KAPU 44

Banduku na Beto Fwete Zolaka Nzambi

BANDUKU kele bantu yina beto kezolaka kusolula ti bo mpi kulutisa ntangu ti bo. Kansi, yo ke mfunu na kuvanda ti banduku ya mbote. Nge keyindula nde nani kele nduku ya kuluta mbote ya beto le vanda na yandi?— Yehowa Nzambi.

Keti beto le vanda mpenza banduku ya Nzambi?— Biblia ketuba nde Abrahami, muntu mosi ya kuzingaka bamvula mingi meluta, kuvandaka ‘nduku ya Nzambi.’ (Yakobo 2:23) Keti nge mezaba sambu na inki?— Biblia kepesa mvutu nde Abrahami vandaka kulemfukila Nzambi. Ata ntangu mambu ya Nzambi kulombaka yandi na kusala vandaka ya mpasi, yandi vandaka kulemfuka kaka. Yo yina, sambu na kuvanda banduku ya Yehowa, beto fwe salaka mambu yina kesepedisaka yandi, kaka mutindu Abrahami kusalaka mpi mutindu Longi ya Nene kesalaka ntangu yonso.—Kuyantika 22:1-14; Yoane 8:28, 29; Baebreo 11:8, 17-19.

 Yezu kusongaka bantumwa na yandi nde: “Beno kele banduku na mono kana beno sala mambu yai ya mono ke songa beno na kusala.” (Yoane 15:14) Sambu mambu yonso ya Yezu vandaka kutubila bantu kukatukaka na Yehowa, Yezu vandaka kutuba nde banduku na yandi kuvandaka bayina vandaka kusala mambu ya Nzambi kutubaka nde bo fwe sala. Ee, banduku yonso ya Yezu vandaka kuzola Nzambi.

Mwa banduku ya ngolo na kati ya banduku ya Longi ya Nene kuvandaka bantumwa na yandi, bayina nge le mona na bifwanisu yina kele na lutiti 75 ya mukanda yai. Bo salaka banzyetolo ti yandi mpi bo sadisaka yandi na kusala kisalu ya kusamuna. Yezu vandaka kulutisa ntangu na yandi mingi ti bantu yai. Bo vandaka kudya kisika mosi. Bo vandaka kutubila mambu ya metala Nzambi na kimvuka. Bo vandaka mpi kusala mambu mingi dyaka na kimvuka. Kansi Yezu kuvandaka ti banduku mingi yankaka. Yandi vandaka na kikalulu ya kuvanda ti bo, mpi bo vandaka kulutisa bantangu ya mbote kisika mosi.

Yezu kuzolaka mingi kuvanda ti dibuta mosi yina vandaka kuzinga na mbanza mosi ya fyoti ya Betania, ntama mingi ve ti mbanza ya nene ya Yeruzalemi. Keti nge keyibuka bantu ya dibuta yango?— Bo vandaka Maria,  Marta ti mpangi na bo ya bakala, Lazare. Yezu kubingaka Lazare nde nduku na yandi. (Yoane 11:1, 5, 11) Kikuma ya Yezu kuzodilaka dibuta yai mpi vandaka kusepela kuvanda ti bo, kuvandaka nde dibuta yango vandaka kuzola Yehowa mpi kusadila Yandi.

Yo ketendula ve nde Yezu kuvandaka ve mbote ti bantu yina vandaka kusadila ve Nzambi. Mpidina ve. Nkutu, yandi vandaka kukwenda na banzo na bo mpi yandi vandaka kudya ti bo. Yo yina kikuma ya kupusaka bantu yankaka na kutuba nde Yezu vandaka “nduku ya bakalaki ya mpaku ti ya bantu mingi ya bikalulu ya mbi.” (Matayo 11:19) Kansi, Yezu kukwendaka ve na banzo ya bantu yina sambu yandi vandaka kundima bikalulu na bo ya mbi. Yandi vandaka kwenda kutala bo sambu na kusolula mambu ya Yehowa ti bo. Yandi sosaka kusadisa bo sambu bo yambula bikalulu na bo ya mbi mpi bo sadila Nzambi.

Dyambu yai kusalamaka kilumbu mosi na bwala ya Yeriko. Yezu kulutaka na bwala yina sambu yandi vandaka kukwenda na Yeruzalemi. Kuvandaka ti kibuka mosi ya bantu, mpi na kati ya kibuka yina kuvandaka ti muntu mosi na zina ya Zasheo. Yandi zolaka kumona Yezu. Kansi Zasheo kuvandaka nkufi, yo yina yandi lendaka ve kumona sambu bantu mingi vandaka kufika yandi. Ebuna yandi kwendaka ntinu na ntwala na nzila yina mpi yandi mataka na nti mosi sambu na kumona Yezu mbote ntangu yandi taluta.

