JUNTÉENJEAKILEʼ Jesús, le Maʼalob j-Kaʼansajoʼ, tu beetaj le kʼáatchiʼaʼ: «¿Máax in maama yéetel máax in wíitsʼinoʼob?» (Mateo 12:48). ¿Jeʼel wa u páajtal a núukik le kʼáatchiʼaʼ?... Maʼ xaaneʼ a wojel u maama Jesuseʼ María. Baʼaleʼ ¿a wojel wa u kʼaabaʼ u yíitsʼinoʼob?... ¿Yaan wa xan x-chʼúupalaloʼob ichil u yíitsʼinoʼob?...

² Le Bibliaoʼ ku yaʼalikeʼ u yíitsʼinoʼob Jesuseʼ Santiago, José, Simón yéetel Judas. Tsʼoʼoleʼ ku yaʼalikeʼ yaan tiʼ u yíitsʼnoʼobeʼ x-chʼúupalaloʼob. Jesuseʼ letiʼ le yáax paaloʼ, le oʼolal u maasiloʼoboʼ u yíitsʼinoʼob (Mateo 13:55, 56; Lucas 1:34, 35).

³ ¿Táakaʼan wa u yíitsʼinoʼob ichil u disipuloʼob?... Le Bibliaoʼ ku yaʼalikeʼ tu káajbaleʼ «maʼatech u tsʼáaik u fejoʼob tiʼ letiʼ» (Juan 7:5). Baʼaleʼ ka máan kʼiineʼ Santiago yéetel Judaseʼ tu beetubaʼob disipuloil tiʼ letiʼ yéetel tu tsʼíibtoʼob junjaats tiʼ le Bibliaoʼ. ¿A wojel máakalmáakoʼobiʼ?... U tsʼíibil Santiago yéetel Judas.

⁴ Kex le Biblia maʼatech u yaʼalik bix u kʼaabaʼ u x-chʼúupalaliloʼob u yíitsʼinoʼob Jesuseʼ, ku yáantkoʼon k-ileʼ anchaj kaʼatúuliʼ. ¿Táakpajoʼob wa ichil u disipuloʼob Jesús?... Le Bibliaoʼ maʼatech u yaʼalik, le oʼolal maʼ k-ojliʼ. Baʼaleʼ ¿baʼaxten tu kʼáataj Jesús máax u maama yéetel máax u yíitsʼinoʼob?... Koʼox ilik.

⁵ Táanil tiʼ u kʼáataʼaltiʼeʼ, Jesuseʼ táan kaʼach u kaʼansik u disipuloʼob, baʼaleʼ tʼaanaj juntúul máakeʼ ka tu yaʼalajtiʼ: «A maama yéetel a wíitsʼnoʼobeʼ tiʼ waʼalakbaloʼob teʼ táankaboʼ yéetel u kʼáatoʼob tʼaan ta wéetel». Jesús túuneʼ tu aprovechartaj u súutukil u  kaʼansik junpʼéel baʼal jach kʼaʼanaʼan tiʼob. Le oʼolal tu beetaj le kʼáatchiʼaʼ: «¿Máax in maama yéetel máax in wíitsʼinoʼob?», tsʼoʼoleʼ ka tu tuchʼuʼtaj u disipuloʼobeʼ ka tu yaʼalaj: «¡Ile! Jeʼel in maama yéetel in wíitsʼnoʼobaʼ».

⁶ Tsʼoʼoleʼ tu yaʼalaj: «Jeʼel máaxak ka u beet le baʼax u kʼáat in Taata yaan teʼ kaʼanoʼ, letiʼ in wíitsʼin, in kiik wa in maama» (Mateo 12:47-50). Lelaʼ ku yeʼesik bukaʼaj u yaabiltmil Jesús u disipuloʼob. Le baʼax tu yaʼaloʼ ku yeʼesikeʼ, utiaʼal letiʼeʼ bey jach u sukuʼun, u yíitsʼin yéetel u maama u disipuloʼobeʼ.

