TI GAGAYYEM ket dagidiay magustuantayo a kasarita ken kalangen. Ngem nagpateg a maaddaantayo kadagiti nasayaat a gagayyem. Siasino ti ammom a kasayaatan a gayyementayo?— Wen, ni Jehova a Dios.

Talaga kadi a mabalintayo a gayyemen ti Dios?— Kinapudnona, kuna ti Biblia a nagbalin a “gayyem ni Jehova” ni Abraham, maysa a tao a nagbiag idi un-unana. (Santiago 2:23) Ammom kadi no apay a gayyem ni Jehova?— Kuna ti Biblia a nagtulnog ni Abraham iti Dios. Nagtulnog uray no narigat dagiti naipaaramid kenkuana. No kasta, tapno agbalintayo a gayyem ni Jehova, masapul nga aramidentayo dagiti pakaragsakanna, a kas iti inaramid ni Abraham ken kas iti kanayon nga inaramid ti Naindaklan a Mannursuro.​​—Genesis 22:​1-​14; Juan 8:​28, 29; Hebreo 11:​8, 17-​19.

 Kinuna ni Jesus kadagiti apostolna: “Dakayo ti gagayyemko no aramidenyo ti ibilbilinko kadakayo.” (Juan 15:14) Yantangay naggapu amin ken Jehova dagiti imbaga ni Jesus kadagiti tattao, kayat a sawen ni Jesus a ti gagayyemna ket dagidiay nagtulnog iti impaaramid ti Dios kadakuada. Wen, amin a gagayyemna ket inayatda ti Dios.

Dadduma kadagiti kasingedan a gagayyem ti Naindaklan a Mannursuro ket dagidi apostolna. Makitam ti ladawanda iti panid 75 daytoy a libro. Kimmuyogda kenkuana ken timmulongda a nangasaba. Adu ti tiempo a pannakikadua ni Jesus kadagitoy a lallaki. Agkakapanganda a sangsangkamaysa. Agsasaritada a sangsangkamaysa maipapan iti Dios. Ken adda pay dadduma a bambanag nga inaramidda a sangsangkamaysa. Ngem adu pay ti sabali a gagayyem ni Jesus. Magustuanna ti makidagus kadakuada, ket tinagiragsakda ti naglalangen.

Ti maysa a pamilia a nagustuan ni Jesus a pagdagusan ket agnanaed idi iti bassit nga ili ti Betania, iti ruar laeng ti dakkel a siudad ti Jerusalem.  Malagipmo kadi ida?— Da Maria ken Marta ken ti kabsatda a lalaki a ni Lazaro. Kuna ni Jesus a gayyemna ni Lazaro. (Juan 11:​1, 5, 11) Inayat ni Jesus daytoy a pamilia ken tinagiragsakna ti makilangen kadakuada gapu ta inayatda ni Jehova ken nagserbida Kenkuana.

Dina kayat a sawen a saan a naasi ni Jesus kadagidiay di agserserbi iti Dios. Naasi met kadakuada. Napan pay ketdi kadagiti pagtaenganda ken nakipangan kadakuada. Daytoy ti gapuna nga addada nagkuna a ni Jesus ket “gayyem dagiti agsingsingir iti buis ken dagiti managbasol.” (Mateo 11:19) Kinapudnona, napan ni Jesus iti pagtaengan dagitoy a tattao saan a gapu ta anamonganna ti wagas ti panagbiagda. Bimmisita kadakuada tapno makasaritana ida maipapan ken Jehova. Inkagumaanna a tulongan ida a sumardeng nga agaramid iti dakes ket agserbida iti Dios.

Kastoy ti napasamak iti maysa nga aldaw idiay siudad ti Jerico. Lumablabas laeng idi ni Jesus nga agturong idiay Jerusalem. Immaribungbong ti adu a tattao, ket karaman kadakuada ti maysa a lalaki nga agnagan iti Zaqueo. Kayatna a makita ni Jesus. Ngem bassit ni Zaqueo, ket dina makita gapu iti kaadu ti tao. Timmaray ngarud nga immun-una sa immuli iti kayo tapno nawaya a makitana ti ilalabas ni Jesus.