Ntangu Yezu kumaka na nti yina, yandi talaka na zulu ebuna yandi tubaka nde: ‘Sasuka, kwisa kutuluka, sambu mono  takwisa na nzo na nge bubu yai.’ Kansi Zasheo kuvandaka mvwama mosi ya kusalaka mambu mingi ya mbi. Sambu na nki Yezu zolaka kukwenda na nzo ya muntu ya mutindu yina?—

Yo vandaka ve sambu Yezu kusepelaka na mambu ya muntu yina vandaka kusala. Yandi kwendaka kuna sambu na kulonga Zasheo mambu ya metala Nzambi. Yandi bakisaka mutindu muntu yina kudipesaka mpasi sambu na kumona yandi. Yo yina, yandi tulaka ntima nde mbala yankaka Zasheo tawa mambu ya yandi tatuba. Yo vandaka okazio mosi ya mbote sambu na kutubila yandi mutindu Nzambi kezolaka nde bantu kuzinga.

Ebuna, inki mambu mesalama na nima?— Zasheo mesepela na malongi ya Yezu. Yandi mewa mpasi mingi mpenza na ntima mutindu yandi vandaka kukusa bantu, mpi yandi mesila na kuvutudila bantu mbongo ya yandi vandaka ve na nswa ya kubaka. Na nima yandi kumaka longoki ya Yezu. Kaka na ntangu yo yina Yezu ti Zasheo kukumaka banduku.—Luka 19:1-10.

Kana beto kelanda mbandu ya Longi ya Nene, keti beto takwenda kutala bantu yina kele ve banduku na beto?— Ee, beto tasala yo. Kansi, beto takwenda ve na banzo na bo sambu beto kesepelaka na mutindu na bo ya kuzinga. Beto tasala mpi ve mambu na bo ya mbi. Beto takwenda kutala bo sambu na kusonga bo mambu ya metala Nzambi.

 Kansi, banduku na beto ya ngolo kele mingimingi bantu yina beto kezolaka kulutisa ntangu ti bo. Sambu bo vanda banduku ya mbote, bo fwe vanda mutindu ya banduku yina Nzambi kezolaka. Nkutu, yo le vanda nde banduku yankaka kuzaba ve kana Yehowa kele nani. Kansi kana bo kezola kulonguka mambu na yandi, beto lenda sadisa bo. Kana bo yantika kuzola Yehowa mutindu beto kezolaka yandi, pana beto le kuma banduku na bo ya ngolo.

Kele ti mutindu yankaka ya kuzaba kana muntu lenda vanda nduku ya mbote. Tala mambu ya yandi kesalaka. Keti yandi kesadilaka bankaka mambu ya mbi na nima yandi yantika kuseka bo sambu na yo? Yo ke mbote ve, mpidina ve?— Keti yandi kekudisosilaka makambu ntangu yonso? Beto tazola ve kudisosila makambu sambu beto kele banduku na yandi, mpidina ve?— To keti yandi kesalaka mambu ya mbi na nku ebuna yandi kuyindula na nima nde yandi ke mayele sambu ata muntu mosi ve kukangaka yandi? Kana ata muntu mosi ve kumonaka yandi, kansi Nzambi monaka mambu ya yandi salaka, mpidina ve?— Keti nge keyindula nde bantu yina kesalaka mambu ya mutindu yina le vanda banduku ya mbote ya beto fwe vanda na bo?—

Keti nge lenda baka Biblia na nge? Bika beto tala nki yo ketuba na yina metala mambu yina banduku na beto le sala na luzingu na beto. Verse yango kele na 1 Korinto kapu 15, verse 33. Keti nge mezwa yo?— Yo ketuba nde: “Bantu kukusa beno ve, sambu: ‘Banduku ya mbi ke bebisaka bikalulu ya mbote.’” Yo ketendula nde kana beto kelutisa ntangu ti bantu ya mbi, beto le kuma bantu ya mbi. Mpi yo ke kyeleka nde banduku ya mbote kesadisaka beto na kuyedisa bikalulu ya mbote.

Beto vilaka ata fyoti ve nde Muntu ya kuluta mfunu na luzingu na beto kele Yehowa. Beto kezola ve kubebisa kinduku na beto ti yandi, mpidina ve?— Yo yina, beto fwe salaka yonso sambu na kuta kinduku kaka ti bantu yina kezolaka Nzambi.

Bo kemonisa mfunu ya kuvanda ti banduku ya mbote na Nkunga 119:115; Bingana 13:20; 2 Timoteo 2:22; mpi 1 Yoane 2:15.

[Kifwanisu ya kele na lutiti 227]

Sambu na nki Abrahami kuvandaka ‘nduku ya Nzambi’?

[Kifwanisu ya kele na lutiti 228]

Sambu na nki Yezu vandaka kubikala mbala mingi ti dibuta yai na ntangu yandi vandaka kukwenda na Yeruzalemi? Keti nge mezaba bazina na bo?

[Kifwanisu ya kele na lutiti 229]

Sambu na nki Zasheo memata na zulu ya nti yai?

[Kifwanisu ya kele na lutiti 230]

Sambu na nki Yezu kwendaka na nzo ya Zasheo, mpi Zasheo ke na kusila nde yandi tasala inki?