LUREMWA gibedo jo ma wamaro boko lok kun wabedo kacel kwedgi. Ento pire tek ni myero wabed ki lurem mabeco. Itamo ni anga ma pud dong obedo laremwa maber loyo ducu?— Obedo Lubanga Jehovah.

Tika wan ada watwero bedo lurem Lubanga?— Baibul waco ni Abraim, laco ma okwo wacon-ni, obedo “larem Lubanga [Jehovah].” (Yakobo 2:23) Ingeyo pingo en obedo larem Lubanga?— Baibul miyo lagamme ni Abraim owinyo dog Lubanga. En owinyo dog Lubanga kadi bed gin ma kiwacce ni otim onongo tek bote. Dong me bedo larem Jehovah, omyero watim gin ma yomo cwinye, kit ma Abraim otimo ki dok kit ma Lapwony Madit otimo kwede kare ducu.—Acakki 22:1-14; Jon 8:28, 29; Jo Ibru 11:8, 17-19.

 Yecu owaco bot lukwenane ni: ‘Wun lurema ka wutiyo gin ducu ma acikowu.’ (Jon 15:14) Kit ma jami ducu ma Yecu owaco bot dano a ki bot Jehovah-ni, Yecu onongo tye ka wacci lureme ducu gubedo jo ma gitimo gin ma Lubanga waccigi ni myero gutim. Ada, lureme ducu onongo gimaro Lubanga.

Lurem mukene macok pa Lapwony Madit-ti gubedo lukwenane ma itwero neno calgi i pot karatac 75 i buk man. Guwoto kwede kacel kun gikonyo en i tic me tito kwena. Pol kare Yecu obedo kacel ki co magi. Gucamo kacel. Guloko lok i kom Lubanga kacel. Dok gutimo jami mukene kacel. Ento Yecu gire onongo tye ki lurem mukene mapol. En onongo bedo botgi, kun ginamo ki yomcwiny kacel.

Lupaco mo acel ma onongo Yecu maro bedo botgi onongo gikwo i Betania, taun mo matidi macok ki Jerucalem. Wi tika po i komgi?— Gin aye Maliam ki Marita ki omingi Lajaro. Yecu  olwongo Lajaro ni lareme. (Jon 11:1, 5, 11) Tyen lok mumiyo Yecu omaro lupaco-ni kun nongo mit pa bedo botgi, aye ni gin onongo gimaro Jehovah kun gitiyo Pire.

Man pe te lokke ni Yecu onongo pe paro pi jo ma pe gitiyo pi Lubanga. En onongo paro pigi bene. En ocito wa i gangigi kun camo kacel kwedgi. Man omiyo jo mukene guwacci en “larem lujog-mucoro ki lubalo!” (Matayo 11:19) Lok ada tye ni Yecu ocito i gangi pa jo magi pe ni pien en omaro kit me kwogi. En olimogi wek etit botgi lok i kom Jehovah. En otemo konyogi wek gulokke ki i timo jami maraco ci guti pi Lubanga.

Man otime nino mo acel i Jeriko. Yecu onongo tye ka kato akata cito i Jerucalem. Lwak dano mapol onongo gitye dok i kingi onongo tye laco mo ma nyinge Jakayo. En onongo mito neno Yecu. Ento Jakayo onongo cek, dok pe twero nenne pi lwak dano mapol. Pi meno, en oringo olubo gudu ocito anyim ci oito i wi yat wek enen Yecu maber ka tye ka kato.

I kare ma Yecu oo ite yat meno, en oneno malo ci owacci: “lor piny oyotoyot; pien tin myero abed i odi.” Ento Jakayo onongo obedo laco ma lalonyo ma otimo  jami maraco. Pingo Yecu onongo mito cito i ot pa laco ma kit man?—

Pe te lokke ni Yecu onongo maro kit me kwo pa laco-ni. En ocito i ot pa Jakayo ka tite lok pa Lubanga. En oneno kit ma laco-ni otemme kwede ki tekke ducu me neno en. Pi meno en ongeyo ni Jakayo nen calo twero winyo lokke. Man obedo kare maber me lok kwede i kom kit ma Lubanga waco ni dano myero gukwo kwede.

Dong adwogine obedo ningo?— Jakayo omaro pwony pa Yecu. Cwinye ocwer pi kwalo cente pa dano dok ocikke me dwoko cente ma ekwalo. Lacen en odoko lapwonnye pa Yecu. I ngeye, Yecu gin ki Jakayo gudoko lurem.—Luka 19:1-10.

Ka walubo lanen pa Lapwony Madit, tika wabilimo jo ma pe gin luremwa?— Wabilimogi. Ento pe wabicito i odigi pien ni wamaro kit me kwogi. Dok pe wabitimo jami maraco kacel kwedgi. Wabilimogi wek watit botgi lok pa Lubanga.

Ento luremwa macok aye jo ma pol kare wamaro bedo kwedgi.  Wek gubed lurem mabeco, omyero kong gubed jo ma Lubanga marogi. Mogo bene pe gingeyo anga ma Jehovah obedo. Ento ka gimito pwonyo lok i kome, watwero konyogi. Dong ka kare oromo ma gucako maro Jehovah calo wan, ci waromo mako lurem kwedgi.

Tye dok yo mukene me ngeyo ka ce ngat moni twero bedo larem maber. Nen jami ma en timogi. Tika en timo jami maraco i kom jo mukene ci dok nyero iye? Meno pe ber, pe kumeno?— Mono en bedo ka poto i peko kare ducu? Wan giwa pe wamito poto i peko kacel kwede, tika wamito?— En mono timo jami maraco akaka ci tamo ni eryek pien pe kimake? Ento kadi bed ni pe kimake, Lubanga nongo oneno gin ma en otimo, pe kumeno?— Mono itamo ni jo ma gitimo jami maraco kit magi gitwero bedo lurem mabeco botwa?—

Pingo pe kong ikwany Baibul-li? Kong wanen gin ma waco i kom kit ma luwotwa gigudu kwede kwowa. Ginacoya meno tye i 1 Jo Korint cura 15, tyeng 33. Tika inongo?— Kwanne ni: “Pe wuwek gibwolwu: ‘Bedo ki jo maraco balo kit mabeco.’” Man te lokke ni ka wabedo ki jo maraco, wan bene kitwa doko raco. Dok tye lok ada ni luwotwa mabeco gikonyowa me dongo kit mabeco.

Omyero wiwa pe owil ni Ngat ma pire tek loyo i kwowa obedo Jehovah. Wan giwa pe wamito balo luremwa kwede, pe kumeno?— Pi meno, omyero wanen ni wamako lurem ki jo ma gimaro Lubanga keken.