 Idi makaasideg ni Jesus iti dayta a kayo, timmangad sa kinunana: ‘Darasem ket umulogka, ta ita nga aldaw umayak iti balaymo.’ Ngem nabaknang a tao ni Zaqueo nga agar-aramid idi iti kinadakes. Apay a kayat ni Jesus ti mapan iti balay ti kasta a dakes a tao?—

Saan a gapu ta magustuan ni Jesus ti panagbiag dayta a tao. Napan sadiay tapno kasaritana ni Zaqueo maipapan iti Dios. Napaliiwna ti napalalo a panangikagumaan dayta a lalaki tapno makitana laeng ni Jesus. Isu nga ammona a mabalin a dumngeg ni Zaqueo. Nagsayaat daytoy a gundaway tapno maibagana ken Zaqueo no ania ti kuna ti Dios a rumbeng a panagbiag dagiti tattao.

Gapuna, ania ti napasamak?— Nagustuan ni Zaqueo dagiti pannursuro ni Jesus. Nagbabawyanna unay ti panangsaurna kadagiti tattao, ket inkarina nga isublina dagiti kuarta a sinaurna. Kalpasanna nagbalin a pasurot ni Jesus. Kalpasan laeng dayta a nagbalin nga aggayyem da Jesus ken Zaqueo.​​—Lucas 19:​1-​10.

No tuladentayo ti Naindaklan a Mannursuro, sarungkarantayo aya dagidiay saantayo a gagayyem?— Wen. Ngem mapantayo iti balayda saan a gapu ta magustuantayo ti wagas ti panagbiagda. Ken ditay makikadua  kadakuada nga agaramid iti dakes. Pumasiartayo kadakuada tapno makasaritatayo ida maipapan iti Dios.

Ngem ti nasinged a gagayyemtayo ket dagidiay magustuantayo unay a kalangen. Tapno nasayaatda a gagayyem, masapul a magustuan ida ti Dios. Mabalin a di pay ketdi ammo dagiti dadduma no siasino ni Jehova. Ngem no kayatda a maam-ammo ti Dios, matulongantayo ida. Ket no ayatendanto ni Jehova a kas iti panagayattayo kenkuana, iti kasta agbalintayto a nasinged nga aggagayyem.

Adda pay sabali a pamay-an tapno maammuantayo no nasayaat a pakigayyeman ti maysa a tao. Siputantayo dagiti ar-aramidenna. Agar-aramid aya iti di nasayaat kadagiti sabsabali sananto katawaan? Saan nga umiso dayta, di ngamin?— Kanayon aya a mangpatpataud iti riribuk? Ditay kayat ti mairamraman iti kinalokona, di ngamin?— Wenno iranrantana kadi ti agaramid iti dakes sa kalpasanna ipapanna a masirib gapu ta saan a naduktalan? Uray di naduktalan dayta a tao, saan aya a nakita ti Dios ti inaramidna?— Panagkunam nasayaat ngata a pakigayyemantayo dagidiay agar-aramid iti kakasta?—

Alaem man ketdi ti Bibliam ket kitaenta no kasano a maapektarannatayo dagiti kakaduatayo. Nailanad dayta iti 1 Corinto kapitulo 15, bersikulo 33. Nakitam kadin?— Kunana: “Dikay payaw-awan. Dagiti dakes a pannakitimpuyog dadaelenda dagiti makagunggona nga ugali.” Kayatna a sawen a no makikadkaduatayo kadagiti dakes a tattao, baka agbalintayo a dakes. Ket agpayso met a dagiti nasayaat a kakadua tulongandatayo a mangpatanor kadagiti nasayaat a kababalin.

Ditay koma liplipatan a ni Jehova ti kapatgan a Persona iti biagtayo. Ditay kayat a madadael ti pannakigayyemtayo kenkuana, di ngamin?— Gapuna, siguraduentayo koma a dagidiay laeng agayat iti Dios ti pakigayyemantayo.