⁷ Teʼ kʼiinoʼob jeʼeloʼ Santiago, José, Simón yéetel Judas, u yíitsʼinoʼob Jesuseʼ, maʼatech u creertikoʼob wa letiʼeʼ u Hijo Dios. Maʼatech u creertikoʼob wa jaaj le baʼax tu yaʼalaj le ángel Gabriel tiʼ u maamaʼoboʼ (Lucas 1:30-33). Maʼ xaaneʼ u pʼekmoʼob kaʼach Jesús. Juntúul máax beetik beyoʼ maʼ tu yeʼesik  wa jach tu jaajil íitsʼintsil. ¿Yaan wa máax a kʼaj óol u pʼekmaj u sukuʼun wa u kiik?...

⁸ Le Bibliaoʼ ku yaʼalikeʼ Esaú kaʼacheʼ jach tu pʼektaj Jacob, u yíitsʼin, le oʼolal tu yaʼalaj: «Yaan in kíimsik in wíitsʼin Jacob». Rebeca, u maamaʼobeʼ, sajakchaji, ka tu yaʼalaj tiʼ Jacob ka xiʼik kajtal náach utiaʼal maʼ u kíimsaʼal tumen Esaú (Génesis 27:41-46). Baʼaleʼ ka máan kʼiineʼ Esaueʼ tu kʼexaj u tuukul, ka tu méekʼaj u yíitsʼineʼ ka tu tsʼuʼutsʼaj (Génesis 33:4).

⁹ Ka máan kʼiineʼ Jacobeʼ anchaj doce u túulul u paalal. Baʼaleʼ le nuuktakoʼoboʼ tu pʼektoʼob José, u yíitsʼinoʼob. Letiʼobeʼ tu pʼektoʼob tumen maas yaabiltaʼan kaʼach tumen u taataʼob. Ka tu konoʼob utiaʼal palitsiltbil tiʼ u jaats máakoʼob ku binoʼob kaʼach Egipto, tsʼoʼoleʼ ka tu yaʼaloʼob tiʼ u taataʼob kíimsaʼab José tumen juntúul tsʼíitsʼik baʼalcheʼ (Génesis 37:23-36). ¿Máasaʼ jach kʼaas le baʼax tu beetoʼoboʼ?...

¹⁰ Ka máan kʼiineʼ u sukuʼunoʼob Joseeʼ arrepentirnajoʼob, letiʼ túuneʼ tu perdonartoʼob. ¿Tiʼ baʼax chíikaʼan  José yéetel Jesús?... Ka tu aktáantaj talamiloʼob Jesuseʼ, pʼaʼat tumen u apostoloʼob, yéetel Pedroeʼ tu yaʼaleʼ maʼ u kʼaj óoliʼ. Baʼaleʼ jeʼex Joseeʼ, perdonartaʼaboʼob tumen Jesús.

¹¹ Le baʼax úuch tiʼ Caín yéetel Abeloʼ yaan xan baʼax ku kaʼansiktoʼon. Dioseʼ tu yileʼ Caíneʼ maʼ u yaabiltmaj u yíitsʼiniʼ, le oʼolal tu yaʼalajtiʼ unaj u kʼexik u tuukul. Wa Caín u yaabiltmaj Dioseʼ, tsʼoʼok kaʼach u beetik baʼax aʼalaʼabtiʼeʼ. Baʼaleʼ maʼ u yaabiltmiʼ. Junpʼéel kʼiineʼ Caíneʼ tu yaʼalaj tiʼ u yíitsʼin: «Koʼox xíimbal». Abeleʼ bin tu yéetel, le ka kʼuchoʼob teʼ kʼáaxoʼ jaʼatsʼ tumen Caín, ka kíimi (Génesis 4:2-8).

¹² Le Bibliaoʼ ku yaʼalikeʼ yaan baʼax k-kanik tiʼ le baʼax úuchoʼ. ¿A wojel wa baʼaxiʼ?... «Lelaʼ letiʼe kʼuben tʼaan ta wuʼuyeʼex desde tu káajbaloʼ: unaj k-paklan yaabiltikbaʼex t-baatsil; maʼ jeʼex Caíneʼ, letiʼeʼ tiʼ le j-Kʼasaʼan u taaloʼ.» Le oʼolaleʼ unaj k-paklan yaabiltikba yéetel k-láakʼtsil. Maʼ unaj k-beetik jeʼex Caíneʼ (1 Juan 3:11, 12).

