinumdumi, kon diri ka nahigugma ha kabugtoan, diri ka gud makakahigugma ha Dios.

Paonan-o naton maipapakita nga hinigugma gud naton an aton kabugtoan?— Aw, kon hinigugma naton hira, diri naton lilikyan hira tungod kay diri naton karuyag makaistorya hira. Magigin makisangkayon kita ha ira ngatanan. Bubuhaton naton pirme an maopay ha ira ngan magigin disidido kita ha paghatag ha ira. Ngan kon may-ada hira problema, bubuligan naton hira tungod kay kita tinuod nga usa ka daku nga pamilya.

Kon hinigugma gud naton an ngatanan naton nga kabugtoan, ano an pinamamatud-an hito?— Pinamamatud-an hito nga mga disipulo kita ni Jesus, an Bantogan nga Magturutdo. Ngan diri ba ito an karuyag naton nga mahitabo?—