¹³ ¿Baʼaxten maʼ unaj k-beetik jeʼex úuchik u beetik Caíneʼ?... Tumen le Bibliaoʼ ku yaʼalikeʼ Caíneʼ «tiʼ le j-Kʼasaʼan u taaloʼ», Satanás le Kʼaasilbaʼaloʼ. Caíneʼ tu beetaj le baʼax tu beetaj le Kʼaasilbaʼaloʼ, le oʼolal jeʼel u yaʼalaʼal bey u hijoeʼ.

¹⁴ ¿Ta naʼatik wa baʼaxten kʼaʼabéet a yaabiltik a sukuʼunoʼob wa a wíitsʼinoʼob?... Wa maʼ a yaabiltikoʼobeʼ, ¿tiʼ máaxoʼob chíikaʼanech?... Tiʼ u paalal le Kʼaasilbaʼaloʼ. ¿Máasaʼ techeʼ maʼ a kʼáat a beetaba beyoʼ?... ¿Bix túun jeʼel u páajtal a weʼesik a kʼáat a beetaba u hijo wa u hija Dioseʼ?... Unaj a yaabiltik a sukuʼunoʼob wa a wíitsʼinoʼob.

¹⁵ Baʼaleʼ ¿baʼax le yaabilajoʼ?... Junpʼéel baʼax péeksik máak u beet baʼax maʼalob yoʼolal u maasil. Ken k-beet baʼax maʼalob yoʼolal u maasileʼ, k-eʼesik k-yaabiltmoʼob. ¿Máaxoʼob le k-sukuʼunoʼob  unaj k-yaabiltikoʼ?... Kʼaʼajaktecheʼ Jesuseʼ tu yaʼaleʼ letiʼe máaxoʼob tsaypachtikoʼ.

¹⁶ ¿Baʼaxten unaj k-yaabiltik le u maasil máaxoʼob meyajtik Diosoʼ?... Le Bibliaoʼ ku yaʼalik: «Le máax maʼ tu yaabiltik u sukuʼun kex táan u yilkeʼ, maʼ tu páajtal u yaabiltik Dios máax maʼ u yiliʼ» (1 Juan 4:20). Lelaʼ ku yeʼesikeʼ maʼ chéen wa jaytúul tiʼ le máaxoʼob meyajtik Dios unaj k-yaabiltikoʼ. Baʼaxeʼ unaj yaabiltik tuláakal. Jesuseʼ tu yaʼalaj: «Wa ka yaabiltikabaʼex ta baatsileʼexeʼ tuláakal máak ken u yojéelteʼ teʼexeʼ in disipuloʼex» (Juan 13:35). Techeʼ, ¿a yaabiltmaj wa tuláakal le sukuʼunoʼoboʼ?... Kʼaʼajaktecheʼ wa maʼ a yaabiltmoʼobeʼ, maʼ a yaabiltmaj xan Diosiʼ.

¹⁷ ¿Bix jeʼel k-eʼesik jach k-yaabiltmaj k-sukuʼunoʼobeʼ?... Maʼatech k-tséeltikoʼob utiaʼal maʼ k-tʼankoʼob. Baʼaxeʼ yaan k-eʼesik utsil tiʼob, yaan k-tratartikoʼob maʼalob mantatsʼ yéetel wa ku béeytaleʼ, yaan k-áantkoʼob yéetel baʼaxoʼob yaantoʼon. Yéetel wa ku aktáantkoʼob wa baʼax talamileʼ, yaan k-áantkoʼob, tumen k-ilkoʼob bey k-láakʼtsiloʼobeʼ.

¹⁸ ¿Baʼax k-eʼesik ken k-yaabilt tuláakal le sukuʼunoʼoboʼ?... K-eʼesikeʼ u disipuloʼon Jesús, le Maʼalob j-Kaʼansajoʼ. ¿Máasaʼ toʼoneʼ k-kʼáat k-beet beyoʼ?...